1-3. (a) Nkamboonzi Jehova naakali kumuyanda Solomoni alubo nziizili zilongezyo Solomoni nzyaakajana? (b) Njiili mibuzyo njitutalange-lange muchiiyo eechi?

SOLOMONI wakaba mwaami wamaIsrayeli kachili mulombe. Solomoni naakasaanguna kweendelezya, Jehova wakalibonia kulinguwe muchiloto mpawo wakamubuzya kuti: ‘Kumbila nchuyanda, ndilakupa.’ Solomoni wakasandula kuti: ‘Mebo ndichili muniini alubo nsikwe luzibo pe. Nkinkaako, ndipe ndimubelesi wako moyo uuswiilila, kuti ndibabeteke kabotu bantu bako.’ (1 Bam. 3:5-10) Solomoni wakali kulibombya choonzyo nkaambo wakakumbila kuba ‘aamoyo uuswiilila.’ Eezi zitondeezya kuti Jehova wakali kumuyanda loko Solomoni. (2 Sam. 12:24) Leza wakabotelwa ansandulo yamwaami wachiniini Solomoni mpawo wakamupa “moyo wabusongo uucenjede.”​—1 Bam. 3:12.

² Chiindi choonse Solomoni naakali kusyomeka, Jehova wakali kumulongezya. Wakajana chilongezyo chakuyaka tempele lyakali kwiitwa ‘azina lyaJehova Leza waIsrayeli.’ (1 Bam. 8:20) Solomoni wakazibinkene loko akaambo kabusongo mbwaakapedwe aaLeza. Alubo zintu nzyakaamba kazulwidwa aaLeza, zililembedwe mumabbuku aatatu aamuBbayibbele. Limwi bbuku ndyaakalemba, ndibbuku lyaTusimpi.

³ Bbala lyakuti moyo lilembedwe kwaziindi zisika ku72 mubbuku lyaTusimpi. Muchikozyano, muli Tusimpi 4:23, Bbayibbele lyaamba kuti: ‘Aakati kazintu zyoonse nzukwabilila, kwabilila kapati moyo wako.’ Mulugwalo oolu, bbala lyakuti “moyo” lyaambaanzi? Mubuzyo ooyu ulasandulwa muchiiyo  eechi. Alubo tulasandula mibuzyo iibili iitobela: Saatani uwunyongania biyeni moyo wesu? Alubo tweelede kuchitaanzi kuti tukwabilile moyo wesu? Kuti tukkale katusyomekede kuli Leza, tweelede kumvwisisisya nsandulo zyamibuzyo eeyi iiyandikana.

4-5. (a) Majwi aali muli Intembauzyo 51:6, atugwasya biyeni kumvwisisisya nzilyaamba bbala lyakuti “moyo”? (b) Mbutuubamba mubili wesu kutugwasya biyeni kuti tumvwisisisye mbutweelede kukwabilila moyo wesu wakukozyanisya?

⁴ Muli Tusimpi 4:23, bbala lyakuti “moyo” lilakonzya kwaamba ‘buntu bwesu bwamukati’ naakuti ‘moyo wesu uusisidwe.’ (Bala Intembauzyo 51:6.) Muli amwi majwi, bbala lyakuti “moyo” lyaamba mizeezo yesu, mbutulimvwa, makanze eesu anzitulombozya. Alubo bbala eeli lyaamba mbutubede mukati kamoyo kutali mbutuboneka aanze.

⁵ Atulange-lange kuti kuba aamubili uusimide kweendelana biyeni ambutubede mukati. Chakusaanguna, kuti tukkale katuli amibili iisimide, tweelede kulya chakulya chiyaka mubili aku-ekisesayiza chiindi choonse. Munzila iikozyenie, kuti tukkale katusimide mubukombi, tweelede kulya chakulya chamubukombi chisimide aku-ekisesayiza chiindi choonse kwiinda mukutondeezya kuti tusyoma Jehova. Tutondeezya kuti tulamusyoma Jehova kwiinda mukubelesya nzitwiiya akubuzya bamwi atala anzitusyoma. (Rom. 10:8-10; Jak. 2:26) Chabili, kuti twalanga mbutuboneka aanze, tulakonzya kulibonaanga tatuchiswi pe pesi katulaabulwazi mumubili. Munzila iikozyenie, kuti twalanga nzituchita mubukombi, tulakonzya kubonaanga tulisimide mubukombi nikuba kuti mizeezo iitali kabotu ilakonzya kukomena mukati kesu. (1 Kor. 10:12; Jak. 1:14, 15) Tweelede kuziba kuti Saatani uyanda kubyala mizeezo yakwe mulindiswe. Kujana Saatani wazichita biyeni eezi? Alubo kujana twalikwabilila biyeni?

6. Ngaali makanze Saatani ngalaawo alubo uchita biyeni kuti aazuzikizye?

⁶ Saatani uyanda kuti tube mbuuli nguwe, sikupapila uutayandi kutobelezya zyeelelo zyaJehova alubo uuliyanda. Saatani takonzyi pe kutupa kuti tuyeeye mbuuli nguwe akuti tuchite mbuuli mbachita. Nkinkaako, ubelesya zimwi nzila kuti azuzikizye makanze aakwe.  Muchikozyano, upa kuti tupone aabantu bali aamizeezo iili mbuuli yakwe. (1 Joh. 5:19) Ulangilila kuti tuyoosala kuliswaanizya aambabo nikuba kuti tulizi kuti kuliswaanizya aabantu bachita zibi ‘kunyongania’ mbutuyeeya ambutuchita. (1 Kor. 15:33) Nzila eeyi njaakabelesya kuMwaami Solomoni. Solomoni wakakwata banakazi bakali kukomba baleza bakubeja mpawo “bakamuyunga kapati,” alubo ‘mbichaani-mbichaani banakazi bakwe bakoongelezya moyo wakwe’ kuti aleke kukomba Jehova.​—1 Bam. 11:3, NW.

7. Niinzi chimwi Saatani nchabelesya kuti apupulule mizeezo yakwe alubo nkamboonzi nitweelede kuchichenjelela?

⁷ Saatani ubelesya mamuvi ama-show aamuTV kuti apupulule mizeezo yakwe. Ulizi kuti twaambo twamumaTV tatutunoneezyi luzutu pesi tutuyiisya mbutweelede kuyeeya, kulimvwa ambutuchita. Jesu wakali kwiibelesya kabotu nzila yakupupulula makani naakali kuyiisya bantu. Muchikozyano, wakaamba chikozyano chili atala amuSamariya ulaaluyando achili atala amwana mulombe wakazwa amuunzi alubo wakasaanisya lubono lwakwe. (Mt. 13:34; Lk. 10:29-37; 15:11-32) Nikuba boobo, bantu batobela mizeezo yaSaatani balakonzya kwaamba twaambo tupa kuti tuyeeye zintu zibi. Tweelede kuba aamaboneno aalikabotu. Mamuvi ama-show aamuTV alakonzya kutunoneezya akutuyiisya, kaatanyonganisizye mizeezo yesu pe. Pesi tweelede kuchenjela. Nitusala zyakulikondelezya, tweelede kulibuzya kuti, ‘Muvi naakuti show eeyi ilikundiyiisya kuti kuli kabotu na kuchita ziyandwa amubili wangu?’ (Gal. 5:19-21; Ef. 2:1-3) Kujana wachita biyeni kuti wabona kuti pulogilamu eeyo isumpula mizeezo yaSaatani? Itantamuke mbuuli mbukonzya kuchita kubulwazi butabukila.

8. Kujana bazyali babagwasya biyeni bana babo kuti bakwabilile myoyo yabo?

⁸ Nibazyali, muli amulimu mupati wakukwabilila bana banu kuli Saatani kuti atabyali mizeezo yakwe mumyoyo yabo. Zili aantanganana  kuti mulabakwabilila bana banu kuti batajatwi malwazi. Mulayisalazya myuunzi yanu alubo mulazisowa zintu zyoonse zikonzya kupa kuti muchiswe abana banu. Munzila iikozyenie, mweelede kukwabilila bana banu kumamuvi, ma-show aamuTV, magemu amakkompiyuta amawebbusayiti aakonzya kupa kuti babe aamizeezo yaSaatani. Jehova umupede mulimu wakukwabilila bana banu mubukombi. (Tus. 1:8; Ef. 6:1, 4) Nkinkaako, mutayoowi pe kubabikkila milawu yeendelana malayilile aazwa muBbayibbele. Amubabuzye bana banu nzibeelede anzibateelede kweebela alubo amubagwasye kuti bamvwisisisye kuti nkamboonzi nimwasala kuchita oobo. (Mt. 5:37) Nibayabukomena bana banu, amubayiisye kuchitila kuti bakonzye kusiyanisya chibotu achibi kweendelana azyeelelo zyaJehova. (Heb. 5:14) Alubo mweelede kuziba kuti bana banu bayiya zyiingi loko kuzintu nzimuchita kwiinda kuzintu nzimwaamba.​—Dt. 6:6, 7; Rom. 2:21.

9. Njiili imwi nzila Saatani njabelesya alubo nkamboonzi niinjizya mumapenzi?

⁹ Saatani unyongania moyo wesu kwiinda mukupa kuti tusyome busongo bwabantu kwiinda bwaJehova. (Kol. 2:8) Atulange-lange imwi nzila Saatani njabelesya yakuti, kuyandisya bunoti tweelede kukubikka mubusena bwakusaanguna mubuumi. Bantu bayeeya munzila eeyi balakonzya kunota naakuti kufwaba. Bantu bali boobo, ngabaswaana mapenzi. Nkamboonzi nibaswaana mapenzi? Nkaambo nzibayeeya nkuyanduula mali luzutu zyakuti balakonzya kupona buumi bupa kuti bachiswe, kusiya mpuli zyabo abweenzinyina mbubali aabo aLeza kuti bazuzikizye chiyandisyo chabo. (1 Tim. 6:10) Tulabotelwa nkaambo Taateesu uuli kujulu ulatugwasya kuti tube aamaboneno aali kabotu atala amali.​—Muk. 7:12; Lk. 12:15.

10-11. (a) Tweelede kuchitaanzi kuti tukonzye kulikwabilila? (b) Niinzi nzibakali kuchita balindi muchiindi chaBbayibbele alubo kujana moyo wesu wabeleka biyeni mbuuli mulindi?

¹⁰ Kuti tuzwidilile mukukwabilila moyo wesu, tweelede kuziba mapenzi aakonzya kuba akuti tufwambaane kuukwabilila. Bbala lyakasandululwa kuti ‘kukwabilila,’ muli Tusimpi 4:23 lituyeezya mulimu wakali kuchitwa aabalindi. Muchiindi chaMwaami Solomoni, balindi bakali kukkala aajulu aamiduli yamyuunzi alubo bakali kupa nchenjezyo kuti kuli nchibabona. Chikozyano eechi chitugwasya kubona mbutukonzya kuchita kuti tutazumizyi Saatani kunyongania mizeezo yesu.

¹¹ Muchiindi chaBbayibbele, balindi bakali kubelekaamwi abalindi bamageedi. (2 Sam. 18:24-26) Kabalaamwi, bakali kukwabilila muunzi kwiinda mukubona kuti mageedi alijalidwe basinkondonyina nibakali kusika aafwiifwi. (Neh. 7:1-3) Moyo * wesu uuyiisidwe aaBbayibbele ulakonzya kubeleka mbuuli mulindi akutuchenjezya chiindi Saatani nayanda kunyongania buntu bwesu bwamukati naakuti chiindi nayanda kunyongania mizeezo yesu, mbutulimvwa, nzitupeekezya anzitulombozya. Chiindi moyo wesu nuutuchenjezya atala achimwi chintu, tweelede kuuswiilila akujala mageedi aakukozyanisya.

12-13. Kujana twasunkwa kuchitaanzi pesi tweelede kuchita biyeni?

¹² Atulange-lange chikozyano chitondeezya mbutukonzya kulikwabilila kuti tutanyonganisigwi aamizeezo yaSaatani. Jehova  wakatuyiisya kuti ‘bwaamu amisyobo yoonse yabusofwaazi tazyeelede kwaambwa pe akati kesu.’ (Ef. 5:3) Pesi kujana twachita biyeni kuti bantu mbitubelekaabo naakuti mbitwiiyaabo batalisya kwaambuula makani aakutalilemeka? Tulizi kuti tweelede ‘kukaka bukkale bwakutayoowa Leza azisusi zyaansi aano.’ (Tit. 2:12) Mulindi naakuti moyo wesu, ulatuchenjezya. (Rom. 2:15) Pesi tuyoowuswiilila na? Tulakonzya kusunkwa kuti tubaswiilile naakuti tulange zifanikisyo nzibali kutondeezyania. Aachiindi eechi, tweelede kujala mageedi aakukozyanisya kwiinda mukuchincha makani ngibalikwaambuula naakuti kubasiya.

¹³ Ziyanda kutayoowa kuti tutantamuke mizeezo amichito mibi njibaamba kuti ilikabotu basela lyesu. Tweelede kuba aachoonzyo chakuti Jehova ulakubona kubeleka changuzu nkutuchita alubo uyootupa manguzu abusongo mbutuyanda kuti tukonzye kutantamuka mizeezo yaSaatani. (2 Mak. 16:9; Is. 40:29; Jak. 1:5) Niinzi chimwi nchitweelede kuchita kuti tuzumanane kukwabilila moyo wesu?

14-15. (a) Nziizili zintu nzitweelede kujulila moyo wesu alubo kujana twazichita biyeni? (b) Majwi aali muli Tusimpi 4:20-22, atugwasya biyeni kuti tumvwisisisye Bbayibbele chiindi nitulibala? (Langa kabbokesi kati, “ Mbukonzya Kuyeeyesesya.”)

¹⁴ Kuti tukwabilile moyo wesu, tweelede kuujala kuti tuteendelezegwi azintu zibi akuujula kuti tweendelezegwe azintu zibotu. Atubweede lubo kuchikozyano chamiduli yamuunzi. Mulindi wageedi wakali kujala geedi kuti asinkile basinkondonyina pesi wakali kulijula kuchitila kuti kunjile chakulya azimwi zintu zyakali kuyandikana. Kaansinga geedi teelyakali kujulwa pe nikuli bantu bamumuunzi bakali kufwa anzala. Munzila iikozyenie, andiswe tweelede kujula moyo wesu kuti tuzumizye mizeezo yaLeza kuti itweelendelezye.

¹⁵ MuBbayibbele muli mizeezo yaJehova, nkinkaako, chiindi nitulibala, ngatulikuzumizya mizeezo yaJehova kuti itweendelezye muzintu nzituyeeya, mbutulimvwa anzituchita. Kujana twalimvwisisisya biyeni Bbayibbele chiindi nitulibala? Tweelede kukomba. Umwi muchizi wakati: “Kanditanabala Bbayibbele, ndilakomba kuli Jehova, kandikumbila kuti andigwasye ‘kubona zintu zigambya’ zili muJwi lyakwe.” (Int. 119:18) Alubo tweelede kuyeeyesesya atala anzitwali kubala. Kukomba, kubala akuyeeyesesya, kupa kuti Jwi lyaLeza lisike ‘mukati kamoyo wesu’ alubo kuchita oobo kupa kuti tuyande mizeezo yaJehova.​—Bala Tusimpi 4:20-22; Int. 119:97.

16. Kweebela mapulogilamu aajanika muJW Broadcasting kwakabagwasya biyeni bamwi?

¹⁶ Imwi nzila njituzumizya mizeezo yaLeza kuti itweendelezye, nkweebela mapulogilamu aajanika muJW Broadcasting^®. Umwi mukwesu amukayintu wakwe bakati: “Mapulogilamu aazwa mweezi amweezi atondeezya chachoonzyo kuti nkombyo zyesu zilasandulwa! Alatusimya akutusungwaazya chiindi nitukataazikene anitulendeledwe. Alubo chiindi chiingi tuswiilizya nyimbo zizwa muJW Broadcasting nituli aang’anda. Tulazilizya nitulikujika, nitulikusalazya mung’anda naakuti nitulikunywa tii.” Mapulogilamu aaya atugwasya kuti tukwabilile moyo wesu. Atuyiisya kuti tuyeeye mbuuli Jehova akuti tutantamuke kuyungwa kuti tutabi aamizeezo yaSaatani.

17-18. (a) Niinzi chichitika kuti twabelesya nzyatuyiisya Jehova kweendelana amajwi aali muli 1 Bami 8:61? (b) Twiiyaanzi kuchikozyano chaMwaami Hezekkiya? (c) Kweendelana ankombyo yaDavida iijanika muli Intembauzyo 139:23, 24, tweelede kukombelaanzi?

¹⁷ Lusyomo lwesu lulasima chiindi nitubona mbukutugwasya kuchita zintu zili kabotu. (Jak. 1:2, 3) Tulabotelwa nkaambo Jehova  utwiita kuti tuli bana bakwe alubo chiyandisyo chesu chakuyanda kuchita nzyayanda chilasima. (Tus. 27:11) Sunko limwi alimwi ndituswaana, litupa mweenya wakuti tutondeezye kuti Taateesu uuli aluyando tatumubelekeli amyoyo iibili pe. (Int. 119:113) Pesi tutondeezya kuti tuyanda Jehova amoyo wesu woonse nkaambo twakalipeda kuswiilila milawu yakwe akuchita kuyanda kwakwe.​—Bala 1 Bami 8:61.

¹⁸ Eezi zyaamba kuti tatunoobisyi na? Tunoobisya; nkaambo tatumaninide pe. Kuti twabisya, tweelede kuyeeya chikozyano chaMwaami Hezekkiya. Hezekkiya wakali kubisya. Pesi wakachincha akwiinkilila kunembo kakomba Jehova ‘amoyo uululeme.’ (Is. 38:3-6; 2 Mak. 29:1, 2; 32:25, 26) Nkinkaako, atutantamuke zintu zyoonse Saatani nzyabelesya kuti anyonganie mizeezo yesu. Atukombele kuti tube ‘aamoyo uuswiilila.’ (1 Bam. 3:9; bala Intembauzyo 139:23, 24.) Tulakonzya kukkala katusyomekede kuli Jehova kuti twazumanana kukwabilila moyo wesu.