1. Kali waba aafwiifwi kufwa, Jesu wakatyeni kuli chimwi chigwebenga? (Lukka 23:39-43)

 JESU azigwebenga zibili bakali kumvwa kuchisa kusikila nibakafwa. (Lk. 23:32, 33) Zigwebenga eezi zibili zyakali kwaambuula makani mabi atala aJesu, nkinkaako zitondeezya kuti teebakali basikwiiya bakwe pe. (Mt. 27:44; Mk. 15:32) Pesi chimwi chigwebenga chakachincha, mpawo chakaamba kuti: “Jesu, ukandiyeeye waakunjila muBwaami bwako.” Jesu wakasandula kati: “Kwaamba choonzyo, sunu ndikubuzya kuti, uzooba aandime muParadayizi.” (Bala Lukka 23:3943.) Taakwe bukamboni butondeezya kuti chigwebenga eechi chakali chatambula mulumbe ngwaakali kukambawuka Jesu ‘waBwaami bwakujulu.’ Alubo Jesu taakwe naakaamba kuti mwaalumi ooyu uyoonjila muBwaami (Mt. 4:17). Jesu wakali kwaambuula atala aParadayizi iili kunembo. Nkamboonzi nitwaamba oobo?

2. Niinzi chitondeezya kuti mwaalumi wakali chigwebenga wakali muJuda?

² Mwaalumi wakasanduka kuyeeyelwa kuti wakali muJuda. Mwaalumi ooyo wakabuzya chigwebenganyina kuti: “Ani tumuyoowi na Leza, mbukunga wajana chisubulo chikozyenie achamwaalumi ooyu?” (Lk. 23:40) MaJuda bakali kukomba Leza uumwi pesi bantu bazisi bakali kusyoma baleza biingi. (Kul. 20:2, 3; 1 Kor. 8:5, 6) Kaansinga zigwebenga eezi zyakali kuzwa kuli zimwi zisi chigwebenga eechi chakali kukonzya kubuzya Jesu kuti, “Ani tubayoowi na baleza? Alubo Jesu taakatumidwe kukufutula bantu bakuli zimwi zisi pe pesi wakatumidwe kumbelele zisweekede zyamung’anda ya-Israyeli.” (Mt. 15:24) Leza wakali wabuzya ma-Israyeli kuti wakali kuzoobusya bafwide. Mwaalumi ooyu wakali chigwebenga wakasanduka, kulakonzeka kuti wakalaazi makani aaya. Nkaambo majwi ngakaamba akali kutondeezya kuti wakalizi kuti Jehova wakali kuzoobusya Jesu kuti azooyendelezye muBwaami bwaLeza. Mwaalumi  ooyu wakali kusyoma kuti, anguwe Leza ulakonzya kuzoomubusya.

3. Kweelede kuti niinzi nzyaakayeeya mwaalumi wakasanduka wakali chigwebenga naakamvwa Jesu kaambuula atala aParadayizi? Pandulula (Matalikilo 2:15)

³ Mbukunga wakali muJuda, mwaalumi ooyu wakasanduka kulakonzeka kuti wakali aaluzibo atala a-Adamu a-Eva aParadayizi Jehova mwaakababikkide. Nkinkaako, kulakonzeka kuti mwaalumi ooyu wakalizi kuti Paradayizi Jesu njaakali kwaamba, muunda mubotu uutanooli aanyika.—Bala Matalikilo 2:15.

4. Majwi Jesu ngaakabuzya mwaalumi wakali chigwebenga ayelede kupa kuti tuchiteenzi?

⁴ Majwi Jesu ngaakabuzya chigwebenga ayelede kupa kuti tuyeeyesesye atala ambubunoobede buumi muParadayizi. Alubo tulakonzya kwiiya zyiingi atala aParadayizi kuzintu zyakachitika nikwakali kweendelezya Mwaami Solomoni. Naakali kweendelezya Solomoni bantu bakali muluumuno. Mbukunga Jesu mupati kwiinda Solomoni, kalaamwi abali 144000, uyoopa kuti nyika ikabe paradayizi mbotu loko. (Mt. 12:42) Eezi zitondeezya kuti bazimwi mbelele beelede kuziba nzibeelede kuti bakeelele kupona kukabe kutamani muParadayizi.—Joh. 10:16.

5. Ubonaanga buumi buyooba biyeni muParadayizi?

⁵ Niinzi chinga chasika mumizeezo yako kuti wayeeyesesya atala abuumi mbubunoobede muParadayizi? Amwi nga wayeeya atala andawu mbotu yamweemvwe iili mbuli kwakabede muunda wa-Edeni. (Matl. 2:7-9) Ulakonzya kuyeeya atala abupolofita bwakalembwa aaMikka bwakuti bakombi baLeza bayookkala “umwi aumwi munsi lyamusaansa wakwe amunsi lyamukuyu wakwe.” (Mik. 4:3, 4) Amwi nga wayeeya atala achakulya chiingi loko chaambidwe muBbayibbili. (Int. 72:16; Is. 65:21, 22) Ulakonzya kulibona kuli mumuunda mubotu loko, kukkede aatebbulu lizwide chakulya chinona loko. Ulakonzya kulibona kulikuyoya muuya mubotu uununkilila uuzwa kuminsamu amaluba. Kulikubona bamumpuli abeenzinyokwe kabalikuseka kuswaanizya abaabo bakabusigwa kuzwa kubafu. Zintu zyoonse eezi teezyakulota biya pe. Zizoochitika aano aanyika, alubo tuyoochita milimu iitunoneezya muParadayizi.

6. Njiili milimu njituyoochita muParadayizi? (Langa chifanikisyo.)

⁶ Jehova wakatulenga munzila yakuti katubotelwa amilimu njituchita. (Muk. 2:24) MuBweendelezi bwaKkristu bwaMinyaka Iili 1 000 tuyoojatikana loko. Aabo batakafutuke lyamapenzi mapati, kuswaanizya amamiliyoni aabantu batakabusigwe, bayooyandikana zyakuzwaata, chakulya andawu yakukkala. Kuti tukakonzye kujana zintu eezyo, kuyooyandikana kubeleka changuzu. Mbuli Adamu a-Eva mbubakali kulangania muunzi wabo, andiswe tuyooba aachilongezyo eecho chakulangania  Paradayizi. Tuyoobotelwa loko akaambo kakuti tuyooba aachilongezyo chakuyiisya mamiliyoni aabantu batakabusigwe bakazi zintu ziche loko atala aJehova amakanze aakwe, akugwasya bakombi baJehova basyomeka batazoobusigwe bakapona chiindi Jesu katanaza aanyika.

7. Tuli aachoonzyo chanzi alubo nkamboonzi?

⁷ Tulakonzya kuba aachoonzyo chakuti muParadayizi tuyookkala muluumuno, katujana zintu zyoonse nzituyanda alubo katubambikene. Nkamboonzi? Nkaambo Jehova wakazitondeezya kale eezi kuti buumi bunooli biyeni aazoosaanguna kweendelezya Mwanaakwe. Ulakonzya kuzibona eezi mubweendelezi bwaMwaami Solomoni.

8. Majwi aali muli akazuzikizigwa biyeni kuzwa chiindi Mwaami Davida naakaalemba? (Langa “Mibuzyo Yabasikubala” mumagazini eeyi.)

⁸ Mwaami Davida wakazulwidwa kuti alembe atala abuumi mbubwakali kuyooba nikwakali kuyooyendelezya mwaami musongo uusyomeka. (Bala Intembauzyo 37: 10, 11, 29.) Chiindi chiingi bantu tubabalila lugwalo lwa Intembauzyo 37:11 nitwaambuula atala aParadayizi. Tuli aatwaambo tubotu tupa kuti tuchite oobo, nkaambo Jesu wakazubulula majwi aaya muNkambawuko yakwe Yakuchilundu kutondeezya kuti akali kuyoozuzikizigwa kunembo. (Mt. 5:5) Alubo majwi aaDavida akali kutondeezya buumi mbubwakali kuyooba mumazuba aaMwaami Solomoni. Chiindi Solomoni naakeendelezya mu-Israyeli bantu baLeza bakali kukkala muluumuno alubo bakali kujana zintu zyoonse nzibakali kuyanda munyika “iikunka buci amukupa.” Leza wakaambide kuti: “Ikuti mwazumanana kubamba mbeta zyangu . . . , ndiyoomupa luumuno munyika alimwi muyoolala kakunyina uumuyoosya.” (Lev. 20:24; 26:3, 6) Zisyomezyo eezi zyakazuzikizigwa chiindi Solomoni naakali kweendelezya. (1 Mak. 22:9; 29:26-28) Alubo Jehova wakaambide kuti bantu babi teebakali kuyoobako pe. (Int. 37:10) Nkinkaako, majwi aali muli Intembauzyo 37: 10, 11 a 29 akazuzikizigwa  chiindi alubo ayoozuzikizigwa muchiindi chili kunembo.

9. Mwaami wachanakazi wakuShebba wakatyeni atala abweendelezi bwaMwaami Solomoni?

⁹ Mwaami wachanakazi wakuShebba wakamvwa atala aluumuno ndubakalaalo ma-Israyeli abuumi bubotu mbubakali kupona nibakali kweendelezegwa aaSolomoni. Eezi zyakapa kuti mwaami wachanakazi ooyo ayinke kuJerusalema akalibonene ameso aakwe buumi mbubakali kupona. (1 Bam. 10:1) Naakabona bweendelezi bwaSolomoni, mwaami wachanakazi ooyo wakati: “Nzyondakaambilwa tazisiki akucisela pe. . . . Bali acoolwe bantu bako alimwi bali acoolwe babelesi bako ibaima kumbele lyako lyoonse kabaswiilila busongo bwako!” (1 Bam. 10:6-8) Buumi mbubakali kupona bantu mubweendelezi bwaSolomoni ninzwisa biyo yazintu Jehova nzyatazoochitile bantu kwazooyendelezya Mwanaakwe Jesu.

10. Nkamboonzi Jesu nasumpukide kwiinda Solomoni?

¹⁰ Jesu ulisumpukide kwiinda Solomoni. Solomoni taakamaninide pe, wakachita zibi zipati naakali kubeteka, eezi zyakapa kuti bakombi baLeza baswaane mapenzi. Pesi Jesu, Mweendelezi uumaninide uutabisyi pe. (Lk. 1:32; Heb. 4:14, 15) Jesu wakazumanana kasyomeka kuli Jehova chiindi naakali kusunkwa aSaatani. Kkristu wakazitondeezya kuti tazoobisyi pe naakuti kuchita zintu zitazoope kuti bantu mbanooyendelezya bazooswaane mapenzi. Nchilongezyo chipati loko kuba aaMwaami uuli boobu.

11. Mbaani batazoogwasye Jesu?

¹¹ Jesu uzooyendelezya aabali 144 000 kuti azoolanganie bantu akuzuzikizya makanze aaJehova aali atala anyika. (Chi. 14:1-3) MaKkristu aaba bakaswaana mapenzi kabachili aanyika, nkinkaako, mbeendelezi banooli aaluzyalo. Pesi nguuli mulimu utazoochitwe aabeendelezi aaba bali 144 000?

12. Mupati biyeni mulimu Jehova ngwaakapa bali 144000?

¹² Mulimu uutazoochitwe aaJesu aamwi abaabo mbatazooyendelezye aabo mupati loko kwiinda wakachitwa aaSolomoni. Solomoni wakeelede kulangania mamiliyoni aabantu bakali kukkala muchisi chimwi biyo. Pesi aabo batazooyendelezye muBwaami bwaLeza, bazoogwasya mabbiliyoni aabantu bali munyika yoonse mbiizulwa. Kwaamba choonzyo, Leza wakabapa mulimu mupati loko aaba bali 144 000.

13. Mulimu uuyandikana loko uutazoochitwe aaJesu abaabo mbatazooyendelezyaabo uswaanizyaanzi?

¹³ Bali 144 000 bazoobeleka kabali baami abapayizi mbuli Jesu. (Chi. 5:10) Aansi aaMulawu waMozesi, mulimu mupati wabapayizi wakali wakukwabilila bantu kumalwazi amubukombi. Mulawu wakali “mweenzule wazintu zibotu” zyakali kuza. Nkinkaako, tulakonzya kwaamba kuti Jesu abaabo mbatazooyendelezyaabo, bazoochita mulimu uuyandikana loko wakukwabilila bantu kumalwazi amubukombi. (Heb. 10:1) Tweelede kulindila, kuchitila kuti tuzoobone kuti baami abapayizi aaba bazoobagwasya biyeni bantu batanooli aanyika. Kufumbwa nzyatazoochite Jehova, tuli aachoonzyo chakuti Paradayizi izoosika alubo bantu batanooli aanyika bazoojana bweendelezi mbubayanda.—Chi. 21:3, 4.

14. Niinzi zilikuchitika akati ‘kazimwi mbelele’ abaabo batazooyendelezye aKkristu?

¹⁴ Bantu mbatazooyendelezyaabo Jesu, wakabaamba kuti ‘katanga kanini.’ (Lk. 12:32) Mukuyungizya, Jesu wakaambuula atala akamwi kabunga kambelele nkaakayita kuti ‘zimwi mbelele.’ Tubunga ootu tubili tupanga tanga limwi lijisini. (Joh. 10:16) Tubunga ootu  twakasaanguna kale kubelekelaamwi, alubo tunoobelekelaamwi kusikila ikasike Paradayizi. Nikuba oobo, kuchiindi eecho ‘bamukatanga kaniini’ banooli kujulu pesi ‘bazimwi mbelele’ banooli aachilongezyo chakupona aanyika mane kukabe kutamani. Pesi kuli zimwi zintu nzibeelede kuchita ‘bazimwi mbelele’ kuti bazooyelele kupona aanyika.

15. (a) “Zimwi mbelele” zibelekelaamwi biyeni abananike? (b) Kujana wachitobelezya biyeni chikozyano chamukwesu ulaachintoolo? (Langa chifanikisyo.)

¹⁵ Chigwebenga chakatondeezya kuti chasanduka, chakafwa kachitanajana mweenya wakutondeezya kuti chilamulumba Kkristu akaambo kakutufwida nkwaakachita. Pesi ‘bazimwi mbelele’ bali aamyeenya myiingi yakutondeezya kuti balamulumba Jesu. Muchikozyano, tutondeezya kuti tulamulumba Jesu akaambo kazintu nzyaakatuchitila munzila njitubajataayo bananike. Jesu wakaamba kuti uzoobeteka mbelele akaambo kanzila njibabajataayo bananike. (Mt. 25:31-40) Tulakonzya kugwasilizya bananike kwiinda mukutola lubazu chabusungu mumulimu wakukambawuka awakuyiisya bamwi kuti babe basikwiiya. (Mt. 28:18-20) Chiindi nituchita mulimu ooyu, tuyanda kwaabelesya kabotu mabbuku aagwasya bantu kwiiya Bbayibbili ngitupegwa aambunga ali mbuli lyakuti, Mbukonzya Kubotelwa Mubuumi Kukabe Kutamani! Kuti kutakwe muntu nguyiyaawe Bbayibbili, baamakanze aakuti ujane bantu biingi mbukonzya kuyiisya Bbayibbili.

16. Niinzi nzitweelede kuchita kuti tulibambile kuzoopona muParadayizi?

¹⁶ Tatweelede kulibuzya kuti tuzooba aabuntu bubotu mbwayanda Jehova kuti twazooba muParadayizi. Nikuba lino, tulakonzya kubelekela kuba bantu basyomeka alubo balijata. Tulakonzya kusyomeka kuli Jehova, kumuntu ngutukwetenaawe, akubakombima. Kuti lino tweezya kupona kweendelana azyeelelo zyaJehova munyika eeyi izwide bubi, kuzootuubila kuchita oobo muParadayizi. Zintu nzituchita lino zyeelede kutondeezya kuti tulikulibambila kuzoopona muParadayizi. Langa chiiyo chitii, “Ulilibambilide Na ‘Kuzookona Nyika’?” mumagazini eeyi.

17. Tweelede kulilya loko na mumoyo akaambo kazibi nzitwakachita chiindi? Pandulula.

¹⁷ Tweelede kubeleka changuzu kuti tutalilyi  loko mumoyo katuli kuyeeya zibi zipati nzitwakachita chiindi. Nikuba oobo, tatweelede kuubaansya chipayizyo chachinunuzyo kwiinda mukuba “aachiimbo chakuchita chibi achaali.” (Heb. 10:26-31) Kuti kakuli wakasanduka choonzyo kuzibi zyako wajana lugwasyo luzwa kuli Jehova mpawo wachincha maponeno aako, Jehova ulakulekelela amoyo woonse. (Is. 55:7; Mil. 3:19) Weelede kuyeeya majwi aaJesu ngaakabuzya baFarisi. Wakati: “Ndakazida kuzooyita basizibi, kutali bantu baluleme pe.” (Mt. 9:13.) Chipayizyo chachinunuzyo chilaamanguzu aakuzima zibi zyesu zyoonse.

18. Niinzi nzuyanda kuzoobuzya chigwebenga chakafwa kumbali lyaJesu?

¹⁸ Yeeya biyo kuli muParadayizi kuli kwaambuula aachigwebenga chakaambuula aaJesu! Kweelede moonse muyootondeezya kulumba akaambo kachinunuzyo chaJesu. Amwi uyoomukumbila kuti akubuzye zyakachitika muma-awa aakumamanino aabuumi bwaJesu kachili aanyika, akuti we wakamvwa biyeni chiindi Jesu naakasandula chikumbizyo chakwe. Amwi anguwe ulakonzya kukumbila kuti umupandulwide kuti buumi bwakali biyeni kumazuba aakumamanino. Chinooli chilongezyo chipati loko kwiiya Jwi lyaLeza aabantu bali boobu.—Ef. 4:22-24.

19. Nkamboonzi buumi nibutanoobbowi pe muParadayizi?

¹⁹ Buumi tabunoobbowi pe muParadayizi. Tunooswaana bantu babotelwa alubo tunoochita milimu iipa kuti tukkutisikane. Alubo chiinda zyoonse, tuyoomuziba kabotu Taateesu wakujulu akubotelwa aazyoonse nzyanootupa. Kwiiya atala aJehova azintu nzyaakalenga takuzoomani pe. Kuvula kwaminyaka katuli kupona, kuzoopa kuti luyando lwesu aLeza lukomene. Tumulumba loko Jehova aJesu akaambo kakutusyomezya kuti tuzoopona mane kukabe kutamani muParadayizi.