1-2. Kuziba makani aali atala abubuke bwakujulu kutugwasya biyeni?

BAKOMBI baJehova biingi bali aabulangilizi bwakuzoopona aanyika. Pesi maKristu bakananikwa balangilila kuzoopona kujulu. MaKristu bananikidwe bali aachiyandisyo chakuziba kuti buumi bwabo bunooli biyeni kujulu. Mbukunga biingi besu tulangilila kuzoopona aanyika, kuziba makani aaya kutugwasya biyeni? Kulatugwasya nkaambo maKristu bananikidwe bayootugwasya kuti tujane zilongezyo aanyika. Tweelede kwaaziba makani aaya kazitakwe ndaba kuti tuyoopona kujulu na naakuti aanyika.

² Leza wakazulwida bamwi basikwiiya baJesu kuti balembe makani aali atala abubuke bwakujulu. Mwaapostolo Johane wakati: “Lino tuli bana ba Leza, pele takunayubununwa pe mbotuyooba kumbele. Tulizyi kuti aakuyubununwa tuyooba mbuli nguwe.” (1 Joh. 3:2) MaKristu bananikidwe tabazi pe kuti buumi bwabo bunooli biyeni bazooya kujulu pesi bazoomubona Jehova. Bbayibbele talitubuzyi pe zyoonse atala abubuke bwakuya kujulu pesi Pawulu kuli nzyakaamba. Muchikozyano, Pawulu wakaamba kuti bananike banooli aamwi aJesu chiindi natazoonyonyoone “mfwulumende zyoonse abweendelezi boonse alimwi anguzu zyoonse,” kuswaanizya ‘asinkondo wamamanino,’ lufu. Jesu abananike bayoolibombya kuli Leza akusiya zintu zyoonse mumaanza aakwe. (1 Kor. 15:24-28) Eechi chinooli chiindi chibotezya loko. *

3. Kweendelana alugwalo lwa 1 Bakorinto 15:30-32, kusyoma bubuke kwakamugwasya biyeni Pawulu?

 ³ Kusyoma kuti kuli bubuke kwakagwasya Pawulu kuti alisimye kubuyumu-yumu busiyene-siyene. (Bala 1 Bakorinto 15:30-32.) Pawulu wakalembela maKristu bakuKkorinto kuti: Buzuba “abuzuba ndijanika muntenda yalufwu.” Alubo wakabalembela kuti: “Ndakalwana abanyama babutambo ku Efeso.” Kulakonzeka kuti aawa Pawulu wakali kwaamba kulwana abanyama bachoonzyo kuEfeso. (2 Kor. 1:8; 4:10; 11:23) Alubo kulakonzeka kuti wakali kwaamba maJuda abamwi bantu bakali kumukazya bakali mbuli ‘banyama babutambo.’ (Mil. 19:26-34; 1 Kor. 16:9) Kufumbwa nzyaakali kwaamba, Pawulu wakaswaanana abuyumu-yumu bwiingi. Pesi wakali aachoonzyo chakuti wakali kuyoopona buumi bulikabotu kunembo.—2 Kor. 4:16-18.

4. Bulangilizi bwabubuke bubagwasya biyeni maKristu mazubaano? (Langa chifanikisyo chili achivumbyo.)

⁴ Tulikupona muziindi ziyumu loko. Bamwi bakwesu abachizi buumi bwabo buli mungoozi akaambo kazigwebenga. Bamwi balayoowa akaambo kakuti bakkala mundawu zili aankondo. Alubo bamwi tabaleki pe kukambawuka nikuba kuti kuchita oobo kulakonzya kupa kuti basungwe naakuti bajeegwe akaambo kakuti bakkala munyika mulimu wesu mukasidwe. Bakwesu abachizi bali muzyiimo zili boobo tabaleki pe kubelekela Jehova alubo nzikozyano zibotu kulindiswe. Balizi kuti nikuba kuti bajeegwa lino, Jehova uzoobabusya kuti bazoopone buumi bulikabotu kunembo.

5. Ngaali maboneno aakonzya kupa kuti lusyomo lwesu atala abubuke lucheye?

⁵ Pawulu wakachenjezya bakombinyina kuti batatobeli maboneno atali kabotu aakuti: “Ikuti bafwu tabakabusyigwi, nkokuti ‘atulye akunywa, nkaambo kayi juunza tuyoofwa.’” Bantu bakali aamaboneno aali boobo kuzwa chiindi. Kulakonzeka kuti majwi aaya Pawulu wakaajana muli Isaya 22:13, ipandulula maboneno ngibakali aawo maIsrayeli. Bakasala kulikondelezya kutali kuswiilila Jehova. MaIsrayeli aaya akali kulibuzya kuti, “botelwa sunu nkaambo juunza ulafwa.” Aaya ngimaboneno bantu biingi ngibalaawo munyika. Bbayibbele lilatubuzya zintu zibi zyakazoochitikila maIsrayeli akaambo kakuba aamaboneno aali boobo.—2 Mak. 36:15-20.

6. Kusyoma bubuke kweelede kupa kuti tuliswaanizye abantu bali biyeni?

⁶ Kuti tukkale katusyoma kuti Jehova uzoobusya bantu bakafwa, tweelede kusala kabotu bantu mbituliswaanizya aabo. MaKristu aakuKkorinto teebakeelede kuliswaanizya abantu batasyomi pe kuti bantu bazoobusigwa. Twiiyaanzi? Zintu tazikootweendela kabotu kuti twakkala katuliswaanizya abantu batakwe ndaba alyajuunza lyabo. Bantu bali boobo, balakonzya kupa kuti tuchinche maboneno eesu amichito yesu akupa kuti tuchite chibi. Eezi zyakapa kuti Pawulu asungwaazye maKristu kuti: “Amusinsimuke munzila yabululami alimwi mutabi nimucita cibi pe.”—1 Kor. 15:33, 34.

7. Kweendelana alugwalo lwa 1 Bakorinto 15:35-38, nguuli mubuzyo bamwi bantu ngubakali kukonzya kubaawo atala abubuke?

⁷ Bala 1 Bakorinto 15:35-38. Muntu wakali kuyanda kuti maKristu batasyomi pe kuti kuli bubuke, wakali kukonzya kubuzya kuti: “Ino bafwu bayoobusyigwa buti?” Bantu biingi bali aamaboneno aasiyene-siyene atala azichitika kuti muntu wafwa. Pesi Bbayibbele lityeni? Atulange-lange zyakaambwa aPawulu atala ankani eeyi.

8. Amba chikozyano chikonzya kutugwasya kuti tumvwisisisye bubuke bwakujulu.

 ⁸ Kuti muntu wafwa, mubili wakwe ulabola. Pesi Leza wakalenga zintu zyoonse ulakonzya kumubusya kali aamubili weendelana ankwayooponena. (Matl. 1:1; 2:7) Pawulu wakaamba chikozyano chitondeezya kuti Leza takoozoobusya bantu kabali aamibili njibali aayo pe lino. Wakazikozyanisya ‘aanseke’ naakuti mbuto. Kuti mbuto yabyalwa, ngayamena mpawo yaba musamu. Musamu uunga wamena ulisiyene ambuto iinga yabyalwa. Chikozyano chaPawulu chitugwasya kubona kuti mulengi wesu ulakonzya kutupa “mubili mbuli mbwayanda.”

9. Kweendelana alugwalo lwa 1 Bakorinto 15:39-41, njiili mibili iisiyene-siyene iiliwo?

⁹ Bala 1 Bakorinto 15:39-41. Pawulu wakaamba kuti zintu zyakalengwa munzila zisiyene-siyene. Muchikozyano, wakaamba kuti kuli mibili yang’ombe, yatuyuni ayabaswi. Wakaamba kuti mweezi azuba zilisiyene. Alubo wakaamba kuti “nyenyeezi imwi aimwi iliindene kunyenyeezinyina kubulemu.” Eechi nchoonzyo nikuba kuti tatukonzyi pe kuzibona ameso eesu. Bazyasayensi bakaamba kuti kuli misyobo iisiyene-siyene yanyenyeezi. Bakaamba kuti zimwi nzipati, zimwi nziniini, zimwi zilasalala, zimwi zilatuba alubo zimwi nzyayellow. Alubo Pawulu wakaamba kuti “kuli mibili yakujulu amibili yaanyika.” Zyaambaanzi eezi? Wakali kwaamba kuti anyika kuli mibili yanyama alubo kujulu kuli mibili yamuuya iili mbuli yabangelo.

10. Bantu batazoobusigwe kuti bakapone kujulu banooli amibili iili biyeni?

¹⁰ Pawulu wakayungizya kuti: “Mbobubede oobo abubuke bwabafwu. Mubili wazikkwa ulabola; pele wabusyigwa tauciboli limbi pe.” Muntu kuti wafwa, mubili ulabola akuba bulongo. (Matl. 3:19) Nkamboonzi nikutegwa mubili “wabusyigwa tauciboli limbi pe”? Pawulu taakali kwaambuula atala abantu banga babusigwa kuti bapone aanyika mbuli bakabusigwa aEliya, Elisha aJesu. Pesi  wakali kwaamba bantu banga babusigwa kabali ‘amubili wamuuya.’—1 Kor. 15:42-44.

11-12. Nkuukuli kuchincha kwakachitika chiindi Jesu naakabusigwa alubo zikozyenie biyeni aziyoochitika kumaKristu bananikidwe?

¹¹ Chiindi Jesu naakali aanyika, wakali aamubili wanyama. Pesi naakabusigwa “wakaba muuya uupa buumi” mpawo wakabweeda kujulu. Munzila iikozyenie, bananike bazoobusigwa kabali aamubili wamuuya. Pawulu wakati: “Mbwaanga tuli mucinkozya cayooyo wakabumbwa abulongo, mbubonya buyo tuyooba mucinkozya cayooyo wakazwa kujulu.”—1 Kor. 15:45-49.

¹² Kulayandikana kuziba kuti Jesu taakabusigwa kali amubili wanyama pe. Nkamboonzi nikuyandikana? Pawulu wakatupa nsandulo chiindi naakati: “Mubili wanyama abulowa taukonzyi kunjila mu Bwami bwa Leza” kujulu. (1 Kor. 15:50) Baapostolo abamwi bananikidwe teebakali kunoobusigwa kuti bayinke kujulu kabali aamubili wanyama abulowa uubola. Bakali kuyoobusigwa lili? Pawulu wakaamba kuti teebakali kuyoobusigwa chiindi nibakali kuyoofwa pe. Pesi bakali kuyoobusigwa kunembo. Chiindi Pawulu naakalemba lugwalo lwa 1 Bakorinto, bamwi basikwiiya bakali ‘boona mulufwu’ mbuli mwaapostolo Jakobo. (Mil. 12:1, 2) Bamwi baapostolo amaKristu bananikidwe bakali ‘kuyoowona mulufu.’—1 Kor. 15:6.

13. Niinzi zyakali kuyootondeezya kubako kwaKristu?

¹³ Jesu aPawulu bakaambilizya chiindi chiyandikana loko chakali kuyoosika. Chiindi eecho nkubako kwaKristu. Chiindi eecho chakali kuyooboneka akaambo kankondo, mizuzumo yanyika, malwazi akuvula kwazintu zibi munyika. Zintu eezi zyakaambwa muBbayibbele zyakasaanguna kuchitika kuzwa mu1914. Kuli chimwi chintu chiyandikana chakali kuyootondeezya kubako kwaKristu. Jesu wakaamba kuti makani mabotu  ali atala akuti Bwaami bwaLeza bwakasaanguna kweendelezya akali kuyookambaukwa “munyika yoonse kuti bukabe bumboni kumasi oonse, mpoonya mamanino ayoosika.” (Mt. 24:3, 7-14) Pawulu wakaamba kuti maKristu bananikidwe bakali ‘boona mulufu’ bakali kuyoobusigwa “kuciindi cakubako kwa Mwami.”—1 Tes. 4:14-16; 1 Kor. 15:23.

14. Niinzi chinga chachitika kumaKristu bananikidwe bali kufwa muchiindi chakubako kwaKristu?

¹⁴ MaKristu bananikidwe balikufwa mazubaano nga babusigwa mpawaawo kuti bakapone kujulu. Majwi akalembwa aPawulu muli 1 Bakorinto 15:51, 52 alazizumina eezi. Wakati: “Tatukooni toonse mulufwu pe, pele toonse tuyoosandulwa, mukaindi kaniini buyo, mukulaba kwaliso, muciindi cakulila kwamweembo wamamanino.” Majwi aaya alikuzuzikizigwa lino. MaKristu banga babusigwa kuti baye kujulu bayoobotelwa loko alubo bayookkala “a Mwami lyoonse.”—1 Tes. 4:17.

15. Nguuli mulimu ngubatazoochite aabo balikuchincha “mukulaba kwaliso”?

¹⁵ Bbayibbele lilatubuzya mulimu ngubatazoochite kujulu maKristu balikuchincha “mukulaba kwaliso.” Jesu wakati: “Ooyo uuzunda akucita milimo yangu mane kusikila kumamanino, ndiyoomupa nguzu zyakweendelezya masi, alimwi bantu uyoobeembela ankoli yabutale cakuti bayoopwayaulwa mbuli mbozipwayaulwa zibelesyo zyabulongo, mbubonya andime mbondatambula kuzwa kuli Taata.” (Ciy. 2:26, 27) Bayoochita mulimu uchitwa amupati wabo, wakweembela zisi ankoli yabutale.—Ciy. 19:11-15.

16. Lufu luyoozundwa biyeni?

¹⁶ Zilaantanganana kuti maKristu bananikidwe bayooluzunda lufu. (1 Kor. 15:54-57)  Kubusigwa kwabo kuyoopa kuti bakonzye kutola lubazu mukumaninsya bubi boonse buli munyika munkondo yaArmagedoni. Mamiliyoni aabantu bayoozwa “mumapenzi mapati” akunjila munyika mpya. (Ciy. 7:14) Bantu aaba batazoofutuke bazoolibonena lufu kaluli kuzundwa chiindi bantu bakafwa nibazoobusigwa. Yeeyela mbutuyoobotelwa chiindi niziyoochitika eezi. (Mil. 24:15) Bantu bayoosyomeka chakumaninina kuli Jehova bayoozunda lufu ndubakajana kuli Adamu. Bazoopona kukabe kutamani.

17. Lugwalo lwa 1 Bakorinto 15:58 lutusungwaazya kuti tuchiteenzi?

¹⁷ MaKristu boonse mazubaano balakonzya kuumbulizigwa amajwi ali atala abubuke Pawulu ngaakalembela maKristu bakuKkorinto. Alubo alatusungwaazya kuti tubeleke changuzu “mumulimo wa Mwami.” (Bala 1 Bakorinto 15:58.) Kuti twabeleka changuzu mumulimu ooyu, tulaba aabulangilizi bwakupona buumi bubotezya kunembo. Buumi oobu bunooli bubotu kwiinda mbutukonzya kuyeeyela. Buyootondeezya kuti teetwakabelekela mahhala pe.