Bantu biingi mazubaano, babonaanga mbabo kupela beelede kusumpulwa akuti mbabo kupela beelede kuchitilwa zintu zibotu. Nikuba kuti kuli zintu nzibanga balaazyo kale, pesi nga bayanda kuti bapegwe zimbi. Bantu biingi bazwide mizeezo eeyi yakuliyeeya alubo tabalumbi pe. Nzizyo Bbayibbili nzilyakaambilizya kuti bantu bakumazuba aamamanino mbubatanoobede.—2 Tim. 3:2.

Bantu baliyeeya teebasaanguna lino pe. Adamu a-Eva bakalisalila abalikke zintu nzibakali kubona kuti nzibotu akuti nzibi. Nzibakasala zyakatweetela mapenzi. Minyaka yakatobela, Mwaami Uziya waJuda, wakayeeya kuti wakali aacheelelo chakutenta tununkilizyo mutempele pesi taakalikwe cheelelo pe chakuti achite oobo. (2 Mak. 26:​18, 19) BaFarisi abaSadusi ambabo bakali kubonaanga Leza wakeelede kubajata munzila iisumpukide kwiinda bamwi akaambo kakuti bakali baluzubo lwa-Abbrahamu.—Mt. 3:9.

Tuzyungulukidwe aabantu baliyeeya alubo balisumpula, muuya ooyu ulakonzya kutunjila andiswe. (Gal. 5:26) Tulakonzya kubonaanga tuli aacheelelo chakupegwa chimwi chilongezyo naakuti kubonaanga bamwi beelede kutujata munzila iisumpukide kwiinda bamwi. Niinzi chikonzya kutugwasya kuti tutantamuke muuya ooyu? Tweelede kuziba kuti Jehova uyibona biyeni nkani eeyi. Malayilile aamuBbayibbili aabili alakonzya kutugwasya.

Jehova nguuzizi zitweelede. Atubone zikozyano.

•   Mumabambe aampuli, mulumi uyanda kulemekwa amwanakazi wakwe, alubo mwanakazi uyanda kuyandwa amulumi wakwe. (Ef. 5:33) Mwaalumi amwanakazi bakwetene beelede kuyandana kabali babili kupela kutali kuti balupe bamwi luyando lwabo. (1 Kor. 7:3) Bazyali bayanda kuti bana babo babaswiilile alubo bana bayanda kuti bazyali babo babayande akubalangania.—2 Kor. 12:14; Ef. 6:2.

• Mumbungano, Jehova uyanda kuti tubalemeke baalu akaambo kakubeleka changuzu nkubachita. (1 Tes. 5:12) Nikuba oobo, baalu tabakwe cheelelo pe chakubuzya bakwesu abachizi zyakuchita.—1 Pet. 5:​2, 3.

• Leza wakapa mfulumende zyabantu cheelelo chakuti kazibbadalisya mutelo akuti bantu mbibeendelezya kababalemeka.—Rom. 13:​1, 6, 7.

Jehova utupa zintu zyiingi kwiinda nzitweelede kujana. Akaambo kakuti tuli aachibi, tweelede kufwa. (Rom. 6:23) Akaambo kakuti Jehova ulaaluyando lutamani, wakatupa zilongezyo zyiingi. (Int. 103:​10, 11) Zilongezyo zyoonse nzitulaazyo, Jehova wakatupa akaambo kaluzyalo lwakwe lupati.—Rom. 12:​6-8; Ef. 2:8.

Chenjelela kuti utayeeyi mbuli bantu bali munyika yaSaatani. Kuti teetwachenjela, tulakonzya kuyeeya kuti tweelede kuba aazintu zyiingi kwiinda bamwi. Jesu wakabelesya chikozyano chababelesi kuti atondeezye umwi mbakonzya kuba aamuuya wakuyanda zyiingi kwiinda bamwi. Umwi awumwi muchikozyano chaJesu wakafozegwa dinari limwi. Bamwi babelesi bakasaanguna kubeleka kuzwa kuseeni alubo bakabeleka buzuba boonse zuba kalili kupya. Pesi bamwi bakabeleka kwa-awa iimwi luzutu. Babelesi bakasaanguna kubeleka kuseeni, bakayeeya kuti balafozegwa mali nyingi akaambo kakuti bakabeleka buzuba boonse zuba kalili kupya. (Mt. 20:​1-16) Jesu wakabelesya chikozyano eechi kuti ayiisye batobeli bakwe kuti beelede kukkutisikana azintu Leza nzyabapa.

Ba muntu uulumba uutalangilili kupegwa kupela. (1 Tes. 5:18) Ba mbuli mwaapostoli Pawulu wakatali kukumbila zintu nzyaakali kuyanda kubakwesu bakuKkorinte nikuba kuti wakali aacheelelo chakukumbila. (1 Kor. 9:​11-14) Tweelede  kulumba kufumbwa zintu bamwi nzibatupa alubo tatweelede kuyeeya kuti bamwi beelede kutupa zintu.

Libombye. Kuti muntu wasaanguna kuliyeeya nga wabonaanga weelede kujana zyiingi kwiinda nzyalaazyo. Kuti katulibombya tatukooyeeya munzila eeyi iitali kabotu.

Mupolofita Daniyele, wakatusiila chikozyano chibotu loko chakulibombya. Wakali kukonzya kubonaanga wakeelede kujatwa munzila iilikabotu kwiinda bamwi akupegwa zilongezyo nzyaakalaazyo akaambo kakuti wakakomenena mumpuli yakali aampuwo, wakali aachiwa chibotu, wakalichenjede akuti kuli zimwi zintu nzyaakali kukonzya kuchita munzila iilikabotu. (Dan. 1:​3, 4, 19, 20) Nikuba oobo, Daniyele wakakkala kalibombya alubo buntu oobo bwakapa kuti ayandikane loko kuli Jehova.—Dan. 2:30; 10:​11, 12.

Atutantamuke muuya wakuliyeeya awakulisumpula uudumide munyika mazubaano. Pesi atwiinkilile kunembo katubotelwa aazilongezyo Jehova nzyatupede akaambo kaluzyalo lwakwe lupati.