Mwaapostoli Pawulu wakalembela mwaalunyina Timoti kuti: “Ndilikukulayilila changuzu kunembo lyaLeza aKkristu Jesu angilozi zisalidwe, kuti ubambe malayilile aaya, kutalangi mbaboneka muntu alubo kutasaluuli pe.”—1 Tim. 5:21.

Kuti tuzibe kuti nziizili ngilozi nzyaakali kwaamba Pawulu, tulasaanguna kulanga-langa kuti nziizili ngilozi zitaswaanizidwe pe mungilozi eezi. Zili aantanganana kuti Pawulu taakali kwaamba aabo bali 144 000. Chiindi Pawulu naakalembela Timoti, mabambe aabubuke bwamaKkristu bananikidwe kuti baye kujulu taakayinasaanguna pe. Baapostoli abamwi bananikidwe teebakayinaba zilenge zyamuuya pe, nkinkaako, kulakonzeka kuti ‘ngilozi zisalidwe’ teezyakali kwaamba mbabo pe.—1 Kor. 15:​50-54; 1 Tes. 4:​13-17; 1 Joh. 3:2.

Alubo, ‘ngilozi zisalidwe’ teenzizyo pe ngilozi zyakapapila Jehova muchiindi chaZambangulwe. Ngilozi eezyo zyakaba kubbazu lyaSaatani alubo zyakaba madimoni. Zyakali kukazya Jesu. (Matl. 6:2; Lk. 8:​30, 31; 2 Pet. 2:4) Muchiindi chilikunembo, ngilozi eezyo zizoowaalilwa mumulindi uutagoli kwaminyaka iili 1 000 alubo niyaakumana minyaka eeyi, zizoonyonyoonwa aamwi aDyabbulosi.—Jud. 6; Chi. 20:​1-3, 10.

Nkinkaako, ‘ngilozi zisalidwe’ nzyaakaamba Pawulu kulakonzeka kuti nzeezyo zisyomeka kuli Jehova zibelekaamwi ‘aLeza aJesu Kkristu,’ anzizyo ngilozi eezyo zyaambidwe muvesi eeyo.

Kuli ngilozi zyiingi loko zisyomeka. (Heb. 12:​22, 23) Tatweelede kuyeeya kuti ngilozi zyoonse zichita mulimu uumwi kupela. (Chi. 14:​17, 18) Tutalubi kuti Jehova wakatuma ngilozi iimwi kuti inyonyoone masooja aaku-Asiriya bali 185 000. (2 Bam. 19:35) Alubo zimwi ngilozi zilakonzya kuzootumwa kuti zizoogwisye “zintu zyoonse zilebya abantu batatobeli mulawu muBwaami [bwaJesu].” (Mt. 13:​39-41) Zimwi zilakonzya kuzootumwa kuti ‘zizoobunganizye bantu bakwe basalidwe’ kuti baye kujulu. (Mt. 24:31) Alubo eezi zimwi zilayililwa kuti ‘zitukwabilile munzila zyesu zyoonse.’—Int. 91:11; Mt. 18:10; yezyanisya aa Mateyo 4:11; Lukka 22:43.

‘Ngilozi zisalidwe’ zyaambidwe muli 1 Timoti 5:21 kulakonzeka kuti zyakapedwe mulimu wakuti zilanganie mbungano. Muvesi eeyi, Pawulu wakali kubapa malayilile aayandikana baalu aambubakonzya kuchita milimu yabo mumbungano. Baalu bakeelede kuchita milimu yabo ‘kabatalangi mbaboneka muntu alubo kabatasaluuli pe.’ Alubo nibakali kusala zyakuchita naakuti nibakali kubeteka, teebakeelede kuzichita kabatayeeyede pe. Kaambo kakapa kuti Pawulu abalembele lugwalo oolu nkakuti nibakali kuchita mulimu wabo bakali kuzichita “kunembo lyaLeza aKkristu Jesu angilozi zisalidwe.” Zili aantanganana kuti zimwi ngilozi zipedwe milimu yakuchita mumbungano iili mbuli, kukwabilila, kuzulwida mumulimu wakukambawuka akusisya makani kuli Jehova.—Mt. 18:10; Chi. 14:6.