Jesu naakali kujulu wakayiya buntu bubotu bwakazoomugwasya kuti azoobeleke kabotu abamwi chiindi naakaza aanyika. Niinzi nzitweelede kuchita kuti tukonzye kugwasigwa achikozyano chaJesu? Kulanga-langa zintu nzyaakali kuchita, kulatugwasya kuti tujane njiisyo zitatu ziyootugwasya kuti tukonzye kubeleka kabotu abamwi. Alubo njiisyo eezyo ziyootugwasya kuti tujatane abakombima.

Muntu uubeleka kabotu abamwi ulalibombya. Ubona bantu mbabelekaabo kuti balayandikana alubo tachiti zintu kayanda kubonenenwa. Jesu wakayiya kulibombya kuzwa kuli Wisi. Nikuba kuti Jehova nguwe alikke weelela kwiitwa kuti Mulengi pesi zintu nzyaakaamba zitondeezya kuti wakali kuyanda kuti tuzibe atala amulimu mupati wakachitwa aaJesu. Wakati: “Atulenge muntu mucinkozya cesu.” (Matl. 1:26) Majwi aaya akapa kuti Jesu abone kuti Jehova ulalibombya.​—Int. 18:35.

Jesu wakali kulibombya chiindi naakali aanyika. Bantu nibakali kumulumbayizya akaambo kazintu nzyaakachita wakali kulumbayizya Leza. (Mk. 10:17, 18; Joh. 7:15, 16) Jesu wakabeleka changuzu kuti akkale kajisini abasikwiiya bakwe alubo wakali kubabona mbuuli beenzinyina kutali bazike. (Joh. 15:15) Aali chimwi chiindi wakabasanzya mawulu kuti abayisye kulibombya. (Joh. 13:5, 12-14) Andiswe tweelede kubabona kabayandikana  bantu mbitubelekaabo kwiinda mukubikka zintu nzibayanda mubusena bwakusaanguna kwiinda nzituyanda. Kuti twalemeka bamwi mpawo twagwisya muzeezo wakuyanda kulumbayizigwa chiindi choonse, tuyoozwidilila mumulimu wesu.​—Rom. 12:10.

Muntu uulibombya ulizi kuti “ikuti kakuli basikulaya banji kulaba kuzwidilila.” (Tus. 15:22) Nikuba kuti kuli zintu zyiingi nzuzi naakuti nzukonzya kuchita, pesi tweelede kuyeeya kuti taakwe muntu uuzi zyoonse pe. Nikuba Jesu wakazumina kuti kuli zimwi zintu nzyaakatazi. (Mt. 24:36) Jesu wakali kuyanda kuziba maboneno aabasikwiiya bakwe. (Mt. 16:13-16) Eezi nzizyo zyakali kupa kuti bantu mbaakali kubelekaabo bamvwe kabaangunikide kubaamwi anguwe. Kuti twalibombya, twaziba kuti tatuzi zintu zyoonse pe akuzumizya bamwi kuti baambe nzibayeeya, tuyoojatana alubo ‘tuyoozwidilila.’

Kulayandikana kuti baalu batobelezye chikozyano chaJesu chakulibombya chiindi nibachita miswaangano yabo. Beelede kuziba kuti muuya uusalala ulakonzya kugwasya kufumbwa mwaalu kuti aambe zintu zitape kuti basale munzila iilikabotu. Kuti baalu babeleka changuzu kuti bape kuti umwi awumwi alimvwe kaangunukide kwaamba maboneno aakwe chiindi nibalikuchita miswaangano yabo, bayoosala munzila iitakagwasye mbungano yoonse.

Muntu uubeleka kabotu abamwi ulanyoneka, ulazumina kuchincha alubo ulazumina kuti bamwi bachite zintu munzila njibayanda kutali kuti bachite munzila njayanda chiindi choonse. Jesu wakali aamyeenya yakubona kuti Wisi ulanyoneka. Muchikozyano, Jehova wakamutuma kuti azoonunune bantu kuzwa kulufu akupa kuti babe aabulangilizi bwakuyoopona kukabe kutamani.​—Joh. 3:16.

Jesu wakali kuzumina kuchincha kuti kakweelela. Amuyeeye mbaakagwasya mwanakazi wakuFonikke nikuba kuti wakatumidwe kumaIsrayeli luzutu. (Mt. 15:22-28) Alubo Jesu wakali kutondeezya kuti ulanyoneka kwiinda munzila njaakali kubajataayo basikwiiya bakwe. Chiindi Petro naakamukaka kunembo lyabantu, Jesu wakamulekelela. Mukuya kwachiindi, wakazoomupa milimu iiyandikana loko. (Lk. 22:32; Joh. 21:17; Mil. 2:14; 8:14-17; 10:44, 45) Chikozyano chaJesu chitondeezya kuti tweelede kupa kuti ‘bantu boonse bazyibe kuti tulanyoneka’ kwiinda mukuzumina kuti bamwi bachite zintu munzila njibayanda kutali kuti bachite nzituyanda chiindi choonse.​—Flp. 4:5.

Kulinyona kuyoopa kuti tuyande kuchincha kuchitila kuti tube aaluumuno abantu bamisyobo yoonse. Jesu wakali kubajata kabotu bantu boonse zyakuti basinkondonyina bakazooba abbivwe akumutamikizya kuti wakali “mweenzinyina wabasimutelo abasizibi” bakatambula mulumbe wakwe. (Mt. 11:19) Zilachita na kuti tutobelezye chikozyano chaJesu kwiinda mukubeleka aabantu basiyene-siyene? Chikozyano chamukwesu uutegwa Louis wakabeleka aabantu basiyene-siyene mumulimu wakweendeenda akuBbeteli chilakonzya kutugwasya. Wakaamba kuti: “Ndakali kukozyanisya bantu mbindakali kubelekaabo ang’anda yayakwa aamabwe atayelene. Pesi kuti wabeleka changuzu kuti uwabikke kabotu mabwe aayo chiindi nulikuyaka, ziyoopa kuti kumamanino uzwe aamuduli uuyelene. Alubo nga ndeezya kuchincha buntu bwangu kuchitila kuti ndikonzye kubeleka kabotu abamwi.” Aaya maboneno aalikabotu ngitweelede kubaawo.

Ndiilili nikuyandikana kuti tutondeezye kuti tulanyoneka mumbungano? Tweelede kutondeezya kuti tulanyoneka chiindi nitubeleka aabasikupupulula basiyene-siyene bali mukabunga kesu kamulimu wakukambawuka. Tulakonzya kubeleka aabasikupupulula bali aaminyaka iisiyene-siyene alubo bali aazyiimo zisiyene-siyene. Nkinkaako, tulakonzya kutondeezya kuti tulanyoneka kwiinda mukuchincha nzila yakukambawuka kuchitila kuti ambabo babotelwe mumulimu wakukambawuka.

Muntu uubeleka kabotu aabamwi ‘ulilibambilide kwaabana zintu abamwi.’ (1 Tim. 6:18) Chiindi Jesu naakali kubelekaamwi aWisi wakabona kuti takwe naakali kumusisila zimwi zintu. Muchikozyano, chiindi Jehova “naakabamba julu,” Jesu ‘wakaliwo’ alubo wakali kwiiya kuzwa kuli nguwe. (Tus. 8:27) Mukuya kwachiindi, Jesu wakazoobuzya basikwiiya bakwe ‘zintu zyoonse nzyaakamvwa’ kuli Wisi. (Joh. 15:15) Andiswe tulakonzya kutobelezya chikozyano chaJehova kwiinda mukuyiisya bakwesu abachizi zintu nzituli aaluzibo anzizyo. Muntu uubeleka kabotu abamwi tabasisili pe mbubeelede kuchita zimwi zintu kayanda kuti chiindi choonse kababuzya kulinguwe. Alubo ulabotelwa kubuzya bamwi zintu zibotu nzyaakayiya.

Tulakonzya kusungwaazya bantu mbitubelekaabo. Tazitusungwaazyi na kuti umwi muntu watondeezya kuti ulazibona zintu zibotu nzituchita akuzilumba? Jesu wakabuzya bantu mbaakali kubelekaabo zintu zibotu nzyaakabona kulimbabo. (Kozyanisya a Matayo 25:19-23; Luka 10:17-20.) Alubo wakababuzya kuti bakali kuyoochita milimu “mipati” kwiinda njaakachita. (Joh. 14:12) Mubusiku mbwaakali kuyanda kujayigwa wakabuzya baapostolo bakwe kuti: “Nywebo ndinywe mwakakatila kulindime mumapenzi aangu.” (Lk. 22:28) Kweelede kuti majwi aaya akabasungwaazya loko alubo akapa kuti bazumanane kuchita mulimu. Andiswe kuti twalumbayizya bantu mbitubelekaabo ziyoopa kuti babotelwe akuti bachite zyiingi.

Mukwesu uutegwa Kayode wakaamba kuti: “Muntu uubeleka kabotu abamwi teemuntu uumaninide pe pesi nguulya uukonzya kupa kuti bamwi babotelwe akuti babeleke kabaangunukide.” Mbuchita na chiindi nubeleka aabamwi? Amwi ulakonzya kubuzya maKristu mbubelekaabo kuti bakubona biyeni munkani eeyi. Kuti kabali kubotelwa kubeleka aanduwe mbuli mbubakali kuchita basikwiiya baJesu, ulakonzya kwaamba mbuli mwaapostolo Pawulu wakaamba kuti: “Tuli basimilimonyoko kutegwa mukondwe.”​—2 Kor. 1:24.