1. Kuyeeyesesya atala achisyomezyo chaJehova chabuumi butamani kutugwasya biyeni?

 JEHOVA wakasyomezya aabo bamuswiilila kuti bazoojana ‘buumi butamani.’ (Rom. 6:23) Kuti twayeeyesesya atala achisyomezyo eechi, tulayungizya kumuyanda Jehova. Eezi zitondeezya kuti Taateesu wakujulu utuyanda loko zyakuti taakwe chintu chikonzya kutwaanzaania aanguwe.

2. Chisyomezyo chabuumi butamani chitugwasya biyeni?

² Chisyomezyo chaLeza chabuumi butamani chitugwasya kuti tulisimye kumasunko ngitulikuswaana. Nikuba kuti basinkondoma batuyoosezya kutujeya tatuyoowi pe. Nkamboonzi? Nkaambo tulizi kuti, kuti twafwa katusyomeka kuli Jehova, uyootubusya katuli aabulangilizi bwakuti tuzoopone kukabe kutamani. (Joh. 5:28, 29; 1 Kor. 15:55-58; Heb. 2:15) Nkamboonzi nitukonzya kuba aachoonzyo chakuti zilachita kuti tuzoopone kukabe kutamani? Atulange-lange twaambo tutobela.

3. Nkamboonzi nitulaachoonzyo chakuti Jehova uzoopa kuti tukapone kukabe kutamani? (Intembauzyo 102:12, 24, 27)

³ Tulizi kuti Jehova ulakonzya kupa kuti tupone kukabe kutamani, nkaambo ngunguwe Kasensa kabuumi alubo unooliwo lyoonse kukabe kutamani. (Int. 36:9) Amwi mavesi aamuBbayibbili atondeezya kuti Jehova wakaliwo kuzwa lili akuti unooliwo kukabe kutamani. Intembauzyo 90:2 yaamba kuti Jehova wakaliwo “kuzwa lili alili mane kukabe kutamani.” Intembauzyo 102 ilaamakani aakozyenie. (Bala Intembauzyo 102:12, 24, 27.) Alubo mupolofita Habbakkukku wakalemba kuti atala aTaateesu wakujulu: “Jehova, sena yebo tonooliko  kuzwa lili alili? O Leza wangu, Uusalala wangu, yebo tofwi pe.”—Hab. 1:12.

4. Tweelede kukataazikana na kuti kwatuyumina kusyoma kuti Jehova wakaliwo kuzwa lili? Pandulula.

⁴ Kulakuyumina na kusyoma kuti Jehova wakaliwo ‘lyoonse alyoonse’? (Is. 40:28) Kuti kakukuyumina, tuli aawulikke pe. Elihu naakali kwaamba atala aLeza, wakati: “Mweelwe wamyaka yakwe tuukonzyi kuzyibwa pe.” (Job. 36:26) Kutamvwisisisya chimwi chintu takwaambi kuti chintu eecho nchakubeja pe. Muchikozyano, tulakonzya kukachilwa kumvwisisisya mbuubeleka mumuni pesi eezi tazyaambi kuti tawuwo pe. Munzila iikozyenie, tulakonzya kutamvwisisisya kuti Jehova wakaliwo kuzwa lili akuti unooliwo kukabe kutamani. Pesi tazyaambi kuti Leza taakaliwo pe kuzwa lili akuti tanooliwo pe kukabe kutamani. Mulengi wesu ulizizi zintu nzituzi alubo ulizizi zintu nzitutamvwisisisyi pe. (Rom. 11:33-36) Wakaliwo kale zintu zili kujulu azili aanyika kazitabawo pe mbuli zuba anyenyeezi. Tuli aachoonzyo chakuti, Jehova “ngo Mulengi wanyika kwiinda munguzu zyakwe.” Jehova wakaliwo kale kuzwa ‘katanatandabula majulu.’ (Jer. 51:15; Mil. 17:24) Nkaakali kamwi kaambo kapa kuti tube aachoonzyo chakuti zilachita kuti tuzoopone kukabe kutamani?

5. Adamu a-Eva bakasiyene biyeni azimwi zilenge zipona zili aanyika?

⁵ Jehova wakalenga zintu zipona zili aanyika kuti zipone kwachiindi chifwiifwi, kutabikkilizya bantu. Wakalenga bantu munzila yakuti kabatafwi pe. Nikuba oobo, Jehova wakachenjezya Adamu kuti: “Pele cisamu cakuzyiba bubotu abubi, toyelede kulya kulincico pe, nkaambo mubuzuba mboyoolya kulincico, ncobeni uyoofwa.” (Matl. 2:17) Kaansinga Adamu a-Eva bakaswiilila Jehova teebakalinoofwa pe. Zilaamutwe kuti Jehova wakali kunoobazumizya kuti balye ‘kuchisamu chabuumi’ alubo eezi zyakali kunoowamba kuti bakali kunooba aabulangilizi bwakupona “kukabe kutamani.” b—Matl. 3:22.

6-7. (a) Niinzi chimwi chitondeezya kuti bantu teebakalengelwa kuti kabafwa pe? (b) Ulangilila kuzoochitaanzi nwazoopona kukabe kutamani? (Langa mapikicha.)

⁶ Kulabotezya kuziba kuti, bamwi basikuyanduulisisya bakajana bumwi bukamboni bwakuti, boongo bwesu bulakonzya kubamba makani miingi loko aayinda ngitujana muminyaka njitupona. Mu2010, imwi magazini iitegwa Scientific American Mind yakaamba  kuti boongo bwesu bulakonzya kubamba makani aasika ku2.5 miliyoni gigi naakuti kubamba makani aakonzya kupupululwa aaTV kwama-awa aali 3 miliyoni naakuti kwaminyaka yiinda ku300, TV kayitazimwi pe. Eezi zitondeezya kuti boongo bwesu bulakonzya kubamba makani miingi loko kwiinda minyaka eeyi yaambwa. Nikuba oobo, eezi zitondeezya kuti Jehova wakalenga boongo bwesu munzila yakuti kabubamba makani miingi loko aayinda ngitujana muminyaka njitupona iili 70 naakuti 80.—Int. 90:10.

⁷ Jehova wakatulenga katuli aachiyandisyo chakupona kukabe kutamani. Bbayibbili lyaamba kuti Leza wakabikka ‘buumi butamani mumyoyo yabantu.’ (Muk. 3:11) Aaka nkiikamwi kaambo kapa kuti lufu lube sinkondoma. (1 Kor. 15:26) Kuti twachiswa, tatulekeli bulwazi kuti bukomene kakutakwe nchituli kuchita pe, pesi nga twayanduula busilisi, kuyanduula madokotela amapilisi kuchitila kuti bulwazi oobo bumane. Tuchita zintu eezi kuti tutafwi pe. Alubo kuti umwi bbululu wesu wafwa nikuba kuti muniini naakuti mupati, zilatuchisa kwachiindi chilamfu. (Joh. 11:32, 33) Mulengi wesu uulaaluyando, wakatulenga munzila iili boobu kali aamakanze aakuti tupone kukabe kutamani. Pesi kuli tumwi twaambo tupa kuti tusyome kuti tulakonzya kupona kukabe kutamani. Atulange zimwi nzyaakachita Jehova chiindi anzyalikuchita mazubaano zitondeezya kuti tanaachincha pe makanze aakwe aakusaanguna.

8. Lugwalo lwa Isaya 55:11 lutupa choonzyo chanzi atala amakanze Leza ngalaawo andiswe?

⁸ Nikuba kuti Adamu a-Eva bakabisya akupa  kuti bana babo bafwe, Jehova taachinchide pe makanze aakwe. (Bala Isaya 55:11.) Makanze aakwe ngakuti bantu basyomeka bazoopone kukabe kutamani. Eezi tuzibona muzintu Jehova nzyaakaamba anzyaakachita kuti azuzikizye makanze aakwe.

9. Leza wakasyomezyaanzi? (Daniele 12:2, 13)

⁹ Jehova wakasyomezya kuti uzoobusya bantu bafwide akuzoopa kuti bazoopone kukabe kutamani. (Mil. 24:15; Tit. 1:1, 2) Mwaalumi uusyomeka Jobu wakalizi kuti Jehova ulaachiyandisyo chakubusya bantu bafwide. (Job. 14:14, 15) Mupolofita Daniyele wakalizi kuti bantu bafwide bakali kuzoobusigwa kuti bazoopone kukabe kutamani. (Int. 37:29; bala Daniele 12:2, 13.) MaJuda bakapona muchiindi chakapona Jesu ambabo bakalizi kuti Jehova wakali kuzoobapa “buumi butamani” bakombi bakwe bakali kusyomeka. (Lk. 10:25; 18:18) Kwaziindi zyiingi, Jesu wakali kwaambuula atala achisyomezyo eechi alubo anguwe wakabusigwa aWisi.—Mt. 19:29; 22:31, 32; Lk. 18:30; Joh. 11:25.

10. Zikozyano zyabantu bakabusigwa chiindi zitondeezyaanzi? (Langa chifanikisyo.)

¹⁰ Jehova nguwe Uutupa Buumi alubo ulaamanguzu aakubusya bantu bafwide. Wakapa mupolofita Elija manguzu aakubusya mwana wamukamufu wakuZerefati. (1 Bam. 17:21-23) Mpawo mupolofita Elisha kagwasigwa aaLeza, wakabusya mwana wamwanakazi muSunemu. (2 Bam. 4:18-20, 34-37) Zikozyano eezi azimwi zyabantu bakabusigwa, zitondeezya kuti Jehova ulaamanguzu aakubusya bantu bafwide. Jesu naakali aanyika wakatondeezya kuti Wisi wakamupa manguzu aakuchita oobo. (Joh. 11:23-25, 43, 44) Lino Jesu ulikujulu alubo wakapegwa “manguzu woonse kujulu aanyika.” Nkinkaako, ulakonzya kuzuzikizya chisyomezyo chakuti aabo boonse bali “mutubanda twakuyeezya” bazoobusigwa kuti bazookonzye kupona kukabe kutamani.—Mt. 28:18; Joh. 5:25-29.

11. Muunzilaanzi chinunuzyo muchipa kuti tuzookonzye kujana buumi butamani?

¹¹ Nkamboonzi Jehova naakazumizya kuti Mwanaakwe ngwayandisya afwe lufu luchisa? Jesu wakaamba kaambo kakapa kuti Wisi achite oobo, wakati: “Nkaambo Leza wakayiyanda loko nyika zyakuti wakapa Mwanaakwe uuzyedwe aalikke, kuchitila kuti muntu woonse uumusyoma atanyonyoonwi pe pesi abe aabuumi butamani.” (Joh. 3:16) Kwiinda mukutupa Mwanaakwe kuti abe chinunuzyo chakuzima zibi zyesu, Leza wakapa kuti tuzookonzye kujana buumi butamani. (Mt. 20:28) Mwaapostolo Pawulu wakaamba kaambo aaka kayandikana atala amakanze aaLeza chiindi naakalemba kuti: “Mbukunga lufu lwakasika kwiinda mumuntu, ankuko kubusigwa kwabantu bafwide kulaba kwiinda mumuntu. Nkaambo, mbukunga boonse balikufwa muli Adamu, nkukwaamba kuti boonse bazooba bawumi muli Kkristu.”—1 Kor. 15:21, 22.

12. Bwaami bwaLeza buzoowazuzikizya biyeni makanze aaLeza aali atala abantu?

¹² Jesu wakayiisya batobeli bakwe kuti bakombele kuti Bwaami bwaLeza busike akuti kuyanda kwaLeza kuchitwe aanyika. (Mt. 6:9, 10) Makanze aaLeza amwi ngakuti bantu bazoopone aanyika kukabe kutamani. Kuti eezi zikonzeke, Jehova wakasala Mwanaakwe kuti abe Mwaami waBwaami bwaLeza akuti abe Mesiya. Leza ulikubunganizya bantu bali 144 000 bazwa aanyika, batazooyendelezye aaJesu kuti bazoozuzikizye kuyanda kwaLeza.—Chi. 5:9, 10.

13. Jehova ulikuchitaanzi lino alubo niinzi nzitweelede kuchita?

¹³ Lino Jehova ulikubunganizya nkamu  mpati yabantu alubo ulikubayiisya kuti bapone kabeendelezegwa aaBwaami bwakwe. Nikuba kuti mazubaano balikupona munyika iizwide zintu ziyoosya ankondo, bali munkamu eeyo balikweezya kubeleka changuzu kuti batasaluulani akuti batazondani pe nikuba kuti bazwa muzisi zisiyene akuti mbamisyobo iisiyene. Nzibachita zitondeezya kuti balikufula mapanga aabo kuti abe maamba aakulimya. (Mik. 4:3) Kwiinda kuti batole lubazu munkondo zilikupa kuti bantu bafwe, balikugwasya bantu kuti bajane “buumi bwachoonzyo” kwiinda mukubayiisya atala aLeza wakasimpe amakanze aakwe. (1 Tim. 6:19) Bamumpuli balakonzya kubakazya naakuti kubula mali akaambo kakuti basumpula Bwaami bwaLeza, pesi Jehova ubapa zintu ziyandikana. (Mt. 6:25, 30-33; Lk. 18:29, 30) Eezi zitondeezya kuti Bwaami bwaLeza mbwachoonzyo akuti bunooyinkilila kunembo kuzuzikizya makanze aaJehova.

14-15. Makanze aaJehova aakunyonyoona lufu kukabe kutamani azoozuzikizigwa biyeni?

¹⁴ Lino Jesu ulikweendelezya kali kujulu alubo uzoozuzikizya zisyomezyo zyoonse Jehova nzyaakasyomezya. (2 Kor. 1:20) Kuzwa mu1914, Jesu ulikuzunda basinkondonyina. (Int. 110:1, 2) Jesu abaabo mbatazooyendelezyaabo, bayoozunda chakumaninina akunyonyoona basizibi.—Chi. 6:2.

 ¹⁵ MuMinyaka Iili 1 000 yaBweendelezi bwaJesu, bantu bafwide bazoobusigwa alubo aabo baswiilila bazoomaninina. Nikwazooyinda kusunkwa kwamamanino, aabo Jehova mbatazoobeteke kuti mbalulami “bayookona nyika alimwi bayookkala alinjiyo lyoonse mane kukabe kutamani.” (Int. 37:10, 11, 29) Chibotezya nchakuti “sinkondoma wamamanino, lufu, uzoonyonyoonwa.”—1 Kor. 15:26.

16. Ngaali makanze eesu mapati aakubelekela Jehova?

¹⁶ Mbuli mbutwabona, bulangilizi bwakuzoopona kukabe kutamani buzwa muJwi lyaLeza. Bulangilizi oobu, butugwasya kuti tukkale katusyomeka muziindi eezi ziyumu zyakumazuba aakumamanino. Tatweelede kubotezya Jehova akaambo kakuti tuyanda kuzoopona kukabe kutamani luzutu, pesi makanze eesu mapati aakuti tukkale katusyomeka kuli Jehova akuli Jesu ngakuti tulabayanda amoyo woonse. (2 Kor. 5:14, 15) Eezi zipa kuti tubatobelezye akuti tubuzye bamwi atala abulangilizi oobu. (Rom. 10:13-15) Kuti katupa, tulaba beenzinyina baJehova kukabe kutamani.—Heb. 13:16.

17. Umwi awumwi wesu, weelede kusala kuchitaanzi? (Mateyo 7:13, 14)

¹⁷ Uzooba aakati kabantu batazoopone kukabe kutamani na? Jehova wakatupa mweenya wakuti tulisalile. Zili kulindiswe kuti tuyanda kukkala katuli munzila iitola kubuumi butamani na naakuti pe. (Bala Mateyo 7:13, 14.) Buumi bunooli biyeni chiindi twaakupona kukabe kutamani? Mubuzyo ooyu uzoosandulwa muchiiyo chitobela.