CHIIYO 7
LWIIMBO 15 Atumutembaule Mwana wa Jehova Mutaanzi Kuzyalwa!
Nzila Njalekelelaayo Jehova Ikugwasya Biyeni?
“Yebo ulalekelela ncobeni.”—INT. 130:4.
NZITUTAYIYE
Tulalanga-langa zimwi zikozyano zili muBbayibbili zipandulula nzila Jehova njatulekelelaayo alubo chiiyo eechi chilatugwasya kuti tuyungizye kumulumba Jehova akaambo kakutulekelela.
1. Nkamboonzi muntu nakonzya kuyeeya zintu zyiingi loko kuti wabuzigwa kuti “ndakulekelela”?
KUTI umwi muntu wakubuzya kuti, “Ndakulekelela,” nga walemutuzigwa, kapati kuti kuzi kuti wakaambuula naakuti wakachita chintu chimuchisa muntu ooyo. Pesi bbala lyakuti “ndakulekelela” lyaambaanzi loko? Lyaamba kuti na muntu ooyo nguwakanyemya nga ulikwaamba kuti mulamvwanana mbuli mbumwakali kumvwanana chiindi? Naakuti lyaamba kuti muntu ooyo nguwakanyemya tachiyandi kuzoowambuula atala ankani eeyo yakamunyemya. Bbala eeli lipa kuti muntu ayeeye zintu zyiingi.
2. Magwalo akupandulula biyeni kulekelela kwaJehova? (Langa makani aamunsi.)
2 Nzila Jehova njatulekelelaayo ilisiyene ambutubalekelela bamwi. Taakwe muntu pe uukonzya kulekelela mbuli mbalekelela Jehova. Naakali kwaambuula atala akulekelela kwaJehova, sintembawuzyo wakaamba kuti: “Yebo ulalekelela ncobeni, ikutegwa bantu kabakulemeka.” a (Int. 130:4) Nichoonzyo, Jehova “ulalekelela ncobeni.” Alubo nguwe alikke uukonzya kututondeezya nchikwaamba chachoonzyo kulekelela. Mumavesi amwi, balembi baBbayibbili bakabelesya bbala lyachiHebberu lyaamba kulekelela libeleka kuli Jehova kupela litabeleki pe kubantu.
3. Nzila Jehova njalekelelaayo isiyene biyeni anjibalekelelaayo bantu? (Isaya 55:6, 7)
3 Kuti Jehova walekelela umwi muntu, nga wazima chibi chamuntu ooyo. Alubo muntu ooyo ulakonzya kuba aabweenzinyina buli aafwiifwi lubo aJehova. Tulamulumba Jehova akaambo kakuti ukkala katulekelela chakumaninina.—Bala Isaya 55:6, 7.
4. Jehova utugwasya biyeni kuti tumvwisisisye kuti kulekelela kwachoonzyo chaambaanzi?
4 Kuti Jehova kalekelela munzila iisiyene ambutulekelela, kujana twakuziba biyeni kulekelela kwachoonzyo? Jehova ulatugwasya kuti tumvwisisisye mbaakatulekelela kwiinda mukubelesya zikozyano. Muchiiyo eechi, tulalanga-langa zimwi zikozyano. Zikozyano eezi zilatondeezya Jehova mbazima zibi ambapa kuti ooyo wabisya amvwanane lubo anguwe. Nitwanoolanga-langa zikozyano eezi, tulayungizya kumuyanda Jehova akumulumba akaambo kakuti nguTaateesu ulaaluzyalo alubo uutulekelela munzila zyiingi.
JEHOVA UGWISYA CHIBI
5. Niinzi zichitika chiindi Jehova natulekelela zibi zyesu?
5 MuBbayibbili, chiindi chiingi zibi zikozyanisidwe aamikuli iilema. Naakali kupandulula atala azibi zyakwe, Mwaami Davida wakaamba kuti: “Milandu yangu yandivwulila atala aamutwe wangu; yandiminya kapati mbuli mukuli mulemu.” (Int. 38:4) Pesi Jehova ulazilekelela zibi zyabasizibi basanduka. (Int. 25:18; 32:5) Bbala lyachiHebberu lyakasandululwa kuti “kondijatila” lyaamba “kunyampula” naakuti “kubweza.” Chiindi Jehova natulekelela zibi zyesu, nga wagwisya mukuli uutulemenede. Nga kuli mbuli kuti twanyampwide chibbudu chilema aamakuko mpawo Jehova wachibweza chibbudu eecho.
“Wakandijatila” (Int. 32:5)
6. Jehova uzibikka kuli zibi zyesu?
6 Nchechi chimwi chikozyano chitondeezya Jehova mbazibikka kule zibi zyesu. Intembauzyo 103:12 yaamba kuti: “Mbubonya kumapolelo aazuba mbokuli kulamfwu kapati kuzwa kumabbililo aazuba, akwalo nkwabikkide zinyonyoono zyesu mbokubede kulampa kuzwa kulindiswe.” Kuzwa kubuzwezuba kusika kububbila nkule loko. Mabazu aaya aabili, taaswaanani pe. Mulaamwi majwi, Jehova nga wabikka zibi zyesu kundawu iili kule loko nkututakonzyi pe kusika. Eezi zitondeezya kuti Jehova ulatulekelela chakumaninina.
“Mbubonya kumapolelo aazuba mbokuli kulamfwu kapati kuzwa kumabbililo aazuba” (Int. 103:12)
7. Nziizili zikozyano zyamuBbayibbili zipandulula Jehova mbatulekelela? (Mika 7:18, 19)
7 Nikuba kuti Jehova nga wazitola kule zibi zyesu munzila yakukozyanisya, pesi zyaamba kuti nga uchiziyeeyede na? Teembuzyaamba pe. Mwaami Hezekkiya naakali kwaambuula atala aJehova, wakaamba kuti: “Zibi zyangu zyoonse wazisowela kusyule lyako.” Alubo makani aamunsi aalugwalo oolu aamba kuti, “Yebo wagusya zibi zyangu zyoonse kumbele aameso aako.” (Is. 38:9, 17; makani aamunsi.) Chikozyano eechi, chitondeezya kuti Jehova ulazibweza zibi zyabantu basanduka mpawo waziwaalila kundawu nkubatakonzyi pe kuzibona. Majwi aaya alakonzya kubikkwa munzila eeyi lubo: “Wakapa kuti kube mbuli kuti taakwe [nindakachitide zibi] pe.” Bbayibbili lyakayungizya kusimya kaambo aaka muli chimwi chikozyano chilembedwe muli Mika 7:18, 19. (Bala.) Mumavesi aaya, kwaambidwe kuti Jehova uzisowela mumpisi zyalwizi zibi zyesu. Muchiindi chakalembwa Bbayibbili, teekwakali kukonzeka pe kuti umwi muntu aboozye zintu zyakasowelwa mumpisi zyalwizi.
“Zibi zyangu zyoonse wazisowela kusyule lyako” (Is. 38:17)
“Zibi zyesu zyoonse uyoozisowela mumpisi zyalwizi” (Mik. 7:19)
8. Niinzi nzitwayiya?
8 Bbayibbili litondeezya kuti chiindi Jehova natulekelela, ulazizima zibi zyesu chakumaninina, nkinkaako, nga takuchiyandikani kuti tulipe mulandu pe. Davida wakaamba kuti, “Balabotelwa aabo bali aamilandu yalekelelwa alubo bali aazibi zyavumbwa, ulabotelwa muntu uuli aazibi Jehova nzyatazooyeeyi lubo pe.” (Rom. 4:7, 8) Ooku nkuko kulekelela kwachoonzyo!
JEHOVA ULAZIZIMA ZIBI
9. Nziizili zikozyano Jehova nzyaakabelesya kuti atondeezye mbatulekelela?
9 Jehova wakabelesya zikozyano zimbi kuti atugwasye kuti tubone mbazima zibi zyabantu basanduka kabelesya chinunuzyo. Munzila yakukozyanisya, Jehova waambwa kuti ulaziwacha akuzisampulula zibi zyesu. Eezi zipa kuti sizibi asalale. (Int. 51:7; Is. 4:4; Jer. 33:8) Jehova lwakwe wakapandulula mbazichita eezi, wakati: “Nokuba kuti zibi zyanu zilasalala pyu, zilatubisyigwa buu mbuli caanda; nokuba kuti zilasubila mbuli cisani camubala wadowalowa, zilaba mbuli boya bwambelele.” (Is. 1:18) Nkuyumu loko kuti usalazye chigogo chidyabide naakuti kugwisya mabata-mabata aadowalowa. Pesi muchikozyano eechi, Jehova utusyomezya kuti zibi zyesu zilakonzya kuwachwa zitube zyakuti nga tazichizooboneki lubo pe.
“Nokuba kuti zibi zyanu zilasalala pyu, zilatubisyigwa buu mbuli caanda” (Is. 1:18)
10. Nchiichili chimwi chikozyano Jehova nchaakabelesya kuti apandulule mbatulekelela zibi zyesu?
10 Mbuli mbukwakaambwa muchiiyo chakayinda, zibi zikozyanisidwe ‘aachikwelete’. (Mt. 18:32-35) Chiindi choonse nitubisizya Jehova, nga kuli mbuli kuti tulikuyungizya chikwelete aajulu aazikwelete. Nga twaba aachikwelete chipati loko kuli Jehova. Pesi chiindi Jehova natulekelela, nga kuli mbuli kuti wazima chikwelete chesu alubo chikwelete eecho nga chamana. Jehova tatutobeleli pe kuti tubbadale zibi nzyaakatulekelela kale. Chikozyano eechi, chitondeezya mbutunga twalemununwa chiindi Jehova natulekelela zibi zyesu.
“Kotulekelela zibi zyesu” (Mt. 6:12)
11. Bbayibbili nga lyaambaanzi chiindi nilyaamba kuti zibi zyesu ‘zyazimwa’? (Milimu 3:19)
11 Jehova tayengi mweengo kupela pe uutondeezya kuti wazilekelela zibi zyesu, ulazizima chakumaninina. (Bala Milimu 3:19.) Muchikozyano, atuteedi tuli aachikwelete mpawo muntu ngutuli aachikwelete weenga zina lyesu amweengo mupati uutondeezya kuti tatuchikwe chikwelete. Nikuba kuti walyeenga zina lyesu, bantu balakonzya kubona kuti twakali aachikwelete. Pesi kuzima kulisiyene akweenga kulikwaambwa aawa. Kuti tumvwisisisye chikozyano eechi, tatweelede kuluba pe kuti muchiindi chakalembwa Bbayibbili, kwakali kuuba kuzima musyobo wa-inki wakali kubelesegwa kukulemba. Muntu wakali kukonzya kuzima zintu zilembedwe kabelesya chilembo chitete. Nkinkaako, chikwelete nichakali “kuzimwa,” chakali kuzimwa chakumaninina. Bantu teebakali kukonzya pe kubona kuti niinzi zyakalembedwe kakutanazimwa. Kwakalinoonga kwaba mbuli kuti taakwe nikwakali chikwelete pe. Kuziba kuti Jehova ulatulekelela kupa kuti tumulumbe nkaambo nga kuli mbuli kuti taakwe nitwakamubisizya pe.—Int. 51:9.
“Nkukuti zibi zyanu zizimwe” (Mil. 3:19)
12. Twiiyaanzi kuchikozyano chajoba lisiya mbi?
12 Kuli chimwi chikozyano cheendelana aacheechi chitondeezya Jehova mbazima zibi zyesu. Jehova waamba kuti: “Ndiyoozimaanya zinyonyoono zyako mbuli kuti zyasiswa kunze aakkumbi azibi zyako mbuli kuti zyasiswa kunze aakkumbi lisiya mbi.” (Is. 44:22) Chiindi Jehova natulekelela nga kuli mbuli kuti wabelesya joba lisiya mbi kuti avumbe zibi zyesu kuchitila kuti tutaziboni lubo pe.
“Ndiyoozimaanya zinyonyoono zyako mbuli kuti zyasiswa kunze aakkumbi” (Is. 44:22)
13. Nga twamvwa biyeni chiindi Jehova natulekelela zibi zyesu?
13 Zikozyano eezi nzitwayiya zituyiisyaanzi? Kuti Jehova watulekelela, tatweelede kukkala katulipa mulandu kwabuumi bwesu boonse atala azibi nzitwakachita. Jesu wakapa chipayizyo chakabbadala zibi zyesu zyoonse chakumaninina. Chiindi Jehova natulekelela zibi zyesu nga kuli mbuli kuti taakwe nitwakabisizye pe. Eezi nzizyo Jehova nzyachita chiindi nitwasanduka kuzibi zyesu.
JEHOVA UBUSILIZYA BWEENZUMA BWACHIINDI
Kulekelela kwaTaateesu wakujulu kupa kuti tube aabweenzuma bulikabotu anguwe (Langa fuka 14)
14. Nkamboonzi nitukonzya kusyoma kuti Jehova ulatulekelela chachoonzyo? (Langa chifanikisyo.)
14 Kulekelela kwachoonzyo kwaJehova kupa kuti tube aabweenzuma bulikabotu lubo anguwe. Kutugwasya kuti tuzunde penzi lyakulilya mumoyo atala azintu nzitwakabisya. Tatweelede kuyoowa kuti Jehova utwaangilide nkoto akaambo kazintu nzitwakachita akuti ulikuyanduula nzila zyakuti azootusubule. Eezi tazizoochitiki pe. Nkamboonzi nitweelede kumusyoma Jehova chiindi naamba kuti watulekelela? Jehova wakabuzya mupolofita Jeremiya majwi aakuti: “Ndiyoobalekelela cinyonyoono cabo, alimwi cibi cabo tandikaciyeeyi limbi pe.” (Jer. 31:34) Naakali kwaamba atala amakani aaya, mwaapostoli Pawulu wakaamba makani aakozyenie ayaaya aakuti: “Tandizooziyeeyi lubo pe zibi zyabo.” (Heb. 8:12) Pesi eezi zyaambaanzi loko?
“Cibi cabo tandikaciyeeyi limbi pe” (Jer. 31:34)
15. Jehova nga waambaanzi chiindi naamba kuti tachiziyeeyi pe zibi zyesu?
15 MuBbayibbili, bbala lyakuti “ukandiyeeye,” chiindi choonse talyaambi kuti muntu nga ulikuyeeya zintu zyakamuchitikilide mubuumi bwakwe. Pesi lilakonzya kuswaanizya kuchita chimwi chintu. Chigwebenga chakagankaminidwe kumbali aaJesu aachisamu chakupenzezya chakakumbila kuti: “Jesu, ukandiyeeye waakunjila muBwaami bwako.” (Lk. 23:42, 43) Chigwebenga eecho, teechakali kukumbila Jesu kuti achiyeeye aachiindi eecho. Nsandulo yaJesu yakatondeezya kuti wakali kuzoobweza ntaamu yakuti azoobusye chigwebenga eecho. Nkinkaako, chiindi Jehova naamba kuti tachiziyeeyi pe zibi zyesu, nga ulikwaamba kuti tazoochiti chimwi chintu pe atala azibi zyesu. Tazootusubuli pe muchiindi chilikunembo akaambo kazibi nzyanooli walekelela.
16. Bbayibbili likupandulula biyeni kwaangunuka nkutunga twabaako kuti Jehova watulekelela?
16 Chiindi Jehova natulekelela nga twaangunuka. Bbayibbili libelesya chimwi chikozyano kuti litugwasye kumvwisisisya nkani eeyi. Akaambo kakuti tatumaninide pe, Bbayibbili lyaamba kuti tuli “bazike bachibi.” Pesi chiindi Jehova natulekelela, nga tuli mbuli bazike ‘bakaangununwa kuchibi.’ (Rom. 6:17, 18; Chi. 1:5) Kuti twaziba kuti Jehova watulekelela, nga twabotelwa mbuli muzike uunga waangununwa.
“Mwakaangununwa kuchibi” (Rom. 6:18)
17. Muunzilaanzi kulekelelwa mukupa kuti tube aabweenzuma busimide lubo aJehova? (Isaya 53:5)
17 Bala Isaya 53:5. Bbayibbili lyaamba kuti, akaambo kakuti tuli basizibi, tuli mbuli bantu bali aabulwazi bubi. Akaambo kachinunuzyo nchaakatupa Jehova kwiinda muMwanaakwe, nga kuli mbuli kuti wakatuponia. (1 Pet. 2:24) Chiindi nitwabisya, nga twapambanisya bweenzuma mbutulaabo aJehova. Pesi akaambo kachinunuzyo, Jehova ulakonzya kutulekelela alubo tulakonzya kumvwanana lubo anguwe. Mbuli mbanga wabotelwa muntu uunga wapona kubulwazi bubi, andiswe tulabotelwa kuti twasaanguna lubo kumvwanana aaJehova.
“Akaambo kazilonda zyakwe swebo twakaponesyegwa” (Is. 53:5)
BUBOTU BUBA AKAAMBO KAKULEKELELWA AAJEHOVA
18. Twayiyaanzi nitwali kulanga-langa zikozyano zili muBbayibbili zili atala anzila Jehova njatulekelelaayo? (Langa kabbokesi kati, “Jehova Mbatulekelela.”)
18 Twayiyaanzi nitwali kulanga-langa atala azikozyano zili muBbayibbili zili atala anzila Jehova njatulekelelaayo? Chiindi Jehova natulekelela zibi zyesu, nga kuli mbuli kuti taakwe nitwakabisizye pe alubo tulakonzya kuba aachoonzyo chakuti tazootusubuli pe muchiindi chilikunembo. Eezi zipa kuti tube aabweenzuma bulikabotu aTaateesu wakujulu. Nikuba oobo, tulizi kuti kulekelelwa kwachoonzyo nchipo chizwa kuli Jehova nchatupa akaambo kakuti ulaaluyando akuti mwaabi.—Rom. 3:24.
19. (a) Nkamboonzi nitweelede kumulumba Jehova? (Baroma 4:8) (b) Tuzooyiyaanzi muchiiyo chitobela?
19 Bala Baroma 4:8. Tulamulumba Jehova nkaambo “ulalekelela ncobeni”! (Int. 130:4) Kuti katuyanda kuti Jehova atulekelele, tweelede kuchita chimwi chintu chiyandikana loko. Jesu wakaamba kuti: “Kuti kamutalekeleli bantu milandu yabo, anguwe Wuso tazoomulekeleli pe milandu yanu.” (Mt. 6:14, 15) Nkinkaako, kulayandikana kuti tutobelezye Jehova kunkani yakulekelela bamwi. Muchiiyo chitobela, tuzoobona nzitweelede kuchita kuti tulekelele bamwi.
LWIIMBO 46 Twalumba Jehova
a Malembe aakusaanguna aachiHebberu akabelesya mabala aakuti “ulalekelela ncobeni,” nkukwaamba kuti nkuko akulikke kulekelela kwachoonzyo nikuba kuti kuli zimwi nzila zyakulekelela. Busanduluzi bwaBbayibbili bwiingi teebwakasiyanisya pe aakati kakulekelela akulekelela kwachoonzyo pesi Bbaibbele lya Busanduluzi Bwanyika Mpya lyakawubikka aantanganana musiyano ooyu mbuli mbukulembedwe muli Intembauzyo 130:4.
