Ndakazyalilwa mudolopo lyaQuebec lili muchilawu chaQuebec mwaambulwa chiFrench muCanada. Bazyali bangu Louis aZélia bakandikomezya munzila yaluyando. Ndeende wakali aabweeme alubo wakali kuyandisya kubala. Ndakali kuyandisya kulemba-lemba alubo ndakali kulombozya kuzooba sikupupulula twaambo.

Nindakaba aminyaka iili 12, umwi mwaalumi utegwa Rodolphe Soucy wakali kubeleka aNdeende wakatuswaya kali amweenzinyina. Bakali baKamboni baJehova. Takwe nzindakazi pe atala abaKamboni alubo teendakalaandaba pe atala achikombelo chabo. Pesi ndakabotelwa anzila njibakali kusandulaayo mibuzyo kababelesya Bbayibbele. Abazyali bangu zyakababotezya, nkinkaako twakazumina kwiiya Bbayibbele.

Aachiindi eecho ndakali kwiiya kuli chimwi chikolo chaRoma. Chimwi chiindi ndakali kwaambuula abantu mbindakali kwiiya aabo atala azintu nzindakali kwiiya muBbayibbele. Mpawo bayiisi besu bakali bapayizi bakazibona. Muchiindi chakuti bandisandule kababelesya Magwalo, umwi wabo wakandipopotela kunembo lyabana bachikolo mukkilasi kaamba kuti ndabapandukila. Nikuba kuti chiimo eechi chakali kukataazya, chakaba chilongezyo nkaambo chakandigwasya kubona kuti nzitwakali kuyiisigwa kuchikolo tazyeendelani pe azyaambwa aBbayibbele. Ndakabona kuti ndakeelede kuzwa aachikolo eechi. Bazyali bangu bakandizumizya kuti ndikayiye kuli chimwi chikolo.

Ndakayinkilila kunembo kwiiya Bbayibbele pesi ndakanonoka kubweza ntaamu nkaambo  ndakali kuyoowa kukambawuka kung’anda ang’anda. Chikombelo chaRoma chakali kukazya mulimu wesu wakukambawuka . Maurice Duplessis wakali mupati wazyapolitikisi muQuebec alubo wakali kunjila Roma. Akaambo kakugwasigwa anguwe, bantu bakali kuyoosezya baKamboni alubo bakali kubalwana. Zyakali kuyanda chibindi kuti ukambawuke.

Mukwesu John Rae wakagilajuweta mukkilasi yachi9 kuChikolo chaGiliyadi wakandigwasya kuti ndizunde kuyoowa. John wakali aluzibo alubo wakali kulibombya. Takwe naakali kukkala kandibuzya zyakuchita pe pesi ndakayiya kuzwa kuchikozyano chakwe chibotu. John taakachizi kabotu pe chiFrench nkinkaako ndakali kumusindikila kukukambawuka kandiya bumuyiisya chiFrench. Kujana chiindi chakuba aJohn kwakandigwasya kuti ndikonzye kubweza ntaamu. Ndakabbabbatizigwa mu 26 May 1951 kakuli kwayinda minyaka iili 10 kuzwa nindakaswaanana abaKamboni.

Mbungano njindakali kunjilaayo kuQuebec yakali niini pesi biingi bakali kupayona. Nzibakali kuchita zyakapa kuti andime nditalike kupayona. Aachiindi eecho twakali kukambawuka kung’anda ang’anda katubelesya Bbayibbele luzutu. Twakeelede kwaabelesya kabotu Magwalo, mbukunga teetwakalikwe mabbuku pe. Nkinkaako ndakabeleka changuzu kuti ndikonzye kuziba mavesi amutwe kuchitila kuti ndikonzye kukambawuka. Nikuba boobo, bamwi bantu bakali kukaka kubala Bbayibbele kapati kuti kalitakwe chidindo chaRoma.

Mu1952, ndakakwata Simone Patry muchizi uusyomeka ngutwakali kunjilaamwi. Kuzwa waawo twakaya kuMontreal alubo mumunyaka nguyooyo twakaba amwana musimbi uutegwa Lise. Nikuba kuti ndakali ndaleka kupayona nindakayanda kukwata, twakazumanana kupona buumi buuba kuchitila kuti tuchite zyiingi mumbungano katuli mpuli.

Nikwakayinda minyaka iili 10 ndakayeeya kuyungizya mulimu wangu wakukambawuka. Mu1962 ndakatambwa kuChikolo Chamulimu waBwaami chabaalu kuBbeteli yakuCanada. Chikolo eecho chakali kutola mweezi alubo ndakali kukkala amukwesu Camille Ouellette. Busungu mbwaakali aabo Camille mumulimu wakukambawuka bwakandisungwaazya kapati nkaambo alakwe wakali ampuli. Chiindi, kwakali kuche kumvwa kuti muntu ngupayona kumwi kali kukomezya mwana pesi  Camille nzyaakali kuchita. Mazuba ngitwakali aamwi wakali kundisungwaazya kuti ndiyeeye atala achiimo changu. Nikwakayinda myeezi miche, ndakazoobona kuti ndilakonzya lubo kuba payona wachiindi choonse. Bamwi bakali kwaamba kuti teendakasala kabotu pesi ndakayinkilila kunembo kandisyoma kuti Jehova uzoondilongezya akaambo kakubeleka changuzu mumulimu wakukambawuka.

Mu1964 twakakumbilwa kuti tube mapayona aayandikana kuQuebec dolopo lyakulindiswe alubo twakabeleka kwaminyaka myiingi. Aachiindi eecho mulimu wakukambawuka teewakachili kukasigwa pesi bamwi bakali kukazya.

Limwi zuba muMugibelo sikati ndakasungwa kuSainte-Marie kadolopo kaniini kali aafwiifwi akuQuebec. Mupolisa wakanditola kunkambe mpawo bakandinjizya muchitokesi nkaambo ndakali kukambawuka kung’anda ang’anda kanditakwe pemiti. Mukuya kwachiindi ndakazootolwa kumubetesi uutegwa Baillargeon wakali kuyoosya. Mpawo wakabuzya kuti ngwani utazoobe loya wangu. Nindakamubuzya kuti nguGlen How, * loya waBakamboni wakazibikene loko, Baillargeon wakati: “Ah! Kuti ngoyo mwawina.” Glen How wakali ampuwo mpati yakukwabilila Bakamboni muchiindi eecho. Kuzwa waawo bakandibuzya kuti mulandu wangu wamana.

Kukasigwa kwamulimu wesu kuQuebec kwakapa kuti kutuyumine kujana busena bubotu bwakunjilila miswaangano. Nkinkaako mbungano yesu yakali kunjilila mugalaji yachiindi mwakali kutontola. Bakwesu bakali kubelesya kamwi kanchina kuti bakasalilwe muchiindi champeyo. Kwama-awa mache miswaangano kayitanatalika twaakali kukkala aafwiifwi ankako kuti tukasalilwe kumwi katulokusungwaazyania.

Kulabotezya kuziba kuti mulimu wakukambawuka wakazwidilila muminyaka yakazootobela. Mu1960, kwakali mbungano ziche alubo ziniini muQuebec, Côte-Nord, akuGaspé Peninsula. Pesi mazubaano kwakaba mabazu ayinda aabili mumasena aaya alubo bakwesu banjilila muMaanda aaBwaami mabotu loko.

Mu1970 twakakumbilwa kuti tubeleke mumulimu wabbazu. Mpawo mu1973 ndakazooba mulangizi wabbooma. Muminyaka eeyo ndakayiya zyiingi kuzwa kubakwesu bakali amikuli baswaanizya Laurier Saumur * aDavid Splane, * bakali mumulimu wakweendeenda. Nitwakali kumaninsya miswaangano yamabazu, ime aDavid twakali kubuzyania mputweelede kubambulula mukuyiisya. Ndichiyeeyede limwi zuba David naakandibuzya kuti: “Léonce nkani yako yamamanino yandinoneezya loko. Yali mbotu loko, pesi ndilakonzya kugwisya nkani zitatu munkani yako.” Ndakali kwaamba zintu zyiingi munkani zyangu. Ndakeelede  kwiiya kubelesya majwi mache.

Balangizi bamabbooma bakali kubeleka kusungwaazya balangizi bamabazu. Bakwesu biingi bakuQuebec bakalindijayide. Bakali kuyandisya kwiinka andime mumulimu wakukambawuka chiindi nindakali kuswaya mabazu aabo. Nikuba kuti kwakali kunoneezya kubeleka aabo mumulimu wakukambawuka, takwe nindakali kujana chiindi chiingi chakuba amulangizi wabbazu. Chimwi chiindi umwi mulangizi wabbazu ulaaluyando wakandigwasya naakandibuzya kuti: “Kuli kabotu loko kujana chiindi chakuba abakwesu abachizi pesi eeyi nimviki yangu. Andime ndiyanda kusungwaazigwa.” Lulayo oolu lwakandigwasya kuti ndibe amaboneno alikabotu.

Chuusisya nchakuti mu1976 kwakachitika chintu nchindakatali kuyeeyela pe. Mwanakazi wangu Simone wakachiswa mpawo wakoona mulufu. Kulipeda akuyandisya Jehova nkwaakali kuchita kwakapa kuti abe mugwasilizi mubotu. Kukkala kandijisikini mumulimu wakukambawuka kwakandigwasya kuti ndilisimye alubo ndilamulumba Jehova nkaambo wakandigwasya muchiindi eecho chiyumu. Mukuya kwachiindi ndakazookwata Carolyn Elliott muchizi wakali kwaambuula Chikuwa. Muchizi ooyu wakali payona musungu wakali waza kuQuebec kwakali kuyandikana basikugwasilizya. Carolyn ulaangunukide kuti bantu kabaambuulaawe alubo ulabayanda bantu, kapati balaabweeme abalendeledwe. Wakandigwasya loko chiindi nitwakali kweendaamwi mumulimu wakweendeenda.

MuJanuary 1978 ndakakumbilwa kuti ndikayiisye kkilasi yakusaanguna kuChikolo chaMulimu wabuPayona kuQuebec. Ndakakataazikana loko nkaambo chikolo eechi chakali chakusaanguna. Ndakabotelwa loko nkaambo kkilasi eeyi yakali aamapayona balaaluzibo. Bakandiyiisya zyiingi loko nikuba kuti ndakali muyiisi wabo.

Kumamanino aamunyaka wa1978 kwakaba Muswaangano Wazisi kuMontreal Olympic  Stadium wakali amutwe uuti “Victorious Faith.” Ooyu nguwakali muswaangano mupati kwiinda yoonse kuQuebec nkaambo wakali abantu bayinda ku80 000. Aamuswaangano ooyu ndakakumbilwa kuti ndibeleke adipatimenti yaNews. Ndakaambuula abasikupupulula twaambo biingi alubo ndakali kubotelwa kubona kuti bakalemba zintu zibotu atala andiswe. Bakali kupupulula mbuzisisyo muradio amuTV kwama-awa ayinda ku20 alubo bakadinda myaanda yamabbuku eesu. Oobu bwakali bumboni bupati.

Mu1996 kwakaba kuchincha kupati. Kuzwa nindakabbabbatizigwa ndakali kubelekela kuQuebec kwaambuulwa chiFrench pesi ndakazookumbilwa kuti ndikabelekele kuToronto bbooma lyaambuulwa Chikuwa. Ndakalibona kanditeeleli pe alubo ndakali kuyoowa kupa nkani muChikuwa chityokede. Ndakeelede kukomba twiingi akusyoma Jehova.

Nikuba kuti ndakali kuyoowa nitwakatalika, ndakabotelwa kubeleka kuToronto kwaminyaka iibili. Carolyn wakandigwasya kuti ndibe achibindi chiindi nindaambuula Chikuwa alubo bakwesu bakali kundigwasya akundisungwaazya. Twakafwambaana kuba aabeenzuma bapya.

Kuyungizya akulibambila muswaangano wabbazu wakali kuba kumamanino aamviki, ndakali kuyandisya kukambawuka kung’anda ang’anda kwa-awa goko muli Bwasanu. Amwi bamwi bakali kulibuzya kuti: ‘Nkamboonzi nachita oobu nikuba kuti nga ulijisikini akaambo kamuswaangano?’ Pesi kwaambuula abantu mumulimu wakukambawuka kwakali kundisugwaazya. Nikuba lino kukambawuka kulandibotezya.

Mu1998 twakakumbilwa kuti tukabeleke katuli mapayona aayandikana kuMontreal. Kwaminyaka myiingi, mulimu wangu wakali kuswaanizya kubamba bukambawusi bwaantanganana akubelekaamwi abasikupupulula twaambo kandilulamika makani aatali kabotu atala aBakamboni baJehova. Ime aCarolyn tulabotelwa kukambawukila bantu bakalongela kuCanada baambuula imwi milaka bayanda kwiiya Bbayibbele.

Kuti ndayeeya atala aminyaka iili 68 kandili mukombi waJehova uubbabbatizidwe, ndichibona kachili chilongezyo. Ndakabotelwa nkaambo ndakaziba mbundikonzya kubotelwa mumulimu wakukambawuka alubo ndakagwasya bantu kuti bazibe kasimpe. Mwanaangu Lise amulumaakwe bakatalika kupayona nibakakomezya bana babo. Kumubona kali musungu mumulimu wakukambawuka kulandibotezya. Ndilabalumba Bakombima bakandigwasya kwiinda muzikozyano zyabo zibotu akundilaya, kuti ndisime mubukombi akuti ndikonzye kuchita imwi milimu yamubukombi. Ndakabona kuti ziyanda muuya uusalala waJehova kuti tukonzye kukkala katusyomekede kumilimu njituchita. (Int. 51:11) Ndilamulumba Jehova akaambo kakundizumizya kutembawula zina lyakwe!​—Int. 54:6.