Mary amulumi wakwe John, a bakkala munyika bantu bazwa kuPhilippines nkubakambawukilwa makani mabotu nibaza kukuyanduula milimu. Muchiindi chakkorona, Mary wakazwidilila kubayiisya Bbayibbili bantu bamunyika yakwe abamwi bakali kuzwa kulizimwi nyika. Wakazichita biyeni?

Mary wakali kubuzya bantu mbayiyaabo Bbayibbili mubuzyo wakuti, “Kuli ngumuzi na uuyanda kwiiya Bbayibbili?” Nibakali kusandula kuti mpali, wakali kukumbila kuti azoobonane aawe. Kubuzya mubuzyo ooyu kwakeeta mpindu mbotu. Nkamboonzi? Nkaambo bantu baliyanda Jwi lyaLeza chiindi chiingi ngababuzya bamumpuli abeenzinyina nzibayiya. Njiili mpindu yakaba akaambo kakubuzya mubuzyo ooyu?

Mary wakali kwiiya Bbayibbili aJasmin alubo Jasmin wakamutondeezya bantu bali 4 bakali kuyanda kwiiya Bbayibbili. Umwi wabantu aabo nguKristine, zyakali kumunoneezya zintu nzyaakali kwiiya alubo wakakumbila Mary kuti kabayiya tubili mumviki. Chiindi Mary naakabuzya kuti kuli ngwaakazi na wakali kuyanda kwiiya Bbayibbili, Kristine wakaamba kuti, “Iiyi, ndizookutondeezya beenzuma.” Mumviki ziche, Kristine wakatondeezya Mary beenzinyina bali 4, bakali kuyanda kwiiya Bbayibbili. Mukuya kwachiindi, Kristine wakazoomutondeezya beenzinyina bambi alubo ambabo beenzinyina bakazoomutondeezya beenzinyina bakali kuyanda kwiiya Bbayibbili.

Kristine wakali aachiyandisyo chakuti bamumpuli yakwe kuPhilippines ambabo bayiye Bbayibbili. Nkinkaako, wakaambuula aamwanaakwe musimbi Andrea. Kumasaangunino Andrea wakali kulibuzya kuti, ‘Bakamboni baJehova tabamvwisisiki pe, tabasyomi muli Jesu pe alubo babelesya Bbayibbili lyaChizuminano Chachiindi kupela.’ Pesi naakayinkilila kunembo kwiiya, wakazoobona kuti nzyaakali kuyeeya teenzizyo pe. Naakali kwiiya, chimwi chiindi wakali kwaamba kuti, “Kuti Bbayibbili kalyaamba oobu, zyaamba kuti nkasimpe!”

Mukuya kwachiindi, Andrea wakazootondeezya Mary beenzinyina bali 2 amubelesinyina wakali kuyanda kwiiya. Alubo Mary taakazi pe kuti muchizi wawisi aa-Andrea wakatali kubona uutegwa Angela wakali kuswiilizya nibakali kwiiya ba-Andrea. Bumwi buzuba, Angela wakabuzya Andrea kuti abuzye Mary kuti anguwe uyanda kwiiya Bbayibbili. Angela wakaziyanda nzyaakali kwiiya. Mumweezi, wakajata mavesi miingi amutwe alubo wakakumbila kuti kayiya tuli 4 mumviki.  Kagwasigwa aa-Andrea, Angela wakasaanguna kunjila miswaangano chiindi choonse kabelesya vidiyo kkoolu.

Mary naakabona kuti mulumi waKristine, Joshua wakayinoonga ukkede aafwiifwi chiindi nibakali kwiiya, wakamukumbila kuti anguwe ayiye aamwi ambabo. Joshua wakaamba kuti, “Ime ndinooswiilila kupela, kuti wandibuzya mubuzyo; ndilayenda.” Nibakasaanguna kwiiya, mumaminiti aali 5 aakusaanguna, Joshua wakabuzya mibuzyo myiingi kwiinda Kristine mpawo wakazooyanda kwiiya Bbayibbili anguwe.

Kwiinda mukubuzya mubuzyo uumwi, Mary wakaba aazyiiyo zyaBbayibbili zyiingi. Wakakumbila bamwi basikupupulula kuti babweze zimwi zyiiyo zyaBbayibbili. Mary wakayiya Bbayibbili abantu bali 28 bazwa munyika zili 4.

Jasmin, wakasaanguna kwiiya Bbayibbili aMary, wakabbabbatizigwa mu-April 2021. Kristine wakabbabbatizigwa muMay 2022 alubo wakabweeda kuli bamumpuli yakwe kuPhilippines. Beenzinyina baKristine babili mbaakatondeezya Mary ambabo bakabbabbatizigwa. Angela wakazoobbabbatizigwa mumyeezi miche yakazootobela alubo lino ulikubeleka kali payona wachiindi choonse. Mulumi waKristine, Joshua amwanaabo musimbi Andrea, azimwi zyiiyo zyaBbayibbili balikwiinkilila kunembo mubukombi.

Muchiindi chakapona Jesu abaapostoli, bantu biingi bakabuzya bamumpuli zyabo abeenzinyina nzibakali bayiya atala aJesu. (Joh. 1:​41, 42a; Mil. 10:​24, 27, 48; 16:​25-33) Tulakonzya kubuzya bantu mbitwiiyaabo Bbayibbili naakuti bali aachiyandisyo chakwiiya mubuzyo wakuti, “Kuli nguzi na uuyanda kwiiya Bbayibbili?” Amwi kubuzya mubuzyo ooyu, kulakonzya kupa kuti tujane bantu biingi bayanda kwiiya Bbayibbili.