CHIIYO 5
“Mutwe Wamwaalumi Uuli Woonse Ngu Kristo”
“Mutwe wamwaalumi uuli woonse ngu Kristo.”—1 KOR. 11:3.
LWIIMBO 12 O Jehova, Uli Leza Mupati
ZITAYIIGWE *
1. Bamwi baalumi bazizulwida biyeni mpuli zyabo?
KUBA muzulwidi chambaanzi? Bamwi baalumi bazulwida mpuli zyabo kabatobelezya zintu zichitwa kubusena nkubakkala. Yanita uukkala kuEurope wakati, “Nkundikkala banakazi balangilwa aansi kwiinda baalumi zyakuti babonwa mbuli babelesi.” Alubo mukwesu uutegwa Luke uukkala kuUnited States wakati, “Bamwi baalumi bayiisya bana babo balombe kuti, nzibaamba banakazi tazikwe mutwe pe nkinkaako, tabeelede kubaswiilizya pe.” Pesi, maboneno aaya tayendelani pe anzila Jehova njayanda kuti baalumi bazulwide mpuli zyabo. (Kozyanisya a Marko 7:13.) Niinzi nzibeelede kuchita baalumi kuti bazulwide kabotu mpuli zyabo?
2. Niinzi nzyayelede kuziba mutwe wampuli alubo nkamboonzi?
2 Kuti mwaalumi abe mutwe wampuli uulikabotu, weelede kuziba zintu Jehova nzyalangilila kuti achite. Alubo weelede kuziba mbakonzya kutobelezya chikozyano chaJehova aJesu akuti nkamboonzi Jehova naakapa bamwi mulimu wakuti bazulwide. Nkamboonzi nikuyandikana kuti mwaalumi azibe zintu eezi? Nkaambo Jehova uyanda kuti nguzu nzyamupede zyakuti azulwide mpuli yakwe azibelesye kabotu.—Lk. 12:48b.
KUZULWIDA KUSWAANIZYAANZI?
3. Lugwalo lwa 1 Bakorinto 11:3, lutuyiisyaanzi atala abusilutwe?
3 Bala 1 Bakorinto 11:3. Lugwalo oolu lutondeezya busilutwe Jehova mbwabikkide kumpuli yakwe yakujulu ayaanyika. Mbukunga Jehova nguwe wakatalisya mabambe aabusilutwe, eezi zyaamba kuti nguwe uuli aanguzu zyoonse. Jehova wakapa bamwi nguzu zyakuti bazulwide bamwi alubo bantu aabo bayoolyaambilila kulinguwe atala anzila njibazulwidaayo. (Rom. 14:10; Ef. 3:14, 15) Jehova wakapa Jesu mulimu wakuti azulwide mbungano, eezi zyaamba kuti Jesu uyoolyaambilila kuli Jehova kunzila njatuzulwidaayo. (1 Kor. 15:27) Alubo Jehova wakapa mwaalumi mulimu wakuti azulwide mpuli yakwe. Nikuba boobo, mwaalumi uyoolyaambilila kuli Jehova akuli Jesu kunzila njazulwidaayo mpuli yakwe.—1 Pet. 3:7.
4. Jehova aJesu bali aanguzu zyakuchitaanzi?
4 Mbukunga Jehova nguwe mutwe wampuli yakujulu ayaanyika, uli aanguzu zyakupa bana bakwe milawu njibeelede kutobelezya akubabeteka kuti baleka kwiitobelezya. (Is. 33:22) Jesu mbuli mutwe wambungano, alakwe uli aanguzu zyakutupa milawu akuba aachoonzyo chakuti twayitobelezya.—Gal. 6:2; Kol. 1:18-20.
5. Mutwe wampuli yachiKristu uli aanguzu zyakuchitaanzi alubo nguzu zyakwe zigolelaali?
5 Mbuli Jehova aJesu, mutwe wampuli yachiKristu uli aanguzu zyakusalila mpuli yakwe zintu zyakuchita. (Rom. 7:2; Ef. 6:4) Pesi nguzu zyakwe kuli mpuzigolela. Muchikozyano, mutwe wampuli weelede kubelesya malayilile aali muJwi lyaLeza kuti ape mpuli yakwe milawu. (Tus. 3:5, 6) Alubo takwe nguzu zyakuti abikkile zimwi mpuli milawu. (Rom. 14:4) Bana bakwe nibakomena akuzwa aang’anda balazumanana kumulemeka pesi nga tabachizulwidwi aanguwe pe.—Mt. 19:5.
NKAMBOONZI JEHOVA NAAKAPA BAMWI MULIMU WAKUTI BAZULWIDE?
6. Nkamboonzi Jehova naakapa bamwi mulimu wakuti bazulwide?
6 Jehova wakabikka mabambe aakuti bamwi bazulwide akaambo kakuti ulayiyanda mpuli yakwe. Mabambe aaya nchipo chizwa kulinguwe. Mabambe aakuti kube bamwi bazulwida apa kuti kube luumuno akuti zintu zyeende munzila iilikabotu. (1 Kor. 14:33, 40) Kaansinga Jehova taakazibikka aantanganana pe kuti ngwani weelede kuzulwida nikuli zintu tazyeendi munzila iilikabotu pe alubo nikuli zilenge zyakwe zyoonse tazibotelwi pe. Muchikozyano, nikuli tatuzi pe kuti ngwani weelede kusala zyakuchita akuti ngwani weelede kubelesya zintu zyasalwa.
7. Kweendelana alugwalo lwa Baefeso 5:25, 28, Jehova uyanda kuti baalumi babajate biyeni banakazi babo?
7 Kuti mabambe aaLeza aakuti kube bamwi bantu bazulwida kagwasya, nkamboonzi bamwi banakazi nibalimvwa kuti balumi babo balabadyaaminina akuti babajata chalunya? Nkaambo baalumi biingi tabatobelezyi malayilile aaJehova pe, pesi batobelezya ziyanza zichitwa nkubakkala. Bamwi balakonzya kujata banakazi babo munzila yalunya kabayanda kuzuzikizya nzibayanda. Muchikozyano, mwaalumi ulakonzya kujata mwanakazi wakwe munzila yalunya kayanda kuti bamwi bamuyoowe akuti alimvwe kuti “mwaalumi.” Ulakonzya kuyeeya kuti, nikuba kuti tandikonzyi pe kusinikizya mwanakazi wangu kuti andiyande pesi ndilakonzya kupa kuti andiyoowe. Alubo ulakonzya kuyeeya kuti, kuti mwanakazi wangu wandiyoowa ndilakonzya kupa kuti achite kufumbwa nzindiyanda. * Kuyeeya kuli boobu takuli kabotu pe nkaambo mwaalumi nga talikumulemeka pe mwanakazi wakwe alubo eezi teenzizyo pe nzyayanda Jehova.—Bala Baefeso 5:25, 28.
NIINZI NZIBEELEDE KUCHITA BAALUMI KUTI BAZULWIDE KABOTU MPULI ZYABO?
8. Niinzi nzibeelede kuchita baalumi kuti bazulwide kabotu mpuli zyabo?
8 Kutobelezya chikozyano chaJehova aJesu kulakonzya kugwasya mwaalumi kuti ayizulwide kabotu mpuli yakwe. Atulange-lange bumwi buntu bwakatondeezegwa aaJehova aJesu mpawo tubone kuti baalumi nga balabutondeezya biyeni buntu oobo nibali kuzulwida mpuli zyabo.
9. Jehova utondeezya biyeni kuti ulalibombya?
9 Kulibombya. Jehova musongo kwiinda bantu boonse bali munyika. Nikuba boobo, ulaziswiilila zyaambwa aabakombi bakwe. (Matl. 18:23, 24, 32) Wakazumizya bangelo kuti baambe maboneno aabo. (1 Bam. 22:19-22) Jehova ulimaninide pesi talangilili kuti tuchite zintu munzila iimaninide. Alubo ugwasya bantu bali aachibi kuti bazwidilile chiindi nibachita milimu yakwe. (Int. 113:6, 7) Bbayibbele limwaamba kuti “mugwasyi.” (Int. 27:9; Heb. 13:6) Mwaami Davida wakaamba kuti, kulibombya kwaJehova nkuko kwakamugwasya kuti achite milimu mipati.—2 Sam. 22:36.
10. Jesu wakatondeezya biyeni kuti ulalibombya?
10 Atulange-lange chikozyano chaJesu. Nikuba kuti Jesu wakali Mwaami akuti wakali Simalelo pesi wakasanzya mawulu aabasikwiiya bakwe. Nkamboonzi Jehova naakapa kuti makani aaya alembwe muBbayibbele? Zilaantanganana kuti Jehova wakali kuyanda kuti toonse kuswaanizya amitwe yampuli tutobelezye chikozyano chaJesu. Jesu wakaamba kuti: “Ndamupa citondezyo, kuti mbubonya mbondamucitila, kamucita mbubonya andinywe.” (Joh. 13:12-17) Nikuba kuti Jesu wakali Simalelo, taakali kuyanda kubelekelwa pe pesi wakali kuyanda kubelekela bamwi.—Mt. 20:28.
Mutwe wampuli ulakonzya kutondeezya kuti ulalibombya akuti ulayiyanda mpuli yakwe kwiinda mukuchita milimu yaang’anda akugwasya mpuli yakwe muzintu zyabukombi (Langa fuka 11, 13)
11. Chikozyano chaJehova aJesu chimuyisyaanzi mwaalumi atala akulibombya?
11 Twiiyaanzi? Mutwe wampuli ulakonzya kutondeezya kuti ulalibombya munzila zisiyene-siyene. Muchikozyano, tayelede kulangilila kuti mwanakazi wakwe abana bakwe bachite zintu munzila iimaninide. Ulaswiilila zyaambwa aampuli yakwe nikuba kuti chimwi chiindi nga tabazuminani pe anzyalikwaamba. Marley uukkala kuUnited States wakaamba kuti: “Chimwi chiindi, ime amulumaangu ngatwaba aamaboneno aasiyene. Nikuba boobo, ndilabotelwa kuti mulumaangu ulandilemeka nkaambo ngawasaanguna kundibuzya nzindiyeeya akuyeeyesesya atala anzizyo katanasala zyakuchita.” Kuyungizya aali zeezi, mwaalumi uulibombya ulalipeda kuchita milimu yaang’anda nikuba kuti muchilawu mwakkala milimu eeyi ibonwa kuti njabanakazi. Teekuba pe kuchita oobu. Nkamboonzi? Muchizi uutegwa Rachel wakaamba kuti, “Nkundizwa kuti mwaalumi wasanzya ndido naakuti kusalazya mung’anda, basimayakilane ababbululu balasaanguna kwaamba kuti ‘wakalisigwa ooyu.’ Alubo ngabayeeya kuti mwanakazi nguwe ulikuzulwida mumpuli.” Kuti maboneno aaya kasungwaazigwa kuchilawu nkukkala, yeeya kuti Jesu wakasanzya mawulu aabasikwiiya bakwe nikuba kuti mulimu ooyu wakali kubonwa kuti weelede kuchitwa abazike. Mwaalumi uulibombya tachiti zintu zibotezya nguwe luzutu pesi uchita zintu zibotezya mpuli yakwe. Kwalino, atubone bumwi buntu mbwayelede kuba aabo mwaalumi kuti akonzye kuba mutwe wampuli uulikabotu.
12. Niinzi nzibakachita Jehova aJesu kutondeezya kuti balatuyanda?
12 Luyando. Zintu zyoonse nzyachita Jehova ulazichita aakaambo kaluyando. (1 Joh. 4:7, 8) Akaambo kakuti ulatuyanda, Jehova utupa chakulya chamubukombi kabelesya Jwi lyakwe Bbayibbele ambunga yakwe. Jehova ulatugwasya nitukataazikene kwiinda mukupa kuti tube aachoonzyo chakuti ulatuyanda. Kutegwani azintu zyakumubili? Jehova utupa “camoyo woonse zintu zyoonse nzyotukkomanina.” (1 Tim. 6:17) Kuti twabisya ulatululamika pesi eezi tazyaambi kuti tachituyandi pe. Jehova wakatupa chinunuzyo akaambo kakuti ulatuyanda. Alubo Jesu wakapa buumi bwakwe akaambo kakuti ulatuyanda. (Joh. 3:16; 15:13) Taakwe chintu chinga chilakachizya Jehova aJesu kuti bayande bantu basyomeka kuli mbabo.—Joh. 13:1; Rom. 8:35, 38, 39.
13. Nkamboonzi mutwe wampuli nayelede kuyanda mpuli yakwe? (Langa kabbokesi kati, “ Niinzi Nzyayelede Kuchita Mwaalumi Uuchizwa Aakukwata Kuchitila Kuti Mwanakazi Wakwe Amulemeke?”)
13 Twiiyaanzi? Zintu zyoonse nzyachita mutwe wampuli weelede kuzichita akaambo kaluyando. Nkamboonzi nikuyandikana kuchita oobo? Mwaapostolo Johane wakaamba kuti: “Ooyo uutayandi munyina [naakuti mpuli yakwe] ngwabwene, takonzyi pe kuyanda Leza ngwatanabona.” (1 Joh. 4:11, 20) Mwaalumi uuyanda mpuli yakwe alubo uutobelezya chikozyano chaJehova aJesu ugwasya mpuli yakwe muzintu zyabukombi, kubatondeezya kuti ulabayanda akubapa nzibayandikana kumubili. (1 Tim. 5:8) Uyiisya bana bakwe akubalulamika. Ulazumanana kusala zintu zipa kuti Jehova alemekwe alubo zigwasya mpuli yakwe. Atuzilange-lange zintu eezi zyeelede kuchitwa aamutwe wampuli alubo tubone kuti nga ulachitobelezya biyeni chikozyano chaJehova aJesu.
NIINZI NZYAYELEDE KUCHITA MUTWE WAMPULI?
14. Mutwe wampuli uyigwasya biyeni mpuli yakwe muzintu zyabukombi?
14 Gwasya mpuli yako muzintu zyabukombi. Jesu wakatobelezya chikozyano chaWisi kwiinda mukugwasya batobeli bakwe kuti babe aalusyomo lusimide. (Mt. 5:3, 6; Mk. 6:34) Munzila iikozyenie, chintu nchayelede kubikka mubusena bwakusaanguna mutwe wampuli nkugwasya mpuli yakwe muzintu zyabukombi. (Dt. 6:6-9) Ulakonzya kuzichita eezi kwiinda mukubala Bbayibbele kali aamwi ampuli yakwe, kunjila miswaangano, kukambawuka makani mabotu akubagwasya kuti babe aabweenzinyina busimide aJehova.
15. Mutwe wampuli nga ulatondeezya biyeni kuti ulayiyanda mpuli yakwe?
15 Tondeezya mpuli yako kuti ulayiyanda. Jehova wakatondeezya aantanganana kuti ulamuyanda Jesu. (Mt. 3:17) Jesu anguwe wakatondeezya kuti ulabayanda batobeli bakwe kwiinda muzintu nzyaakali kuchita anzyaakali kwaamba. Alubo batobeli bakwe bakamubuzya kuti balamuyanda. (Joh. 15:9, 12, 13; 21:16) Mutwe wampuli ulakonzya kutondeezya kuti ulayiyanda mpuli yakwe kwiinda muzintu nzyachita mbuli kubala Bbayibbele kabali aamwi. Weelede kutondeezya kuti ulabayanda akuti ulabalumba, kuti kazichita ulakonzya kuchita oobo nikuba kunembo lyabantu.—Tus. 31:28, 29.
Kuti mutwe wampuli ubotezye Jehova weelede kugwasya mpuli yakwe kuti ijane zintu ziyandikana zyakumubili (Langa fuka 16)
16. Niinzi chimwi nchayelede kuchita mutwe wampuli alubo weelede kuchenjelelaanzi?
16 Gwasya mpuli yako kuti ijane ziyandikana zyakumubili. Jehova wakali kugwasya maIsrayeli kuti bajane ziyandikana zyakumubili nikuba kuti chimwi chiindi teebakali kuswiilila pe. (Dt. 2:7; 29:5) Nikuba mazubaano, ulikutupa ziyandikana zyakumubili. (Mt. 6:31-33; 7:11) Jesu wakapa batobeli bakwe chakulya. (Mt. 14:17-20) Alubo Jesu wakaponia bachiswa. (Mt. 4:24) Kuti mutwe wampuli ubotezye Jehova, weelede kugwasya mpuli yakwe kuti ijane ziyandikana zyakumubili. Pesi kuli nzyayelede kuchenjelela. Tayelede kubikka mulimu mubusena bwakusaanguna zyakuti nga wazookachilwa kugwasya mpuli yakwe muzintu zyabukombi akwitondeezya kuti ulayiyanda.
17. Jehova aJesu batuyiisya biyeni alubo batululamika biyeni?
17 Yiisya bana bako. Jehova ulatuyiisya akutululamika kuchitila kuti zintu zitweendele kabotu. (Heb. 12:7-9) Mbuli Wisi, Jesu utuyiisya munzila yaluyando. (Joh. 15:14, 15) Chiindi natululamika utondeezya kuti uli aaluzyalo. (Mt. 20:24-28) Alubo Jesu ulamvwisisisya kuti tuli bantu bali aachibi akuti chimwi chiindi tulalubizya.—Mt. 26:41.
18. Niinzi nchayelede kuziba mutwe wampuli uulikabotu?
18 Mutwe wampuli uutobelezya chikozyano chaJehova aJesu ulizi kuti bamumpuli yakwe balalubizya akaambo kakuti bali aachibi. Alubo tanyemeni mwanakazi wakwe abana bakwe “cakuzwa munzila.” (Kol. 3:19) Nikuba boobo, utobelezya malayilile aalembedwe muli Bagalatiya 6:1 alubo ubalaya ‘aamoyo uubombede’ nkaambo anguwe ulizi kuti tamaninide pe. Mbuli Jesu, mutwe wampuli ulizi kuti, kuti akonzye kugwasya mpuli yakwe weelede kuba chikozyano chilikabotu.—1 Pet. 2:21.
19-20. Kujana mutwe wampuli wachitobelezya biyeni chikozyano chaJehova aJesu chiindi nasala zyakuchita?
19 Sala zintu zigwasya mpuli yako. Jehova usala zintu zigwasya bamwi kutali zigwasya nguwe luzutu. Muchikozyano, wakatulenga kuchitila kuti tubotelwe abuumi. Taakwe wakamusinikizya pe kuti atupe Mwanaakwe kuti atufwide pesi wakaliyandila kuchitila kuti atununune. Jesu anguwe wakasala zintu zigwasya bamwi. (Rom. 15:3) Muchikozyano, wakaleka kulyookezya naakakatede kuchitila kuti ayiisye bantu.—Mk. 6:31-34.
20 Mutwe wampuli ulizi kuti uli aamulimu mupati wakusala zintu zigwasya mpuli yakwe alubo uubona kawuyandikana mulimu ooyu. Tasali zintu katayeeyede pe naakuti kusala kweendelana ambalimvwa aachiindi eecho. Pesi uzumizya Jehova kuti amuyiisye kusala kabotu. * (Tus. 2:6, 7) Kuchita oobo kuyoopa kuti nzyasala zigwasye bamwi kutali nguwe.—Flp. 2:4.
21. Tuyoolanga-langaanzi muchiiyo chitobela?
21 Jehova wakapa mitwe yampuli mulimu mupati alubo uyanda kuti bawuchite kabotu mulimu ooyu. Kuti mwaalumi watobelezya chikozyano chaJehova aJesu, uyooba mutwe wampuli uulikabotu. Alubo kuti mwanakazi wachita eezyo nzyalangililwa kuti achite, lukwatano lwabo luyoobotezya. Mwanakazi weelede kuubona biyeni mulimu ngwalaawo mwaalumi wakuzulwida mpuli alubo mbuubuli buyumu-yumu mbwaswaanana aabo? Mibuzyo eeyi, iyoosandulwa muchiiyo chitobela.
LWIIMBO 16 Atumutembaule Ja Akaambo ka Mwanaakwe Uunanikidwe
^ par 5 Chiindi mwaalumi naakwata, nga waba mutwe naakuti muzulwidi wampuli yakwe. Muchiiyo eechi, tulalanga-langa kuti kuzulwida kuswaanizyaanzi, nkamboonzi Jehova naakapa bamwi mulimu wakuti bazulwide akuti baalumi bayiyaanzi kuzwa kuchikozyano chaJehova aJesu. Muchiiyo chachibili, tuyoolanga-langa kuti mwaalumi amwanakazi bayiyaanzi kuzwa kuchikozyano chaJesu akuli zimwi zikozyano zili muBbayibbele. Muchiiyo chachitatu, tuzooyiya atala abakwesu bazulwida mumbungano mbubeelede kuzulwida kabotu.
^ par 7 Muzeezo wakuti baalumi balakonzya kujata banakazi babo munzila iitali kabotu akubawuma ulasungwaazigwa mumamuvi, mumaTV amumabbuku. Eezi zilakonzya kupa kuti mwaalumi abonaanga kudyaaminina mwanakazi teekubi pe.
^ par 20 Kuti ujane makani miingi atala ambukonzya kusala kabotu, langa chiiyo chiti, “Ikusala Zyintu Zikonzya Kumulemeka Leza” chijanika muNgazi Yamulindizi yamuApril 15 2011, peji 13-17.
