1. Ndiilili maKkristu bananikidwe basyeede nibatazooyinke kujulu?

 KWAMINYAKA yayinda, bakombi baJehova bakali kulibuzya kuti, ‘Ndiilili maKkristu bananikidwe nibatazooyinke kujulu?’ Twakali kuyeeya kuti amwi bamwi maKkristu bananikidwe banoochili aanyika muParadayizi kwachiindi chifwiifwi nkondo ya-Amagedoni niyazooyinda. Pesi muNgaziyakulinda yamuJuly 15 2013, twakayiya kuti maKkristu boonse bananikidwe batanoochili aanyika bazooyinka kujulu nkondo ya-Amagedoni kayitanasaanguna.—Mt. 24:31.

2. Nguuli mubuzyo bamwi ngubakonzya kulibuzya, alubo tulalanga-langaanzi muchiiyo eechi?

² Nikuba oobo, bamwi balakonzya kubuzya kuti: Niinzi zitazoochitike kuli ‘bazimwi mbelele’ babelekela Jehova kabasyomeka muchiindi ‘chamapenzi mapati’? (Joh. 10:16; Mt. 24:21) Mazubaano, bamwi balakonzya kukataazikana kuti bayoobula zyakuchita naakuti bayoolimvwa kabali balekelezegwa chiindi bakwesu abachizi bananikidwe nibazooyinka kujulu. Atulange-lange zikozyano zibili zyamuMagwalo zikonzya kupa kuti bayeeye oobo. Mpawo tulabona twaambo tutugwasya kuti tutakataazikani pe atala azitazoochitike.

TAZIKABACHITIKILI PE BAZIMWI MBELELE

3-4. Bamwi balakonzya kukataazikana atalaanzi alubo nkamboonzi?

³ Bamwi balakonzya kukataazikana kuti bazimwi mbelele bayooleka kubelekela Jehova akaambo kakuti bakwesu bananikidwe bamuKabunga Keendelezya nga tabachiwo pe kuti babazulwide. Balimvwa oobo akaambo kazimwi zikozyano zyamuBbayibbili. Atulange-lange zikozyano zibili. Chakusaanguna chiswaanizya Mupayizi Mupati Jehoyada. Wakali kubelekela Leza kasyomeka. Jehoyada amwanakazi wakwe, Jehoshabbeti, bakakwabilila mulombe uutegwa Jehoyashi alubo bakamugwasya kuti abe mwaami uulikabotu alubo uusyomeka. Chiindi Jehoyada naakachili kupona, Jehoyashi wakali kuchita zintu zilikabotu. Pesi Jehoyada naakafwa, Jehoyashi wakasaanguna  kuchita zintu zibi. Wakaswiilila basilutwe babi alubo wakasiya Jehova.—2 Mak. 24:​2, 15-19.

⁴ Chikozyano chachibili nchamaKkristu bakapona baapostoli kabali bafwa. Mwaapostoli Johane nguwe wakasyaalila kufwa, wakali chikozyano chibotu kumaKkristu biingi alubo wakali kubagwasya kuti balisimye chiindi nibakali kubelekela Jehova. (3 Joh. 4) Mbuli baapostoli boonse basyomeka, Johane wakabeleka changuzu kuti akwabilile mbungano kuli basiluleyo bakali kuyiisya njiisyo zyakubeja. (1 Joh. 2:18; langa makani aakwiiya aali muli 2 Tes. 2:7 muBbayibbili lyaKwiiya lyaChikuwa.) Chiindi Johane naakafwa, mumbungano mwakaba basiluleyo biingi. Kakutanayinda minyaka myiingi, mbungano yachiKkristu yakali yazula basiluleyo bakali kuyiisya njiisyo zyakubeja.

5. Kuzwa kuzikozyano zibili zyamuMagwalo nzitwalanga-langa, nkamboonzi nituteelede kulangilila kuti nzizyo zitazoochitike kuli zimwi mbelele?

⁵ Zikozyano eezi zibili zyamuMagwalo zitondeezya kuti nzizyo na zitazoochitike kuli zimwi mbelele chiindi maKkristu bananikidwe nibatazooyinke kujulu? Aachiindi eechi, maKkristu basyomeka batanooli aanyika bazoosiya kasimpe na mbuli Jehoyashi naakuti bazooba basiluleyo mbuli maKkristu biingi bakapona baapostoli kabali bafwa? Nsandulo njakuti peepe! Tulakonzya kuba aachoonzyo chakuti chiindi maKkristu bananikidwe nibatazooyinke kujulu, bazimwi mbelele bazoosyaala kababelekela Jehova alubo banoojana chakulya chamubukombi. Nkamboonzi nitukonzya kubaachoonzyo eechi?

BUKOMBI BUSALALA BUNOOLIWO KUKABE KUTAMANI

6. Nziizili ziindi zitatu nzitutalange-lange?

⁶ Nkamboonzi nituli aachoonzyo chakuti bukombi busalala tabukapambanisigwi pe nikuba muziindi ziyumu nzituyooswaana muchiindi chilikunembo? Akaambo kazintu nzitwakayiya muBbayibbili zili atala achiindi nchitulikupona. Chiindi nchitulikupona chisiyene loko achiindi chakapona ma-Israyeli kuswaanizya achiindi chakapona maKkristu bakasyaala baapostoli kabali bafwa. Lino atulange-lange zyiingi atala aziindi eezi zitatu: (1) Chiindi chakapona ma-Israyeli, (2) chiindi chakapona maKkristu baapostoli kabali bafwa (3) achiindi chesu nkukwaamba ‘ziindi zyakubweedezegwa kwazintu zyoonse.’—Mil. 3:21.

7. Muchiindi chama-Israyeli, nkamboonzi bamwi bakombi baLeza basyomeka nibakatamana manguzu chiindi ma-Israyeli abaami babo nibakasala kuchita zintu zibi?

⁷ Chiindi chakapona ma-Israyeli. Kali waba aafwiifwi kufwa, Mozesi wakabuzya ma-Israyeli kuti: “Nkaambo ndilizyi kabotu kuti ndaakufwa, ncobeni muyoobisya akuleya kuzwa munzila njondakamulailila.” (Dt. 31:29) Alubo Mozesi wakachenjezya ma-Israyeli kuti bakali kuyootolwa mubuzike kuti bapapila Leza. (Dt. 28:​35, 36) Majwi aaMozesi akazuzikizigwa. Kwaminyaka myiingi, baami biingi bakasala kuchita zintu zibi alubo bakapa kuti bakombi baLeza ambabo bachite zintu zibi. Eezi zyakapa kuti Jehova abakake bakombi bakwe alubo taakachili kuzumizya baami bachi-Israyeli kuti beendelezye. (Ezk. 21:​25-27) Pesi ma-Israyeli basyomeka bakaba aachibindi chakwiinkilila kunembo kababelekela Leza chiindi nibakabona kuti majwi aaLeza azuzikizigwa.—Is. 55:​10, 11.

8. Tweelede kugamba na kuti mbungano yamaKkristu bakapona baapostoli kabali bafwa yakali yapambanika? Pandulula.

⁸ Chiindi chakapona maKkristu baapostoli kabali bafwa. Zilatugambya na kuziba kuti mbungano yamaKkristu bakapona baapostoli kabali bafwa yakali yapambanika? Tazitugambyi pe. Jesu wakali wapolofita kale kuti kwakali kuzooba basiluleyo biingi. (Mt. 7:​21-23; 13:​24-30, 36-43) Mwaapostoli Pawulu, Petro  aJohane, boonse bakatondeezya kuti bupolofita bwaJesu bwakali bwasaanguna kuzuzikizigwa mumwaanda wamunyaka wakusaanguna. (2 Tes. 2:​3, 7; 2 Pet. 2. 2:1; 1 Joh. 2:18) Kabali bafwa baapostoli boonse, mbungano yachiKkristu yakali yapambanika. Akaambo kabasiluleyo bakali bavula, mbungano eeyi yakaba Bbabbiloni Mupati, mbunga yabukombi bwakubeja. Eezi zitondeezya kuti bupolofita bwaJesu bwakali bwazuzikizigwa.

9. Chiindi nchitupona chisiyene biyeni achiindi chakapona ma-Israyeli achakapona maKkristu bamumwaanda wamunyaka wachibili?

⁹ “Ziindi zyakubweedezegwa kwazintu zyoonse.” Chiindi nchitulikupona chilisiyene achiindi chakapona ma-Israyeli kuswaanizya achiindi chakapona basiluleyo biingi bakanjila mumbungano mumwaanda wamunyaka wachibili. Chiindi nchitupona chitegwani? Tulakonzya kusaanguna kuchaamba kuti ‘mazuba aakumamanino’ aabwiime bwazintu. (2 Tim. 3:1) Pesi Bbayibbili litondeezya kuti chiindi eechi nchilamfu loko, chakasaanguna aachiindi chimwi achiindi chakubweedezegwa kwazintu zyoonse. Chinooliwo kusikila Bwaami bwaMesiya nibutazoope kuti bantu bamaninine akuchincha nyika eeyi kuti ibe Paradayizi. Chiindi eechi chitegwa ‘ziindi zyakubwedezegwa kwazintu zyoonse.’ (Mil. 3:21) Alubo chakasaanguna mu1914. Niinzi zyakabweedezegwa aachiindi eechi? Jesu wakasalwa kuti abe Mwaami kujulu. Nkinkaako, Jehova wakaba aamweendelezi uumwiiminina lubo, sikukona wazyalani lyaMwaami Davida. Nikuba oobo, bwaami oobu teembubo pe abulikke Jehova mbwaakabweedezya. Kakutanayinda chiindi, bukombi busalala bwakasaanguna kubweedezegwa! (Is. 2:​2-4; Ezk. 11:​17-20) Buzoopambanisigwa lubo na bukombi busalala?

10. (a) Bbayibbili lyakaambaanzi atala abukombi busalala mazubaano? (Isaya 54:17) (b) Nkamboonzi bupolofita oobu nibutuumbulizya?

¹⁰ Bala Isaya 54:17. Yeeya atala amajwi aabupolofita aakuti: “Kunyina cilwanyo cipangilwa kulwana nduwe iciyoozwidilila”! Majwi aaya alikuzuzikizigwa mazubaano. Majwi aatobela alabeleka nikuba muchiindi nchitulikupona: “Bana bako boonse bayooyiisyigwa a Jehova, alimwi luumuno lwabana bako luyoovwula kapati. Uyookkazikizyigwa mubululami. . . . Tokayoowi cintu cili coonse alimwi takukabi cintu cikupa kuyoowa, nkaambo tacikakusweni afwaafwi pe.” (Is. 54:​13, 14) Nikuba “leza wabwiime bwazintu oobuno” Saatani lwakwe, takonzyi pe kwiimikizya mulimu wakuyiisya uulikuchitwa aabakombi baJehova mazubaano. (2 Kor. 4:4) Bukombi busalala  bwakabweedezegwa alubo tabuzoopambanisigwi lubo pe. Bunooliwo kusikila kukabe kutamani. Taakwe chilwanisyo pe chakapangilwa kulwana ndiswe chizoozwidilila!

NIINZI ZITAZOOCHITIKE?

11. Niinzi chipa kuti tube aachoonzyo chakuti bankamu mpati tabazoolekelezegwi pe chiindi maKkristu bananikidwe nibazooyinka kujulu?

¹¹ Niinzi zitazoochitike chiindi maKkristu bananikidwe nibazooyinka kujulu? Utalubi kuti Jesu Mweembeli wesu alubo mutwe wambungano yachiKkristu. Jesu wakaamba aantanganana kuti: “Muzulwidi wanu ngumwi, nguKkristu.” (Mt. 23:10) Mwaami wesu Jesu tazookachilwi pe kuchita mulimu wakwe. Batobeli baKkristu batanooli aanyika taakwe nchibatazooyoowe pe akaambo kakuti Kkristu unoobazulwida. Nisimpe tatuzi pe kuti Kkristu uyoobazulwida biyeni bakombi baLeza aachiindi eecho. Nkinkaako, lino atulange-lange zimwi zikozyano zyamuBbayibbili zikonzya kutugwasya.

12. Jehova wakali kubalangania biyeni bakombi bakwe (a) Mozesi naakafwa? (b) Elija naakapegwa uumwi mulimu? (Langa chifanikisyo.)

¹² Ma-Israyeli kabatananjila muNyika Yachisyomezyo, Mozesi wakafwa. Niinzi zyakachitika kubakombi baLeza? Jehova taakaleka pe kubagwasya bakombi bakwe basyomeka nikuba kuti mwaalumi ooyu wakali wafwa. Chiindi choonse ma-Israyeli nibakali kusyomeka kuli Jehova, wakali kubalangania. Mozesi katanafwa, Jehova wakamubuzya kuti asale Joshuwa kuti azoozulwide bakombi bakwe. Mozesi wakayiisya Joshuwa milimu kwaminyaka myiingi. (Kul. 33:11; Dt. 34:9) Kuyungizya aali zeezi, kwakali bamwi baalumi biingi bakali kuzulwida, nkukwaamba basilutwe babantu bali zyuulu, basilutwe babantu bali myaanda, basilutwe babantu bali makumi aali musanu, basilutwe babantu bali makumi. (Dt. 1:15) Leza wakali kubalangania bakombi bakwe. Kuli chimwi chikozyano chikozyenie aacheechi, nchikozyano cha-Elija. Elija wakali kusumpula bukombi busalala mu-Israyeli kwaminyaka myiingi. Pesi Jehova wakazoomuchincha kuti akabelekele kuJuda nkwiili kumusanza. (2 Bam. 2:1; 2 Mak. 21:12) Ma-Israyeli bakali kusyomeka bamisyobo iili kkumi bakalekelezegwa na? Peepe. Elija wakali wayiisya Elisha milumu kwaminyaka myiingi. Alubo kwakali bamwi “bana babasinsimi” bakali bayiisigwa milimu. (2 Bam. 2:7) Nkinkaako, kwakali baalumi biingi basyomeka bakali kugwasilizya kuti bazulwide bakombi baLeza. Jehova wakayinkilila kunembo kuzuzikizya makanze aakwe alubo wakali kubalangania bakombi bakwe basyomeka.

13. Jehova utusyomezyaanzi muli Mahebberu 13:5b? (Langa chifanikisyo.)

 ¹³ Katuli aazikozyano eezi mumizeezo, ubonaanga niinzi zitazoochitike chiindi maKkristu bananikidwe basyeede nibazooyinka kujulu? Tatweelede kukataazikana pe. Bbayibbili likabikka aantanganana kasimpe kakuti: Ziyume zitete, Jehova takabalekelezyi pe bakombi bakwe batanooli aanyika. (Bala Mahebberu 13:5b.) Mbuli Mozesi a-Elija, kabunga kaniini kamaKkristu bananikidwe bazulwida mazubaano bakubona kakuyandikana kuyiisya bamwi milimu. Kwaminyaka myiingi, bakwesu bali muKabunga Keendelezya balikuyiisya bakwesu bazimwi mbelele kuti bazulwide bakombi baLeza. Muchikozyano, bakabamba zikolo zyiingi kuti bayiisye baalu, balangizi bamabazu, bakwesu bali mumaKkomiti aaMitabi, balangizi bali aaBbeteli abamwi. BamuKabunga Keendelezya balikuyiisya bagwasilizi bamaKkomiti aasiyene-siyene aamuKabunga Keendelezya. Bagwasilizi aaba lino balikubeleka milimu myiingi mumbunga. Balikuyiisigwa milimu eeyi kuchitila kuti bayinkilile kunembo kulangania mbelele zyaKkristu.

14. Nkaakali kaambo kayandikana nkitwayiya muchiiyo eechi?

¹⁴ Kaambo kayandikana nkituli kwiiya muchiiyo eechi nkakuti: Chiindi maKkristu bananikidwe nibatazootolwe kujulu mapenzi mapati kaali abaafwiifwi kumana, bakombi baJehova batanooli aanyika bazooyinkilila kunembo kumukomba chakusyomeka. Aachiindi eechi, tuyoolwanwa aaGogi wamaGogi nkukwaamba zisi ziyoojatana kuti zilwane bakombi baLeza. (Ezk. 38:​18-20) Pesi bantu aaba tabakazwidilili pe alubo tabakakonzyi pe kulesya bakombi baLeza kuti bakombe Jehova. Jehova uyoobakwabilila! Muchilengaano, mwaapostoli Johane wakabona “nkamu mpati” yazimwi mbelele. Johane wakabuzigwa kuti “nkamu mpati” eeyi izwa “mumapenzi mapati.” (Chi. 7:​9, 14) Bakombi baLeza banookwabililidwe.

15-16. Kweendelana a Chiyubunuzyo 17:​14, maKkristu bananikidwe bayoochitaanzi munkondo ya-Amagedoni alubo nkamboonzi eezi nizitusungwaazya?

¹⁵ Bamwi balakonzya kubuzya kuti: ‘MaKkristu bananikidwe bayoochitaanzi nibatazooyinke kujulu?’ Bbayibbili lili aansandulo  yamubuzyo ooyu. Litondeezya kuti mfulumende zyabantu zili aanyika ziyoolwana “aaMwanaambelele.” Mfulumende eezi zyabantu tazikazwidilili pe. Bbayibbili lyaamba kuti: “Mwanaambelele uzoobazunda.” Mbaani batazoomugwasye? Bbayibbili lyaamba kuti mbaabo “bakayitwa, basalidwe alubo basyomeka.” (Bala Chiyubunuzyo 17:14.) Mbaani aabo? MaKkristu bananikidwe batazooyinke kujulu! Nkinkaako, chiindi maKkristu bananikidwe basyeede aanyika nibatazooyinke kujulu kumamanino aamapenzi mapati, mulimu wabo wakusaanguna ngwakulwana. Ooyu mulimu mupati ngubatakachite! Bamwi maKkristu bananikidwe bakali kulwana kabatanaba Bakamboni baJehova. Bamwi bakali masooja. Pesi bakazooba maKkristu bakasimpe alubo bakayiya kukkala muluumuno abamwi. (Gal. 5:22; 2 Tes. 3:16) Bakaleka kutola lubazu munkondo. Nikuba oobo, nibatazooyinke kujulu bayoobelekaamwi aKkristu angilozi zyakwe zisalala chiindi nibayoolwana basinkondonyina baLeza munkondo yamamanino.

¹⁶ Yeeya atala azeezi. Bamwi maKkristu bananikidwe bachili aanyika bachembaala alubo bamwi tabachikwe nguzu pe. Pesi nibazooyinka kujulu, bayooba aanguzu alubo bayooba zilenge zyamuuya zitafwi, bayoobelekaamwi aMwaami Singuzu Jesu Kkristu. Nkondo ya-Amagedoni niyazoomana, bayoobelekaamwi aJesu Kkristu kuti bakagwasye bantu kuti bamaninine. Kabali kujulu, maKkristu bananikidwe bayoobagwasya loko bakwesu abachizi batanooli aanyika kwiinda nzibakali kuchita kabachili aanyika.

17. Tuzizi biyeni kuti bakombi baLeza boonse banookwabililidwe niyazoosaanguna nkondo ya-Amagedoni?

¹⁷ Uli wazimwi mbelele na? Kuti kakuli oobo, niinzi nzweelede kuyoochita nkondo ya-Amagedoni niyazoosaanguna? Nzezi nzweelede kuyoochita: Weelede kusyoma Jehova akutobela malayilile aakwe. Eezi ziswaanizyaanzi? Bbayibbili lyaamba kuti: “Amunjile mumaanda aanu aamukati mulijalile. Amuyube kwakaindi kaniini buyo kusikila mane bukali bwiinde.” (Is. 26:20) Bakombi baLeza boonse basyomeka batanooli kujulu abatanooli aanyika banookwabililidwe aachiindi eecho. Mbuli mwaapostoli Pawulu, tuli aachoonzyo chakuti, “mfulumende, naakuti zintu ziliwo lino, naakuti zintu zichiza . . . tazikonzyi pe kutwaanzaania kuluyando lwaLeza.” (Rom. 8:​38, 39) Utalubi kuti Jehova ulakuyanda alubo tazookulekelezyi pe!