Ndeende abaama bakasimpide miyanda muchikombelo chaRoma. Nibakayiisigwa kuti zina lyaLeza nguJehova, bakaba Bakamboni baJehova basungweete. Ndeende wakaleka kubeza zikozyano zyaJesu. Wakabelesya luzibo lwakubeza kuti achinche iimwi rumu yakali aang’anda yesu kuti ibe Ng’anda yaBwaami kuSan Juan del Monte iili kuManila, dolopo pati lyaPhilippines.

Nindakazyalwa mu 1952, bazyali bangu bakasaanguna kundiyiisya Bbayibbili mbuli mbubakali kuyiisya bakulana bangu bachaalumi bali 4 abachizi bangu batatu. Nindakali kuyabukomena, ndeende wakandisungwaazya kuti kandibala chaandaano chimwi chaBbayibbili buzuba abuzuba alubo wakali kundiyiisya kabelesya mabbuku aasiyene-siyene aambunga. Chimwi chiindi, bazyali bangu bakali kutamba balangizi beendeenda abayiminini bawofesi yamutabi kuti basikile kung’anda yesu. Eezi zyakali kupa kuti mpuli yesu ibotelwe alubo nzibakali kwaamba zyakatusungwaazya kuti tubikke mulimu waJehova mubusena bwakusaanguna mubuumi bwesu.

Ndakayiya chikozyano chilikabotu kubazyali bangu bakali kusyomeka kuli Jehova. Baama kabali bafwa, ime andeende twakasaanguna kupayona mu 1971. Pesi mu 1973 kandili aaminyaka iili 20, ndeende anguwe wakafwa. Kufwidwa bazyali kwakapa kuti ndilimvwe kanditagwasyi alubo ndakalendelelwa. Bulangilizi mbutujana muBbayibbili ‘bwachoonzyo alubo butazungaani’ bwakandigwasya kuti ndibatame alubo ndakakkala kandisimide mubukombi. (Heb. 6:19) Kakwiindide chiindi chifwiifwi ndeende kali wafwa, ndakasaanguna kubeleka kandili payona uuyandikana kukasuwa kali kule kaCoron, muchilikiti chaPalawan.

Ndakali aaminyaka iili 21 nindakasika kuCoron. Akaambo kakuti ndakakomenena mudolopo, ndakagamba nindakabona kuti mukasuwa aaka kwakali ndawu ziche zyakali aamagesi, mpompi zyamaanzi amoota naakuti miduduudu. Mbukunga kwakali bakwesu bache, teendakalikwe muntu  wakupayonaawe pe alubo chimwi chiindi ndakali kwiinka aandikke kukukambawuka. Mumweezi wakusaanguna, ndakali kubayeeya bamumpuli yangu abeenzuma. Mansiku ndakali kulanga nyenyeezi, ooku misozi kiilikweenda. Ndakayeeya kuti ndisiye mulimu mpawo ndibweede kung’anda.

Muchiindi eecho nindakali kulimvwa kandilendeleledwe, ndakali kubuzya Jehova zyakali aansi aamoyo wangu. Ndakali kuyeeya twaambo tusungwaazya ntundakabalide muBbayibbili amumabbuku eesu. Ndakali kukkala kandiyeeya lugwalo lwa Intembauzyo 19:14. Ndakabona kuti Jehova uba ‘Ndomba yangu aMuvwuni wangu’ kuti ndayeeyesesya atala azintu zimubotezya zili mbuli zintu nzyachita abuntu bwakwe. Ngaziyakulinda yaChikuwa iili aamutwe utii, “Tuli Aawulikke Pe” a yakandigwasya loko. Ndakali kukkala kandiibala. Ndakabona kuti ndakali aaJehova muziindi eezyo alubo zyakali kundipa mweenya wakuti ndikombe, ndibale akuyeeyesesya.

Kanditanaba aachiindi chilamfu kandili kuCoron, ndakasalwa kuti ndibe mwaalu. Mbukunga ndime ndakali mwaalu andikke, mviki amviki ndakali kuchitisya Chikolo chaMulimu, Muswaangano waMulimu, Chiiyo chaBbuku chaMbungano aChiiyo chaNgaziyakulinda. Alubo mviki amviki ndakali kupa nkani yabantu boonse. Akaambo kakuti ndakali kukkala kandijisikini, kulendelelwa kwakazoomana.

MuCoron ndakali kwiiya Bbayibbili abantu biingi alubo bamwi bakabbabbatizigwa. Pesi kuli bumwi buyumu-yumu mbundakali kuswaana. Chimwi chiindi, ndakeelede kweenda kuzwa kuseeni kusika sikati kuti ndikaakusike nkubakali kukkala kanditazi pe kuti ndiyoolala kuli nindaakusika. Chilawu chakeelede kukambawukwa aambungano yesu chakali kuswaanizya tusuwa twiingi. Ndakali kubelesya bboodi kuti ndikasike nkubakali kukkala nikuba kuti mulwizi mwakali mayuwe alubo ime teendakali kukonzya pe kuyamba. Mubuyumu-yumu boonse oobu, Jehova wakandikwabilila alubo wakandigwasya. Ndakabona kuti Jehova wakali kundiyiisya kuti ndilibambile buyumu-yumu mbundakali kuzooswaana kumulimu mupya ngundakali kuzoopegwa.

Mu 1978 ndakachinchilwa kuPapua New Guinea ku-Australia nkwiili kunyika. Papua New Guinea ili aazilundu zyiingi loko alubo yakasyeelane aaSpain bupati bwayo. Ndakagamba nindakaziba kuti bantu bakkala kunyika eeyi basika ku 3 miliyoni baambuula milaka yiinda ku 800. Pesi biingi babo balakonzya kwaambuula chiMelanesian Pidgin, chizibinkene kuti Tok Pisin.

Ndakanjila aambungano yaChikuwa kwachiindi chifwiifwi kuPort Moresby. Mpawo ndakazoochinchilwa kumbungano yachiTok Pisin. Kuti nduuzibe kabotu mulaka, ndakanjila kkilasi yamulaka ooyu. Mumulimu wakukambawuka ndakali kubelesya mabala ngindakali kwiiya mukkilasi. Eezi zyakandigwasya kuti ndifwambaane kuuziba mulaka. Kakutanayinda chiindi chilamfu, ndakakonzya kupa nkani yabantu boonse mumulaka wachiTok Pisin. Kanditanakkwanisya munyaka kandili muPapua New Guinea, ndakabuzigwa kuti ndibeleke kandili mulangizi wabbazu mumbungano zyachiTok Pisin, muzilikiti zisiyene-siyene. Nindakapegwa mulimu ooyu ndakagamba loko.

Akaambo kakuti mbungano zyakalisenseene, ndakeelede kubamba miswaangano yabbazu myiingi alubo ndakali muntu wakweenda kupela. Kumasaangunino, ndakali kulimvwa kandilendeleledwe  nindakali kusika kunyika iimbi, kwiiya mulaka mupya amaponeno mapya. Akaambo kakuti ndawu eeyi yakazwide zilundu alubo teeyakali kweendeka pe amoota, mviki amviki ndakali kugada ndeke. Chimwi chiindi, kwakayinoonga ndime andikke nindakali mundeke, ndeke eeyo chakali chikkolo-kkolo. Ndakali kukataazikana nindakali kugada ndeke eeyo mbuli mbundakali kukataazikana nindakali kugada bboodi.

Bakali bache bantu bakali aamafooni, nkinkaako, ndakali kwaambuula aambungano kandibelesya magwalo. Chiindi chiingi ndakayinoonga ndaasaangunina kusika magwalo aayo, mpawo ndakali kubuzya bantu bamuchilawu eecho kuti nkuukuli kuli Bakamboni. Chiindi nindakali kubonana aabakwesu, bakali kunditambula munzila yaluyando alubo eezi zyakali kupa kuti ndiyeeye mbukuyandikana kubeleka changuzu nkundichita kuti ndibaswaye. Ndakabona kuti Jehova wakandigwasya munzila zyiingi loko alubo ndakabona kuti bweenzuma mbundilaabo anguwe bwakasima.

Kukasuwa kategwa Bougainville nindakanjila miswaangano kakusaanguna, kwakasika bamwi bakwetene kabali kumwemwetela mpawo bakandibuzya kuti, “Uchituyeeyede na?” Ndakazooyeeya kuti ndakalibakambawukilide nindakasika kuPort Moresby mpawo ndakakumbila umwi mukwesu wamundawu eeyo kuti ayiye aabo Bbayibbili. Nibakasika kukuzoondijuzya, bakali babbabbatizigwa. Eechi nchiimwi chazilongezyo nzindakajana muminyaka iitatu kandibelekela kuPapua New Guinea.

Kanditanazwa muCoron mu 1978, ndakazibana aawumwi muchizi wakali mubotu alubo wakali kubeleka changuzu uutegwa Adel. Wakali payona wachiindi choonse kumwi kalangania bana bakwe babili, Samuel aShirley. Aachiindi nchicheecho, wakali kulangania bayina bakali bachembaala. MuMay 1981, ndakabweeda kuPhilippines kuti ndikachade a-Adel. Nitwakachada, twakaba mapayona aachiindi choonse alubo twakali kulangania mpuli katuli aamwi.

Nikuba kuti ndakali ndaba aampuli, mu 1983 ndakasalwa kuti ndibe payona uuyandikana alubo ndakaakubelekela kukasuwa kaLinapacan kali muchilikiti chaPalawan. Mpuli yangu yakalongela kubusena oobu bwakali kule loko kwakatalikwe Bakamboni. Mumunyaka wakazootobela, baamazyala bakatusiya. Nikuba oobo, twakakkala katujisikini mumulimu wakukambawuka alubo eezi zyakatugwasya kuti tulisimye nikuba kuti twakali twafwidwa. Bantu mbitwakali kwiiyaabo Bbayibbili muLinapacan bakali kuziyanda nzibakali kwiiya alubo kakutanayinda chiindi kwakali kwayandikana kuti tube aaNg’anda yaBwaami niini, nkinkaako, twakaliyakila atulikke. Katuli twaba aaminyaka iitatu muLinapacan, twakabotelwa nikwakasika bantu bali 110 kuChiyubulusyo alubo biingi babo bakazoobbabbatizigwa katuli twazwa mundawu eeyi.

Mu 1986, ndakachinchilwa kukasuwa kaCulion. Kasuwa aaka kakali aabantu bakali kuchiswa chipele. Nindakachinchilwa kundawu eeyi, anguwe Adel wakasalwa kuti abe payona uuyandikana. Kumasaangunino, twakali kuyoowa kukambawukila bantu bakali aachipele. Pesi basikupupulula bamundawu eeyi bakatubuzya kuti, aabo bakali kuchiswa bulwazi oobu bakali bajana busilisi alubo teebwakachili kutabukila-tabukila pe. Bamwi bakali aachipele bakali  kunjila miswaangano kung’anda yawumwi muchizi. Kakutanayinda chiindi, twakali twajayila mundawu eeyi alubo twakabotelwa kubuzya bantu atala abulangilizi bwamuBbayibbili nikuba kuti bakali kubonaanga Leza abantu tabakwe ndaba pe ambabo. Twakabotelwa nitwakabona mbubakali kubotelwa bantu aabo bakali aachipele nibakaziba kuti limwi zuba bulwazi bwabo buzoomana.—Lk. 5:​12, 13.

Niinzi zyakagwasya bana besu kuti babotelwe kuCulion? Ime a-Adel twakatamba bachizi babili bachikula bakuCoron kuti bazoobe beenzinyina babana besu. Samuel, Shirley abachizi aaba babili, bakali kunoneezegwa mumulimu wakukambawuka. Bakali kwiiya aabana mpawo ime a-Adel twakali kwiiya aabazyali babana aabo. Aali chimwi chiindi twakali kwiiya aampuli zili 11. Twakali aazyiiyo zyaBbayibbili zyiingi zyakali kwiinkilila kunembo alubo kwakajulwa mbungano mpya.

Kumasaangunino, ndime andikke nindakali mwaalu mundawu eeyo. Nkinkaako, bakuwofesi yamutabi bakandikumbila kuti kandichitisya miswaangano mviki amviki kuCulion kwakali basikupupulula bali 8 akuMarily kwakali basikupupulula bali 9. Kuzwa kuCulion kusika kuMarily kwakali kweendwa ma-awa aatatu abboodi. Niyakali kumana miswaangano, ime ampuli yangu twakali kweenda kwama-awa miingi katwiinda muzilundu kuti tukachitisye zyiiyo zyaBbayibbili muchilawu chitegwa Halsey.

Kakutanayinda chiindi, bantu biingi bakaza mukasimpe kuMarily akuHalsey zyakuti twakayaka Maanda aaBwaami kundawu eezi zibili. Mbuli mbubakachita kuLinapacan, bakwesu azyiiyo zyaBbayibbili mbabo bakayaka Ng’anda yaBwaami. Ng’anda yaBwaami yakuMarily yakali kukkwana bantu bali 200 alubo yakali kukomezegwa, mpawo mputwakali kuchitila miswaangano yabbazu.

Mu 1993 bana kabali bakomena, ime amwanakazi wangu twakanjila mumulimu wabbazu kuPhilippines. Mu 2000, ndakanjila Chikolo Chakwiiya Mulimu kuti ndiyiisigwe kuba muyiisi wachikolo eechi. Ndakalimvwa kanditeeleli pe kubeleka mulimu ooyu wakuyiisya, pesi Adel wakali kukkala kandisungwaazya. Wakandiyeezya kuti Jehova wakali kuyoondipa manguzu aakuti ndichite mulimu ooyu mupya. (Flp. 4:13) Adel wakalizi kuti eezi nzyachoonzyo akaambo  kakuti Jehova wakali kumugwasya kuti achite mulimu nikuba kuti wakali kuchiswa.

Mu 2006 kandili kuchita mulimu wakuyiisya, Adel wakajatwa bulwazi bwaboongo bupa kuti muntu alebuke mubili. Twakayoowa. Nindakayeeya kuti tusiye mulimu wesu kuchitila kuti ndimulanganie, Adel wakaamba kuti, “Yanduula dokotela uukonzya kundisilika bulwazi bwangu alubo ndilizi kuti Jehova ulatugwasya kuti tukonzye kwiinkilila kunembo amulimu wesu.” Kwaminyaka iili 6 yakatobela, Adel wakayinkilila kunembo kabelekela Jehova katang’ung’uni. Naakakachilwa kweenda, wakali kukambawuka kali aawheelchair. Nikwakali kumuyumina kwaambuula zintu zyiingi, wakali kusandula aamajwi mache kumiswaangano. Kusikila naakafwa mu 2013, bantu bakali kukkala kabamusendela mameseji aakumulumba akaambo kakuba chikozyano chilikabotu chakulisimya. Kwaminyaka yiinda ku 30, ndakakkala aamwanakazi wangu wakali kusyomeka alubo wakali aaluyando. Pesi naakazoofwa, ndakasaanguna lubo kulendelelwa akuusa.

Adel wakali kuyanda kuti ndiyinkilile kunembo amulimu wangu, alino nzizyo nzindakachita. Ndakali kukkala kandijisikini alubo eezi zyakandigwasya kuti nditalendelelwi loko pe. Kuzwa mu 2014 kusika mu 2017, ndakakumbilwa kuti kandiswaya mbungano zyaambuula mulaka wachiTagalog munyika mulimu wesu muwakakasidwe. Kuzwa waawo, ndakaswaya mbungano zyamulaka wachiTagalog kuTaiwan, ku-United States akuCanada. Mu 2019, ndakaakuchitisya makkilasi aamulaka waChikuwa kuChikolo chaBakambawusi baBwaami ku-India akuThailand. Ndakali kubotelwa loko nindakali kuchita milimu yoonse eeyi. Kukkala kandichita zintu zyamubukombi kupa kuti ndikkale kandibotelwa.

Kundawu zyoonse nzindakayinka, ndakali kumvwanana loko abakwesu abachizi mbindakali kuswaana, nkinkaako, teekwakali kuuba pe kuti ndibasiye. Muziindi eezi ndakayiya kuti ndisyome Jehova chakumaninina. Ndakali kukkala kandibona Jehova mbaakali kundigwasya alubo eezi zyakandigwasya kuti nditambule kufumbwa zyiimo nzindakali kuswaana. Lino ndilikubeleka kandili payona uuyandikana kuPhilippines. Ndakajayila mumbungano mpya alubo bamumbungano eeyi balandisungwaazya akundilangania. Alubo ndilabotelwa kubona Samuel aShirley kabali kwiinkilila kunembo kubelekela Jehova mbuli bayina.—3 Joh. 4.

Nichoonzyo ndakaswaanana aabuyumu-yumu bwiingi mubuumi bwangu, buswaanizya kubona mwanakazi wangu kalikuchiswa bulwazi bubi loko kusikila wandisiya. Alubo ndakeelede kuchincha kweendelana azyiimo. Ndakalibonena kuti Jehova “tali kule pe kuli umwi awumwi wesu.” (Mil. 17:27) Kuboko kwaJehova ‘teekufwiifwi pe’ kuti kugwasye akusimya bakombi bakwe nikuba bali kundawu zili kule. (Is. 59:1) Jehova Bbwe lyangu, wakali aandime kwabuumi bwangu boonse, ndilamulumba. Teendakali aandikke pe.