1. Nkamboonzi bamwi nibabonaanga tazichiti pe kuti bapone kukabe kutamani?

 BANTU biingi bakkala kabalya chakulya chiyaka mubili alubo nga ba-ekisesayiza kuchitila kuti bapone kwachiindi chilamfu. Pesi balizi kuti tabazooponi kukabe kutamani. Babonaanga tazichiti pe kuti bapone kukabe kutamani kuti bayeeya mapenzi ngaswaana muntu kuti wachembaala. Nikuba oobo, Jesu wakaamba kuti kulakonzeka kuti muntu abe “aabuumi butamani” mbuli mbukwaambidwe muli Johane 3:16 a 5:24.

2. Johane chaandaano 6 ityeni atala abuumi butamani? (Johane 6:​39, 40)

² Jesu wakali wachita chigambyo chakusanina bantu biingi kabelesya chinkwa atuswi. a Pesi nzyaakazoochita mubuzuba bwakatobela zyakali kugambya loko. Nkamu yabantu yakamutobela kuKkapenawume kuGalili alubo Jesu wakababuzya kuti wakali kukonzya kubusya bantu bafwide akuti bapone kukabe kutamani. (Bala Johane 6:​39, 40.) Nzyaakaamba Jesu, zijatikizya beenzuma ababbululu besu bakafwa alubo zitondeezya kuti bantu bakafwa bazoobusigwa alubo tuzoopona kukabe kutamani katuli aamwi ambabo. Nikuba oobo, nzyaakazoowamba Jesu mumavesi aali kunembo muli Johane chaandaano 6, bantu biingi taakwe nibakazimvwisisisya pe. Atuzilange-lange.

3. Jesu wakatyeni muli Johane 6:51?

 ³ Chiindi Jesu naakasanina bantu munzila yachigambyo, maJuda bakayeeya mana Jehova njaakapa ma-Israyeli nibakali munkanda. Magwalo aamba kuti atala amana, “[ncinkwa] cizwa kujulu.” (Int. 105:40; Joh. 6:31) Jesu wakabelesya mana naakali kuyanda kubayiisya chimwi chintu chiyandikana. Nikuba kuti Leza wakapa ma-Israyeli chakulya chamana munzila yachigambyo, pesi aabo bakalya bakazoofwa. (Joh. 6:49) Kusiyana amana eeyo, Jesu wakalyaamba kuti ‘nchinkwa chachoonzyo chizwa kujulu,’ “chinkwa chaLeza” ‘achinkwa chabuumi.’ (Joh. 6:​32, 33, 35) Jesu wakatondeezya mbaakasiyene amana, wakati: “Ime ndili chinkwa chuumi chakazwa kujulu. Kufumbwa muntu uulya chinkwa eechi, uzoopona kukabe kutamani.” (Bala Johane 6:51.) MaJuda aabo bakanyema. Teebakali kumvwisisisya pe kuti nkamboonzi Jesu naakali kwaamba kuti wakali “chinkwa” chakazwa kujulu akuti wakalisumpukide kwiinda mana Leza njaakapa ma-Israyeli. Jesu wakazoobabuzya kuti “chinkwa nchindipa, mubili wangu.” Jesu wakali kwaambaanzi? Kulayandikana kuziba nzyaakali kwaamba akaambo kakuti kuziba nsandulo yamubuzyo ooyu kutugwasya kuti tukakonzye kujana buumi butamani. Atubone nzyaakali kwaamba Jesu.

CHINKWA CHABUUMI AMUBILI WAKWE

4. Nkamboonzi bamwi nibakagamba atala azintu Jesu nzyaakaamba?

⁴ Bamwi bantu bakali kuswiilila Jesu bakagamba naakali kuti chinkwa nchindipa, “mubili wangu akaambo kabuumi bwanyika.” Amwi bamwi bakali kuyeeya kuti Jesu wakali kwaamba kuti balye mubili wakwe chachoonzyo kutali munzila yakukozyanisya. (Joh. 6:52) Pesi Jesu wakababuzya chimwi chintu nchibakatali kuyeeyela pe chakapa kuti bagambe loko, wakati: “Kuti teemwalya mubili waMwanaamuntu akunywa ganzi lyakwe, tamukooba aabuumi pe mulindinywe.”—Joh. 6:53.

5. Nkamboonzi nitukonzya kwaamba kuti Jesu taakali kwaamba kuti bantu bakeelede kunywa ganzi lyakwe chachoonzyo?

⁵ Muchiindi chakapona Nowa, Leza taakali kuzumizya pe kuti bantu balye ganzi. (Matl. 9:​3, 4) Alubo Jehova wakazoopa ma-Israyeli mulawu wakuti batalyi ganzi. Kufumbwa muntu wakali kulya ganzi ‘wakeelede kujayigwa.’ (Lev. 7:27) Jesu wakayiisya maJuda kuti baswiilile milawu yoonse Jehova njaakabapede. (Mt. 5:​17-19) Nkinkaako, tazichiti pe kuti Jesu wakali kusungwaazya maJuda kuti balye mubili wakwe naakuti kunywa ganzi lyakwe chachoonzyo. Naakaamba majwi aaya aagambya, Jesu wakali kuyanda kuyiisya bantu mbubakonzya kuba “aabuumi butamani.”—Joh. 6:54.

6. Nkamboonzi nitukonzya kwaamba kuti majwi aaJesu aali atala akulya mubili wakwe akunywa ganzi lyakwe akali aakukozyanisya?

⁶ Jesu wakali kwaambaanzi loko? Zili aantanganana kuti Jesu wakali kwaambuula munzila yakukozyanisya mbuli mbaakachita naakali kwaambuula aamwanakazi muSamariya naakaamba kuti: “Muntu woonse uunywa maanzi ngindimupa, tazoobi aanyota lubo pe, pesi maanzi ngindimupa azooba kasawu kamaanzi aabbobboma mulinguwe aapa buumi butamani.” (Joh. 4:​7, 14) b Jesu taakali kwaamba kuti mwanakazi muSamariya wakali kunoojana buumi butamani kuti wanywa maanzi aamuchikala eecho.  Munzila iikozyenie, taakali kwaamba kuti nkamu yabantu njaakaambuulaayo kuKkapenawume bakali kukonzya kupona kukabe kutamani kuti balya mubili wakwe ngubakali kubona akuti banywa ganzi lyakwe.

JESU MBAAKABELESYA MAJWI AAKOZYENIE MUZYIIMO ZIBILI ZISIYENE

7. Bamwi baambaanzi atala amajwi aaJesu aali muli Johane 6:53?

⁷ Bamwi bantu bali muli zimwi zikombelo baamba kuti majwi Jesu ngaakaamba aali muli Johane 6:53 aali atala akulya mubili wakwe akunywa ganzi lyakwe, aamba zyeelede kuchitwa kuChilalilo chaMwaami akaambo kakuti Jesu wakabelesya majwi aakozyenie naakali kuchita Chilalilo chaMwaami. (Mt. 26:​26-28) Baamba kuti muntu woonse uunjila muswaangano waChilalilo chaMwaami weelede kulya chinkwa akunywa wayini yeenzegwa mubantu. Mbuzyaamba na? Kulayandikana kuziba kuti zintu nzibaamba nzyachoonzyo na naakuti pe akaambo kakuti mamiliyoni aabantu nga babungana aandiswe munyika yoonse kumuswaangano ooyu. Tulalanga-langa musiyano uuliwo kumajwi aajanika muli Johane 6:53 anzyaakaamba Jesu kuChilalilo chaMwaami.

8. Nguuli musiyano uuliwo aakati kazyiimo zibili Jesu mpaakabelesya majwi aakozyenie? (Langa zifanikisyo.)

⁸ Atubone musiyano uuliwo aakati kazyiimo eezi zibili. Wakusaanguna, ndiilili alubo nkuukuli Jesu nkwaakaambila majwi aajanika  muli Johane 6:​53-56? Wakaamba majwi aaya mu 32 C.E., kabuzya maJuda bakali muGalili. Kulakonzeka kuti kwakasyeede munyaka kuti achite Chilalilo chaMwaami kuJerusalema. Wachibili, mbaani mbaakali kwaambila majwi aaya? Jesu wakali kubuzya bantu bakuGalili bakali kubikkila maanu kunkani yachakulya chakumubili kwiinda kuti bayiye atala aJehova naakuti Bwaami bwaLeza. (Joh. 6:26) Chiindi Jesu naakali kwaamba chintu nchibakatali kumvwisisisya, bakaleka kumusyoma. Nikuba bamwi basikwiiya bakwe bakaleka kumutobela. (Joh. 6:​14, 36, 42, 60, 64, 66) Bantu aaba bakalisiyene abaapostoli basyomeka bali 11 Jesu mbaakali aabo naakachita Chilalilo chaMwaami mumunyaka wakazootobela mu 33 C.E. Naakachita Chilalilo chaMwaami, baapostoli basyomeka bali 11 bakalaamwi aJesu nikuba kuti teebakali kuzimvwisisisya chakumaninina nzyaakayiisya. Nikuba oobo, kusiyana abantu biingi bakuGalili, baapostoli bakwe basyomeka bakali aachoonzyo chakuti Jesu wakali Mwana waLeza wakaseluka kuzwa kujulu. (Mt. 16:16) Wakabalumbayizya kati: “Inywe ndinywe mwakakakatila aandime mumasunko aangu.” (Lk. 22:28) Kusiyana kwazyiimo eezi kutondeezya kuti muli Johane 6:53 Jesu taakali kweezya kupandulula zintu zyakali kunoochitwa kuChilalilo chaMwaami. Pesi kuli bumwi bukamboni butondeezya kuti majwi ngaakaamba Jesu kuzyiimo eezi zibili alisiyene.

MAJWI JESU NGAAKAAMBA AAMBAANZI KULINDISWE?

9. Majwi Jesu ngaakaamba aaChilalilo chaMwaami abeleka kuli bani?

⁹ Naakachita Chilalilo chaMwaami, Jesu wakabapa chinkwa chitakwe bumena baapostoli bakwe alubo wakababuzya kuti chiiminina mubili wakwe. Alubo wakabapa wayini mpawo wakaamba kuti yiiminina ‘ganzi lyachizuminano.’ (Mk. 14:​22-25; Lk. 22:20; 1 Kor. 11:24) Nzyaakaamba atala achizuminano ziyandikana loko. Chizuminano chipya chichitwa “abamung’anda ya-Israyeli” banooli ‘muBwaami bwaLeza,’ kutali bantu boonse. (Heb. 8:​6, 10; 9:15) Baapostoli teebakazimvwisisisya pe zintu eezi aachiindi eecho, pesi bakali kuzoonanikwa aamuuya uusalala akunjila muchizuminano chipya kuti babe aandawu kujulu kabali aamwi aJesu.—Joh. 14:​2, 3.

10. Zintu Jesu nzyaakabuzya bantu kuGalili zisiyene biyeni anzyaakaamba naakachita Chilalilo chaMwaami? (Langa chifanikisyo.)

¹⁰ Jesu naakachita Chilalilo chaMwaami, wakali kubikkila maanu ‘kukatanga kaniini.’ Kabunga aako, kakasaanguna aabaapostoli bakwe basyomeka mbaakali aabo mung’anda. (Lk. 12:32) Baapostoli mbabo bakeelede kulya chinkwa akunywa wayini mubuzuba oobo alubo bamwi bakazoobajoyina ambabo bakeelede kulya chinkwa akunywa wayini nibakali kuchita Chilalilo chaMwaami. Kabunga kabantu aaka bayookkalaamwi aJesu kujulu. Nzyaakaamba Jesu kubaapostoli bakwe naakali kuchita Chilalilo chaMwaami zilisiyene azyakachitika naakali kwaambuula aankamu yabantu kuGalili. Majwi ngaakaamba akali kuswaanizya bantu biingi.

11. Niinzi Jesu nzyaakaamba muGalili zitondeezya kuti taakali kwaamba bantu bache pe?

¹¹ Jesu naakali muGalili mu32 C.E., wakali kwaambuula aamaJuda bakali kuyanda chakulya chakumubili kulinguwe. Nikuba oobo, Jesu wakababuzya chintu chakali kuyandikana loko chakali kupa kuti bazoojane buumi butamani kutali kubikkila maanu  kuchakulya chakumubili. Alubo Jesu wakaamba kuti aabo bakafwa bakali kuzoobusigwa mubuzuba bwamamanino alubo bazoopone kukabe kutamani. Jesu taakali kwaambuula atala abantu bache pe mbuli mbaakachita kuChilalilo chaMwaami. Pesi naakali muGalili wakali kwaamba zintu zikonzya kujanwa aabantu boonse. Wakaamba kuti: “Kufumbwa muntu uulya chinkwa eechi, uzoopona kukabe kutamani . . . chinkwa nchindipa, mubili wangu akaambo kabuumi bwanyika.”—Joh. 6:51. c

12. Niinzi nzitweelede kuchita kuti tukajane buumi butamani?

¹² Jesu wakali kwaamba kuti muntu woonse wakali kuzoojana buumi butamani na? Inee. Aabo kupela balya chinkwa chakukozyanisya mbabo bakali kuzoogwasigwa, chaamba aabo bali aalusyomo mulinguwe. Bantu biingi balyaamba kuti maKkristu baamba kuti balakonzya kufutulwa kuti ‘baba aalusyomo’ muli Jesu kupela akuti bamubona kuti mufutuli wabo. (Joh. 6:29) Pesi bamwi bakali kumusyoma Jesu bakazoomukaka. Nkamboonzi?

13. Kuba mutobeli waJesu wachoonzyo kuswaanizyaanzi?

¹³ Nkamu yabantu Jesu njaakasanina bakamutobela akaambo kakuti wakabapa nzibakali kuyanda. Bakali kubotelwa nibakali kubona Jesu kaponia bantu munzila yachigambyo, kali kubapa chakulya katababbadalisyi pe anaakali kubayiisya munzila mbotu. Nikuba oobo, Jesu wakatondeezya kuti kuli zyiingi  nzibakeelede kuchita kuti babe batobeli bakwe bachoonzyo. Taakazide aanyika kuti azoobape zintu nzibakali kuyanda zyakumubili bantu. Pesi wakali kuyanda kuti baswiilile naakababuzya kuti ‘amuze kulindime’ kwiinda mukutambula akuswiilila zintu zyoonse nzyaakayiisya.—Joh. 5:40; 6:44.

14. Niinzi nzitweelede kuchita kuti tugwasigwe aamubili aganzi lyaJesu?

¹⁴ Jesu naakali kwaambuula aankamu yabantu, wakasimya kaambo kakuti bakeelede kuba aalusyomo mulinguwe. Bakali kuzichita biyeni eezi? Kwiinda mukusyoma kuti mubili wakwe aganzi lyakwe nzizyo zyakali kupa kuti bazookonzye kupona kukabe kutamani. Kwakali kuyandikana kuti maJuda babe aalusyomo oolo, andiswe tweelede kubaalo lusyomo oolu mazubaano. (Joh. 6:40) Andiswe kuti tugwasigwe aamubili aganzi lyaJesu, zyaambidwe muli Johane 6:​53, tweelede kuba aalusyomo muchinunuzyo. Bantu biingi balakonzya kujana chilongezyo eechi.—Ef. 1:7.

15-16. Nziizili zintu ziyandikana nzitwayiya muli Johane chaandaano 6?

¹⁵ Nkani iili muli Johane chaandaano 6 iyandikana loko kulindiswe toonse. Itondeezya kuti Jesu ulaandaba abantu. Naakali muGalili wakaponia bachiswa, wakabayiisya atala aBwaami alubo wakabasanina. (Lk. 9:11; Joh. 6:​2, 11, 12) Kwiinda zyoonse, wakayiisya kuti ngunguwe “chinkwa chabuumi.”—Joh. 6:​35, 48.

¹⁶ Aabo ‘bazimwi mbelele’ tabalyi pe chinkwa akunywa wayini kuChilalilo chaMwaami chichitwa munyaka amunyaka. (Joh. 10:16) Pesi balagwasigwa amubili aganzi lyaJesu Kkristu. Bachita oobo kwiinda mukuba aalusyomo muchinunuzyo chaJesu Kkristu amuzintu nzyatazoochite muchiindi chilikunembo. (Joh. 6:53) Aabo balya chinkwa akunywa wayini, batondeezya kuti nchipanzi chachizuminano chipya alubo bali aabulangilizi bwakuyooyendelezya muBwaami bwakujulu. Kazitakwe ndaba kuti tuli maKkristu bananikidwe naakuti bazimwi mbelele, nkani iili muli Johane chaandaano 6 ilatugwasya toonse. Itondeezya mbukuyandikana kuba aalusyomo muchinunuzyo akuti tukajane buumi butamani.