KULAKONZEKA kuti ulikubotelwa azipo zyiingi Jehova nzyaakakupa akuti ulamulumba akaambo kalwaangunuko lwakulisalila mbukonzya kubotelwa azipo eezyo. Kweendelana aBbayibbili, wayini nchipo chizwa kuli Leza. Bbayibbili lyaamba kuti: “Cakulya cipa kuti bantu kabaseka, alimwi waini upa kuti buumi kabukondelezya.” (Muk. 10:19; Int. 104:15) Kulakonzeka kuti wakabona bamwi bantu bakaswaana buyumu-yumu akaambo kabukande. Mukuyungizya, bantu bali munyika bali aamaboneno aasiyene-siyene atala ankani yakunywa bukande. Pesi niinzi chikonzya kugwasya maKkristu kuti basale kabotu munkani eeyi?

Kufumbwa kuti tukkala kuli naakuti twakakomenena kuli, kuzumizya malayilile aaLeza kuti atuzulwide munzila njituyeeyaayo anjitusalaayo kulatugwasya mubuumi alubo kupa kuti tubotelwe.

Amwi wakazibona kuti bantu biingi munyika bakkala kabanywa bukande akuti balikubunywa zyiindilide. Bamwi banywa bukande kabayanda kuti balyiibe, mpawo bamwi balanywa kuchitila kuti baleke kuyeeya mapenzi aabo. Alubo muli zimwi ndawu, kuti wanywa bukande zyiindilide nga ulikutondeezya kuti wakomena akuti uli mwaalumi.

Pesi, maKkristu bali aamalayilile aabusongo aazwa kuMulengi wesu ulaaluyando. Muchikozyano, Mulengi wesu wakatuchenjezya atala amapenzi ngitujana kuti twanywa bukande zyiindilide. Amwi twakabala atala amakani aali muli Tusimpi 23:29-35 aawambuula atala amuntu uukoledwe amapenzi ngajana. a Daniel, mwaalu uukkala ku-Europe, uchiyeeyede mbubwakabede buumi bwakwe katanaba muKkristu. Wakaamba kuti, “Kunywa bukande zyiindilide kwakali kupa kuti nditasali kabotu alubo kwakapa kuti ndiswaane mapenzi. Kuti ndaziyeeya zyakachitika mubuumi bwangu, nga ndakataazikana loko.”

MaKkristu nga balalubelesya biyeni lwaangunuko ndubalaalo lwakulisalila akuti batantamuke mapenzi aabawo akaambo kakunywa bukande zyiindilide? Chintu chikonzya kubagwasya nkuzumizya maboneno aaLeza kuti abazulwide muzintu nzibasala.

Atulange-lange nzilyaamba Bbayibbili atala akunywa bukande atwaambo tupa kuti bamwi banywe bukande.

Jwi lyaLeza talikasyi pe kunywa bukande. Bbayibbili litondeezya kuti kunywa wayini kulakonzya kupa kuti tubotelwe mubuumi. Lyaamba kuti: “Koya, ukalye cakulya cako kokkomene akunywa waini wako amoyo uukondedwe.” (Muk. 9:7) Aali chimwi chiindi, Jesu wakanywa wayini alubo bamwi bakombi baJehova basyomeka ambabo bakanywa wayini.​—Mt. 26:27-29; Lk. 7:34; 1 Tim. 5:23.

Nikuba kuti Bbayibbili talikasyi pe kunywa bukande, pesi likasya kukolwa. Lyaamba kuti: “Mutakolwi aawayini pe.” (Ef. 5:18) Alubo litondeezya kuti “basikukolwa . . . tabazookoni Bwaami bwaLeza.” (1 Kor. 6:10) Nisimpe Jehova takuyandi pe kunywa bukande zyiindilide akukolwa. Kwiinda kuti tutobelezye zichitwa aabantu bali muchilawu chesu, tweelede kusala zintu zipa kuti Leza abotelwe.

Bamwi babonaanga balakonzya kunywa bukande zyiindilide kabatakolwi pe, pesi kuchita oobo nkulinjizya mumapenzi miingi. Magwalo aamba kuti kuba “bazike bawayini” kulakonzya kupa kuti mwaalumi naakuti mwanakazi atalijati kabotu naakuti achite chibi chipati. (Tit. 2:3; Tus. 20:1) Alubo Jesu wakachenjezya kuti, ‘kunywa zyiindilide’ kulakonzya kukachizya muntu kuti anjile munyika mpya. (Lk. 21:34-36) Niinzi chikonzya kugwasya muKkristu kuti ataswaani mapenzi aayetwa akaambo kakunywa bukande zyiindilide?

Kutobelezya nzila njibanywaayo bantu bamuchilawu chesu kulakonzya kutweetela mapenzi miingi. Kulayandikana kuti maKkristu bachite zintu zibotezya Jehova munkani yachakulya akunywa. Bbayibbili lituyeezya kuti: “Kufumbwa kuti mulikulya, naakuti mulikunywa, naakuti mulikuchita chimwi chintu, amuchite zintu zyoonse kuti Leza alemekwe.” (1 Kor. 10:31) Njeyi imwi mibuzyo njitukonzya kulibuzya amalayilile aamuBbayibbili ngitukonzya kubelesya:

Ndinywa bukande kuchitila kuti ndimwvanane abamwi na? Kulonga 23:2 yaamba kuti: “Toyelede kutobela buleya.” Muvesi eeyi, Jehova wakali kuchenjezya ma-Israyeli aabo bakali kutobelezya bantu bakali kuchita zintu zitamubotezyi. Malayilile aaya alabeleka akumaKkristu mazubaano. Kuti twazumizya bantu kuti batubumbe munzila njituyeeyaayo anjitusalaayo munkani yakunywa bukande, tuzoojinka katuli twalitantamuna kuli Jehova alubo katutachiponi kweendelana amilawu yakwe.​—Rom. 12:2.

Ndinywa bukande kuti nditondeezye kuti ndilisimide na? Muli zimwi ziyanza, kunywa bukande zyiindilide kulijayilikene alubo kulatambulika. (1 Pet. 4:3) Pesi yeeya atala amalayilile aabusongo aali muli 1 Bakkorinte 16:13 aakuti: “Amukkale kamulangide, mujatisisye mulusyomo, muchite mbuli baalumi alubo musime.” Kunywa bukande kupa kuti muntu asime na? Peepe. Bukande kupa kuti muntu atayeeyi kabotu akuti atasali munzila iilikabotu. Alubo kwiinda kuti kunywa bukande zyiindilide kutondeezye kuti muntu ulisimide, pesi kupa kuti abe mufuba-fuba. Isaya 28:7 yaambuula atala amuntu uusweeka akaambo kakuti bukande bupa kuti adadalike akuti asale munzila iitali kabotu.

Jehova nguwe uutupa nguzu zyakuti tuchite zilikabotu alubo eezi ziyanda kuti tukkale katulangide, tujatisisye mulusyomo. (Int. 18:32) MuKkristu uusyomeka ulakonzya kuchita oobo kwiinda mukukkala kalangide akusala kabotu kuchitila kuti alikwabilile kuzintu zipambanisya bweenzinyina mbwaalaabo aJehova. Jesu wakatondeezya kuti ulaamanguzu chiindi naakali anyika alubo bantu biingi bakamubona kali mwaalumi ulaachibindi.

Ndinywa bukande kuchitila kuti ndichije mapenzi aangu na? Sintembawuzyo wakazulwidwa kulemba kuti: “Mizeezo minji iilibilisya neyakandikatazya, yebo wakanduumbulizya akunditontozya.”  (Int. 94:19) Kuti mapenzi akumana manguzu, syoma Jehova kuti akugwasye kutali bukande. Nzila njitukonzya kuzichitaayo eezi nkukomba kuli Jehova chiindi choonse. Alubo biingi bakabona kuti kukumbila kugwasigwa aamuKkristu uusimide mubukombi kulagwasya. Kuti muntu wanywa bukande kayanda kuti achije mapenzi aakwe, kumamanino uzoojinka wabuubaansya kuchita zintu nzyayanda Jehova. (Hos. 4:11) Daniel waambwa musule wakaamba kuti, “Ndakali kukataazikana alubo ndakali kulipa mulandu. Ndakali kunywa bukande kandiyanda kuti nditayeeyi mapenzi aangu, pesi akayungizya biya. Teendakachili aabantu bakumvwananaabo alubo bantu teebakachili kundilemeka pe.” Niinzi chakazoogwasya Daniel? Wakaamba kuti, “Ndakazoobona kuti ndakeelede kugwasigwa aaJehova kutali aabukande. Kumamanino, kwiinda mukugwasigwa aaJehova ndakazookonzya kulisimya mumapenzi aangu alubo ndakaazunda.” Simpe ndyakuti Jehova ulilibambilide kutugwasya chiindi choonse nikuba katubonaanga penzi nditwaswaana tatukonzyi pe kulizunda.​—Flp. 4:6, 7; 1 Pet. 5:7.

Kuti kunywa bukande, ulakonzya kulanga-langa nzila njunywaayo kwiinda mukulibuzya mibuzyo eeyi: ‘Kuli umwi na mumpuli naakuti mweenzinyokwe wakakuchenjezya atala anzila njunywaayo?’ Kuti kakuli oobo, nchitondeezyo chakuti weelede kuchesya nzila njunywaayo. ‘Ndabwiinzizya loko na kunywa bukande kwiinda chiindi?’ Eezi zilakonzya kuchitwa aamuntu uutananjilwa muganzi akunywa bukande pesi kali munzila yakunjilwa muganzi. ‘Kulandiyumina na kuti ndikkale kwamazuba mache naakuti miingi kanditanywide bukande?’ Kuti kakuli oobo, nchitondeezyo chakuti kunywa bukande kwakakunjila muganzi, chimwi chiindi ngakwayandikana kuti ugwasigwe abasyaabusongo kuti uzunde penzi eelyo.

Akaambo kakuti kunywa bukande kupa kuti muntu aswaane mapenzi miingi, bamwi maKkristu bakasala kutanywa bukande. Bamwi bakasala kuchita oobo akaambo kakuti bukande tabubanoneli pe. Kuti mweenzinyokwe kali wakasala munzila eeyi, ulakonzya kutondeezya kuti ulamuyanda kwiinda mukulemeka nzyaakasala kutamufubaazyi pe.

 Amwi wakabona kakugwasya kulibikkila migaanu. MuKkristu ulakonzya kulibikkila migaanu atala akuti unywa bukande bwiingi biyeni naakuti kwaziindi zyiingi biyeni. Amwi ulakonzya kunywa kamwi amviki naakuti kunywa mbichaani aachiindi chakulya. Bamwi bakasala kulibikkila migaanu atala amisyobo yabukande njibanywa mbuli kunywa wayini naakuti bukande butakoli loko alubo butaswaanizidwe aamadilinki. Kuti muKkristu wasala kulibikkila migaanu atala ankani yakunywa bukande, kulamuubila kuti akakatile kuzintu nzyaasala. Alubo taakwe kaambo pe kapa kuti muKkristu uusimide abe abweeme kuti wasala munzila eeyi akukakatila kuzintu nzyaasala.

Alubo kuyeeya bamwi kulayandikana chiindi nitusala kunywa bukande. Baroma 14:21 yaamba kuti: “Zilikabotu kuleka kulya nyama, kunywa wayini naakuti kuchita chimwi chintu chipa kuti mukombinyokwe alebwe.” Kujana waabelesya biyeni malayilile aaya? Tondeezya luyando lwabuzyalwama. Kuti wabona kuti kunywa bukande kulakonzya kupambanisya bamwi, luyando lulakonzya kupa kuti usale kutanywa bukande aachiindi eecho. Kuti wachita oobo, nga ulikutondeezya kuti ulabalemeka bamwi, ulabayanda akuti ubikka zintu nzibayanda mubusena bwakusaanguna kwiinda nzuyanda.​—1 Kor. 10:24.

Alubo mfulumende ilakonzya kubikka milawu iili atala akunywa bukande. MuKkristu weelede kuswiilila milawu eeyi. Milawu eeyi ilakonzya kwaamba kuti weelede kusisya iimwi minyaka kuti usaangune kunywa bukande naakuti tutanywi bukande chiindi nitudilayiva naakuti nitubelesya imwi minchina.​—Rom. 13:1-5.

Jehova wakatupa zipo zyiingi. Alubo chimwi chakkona ndwaangunuko lwakulisalila mbutukonzya kuzibelesya zipo eezi, ziswaanizya kusala zintu nzitulya anzitunywa. Zintu nzitusala zyeelede kutondeezya kuti tulachilumba chipo eechi chalwaangunuko kwiinda mukusala zintu zibotezya Taateesu wakujulu.