MUCHIZI utegwa Sylviana, payona uuli aminyaka yiinda ku20 wakati, “Nindakamvwa beenzuma kabali kwaamba bubotu mbubakajana nibakali kupayona kubusena bwakali kuyanda basikugwasilizya, ndakayanda kuchita mbuuli mbabo. Pesi ndakali kuyoowa kuti tandikakonzyi pe kuyoojana zintu ziyandikana mubuumi.”

Ngawalimvwa mbuuli mbakalimvwa na Sylviana? Ulaachiyandisyo chakuyoobelekela kubusena buyanda basikugwasilizya na pesi kuyoowa kuti tukachizuzikizyi pe chipeekezyo eecho? Kuti kulimvwa munzila eeyo, utalikataazyi! Jehova wakagwasya bakwesu abachizi biingi kuti bazwidilile kuzunda mapenzi aakali kukonzya kubakachizya kuti bayungizye mulimu wabo wakukambawuka. Kuti tubone kuti Jehova wakabagwasya biyeni bamwi, atulange-lange zyakachitika kuMadagascar kasuwa kachi4, bupati munyika.

Kwaminyaka yiinda ku10 basikupupulula basungu biinda ku70 amapayona bazwa kumanyika * aasika ku11, bakalipeda kuti bazookambawukile mukasuwa aaka kalimuAfrica. Bantu bakkala mukasuwa aaka balaachiyandisyo chakwiiya kasimpe alubo balalilemeka Bbayibbele. Nikuba basikupupulula bamuchisi eechi, balagwasilizya abalabo mukupupulula mulumbe waBwaami. Atumvwe mbubakaamba bamwi babo.

Louis amukayintu wakwe Perrine bali aminyaka yiinda ku30 bakuFrance, bakalongela kuMadagascar. Bakali baba achiindi chilamfu kababambide kuti bayungizye mulimu wabo wakukambawuka kwiinda mukulongela kulibumwi busena pesi Perrine wakali amyoyo iibili. Perrine wakaamba kuti: “Ndakali kuyoowa kulongela kuchisi nchinditazi. Teendakali kuyanda kusiya bamumpuli yangu, beenzuma bamumbungano, ng’anda yangu, masena ngindakali kuyandisya azintu nzitwakazibilide kuchita buzuba abuzuba. Kulikataazya azintu eezi, ndilyo lyakali penzi pati ndindakeelede kuzunda.” Mu2012, Perrine wakachincha maboneno aakwe akuzumina kuti balonge. Lino ulimvwa biyeni akusala nkubakachita? Wakati: “Kubona Jehova mbalikutugwasya mubuumi kulikusimya lusyomo lwesu.” Louis wakati:  “Chakatubotezya nchakuti, nitwakanjila Chiyubulusyo chakusaanguna kuMadagascar, bantu mbitwakali kwiiyaabo Bbayibbele bali10 bakasika kuChiyubulusyo!”

Niinzi chakabagwasya kuti bazumanane amulimu wabo nibakaswaana mapenzi? Bakakomba kuli Jehova kuti abape manguzu aakuti balisimye. (Flp. 4:13) Louis wakaamba kuti: “Twakabona nzila Jehova njakasandulaayo nkombyo zyesu alubo wakatupa ‘luumuno lwa-Leza.’ Twakabikkila maanu kuzintu zibotu nzitwakali kujana mumulimu wesu. Beenzuma mbitwakasiya kuFrance bakali kutulembela mameseji amagwalo, eezi zyakali kutusungwaazya kuti tuzumanane amulimu wesu.”—Flp. 4:6, 7; 2 Kor. 4:7.

Jehova wakabalongezya baLouis aPerrine akaambo kakulisimya kwabo. Louis wakaamba kuti: “MuOctober 2014, twakatambwa kuti tukanjile Chikolo chaBbayibbele chaBantu Bakwetene, * chakachitilwa kuFrance. Tatukachilubi pe chipo eechi nchitwakapegwa aJehova.” Nibakamaninsya chikolo eechi bakabweedezegwa kuMadagascar.

Mumunyaka wa2010, Didier amukayintu wakwe utegwa Nadine bakalongela kuMadagascar, nibakalonga bakali aminyaka yiinda ku50. Didier wakati: “Nitwakakwatana twakali kupayona mpawo twakazooba abana batatu. Nibakakomena twakayeeya kulongela kubusena buyanda basikugwasilizya.” Nadine wakaamba kuti: “Nindakayeeya kuti ndiyookkala kule abana bangu zyakapa kuti ndibe aamyoyo iibili pesi bana besu bakatubuzya kuti, ‘Kuti mwiinka kubusena buyanda basikugwasilizya muzootupa mantukwe!’ Majwi aabo akatusungwaazya kuti tulonge. Nikuba kuti tukkala kule abana besu pesi tulabotelwa akaambo kakuti tukkala katufoonenana.”

Kwiiya mulaka wachiMalagasy kwakali kubayumina baDidier aNadine. Nadine kalikumweta-mweta wakati: “Nikuli tuli aminyaka iili 20 kwali kunootuubila kwiiya mulaka ooyu.” Niinzi chakabagwasya? Bakatalika kunjila ambungano yachiFrench. Mukuya kwachiindi bakasala kuti balongele kumbungano yachiMalagasy. Nadine wakaamba kuti: “Bantu biingi mbitukambawukila balaachiyandisyo chakwiiya Bbayibbele. Ziindi zyiingi balatulumba akaambo kakubaswaya. Kumatalikilo ndakali kubonaanga ndakali kulota. Kulandibotezya kukambawukila muchilawu eechi. Nindibuka kuseeni ngandili achiyandisyo chakukambawuka!”

Didier ngawaliseka kuti wayeeya chiindi naakatalika kwiiya chiMalagasy. Wakati: “Limwi zuba ndakali kuchitisya miswaangano pesi teendakali kuzimvwa pe nzibakali kusandula bakwesu abachizi. Nzindakali kukonzya kwaamba nkuti, ‘Twalumba.’ Nindakalumba umwi muchizi, bamwi bakanditondeezya kuti nsandulo njapa teenjiyo pe. Ndakazoowamba umwi mukwesu, ndiyeeya kuti wakapa nsandulo iili njiyo.”

Kumuswaangano waBbooma wamu2005, Thierry amukayintu wakwe Nadia bakeebela chisobano chiti “Pursue Goals That Honor God.” Chisobano eechi  chakabasika aamoyo alubo chakapa kuti bayeeye kulongela kubusena buyanda basikugwasilizya. Thierry wakaamba kuti: “Nichakamana chisobano eechi katuli kukambilila maboko ndakalanga mukayintu wangu akumubuzya kuti, ‘Tulaya kuli?’ Mukayintu wangu wakandibuzya kuti nzizyo nzyaakali kuyeeya alakwe.” Kuzwa waawo, bakabweza ntaamu kuti bazuzikizye chipeekezyo chabo. Nadia wakati: “Twakawuzya zintu nzitwakali aazyo mane twasyaala azintu zyakali kukkwana muzikwama zine luzutu!”

Mu2006 bakalongela kuMadagascar alubo bakakubotelelwa kukambawuka mubusena oobo. Nadia wakaamba kuti: “Bantu mbitukambawukila bapa kuti tubotelwe.”

Nikwakiinda minyaka iili 6, bakaswaana buyumu-yumu. Bayina aaNadia bakali kukkala kuFrance bakawa mpawo bakatyoka kuboko akulichisa mumutwe. Bana babo bakakumbila dokotela wakali kubasilika kuti bakakkale ambabo kuMadagascar. Nikuba kuti bakali aminyaka iili 80 pesi bakazumina kulonga. Balimvwa biyeni lino atala akusala nkubakachita? Bakaamba kuti: “Nikuba kuti nkuyumu kuchincha akuti ndilachiswa-chiswa pesi ndilabotelwa akaambo kakuti ndilikugwasilizya mumbungano. Alubo chimwi chindibotezya nchakuti kukkala ookuno kupa kuti bana bangu bakonzye kwiinkilila kunembo amulimu wabo.”

Mukwesu uutegwa Riana uli aminyaka yiinda ku20, wakakomenena kuAlaotra Mangoro iili kubuzwezuba kuMadagascar. Kubusena oobu kulalimwa. Riana wakali kupasa kuchikolo alubo wakakanzide kuya kuyunivesiti. Pesi nakiiya Bbayibbele wakachincha maboneno aakwe. Wakaamba kuti: “Ndakasyomezya Jehova kuti, ‘Ndazoopasa kusekkondali akukkoleji ndizoosaanguna kupayona.’” Naakamaninsya kukkoleji wakazuzikizya chisyomezyo chakwe. Bakabamba amweenzinyina wakali kupayona kuti bayanduule mulimu wakali kukonzya kubagwasilizya nibakali kupayona. Wakayungizya kuti: “Ndakasala munzila mbotu loko.”

Nikuba boobo, zibbululu zyaRiana teebakabotelwa pe akusala nkwaakachita. Wakaamba kuti: “Ndeende, siminzyeesu abanene bakandisungwaazya kuti ndiye kuyunivesiti. Pesi teendakali kuyanda kuzumizya zimwi zintu kuti zindikachizye kupayona.” Nikwakiinda chiindi, Riana wakasala kuyoobelekela kubusena kwakali kuyanda basikugwasilizya. Niinzi chakapa kuti asale munzila eeyo? Wakaamba kuti: “Limwi zuba zintu zyangu zyakabbigwa. Eezi zyakandiyeezya majwi aaJesu aakuti tweelede kuliyobweda ‘lubono lwakujulu.’ Alubo ndakasala kubikkila maanu kuzintu zyabukombi.” (Mt. 6:19, 20) Wakalongela kumusanza kwaMadagascar musinzo wamakkilomita aali 1 300 kuzwa nkwaakali kukkala alubo kubusena oobu zilyo tazichiti kabotu. Kubusena oobu kukkala bantu baambuula chiTandroy. Niinzi chakapa kuti ayinke kubusena oobu?

Kakusyeede mweezi uumwi katanabbidwa, Riana wakali kwiiya abaalumi babili baambuula chiTandroy. Wakali wakonzya kwaambuula amwi mabala aamulaka ooyu alubo wakayeeya kuti bantu bachiTandroy biingi teebakalinawumvwa pe mulumbe waBwaami. Wakaamba kuti: “Ndakakomba kandikumbila kuti Jehova andigwasye kuti ndilongele kubusena kwakali kwaambuulwa chiTandroy.”

Chiindi Riana naakalonga wakaswaana buyumu-yumu. Wakabula mulimu. Umwi mwaalumi wakamubuzya kuti: “Wakazidaanzi ookuno?” Bantu bakokuno bayinka kulindinywe kuti bakajane milimu.” Nikwakiinda mviki zibili, Riana wakabweeda kulimbabo kuti akanjile muswaangano wabbooma pesi taakalikwe mali pe. Nwaakamana muswaangano, umwi mukwesu wakabikka chimwi chintu munkomo yabbachi lyaRiana. Yakali mali yakumugwasya kuti abweede akuti akatalisye bbizinesi yakuuzya mayogati. Riana wakaamba kuti: “Ndakabona Jehova kalikundigwasya achiindi cheelede. Ndakakonzya kuzumanana kukambawukila bantu bachiTandroy bakali achiyandisyo chakwiiya atala aJehova!” Alubo kumbungano eeyi kwakali milimu myiingi yakeelede kuchitwa. “Ndakali achilongezyo chakupa nkani yabantu boonse mviki amviki. Jehova wakali kundiyiisya kabelesya mbunga yakwe.” Ambulisunu,  Riana uchibelekela kubusena oobu kuti agwasye bantu baambuula mulaka wachiTandroy kuti bazibe Jehova.

Jehova utusyomezya kuti: “Kufumbwa uulilongezya munyika uyoolilongezya muzina lya-Leza walusinizyo.” (Is. 65:16) Kuzwidilila kuzunda buyumu-yumu mbutuswaana nitulikuyungizya mulimu wesu wakukambawuka, kutugwasya kubona nzila Jehova njatulongezyaayo. Atulange-lange zyakaambwa aSylviana waambwa kumatalikilo achiiyo eechi. Wakaamba kuti wakali kubonaanga takonzyi pe kulongela kubusena buyanda basikugwasilizya. Niinzi chakamupa kuyeeya oobo? Wakaamba kuti: “Mawulu aangu tayelene pe. Nkinkaako ndeenda kandibbikitila alubo ndilafwambaana kukatala.”

Mu2014, Sylviana aSylvie Ann muchizi wakali payona mumbungano yakwe, bakalongela kuli bumwi busena bwakali kweendwa makkilomita ali85 kuzwa nkubakali kukkala. Nikuba kuti wakali kuswaana buyumu-yumu, Sylviana wakazuzikizya chipeekezyo chakwe, eezi zyakapa kuti alongezegwe. Sylviana wakaamba kuti: “Nindakaba amunyaka kandili kubusena nkutwakalongela, umwi mwanakazi ngundakali kwiiyaawe Bbayibbele utegwa Doratine wakabbabbatizigwa kumuswaangano wabbazu.”

Lusyomo ndubakali aalo basikubelekela kubusena buyanda basikugwasilizya lutondeezya kuti, kuti twazumanana kuzunda buyumu-yumu mbutuswaana nitulikuyungizya mulimu wesu wakukambawuka, tuyoobona kuzuzikizigwa kwamajwi aaJehova aakuti: “Njookuyumya, njookugwasya.” (Is. 41:10) Eezi zipa kuti bweenzuma mbutulaabo aJehova busime. Kuyungizya waawo, kulipeda kubelekela Jehova amoyo wesu woonse nikuba kubusena nkutukkala naakuti kulizimwi nyika, kutugwasya kulibambila zitakachitike munyika mpya. Didier waambwa kumatalikilo achiiyo eechi, wakati, “kubelekela kubusena buyanda basikugwasilizya kutugwasya kulibambila zitakachitike kunembo.” Tuli achoonzyo chakuti basikulipeda biingi balikulibambila zitakachitike kunembo!