1. Niinzi chikonzya kuchitika kuti twakataazikana?

BUZUBA abuzuba tuswaanana abuyumu-yumu. Alubo tuleezya amanguzu eesu woonse kuti tulisimye. Pesi nkuyumu kulisimya kuti katukataazikene. Kukataazikana kulakonzya kupa kuti lusyomo lwesu lucheye, tuyoowe akuti tutabotelwi. Tusimpi 24:10 yaamba kuti: “Ikuti watyompwa mubuzuba bwamapenzi, nkokuti nguzu zyako zilaceya.” Nisimpe, kukataazikana kulakonzya kutumana manguzu akupa kuti kutuyumine kulwana mapenzi.

2. Niinzi chikonzya kupa kuti tukataazikane alubo tulalanga-langaanzi muchiiyo eechi?

² Kuli zintu zyiingi zipa kuti tukataazikane. Zintu eezi ziswaanizya kubisya, zintu nzitutakonzyi kuchita akuchiswa. Alubo tulakonzya kukataazikana akaambo kakutapegwa mulimu ngutuyanda mumbunga naakuti kukambawukila mundawu ilaabantu bataswiilili. Muchiiyo eechi tulalanga-langa zintu zikonzya kutugwasya kuti tulwane apenzi lyakukataazikana.

3. Niinzi chikonzya kutugwasya kuti tube amaboneno alikabotu atala akutamaninina kwesu?

³ Tulakonzya kukataazikana akaambo kakubisya nkutuchita. Eezi zilakonzya kupa kuti tubonaanga Jehova takoozootuzumizya pe kuti tunjile munyika mpya. Maboneno ali boobu tali kabotu pe. Tweelede kukubona biyeni kubisya nkutuchita? Bbayibbele lyaamba kuti bantu “boonse balibisyide” kunze kwaJesu Kristu. (Rom. 3:23) Pesi Jehova tabikkili maanu kukubisya nkutuchita naakuti kulangilila kuti tube bantu bamaninide. NguNdeende ulaaluyando amoyo mulamfu alubo ulaachiyandisyo chakutugwasya. Ulizi kuti tubeleka changuzu kuti  tuchite zintu zilikabotu akuti tutanookkali katulipa mulandu akaambo kakubisya nkutuchita.—Rom. 7:18, 19.

4-5. Kweendelana alugwalo lwa 1 Johane 3:19, 20, niinzi chakapa kuti bachizi babili bazunde penzi lyakukataazikana?

⁴ Atubone chikozyano chaDeborah achaMaria. * Deborah kachili muniini, bakulimbabo bakali kuchita zintu zyakali kupa kuti alibone katagwasyi. Takwe nibakali kumulumba pe. Eezi zyakapa kuti alilangile aansi. Nikuba kuti wabisya kantu kaniini, wakali kubonaanga takwe nchakonzya kuchita. Maria anguwe wakali apenzi likozyenie alyaDeborah. Babbululu bakwe bakali kumufubaazya. Eezi zyakapa kuti alibone katagwasyi. Nikuba chiindi naakaba Kamboni wakali kulibona kateeleli kwiitwa azina lyaLeza.

⁵ Nikuba boobo bachizi aba babili teebakaleka pe kubelekela Jehova. Niinzi chakabagwasya? Bakawaala mikuli yabo iiminia kuli Jehova kwiinda munkombyo. (Int. 55:22) Bakabona kuti Taateesu uuli kujulu Jehova ulizi kuti zintu zibi zyakatuchitikila chiindi zilakonzya kupa kuti tulibone munzila iitali kabotu. Alubo ulabubona buntu bubotu mbutuli aabo swe mbututazi pe kuti tuli aabo.—Bala 1 Johane 3:19, 20.

6. Niinzi nzyakonzya kuyeeya muntu kuti wayindulula chibi?

⁶ Muntu ulikubeleka changuzu kuti aleke kuchita chimwi chintu chitali kabotu ulakonzya kukataazikana kuti wachiindulula lubo. Toonse tulakonzya kulisola kuti twabisya. (2 Kor. 7:10) Pesi tatweelede kukataazikana zyiindilide akulibuzya kuti ‘tandichikonzyi pe kuchincha alubo Jehova takoondilekelela pe?’ Muzeezo uli boobu tawuli kabotu pe alubo ulakonzya kupa kuti tuleke kubelekela Jehova. Utalubi kuti lugwalo lwa Tusimpi 24:10 lwati tulakonzya kumana manguzu kuti katukataazikene. Nkinkaako bamba twaambo aJehova kwiinda mukukomba umukumbile kuti akulekelele. (Is. 1:18) Kuti wabona kuti wachincha, ulakulekelela. Kuyungizya waawo, kumbila baalu kuti bakugwasye. Nkaambo bayookugwasya kuti usime lubo mubukombi.—Jak. 5:14, 15.

7. Nkamboonzi nituteelede kukataazikana kuti kakutuyumina kuchita zintu zili kabotu?

⁷ Kali kwaambuula atala abantu bali kweezya kusiya chimwi chintu chitali kabotu, Jean-Luc mwaalu wakuFrance wakati: “Muntu uululeme mumeso aJehova nguulya uulisola akuchincha kuti wabisya kutali utabisyi pe.” (Rom. 7:21-25) Tweelede kulibona kutagwasyi pe kuti kakuli zimwi zintu nzutachiti kabotu. Utalubi kuti takwe muntu utabisyi  pe. Nkinkaako toonse tuyanda kuti Jehova atulekelele kabelesya chinunuzyo chakwe.—Ef. 1:7; 1 Joh. 4:10.

8. Mbaani mbitweelede kukumbila kuti batugwasye chiindi nitukataazikene?

⁸ Tulakonzya kukumbila bakwesu abachizi kuti batusungwaazye. Balakonzya kutuswiilizya chiindi nituli kubabuzya zili mumoyo akutubuzya majwi asungwaazya. (Tus. 12:25; 1 Tes. 5:14) Muchizi uutegwa Joy ukkala kuNigeria wakali apenzi lyakukataazikana wakati: “Tandizi pe kuti nikuli ndili kuli kaansinga teendakagwasigwa abakwesu abachizi? Kundigwasya nkubakachita kwakatondeezya kuti Jehova wakali kuzisandula nkombyo zyangu. Alubo ndakayiya kuchikozyano chabo mbundikonzya kusungwaazya bamwi bakataazikene.” Chimwi chiindi bakombima balakonzya kutazibona kuti tuli kataazikene. Nkinkaako kuti katukataazikene tweelede kubuzya mukombima uusimide mubukombi kuchitila kuti atugwasye.

9. Lugwalo lwa Intembauzyo 41:3 a 94:19 lutuumbulizya biyeni?

⁹ Kumbila Jehova kuti akugwasye. Tulakonzya kukataazikana kuti twachiswa kapati kuti twachiswa bulwazi butasilikiki. Nikuba kuti Jehova tatusiliki bulwazi oobu munzila iigambya pesi ulakonzya kutuumbulizya akutupa manguzu akuti tulisimye. (Bala Intembauzyo 41:3; 94:19.) Ulakonzya kutugwasya kwiinda mukupa kuti umwi mukombima azootuchitile imwi milimu yaang’anda naakuti akatuulile zimwi zintu. Alubo ulakonzya kupa kuti umwi mukombima akombe aamwi andiswe. Chimwi chiindi ulakonzya kupa kuti tuyeeye majwi aawumbulizya ali muJwi lyakwe, mbuli bulangilizi bwakupona kukabe kutamani munyika mpya kakutachikwe malwazi akuchisa.—Rom. 15:4.

10. Niinzi chakagwasya Isang kuti azunde penzi lyakukataazikana?

¹⁰ Isang uukkala kuNigeria wakachitikilwa ngoozi mpawo wakaba mulema. Dokotela wakamubuzya kuti tazoofwi weenda lubo pe. Isang wakati: “Zyakandichisa alubo ndakakataazikana mumizeezo.” Pesi wakakkala kakataazikene na? Peepe. Niinzi chakamugwasya? Wakati: “Twakali kukkala katukomba kuli Jehova akubala Bbayibbele amwanakazi wangu.” Alubo wakayungizya kuti: “Twakali kukkala katuyeeyesesya atala azilongezyo Jehova nzyatupede ziswaanizya bulangizi bwakupona munyika mpya.”

11. Niinzi chakagwasya Cindy kuti abotelwe chiindi naakali kuchiswa?

¹¹ Umwi muchizi utegwa Cindy uukkala kuMexico wakajatwa bulwazi butasilikiki. Niinzi chakamugwasya kuti alisimye? Wakali kukambawuka buzuba abuzuba chiindi naakali kuyoobona dokotela. Wakalemba kuti: “Eezi zyakandigwasya kuti ndibikkile bamwi maanu kutali kubikkila maanu kubulwazi bwangu amachise ngindakali kumvwa. Kuti ndikonzye kukambawuka ndakali kubuzya madokotela naakuti manesi kuti bamumpuli zyabo bali biyeni. Mpawo ndakali kubabuzya kuti niinzi chakapa kuti basale kubeleka mulimu ooyu muyumu. Eezi zyakali kundigwasya kuti ndikonzye kusala makani akonzya kubasika amoyo. Biingi babo bakati nkache kuti muntu uuchiswa akubuzye kuti ‘ulikabotu na?’ Alubo biingi bakali kundilumba akaambo kakuba andaba ambabo. Bamwi bakandipa manamba afooni zyabo ama-adilesi aabo. Ndakalizi kuti Jehova ulakonzya kundigwasya kuti ndilisimye. Pesi wakandigwasya munzila njindakatali kuyeeyela pe.”—Tus. 15:15.

12-13. Nziili nzila nzibakabelesya bamwi bantu bachembeede abachiswa kuti bakambawuke alubo zyakeeta mpinduunzi?

¹² Bantu bachiswa naakuti bachembaala balakonzya  kukataazikana akaambo kakuti tabakonzyi pe kuchita zyiingi mumulimu wakukambawuka. Pesi biingi babo bakajana nzila zyiingi zibagwasya kuti bakambawuke. Umwi muchizi utegwa Laurel ukkala kuUnited States wakakkala kwaminyaka iili 37 katakonzyi pe kweenda akaambo kakuti wakali kubelesya munchina wakali kumugwasya kuyoya. Wakali abulwazi bwakkensa. Waka-opaletwa kwaziindi zyiingi. Alubo wakali aamwi malwazi. Pesi mapenzi aaya takwe naakapa kuti aleke kukambawuka. Wakali kukambawukila manesi abamwi bakali kusika kung’anda kuzoomubona. Kwakaba mpinduunzi? Wakagwasya bantu bali 17 kuti bayiye kasimpe. *

¹³ Mwaalu uukkala kuFrance utegwa Richard wakaamba zikonzya kugwasya bantu batakonzyi pe kuzwa ang’anda akaambo kakuchiswa naakuti bakkala mundawu zibambilidwe bantu bachembeede. Wakati: “Ndibasungwaazya kuti babikke mabbuku amamagazini mundawu zilaantanganana. Kuti bantu baabona ziyoopa kuti babe amibuzyo ikonzya kupa kuti bakonzye kubakambawukila. Kukambawuka munzila eeyi kulakonzya kupa kuti basime bakwesu abachizi aaba batachikonzyi pe kuyookambawuka kung’anda aang’anda.” Alubo bakwesu abachizi aaba balakonzya kukambawuka kababelesya magwalo amafooni.

14. Twiyaanzi kuchikozyano chaMwaami Davida?

¹⁴ Chimwi chiindi tulakonzya kukachilwa kujana chilongezyo nchitwali kulangilila mumbungano akaambo kakuchembaala, kuchiswa naakuti zimwi. Kuti katuli muchiimo chili boobu, tulakonzya kugwasigwa achikozyano chaMwaami Davida. Davida wakali kuyanda kuyakila Jehova tempele pesi wakabuzigwa kuti teenguwe pe utaliyake. Nikuba boobo, wakagwasya muntu wakasalwa aJehova kuti achite mulimu ooyu. Alubo wakapa zintu zyiingi zyakali kuyoogwasya kuyaka tempele. Davida nchikozyano chibotu loko nchitukonzya kutobelezya.—2 Sam. 7:12, 13; 1 Mak. 29:1, 3-5.

15. Niinzi chakagwasya Hugues kuti azunde penzi lyakukataazikana?

¹⁵ Umwi mukwesu utegwa Hugues uukkala kuFrance wakayimikila kuba mwaalu akaambo kakuchiswa alubo taakachili kukonzya kuchita milimu nikuba aang’anda. Wakalemba kuti: “Kumasaangunino ndakalibona kanditagwasyi alubo ndakakataazikana. Pesi mukuya kwachiindi ndakazoobona kuti tandeelede kukataazikana akaambo kazintu nzinditachikonzyi pe kuchita pesi ndeelede kubotelwa akuchita nzindikonzya mumulimu waJehova. Ndililipedelede kuzumanana kubelekela Jehova. Mbuli Gidiyoni abaalumi  bali 300 bakazumanana kulwana nikuba kuti bakali bakatala, andime ndiyoozumanana kulisimya.”—Bab. 8:4.

16. Twiyaanzi kuchikozyano chabangelo?

¹⁶ Bangelo basyomeka nchikozyano chibotu. Chiindi nikwakali kweendelezya Mwaami Ahabbu, Jehova wakali kuyanduula nzila zyakweena mwaami ooyu mubi. Wakabuzya bangelo kuti kujana bazichita biyeni. Bangelo basiyene-siyene bakaamba maboneno aabo. Pesi Jehova wakasala muzeezo wamungelo uumwi mpawo wakamwaambila kuti uyoozwidilila. (1 Bam. 22:19-22) Bamwi bangelo bakakataazikana na akulibuzya kuti kaansinga tandaambide pe? Peepe, teebakachita oobo. Bangelo balalibombya alubo balamulemeka Jehova.—Bab. 13:16-18; Ciy. 19:10.

17. Niinzi nchitweelede kuyeeya kuti teetwajana chilongezyo nchitwali kuyeeyela?

¹⁷ Kkala kuyeeya atala achilongezyo nchulaacho chakwiitwa aazina lyaLeza akwaambilizya Bwaami bwakwe. Zilongezyo teenzizyo pe zipa kuti tuyandikane mumeso aJehova nkaambo tulakonzya kubaacho sunu, juunza chimane. Kulibombya nkuko kupa kuti Jehova abakwesu abachizi batuyande. Nkinkaako kombelezya Jehova kuti akugwasye kuti ukkale kulibombya. Bala alubo uyeeyesesye atala azikozyano zili muBbayibbele zyabantu bakali kulibombya. Alubo lipede kugwasya bakombinyokwe kwiinda mukuchita kufumbwa mulimu.—Int. 138:6; 1 Pet. 5:5.

18-19. Niinzi chikonzya kukugwasya kuti ubotelwe mumulimu wakukambawuka nikuba bantu bamuchilawu chanu kabatakwe chiyandisyo?

¹⁸ Nga wakataazikana na akaambo kakuti bantu bamuchilawu chanu tabakwe chiyandisyo naakuti tabajaniki-janiki aang’anda? Kuti kuli muchiimo chili boobu niinzi chikonzya kukugwasya? Kabbokesi kalembedwe kuti “ Zintu Zikonzya Kukugwasya Kuti Ubotelwe Mumulimu Wakukambawuka” kali azimwi zintu zikonzya kukugwasya. Chimwi chiyandikana nkuba amaboneno alikabotu atala amulimu wakukambawuka. Zyaambaanzi eezi?

¹⁹ Kkala kuyeeya kuti chintu chiyandikana nkwaambilizya atala azina lyaLeza aBwaami bwakwe. Jesu wakaamba aantanganana kuti mbantu bache bakali kuyoozumina kweendela munzila iitola kubuumi. (Mt. 7:13, 14) Chiindi nituli mumulimu wakukambawuka tuli aachilongezyo chakubelekaamwi aJehova, Jesu abangelo. (Mt. 28:19, 20; 1 Kor. 3:9; Ciy. 14:6,  7) Jehova ulabakwelela kuli nguwe bantu  bayanda kumubelekela. (Joh. 6:44) Nkinkaako muntu uutakwe chiyandisyo sunu ulakonzya kuzooba achiyandisyo muchiindi chitobela.

20. Kweendelana alugwalo lwa Jeremiya 20:8, 9, niinzi chikonzya kutugwasya kuti tulwane penzi lyakukataazikana?

²⁰ Tulakonzya kujana chiiyo chibotu loko kuzwa kuchikozyano chamupolofita Jeremiya. Bantu mbaakali kukambawukila teebakali kumuswiilila pe. Alubo bakali kumutukila akumukalalila “buzuba boonse.” (Bala Jeremiya 20:8, 9.) Jeremiya wakakataazikana loko zyakuti wakayeeya kuleka kukambawuka. Pesi taakaleka pe. Niinzi chakamugwasya? “Jwi lyaJehova” lyakaba mbuli mulilo uvwilima mulinguwe zyakuti wakakachilwa kuumuna. Andiswe tulakonzya kuba mbuli nguwe kuti twakkala katubala Jwi lyaLeza akuyeeyesesya atala anzitubala buzuba abuzuba. Eezi zilapa kuti tubotelwe mumulimu wakukambawuka akuti tuzwidilile.—Jer. 15:16.

21. Kujana walizunda biyeni penzi lyakukataazikana?

²¹ Deborah waambwa musule wakati: “Kukataazikana nchilwanisyo chipati Saatani nchabelesya.” Pesi Jehova ulaamanguzu kwiinda Saatani azilwanisyo zyakwe zyoonse. Nkinkaako kuti kwaba chintu chipa kuti ukataazikane, kombelezya Jehova kuti akugwasye. Uyookugwasya kuti uzwidilile kulwana penzi lyakukachilwa kuchita zimwi zintu. Uyookugwasya kuti ulisimye chiindi nulikuchiswa. Uyookugwasya kuti ube amaboneno ali kabotu atala amulimu nguchita mumbungano. Alubo uyookugwasya kuti ukkale kubotelwa mumulimu wakukambawuka. Utaleki pe kumubuzya zili mumoyo wako. Nkaambo uyookugwasya kuti uzunde penzi lyakukataazikana.