1-2. Chiimo chesu chikozyenie biyeni achamulombe waambwa mufuka 1?

 ATUTEEDI umwi mulombe uzyedwe aampuli iinotede. Bumwi buzuba bazyali bakwe bajayigwa. Kachilila bazyali bakwe, wamvwa penzi limbi. Waziba kuti bazyali bakwe bakalya mali yoonse njibakalaayo mpawo bakasiya zikwelete zyiingi. Kwiinda kuti akone bunoti bwabazyali bakwe, mulombe ooyu waba muchikwelete alubo takwe aakusaangunina pe. Bakalidwa mali balikumukataazya kuti abbadale zikwelete eezyo. Takwe mali pe yakuti ulakonzya kubbadala zikwelete zyoonse.

² Munzila iikozyenie, chiimo chesu chili mbuli chamulombe ooyu waambwa aajulu. Bazyali besu bakusaanguna, Adamu a-Eva, bakali aabuumi bumaninide alubo bakali kupona buumi bubotu muparadayizi mbotu. (Matl. 1:27; 2:​7-9) Bakali aachilongezyo chakupona kukabe kutamani, pesi mukulaba kwaliso, zintu zyakabachinchila. Bakasweekelwa chilongezyo chibotu chakupona kukabe kutamani muParadayizi. Nduululi lukono bana babo ndubakali kukonzya kukona? Bbayibbili lyaamba kuti: “Chibi chakanjila munyika kwiinda mumuntu uumwi alubo lufu lwakanjila kwiinda muchibi, nkinkaako, lufu lwakasikila bantu boonse nkaambo boonse bakabisya.” (Rom. 5:12) Twakakona chibi kuzwa kubazyali besu bakusaanguna alubo chibi eecho chakeeta lufu. Chibi nchitwakakona  chili mbuli chikwelete chipati loko nchitutakonzyi pe kubbadala.—Int. 49:8.

 3. Nkamboonzi zibi zyesu nizikozyanisidwe aazikwelete?

³ MuBbayibbili, zibi zikozyanisidwe aachikwelete. (Mt. 18:​32-35) Kuti twabisya nga kuli mbuli kuti twaba aachikwelete kuli Jehova. Tweelede kuchibbadala chikwelete eecho. Kuti twakachilwa kuchibbadala katuchipona, nga chazoozimwa nitwafwa.—Rom. 6:​7, 23.

 4. (a) Kuti teetwagwasigwa aaJehova, niinzi zikonzeka kuchitika? (Intembauzyo 49:​7-9) (b) Mbuli mbulibelesedwe muBbayibbili, bbala lyakuti “chibi” lyaambaanzi? (Langa kabbokesi katii, “ Chibi.”)

⁴ Zilachita na kuti tuboozye zintu zyoonse nzibakasweekelwaazyo ba-Adamu a-Eva? Katuli aatulikke, tazikonzeki pe. (Bala Intembauzyo 49:​7-9.) Kuti teetwagwasigwa, tulakonzya kufwa mbuli mbubafwa banyama zyakuti tatuchizookonzyi pe kupona lubo.—Muk. 3:19; 2 Pet. 2:12.

 5. Taateesu siluyando wakatugwasya biyeni kuti tubbadale chikwelete chachibi nchitwakakona? (Langa chifanikisyo chili aachivumbyo.)

⁵ Kuti twabweeda kuchikozyano chamulombe waambwa mufuka 1, kujana mulombe ooyu wamvwa biyeni kuti umwi mwaalumi uunotede wasala kumubbadalila chikwelete chakwe choonse? Mulombe ooyu ulamulumba loko muntu ooyo. Munzila iikozyenie, Taateesu siluyando Jehova wakatupa chipo kuti tubbadale chikwelete chachibi nchitwakakona kuli Adamu. Jesu wakazipandulula munzila eeyi: “Leza wakayiyanda loko nyika zyakuti wakapa Mwanaakwe uuzyedwe aalikke, kuchitila kuti muntu woonse uumusyoma atanyonyoonwi pe pesi abe aabuumi butamani.” (Joh. 3:16) Mukuyungizya, chipo eecho chipa kuti tube aabweenzuma busimide aJehova.

 6. Tulalanga-langaanzi muchiiyo eechi alubo nkamboonzi?

⁶ Kujana twagwasigwa biyeni achipo chipati chipa kuti tulekelelwe zibi zyesu? Kuti tusandule mubuzyo ooyu, tulalanga-langa mabala aasiyene-siyene aabelesedwe muBbayibbili anzyaawamba. Nitwanooyeeyesesya atala abupanduluzi bwamabala aaya azintu Jehova nzyaakatuchitila kuti atulekelele zibi, tulayungizya kumulumba.

KUMVWANANA LUBO ALEZA

 7. (a) Nchiichili chimwi nchibakasweekelwaacho ba-Adamu a-Eva? (b) Mbukunga tuli bana ba-Adamu a-Eva, niinzi nchituyandikana? (Baroma 5:​10, 11)

⁷ Chiindi Adamu a-Eva nibakabisya teebakachili kukonzya pe kupona kukabe kutamani, pesi bakaba basinkondonyina aTaata, Jehova. Kabatanabisya, Adamu a-Eva  bakali chipanzi champuli yaLeza. (Lk. 3:38) Pesi chiindi nibakasala kutaswiilila Jehova, bakatandwa mumpuli yaJehova alubo eezi nizyakachitika, teebakayinaba aabana pe. (Matl. 3:​23, 24; 4:1) Mbukunga tuli bana babo, kwakali kuyandikana nzila yakuti tumvwanane lubo aJehova. (Bala Baroma 5:​10, 11.) Mulaamwi majwi, tweelede kuti tube aabweenzuma bulikabotu aJehova. Kweendelana alimwi bbuku lipandulula makani aamuBbayibbili, mabala aachiGrikki aakabelesegwa aawa atii, “kumvwanana lubo” alakonzya kwaamba “kuba aabweenzinyokwe asinkondonyokwe.” Chigambya nchakuti Jehova nguwe wakabweza ntaamu yakuti tukonzye kumvwanana lubo anguwe. Wakazichita biyeni?

LEZA WAKAJULA NZILA YAKUTI TUBE BEENZINYINA

 8. Niinzi Jehova nzyaakachita kuti tumvwanane lubo anguwe?

⁸ Kumaninsya Milandu mabambe Jehova Leza ngaakabikka aakuti bantu balaachibi bamvwanane lubo anguwe. Eezi zyaamba kuti, kuti kuyanda kubbadala chimwi chintu, chintu nchuyanda kubbadazya cheelede kweendelana aamuulo wachintu eecho. Munzila eeyi, kuti chimwi chintu chasweeka naakuti chanyonyooka chilakonzya kuboola lubo. Magwalo aachiGrikki angawo aambuula atala anzila Jehova njaakabelesya iipa kuti kukonzeke kumuntu woonse kuti abe aabweenzinyina anguwe.—Rom. 3:25.

 9. Ngaali mabambe Jehova ngaakachitide kuti ma-Israyeli balekelelwe zibi zyabo?

⁹ Kuti ma-Israyeli babe aabweenzinyina bulikabotu aJehova, Jehova wakachitide mabambe aakali kubeleka kwachiindi chifwiifwi kuti balekelelwe zibi zyabo. Muchisi cha-Israyeli, Buzuba Bwakumaninsya Milandu bwakali kuchitwa kamwi amunyaka. Mubuzuba oobo, mupayizi mupati wakali kupa chipayizyo chamunyama kayiminina bantu boonse. Pesi zipayizyo zyabanyama teezyakali kumaninsya zibi chakumaninina pe akaambo kakuti bantu balisumpukide kwiinda banyama. Ma-Israyeli bakali kusanduka chachoonzyo chiindi nibakali kupa zipayizyo Jehova nzyaakali kuyanda, Jehova wakali kubalekelela chakumaninina. (Heb. 10:​1-4) Mukuyungizya, mabambe aaya aakupa zipayizyo ngibakali kuchita chiindi achiindi, akali kubayeezya kuti babone kuti chibi chabo chakali chipati biyeni akuti kwakali kuyandikana chimwi chintu chakali kukonzya kumaninsya zibi zyabo chakumaninina.

10. Ngaali mabambe Jehova ngaakachita kuti bantu balekelelwe zibi chakumaninina?

¹⁰ Ngaali mabambe Jehova ngaakachita kuti bantu balekelelwe zibi chakumaninina? Wakatupa Mwanaakwe ngwayandisya alubo “wakapayizigwa kamwi biyo kuti abweze zibi zyabantu biingi.” (Heb. 9:28) Jesu wakapa “buumi bwakwe kuti bube chinunuzyo chakunununa biingi.” (Mt. 20:28) Chinunuzyo niinzi?

CHINUNUZYO CHAJESU CHAKAPA KUTI TUBE BEENZINYINA BALEZA

11. (a) Kweendelana abupanduluzi bwaBbayibbili, chinunuzyo niinzi? (b) Muntu uuli biyeni wakali kukonzya kubbadala chinunuzyo?

¹¹ Kweendelana abupanduluzi bwaBbayibbili, chinunuzyo nimbadalo iipa kuti kumaninsigwe milandu akuti kube kumvwanana lubo. a Mumaboneno aaJehova, chinunuzyo chiboozya zintu zyakasweeka. Munzilaanzi? Utalubi kuti Adamu a-Eva teebakachimaninide pe alubo teebakachilikwe chilongezyo  chakupona kukabe kutamani. Nkinkaako, muulo wachinunuzyo wakeelede kweelana aazintu zyakasweegwa. (1 Tim. 2:6) Chinunuzyo chakeelede kubbadalwa aamuntu (1) wakamaninide; (2) wakali kukonzya kupona kukabe kutamani aanyika alubo (3) wakalipedelede kupa buumi bwakwe kuti bube chinunuzyo chesu. Buumi bwamuntu ooyo mbubo abulikke bwakali kukonzya kubbadala buumi bwakasweegwa aa-Adamu a-Eva.

12. Nkamboonzi Jesu naakali kweelela kuti ape chinunuzyo?

¹² Atubone twaambo tutatu tutondeezya kuti nkamboonzi Jesu naakali kweelela kubbadala chinunuzyo. (1) Jesu wakalimaninide alubo “taakwe chibi nchaakachita pe.” (1 Pet. 2:22) (2) Akaambo kakuti wakalimaninide, wakali kukonzya kupona kukabe kutamani aanyika. (3) Wakalilipedelede kufwa akuti ape buumi bwakwe akaambo kandiswe. (Heb. 10:​9, 10) Akaambo kakuti wakalimaninide, Jesu wakali mbuli Adamu katanabisya. (1 Kor. 15:45) Nkinkaako, akaambo kakuti Jesu wakatufwida, wakakonzya kubbadala zintu zyakasweegwa aa-Adamu. (Rom. 5:19) Eezi nzizyo zyakapa kuti Jesu abe “Adamu wakumamanino.” Takuyandikani muntu uumbi pe uumaninide kuti azoomaninsye chibi cha-Adamu. Chiindi Jesu naakapa buumi bwakwe, “wakazichita kamwi biyo.”—Heb. 7:27; 10:12.

13. Nguuli musiyano uuliwo aakati kamabambe aakali kuchitwa kuti kumaninsigwe milandu achinunuzyo?

¹³ Nguuli musiyano uuliwo aakati kamabambe aakali kuchitwa kuti kumaninsigwe milandu achinunuzyo? Kumaninsya Milandu nintaamu Leza njaakabweza kuti ape kuti bantu bali aachibi babe aabweenzinyina bulikabotu lubo anguwe. Chinunuzyo nimbadalo yakabbadalwa kuti bantu bali aachibi bakonzye kulekelelwa milandu yabo. Mbadalo eeyi yiimininwa aaganzi lyaJesu lyakatilwa aakaambo kandiswe.—Ef. 1:7; Heb. 9:14.

TULILULEME NKAAMBO JEHOVA WAKATUNUNUNA KUCHIBI AKULUFU

14. Tuyanda kulanga-langaanzi lino alubo nkamboonzi?

¹⁴ Tugwasigwa biyeni azintu nzyaakatuchitila Jehova? Kuti tusandule mubuzyo ooyu, tulalanga-langa bupanduluzi bwamabala aabili aabelesedwe muBbayibbili aatugwasya kuti tumvwisisisye mbutugwasigwa akulekelelwa aaJehova.

15-16. (a) MuBbayibbili, bbala lyakuti ‘kwaangununwa’ lyaambaanzi? (b) Kwaangununwa kuzwa kuchibi akulufu kupa kuti tumvwe biyeni?

¹⁵ Bbayibbili lyaamba kuti chinunuzyo nichakabbadalwa, twakaangununwa. Mwaapostoli Petro wakaamba kuti: “Mulizi kuti mwakaangununwa [muchiGrikki, “mwakanununwa”] kuzwa kubuumi bwanu bwabuyo mbumwakapegwa aamasianyookulu, kutali aazintu zinyonyooka zili mbuli nsiliva naakuti ngolida. Pesi mwakaangununwa aaganzi liyandikana lyaKkristu, lili mbuli lyamwanaambelele uutakwe bubi akabata.”—1 Pet. 1:​18, 19; makani aamunsi.

¹⁶ Akaambo kachipayizyo chachinunuzyo, twakaangununwa kuzwa kubuzike bwachibi alufu. (Rom. 5:21) Tulamulumba Jehova aJesu nkaambo twakaangununwa aaganzi lyaJesu.—1 Kor. 15:22.

17-18. (a) Niinzi chipa kuti muntu aambwe kuti uliluleme? (b) Eezi zipa kuti tumvwe biyeni?

¹⁷ Bbayibbili lyaamba kuti babelesi baLeza baambwa kuti baliluleme, eezi zyaamba kuti iswe tatweelede kulibbadalila zibi zyesu. Nikuba kuti eezi nzizyo nzyaakachita, Jehova tatyoli zyeelelo zyakwe ziluleme. Tatwaambi kuti tuliluleme kakutakwe nzitwachita pesi kuli zimwi nzitweelede kuchita. Jehova  ulilibambilide kutulekelela zibi zyesu kuti twasyoma mabambe ngibakatuchitila aJesu kuti batupe chinunuzyo.—Rom. 3:24; Gal. 2:16.

¹⁸ Kwaambwa kuti tuliluleme kutugwasya biyeni? Bamwi bakasalwa kuti bazooyendelezyaamwi aJesu kujulu, bakaambwa kale kuti baliluleme alubo bakaba bana baLeza. (Tit. 3:7; 1 Joh. 3:1) Zibi zyabo zyakalekelelwa. Kuli mbuli kuti taakwe nibakachitide chibi pe alubo baleelela kuba muBwaami bwaLeza. (Rom. 8:​1, 2, 30) Aabo bali aabulangilizi bwakupona aanyika baambwa kuti baliluleme, mbeenzinyina baLeza alubo zibi zyabo zyakalekelelwa. (Jak. 2:​21-23) Bankamu mpati batazoofutuke lya-Amagedoni, bali aabulangilizi bwakuzoopona kukabe kutamani. (Joh. 11:26) “Baluleme abataluleme” balikoona mulufu bazoobusigwa. (Mil. 24:15; Joh. 5:​28, 29) Kuzwa waawo, bakombi baLeza boonse baswiilila banooli aanyika, bayooba “aalwaangunuko lwabulemu bwabana baLeza.” (Rom. 8:21) Tuchilangilila aameso aasalala chiindi eecho nituyooba aabweenzuma busimide loko aJehova nkaambo tunooli twamaninina!

19. Chiimo chesu chakachincha biyeni? (Langa kabbokesi kati, “ Mbaakatulekelela Jehova.”)

¹⁹ Nisimpe kuti chiimo chesu chili mbuli chamulombe waambwa mufuka lyakusaanguna wakasweekelwa zintu zyoonse alubo wakakona chikwelete chipati nchaakatali kukonzya kubbadala. Tulamulumba Jehova nkaambo wakatugwasya. Chiimo chesu chakachincha akaambo kamabambe aakumaninsya milandu achinunuzyo chakabbadalwa. Kusyoma muli Jesu Kkristu kupa kuti twaangununwe kuchibi alufu. Zibi zyesu zyakamwayigwa alubo kuli mbuli kuti taakwe nitwakabisizye pe. Chibotezya loko nchakuti, tulakonzya kuba aabweenzuma bulikabotu lino aTaateesu wakujulu siluyando Jehova.

20. Tuzoolanga-langaanzi muchiiyo chitobela?

²⁰ Tulayungizya kumuyanda Jehova aJesu kuti twayeeyesesya atala azintu nzibakatuchitila. (2 Kor. 5:15) Kaansinga teebakatugwasya, nikuli tatukwe bulangilizi pe! Pesi umwi awumwi wesu ugwasigwa biyeni akaambo kakuti Jehova wakatulekelela? Mubuzyo ooyu uzoosandulwa muchiiyo chitobela.