1-2. (a) Niinzi Jehova nchalanga kumamiliyoni aabantu babungana kuChilalilo chaMwaami Chagoko? (Langa chifanikisyo chili aachivumbyo.) (b) Tulalanga-langaanzi muchiiyo eechi?

YEEYA mbalimvwa Jehova chiindi nabona mamiliyoni aabantu munyika yoonse kababungene, kuti bachite Chilalilo chaMwaami Chagoko. Talangi kuvula kwabantu luzutu pesi ulanga umwi awumwi uuli aamuswaangano ooyu. Muchikozyano, ulababona boonse aabo basyomeka, basika munyaka amunyaka. Aakati kabantu aaba, kuli basika nikuba kabapenzegwa chalunya. Bamwi tabanjili pe miswaangano yachiKristu chiindi choonse pesi kujanika kuChiyubulusyo bakubona kachili chintu chiyandikana loko nchibeelede kuchita. Alubo Jehova ulababona bantu basika kuChiyubulusyo kakusaanguna nkaambo bayanda kuziba zyiingi.

² Zili aantanganana kuti Jehova ulabotelwa nabona bantu biingi kabajanika kuChiyubulusyo. (Lk. 22:19) Nikuba boobo, Jehova tabikkili maanu kumweelwe wabantu basika luzutu. Pesi ubikkila maanu kapati kukaambo kapa kuti basike. Muchiiyo eechi, tulalanga-langa mubuzyo uuyandikana wakuti: Nkamboonzi nituteelede kujanika kuChiyubulusyo chichitwa kamwi amunyaka luzutu pesi nitweelede kunjila amiswaangano iichitwa mviki amviki Jehova njabambila bantu bamuyanda?

3-4. (a) Nkamboonzi nitunjila miswaangano? (b) Kunjila miswaangano kutondeezya kuti tuli bantu bali biyeni? (c) Kweendelana amajwi aali muli 1 BaKorinto 11:23-26, nkamboonzi nituteelede kuleka kujanika kuChiyubulusyo?

³ Kaambo kakusaanguna kapa kuti tunjile miswaangano yambungano nkakuti, nchipanzi chabukombi bwesu. Alubo, tunjila  miswaangano kuchitila kuti tuyiisigwe aJehova. Bantu balisumpula balibona kuti tabayandikani kuyiisigwa nikuba chintu. (3 Joh. 9) Iswe tulisiyene ambabo nkaambo tuyanda kuyiisigwa aJehova ambunga yakwe njalikubelesya.​—Is. 30:20; Joh. 6:45.

⁴ Kunjila miswaangano kutondeezya kuti tulalibombya, tulilibambilide akuti tuyandikana kuyiisigwa. Mubuzuba bwaChiyubulusyo chalufu lwaJesu goko, tulabungana kumuswaangano ooyu uuyandikana kutali akaambo kakuti tweelede kuunjila luzutu pesi akaambo kakuti tuswiilila mulawu waJesu wakuti: “Kamucita obo, kuti cibe ciibalusyo candime.” (Bala 1 BaKorinto 11:23-26.) Muswaangano ooyu usimya bulangilizi mbutulaabo bwazintu zili kunembo alubo utondeezya luyando Jehova ndwalaalo kulindiswe. Nikuba boobo, Jehova ulizi kuti tweelede kusungwaazigwa akusimisigwa kwaziindi zyiingi kutali kamwi luzutu amunyaka. Nkinkaako, utupa miswaangano mviki amviki alubo utusungwaazya kuti katwiinjila. Kulibombya kupa kuti tuswiilile. Mviki amviki, tulalipa chiindi chakulibambila miswaangano eeyo akwiinjila.

5. Nkamboonzi bantu balibombya nibazumina kutambwa aJehova?

⁵ Munyaka amunyaka, Jehova utamba bantu kuti bayiisigwe anguwe alubo balibombya mbabo bazumina. (Is. 50:4) Balabotelwa nibanjila Chiyubulusyo alubo eezi zipa kuti basaangune kunjila ayimwi miswaangano yachiKristu. (Zek. 8:20-23) Katuli aamwi abakombima abamwi batuswaya, tulabotelwa kuyiisigwa akuzulwidwa aaJehova ‘mugwasyi wesu alubo muvuni wesu.’ (Int. 40:17) Niinzi chikonzya kutubotezya naakuti chiyandikana loko chiinda kuzumina kutambwa kuti tuzooyiisigwe aaJehova aJesu, Mwanaakwe ngwayandisya loko?​—Mt. 17:5; 18:20; 28:20.

6. Kulibombya kwakamugwasya biyeni umwi mwaalumi kuti ajanike kuChiyubulusyo?

⁶ Munyaka amunyaka, tubeleka changuzu kutamba bantu biingi kuti banjile Chiyubulusyo chalufu lwaJesu. Bantu biingi balibombya bakayiya zyiingi akaambo kakuzumina kutambwa ooku. Atulange chimwi chikozyano. Kwaminyaka yayinda, umwi mwaalumi wakapegwa kapepa kakutamba bantu kuChiyubulusyo pesi wakabuzya mukwesu wakamupa kapepa kuti tazoosiki pe. Pesi mubuzuba bwaChiyubulusyo, mukwesu ooyu wakagamba naakabona mwaalumi ooyo kalikunjila muNg’anda yaBwaami. Mwaalumi ooyo wakabotelwa anzila njibakamutambulaayo bamumbungano, zyakuti wakasaanguna kunjila miswaangano yesu mviki amviki. Mumunyaka woonse, njitatu luzutu miswaangano njaakakachilwa kunjila. Niinzi chakamugwasya kuti kanjila miswaangano yoonse? Kulibombya nkuko kwakamugwasya kuti achinche maboneno aakwe. Mukuya kwachiindi, mukwesu wakamutambide wakaamba kuti mwaalumi ooyo, “Muntu uulibombya.” Zili aantanganana kuti Jehova nguwe wakakwela mwaalumi ooyo alubo lino wakabbabbatizigwa.​—2 Sam. 22:28; Joh. 6:44.

7. Nzitwiiya kumiswaangano anzitubala muBbayibbele zitugwasya biyeni kuti tube bantu balibombya?

⁷ Nzitwiiya kumiswaangano anzitubala muBbayibbele zitugwasya kuti tube bantu balibombya. Mumviki zyaChiyubulusyo, chiindi chiingi miswaangano yesu yaambuula atala achikozyano chaJesu akulibombya nkwaakatondeezya naakapa buumi bwakwe kuti bube chinunuzyo. Alubo, mumazuba Chiyubulusyo kachitanachitwa, tusungwaazigwa kubala mavesi aamuBbayibbele aali atala akufwa kwaJesu akubusigwa kwakwe. Nzitwiiya kumiswaangano eeyo anzitubala mumavesi aaya aamuBbayibbele, zipa kuti tulumbe chituuzyo  Jesu nchaakapa akaambo kandiswe. Alubo, eezi zipa kuti tuyande kutobelezya chikozyano chakwe chakulibombya akuchita kuyanda kwaJehova nikuba nituli muzyiimo ziyumu.​—Lk. 22:41, 42.

8. Jesu wakakutondeezya biyeni kutayoowa?

⁸ Tutobelezya chikozyano chaJesu kwiinda mukuba bantu batayoowi. Yeeya kutayoowa Jesu nkwaakatondeezya kali wasyaalilwa mazuba mache kuti afwe. Wakalizi kuti basinkondonyina bakali kuyoomufubaazya, kumuuma akumujaya. (Mt. 20:17-19, NW) Nikuba boobo, wakalipeda kufwa. Nichakasika chiindi, wakabuzya baapostolo bakwe basyomeka mbaakali aabo mumuunda wakuGetsemane kuti: “Amubuke, tweende. Amulange, uli afwaafwi oyo uundaaba.” (Mt. 26:36, 46) Nkamu yabantu bakali aamapanga amasumu nibakasika kuti bamujate, wakayinka kulimbabo, waamba kuti nguwe ngubalikuyanduula mpawo wakabuzya masoja kuti baleke baapostolo bakwe biinke. (Joh. 18:3-8) Nisimpe, Jesu wakatondeezya kutayoowa kupati! Mazubaano, maKristu bananikidwe abambelele zimwi balikubeleka changuzu kuti batobelezye chikozyano chaJesu chakutayoowa. Bachitobelezya biyeni?

9. (a) Nkamboonzi nikuyandikana kuti tutayoowi kuti tukonzye kunjila miswaangano chiindi choonse? (b) Chikozyano chesu chibagwasya biyeni bakombima bali mumajele akaambo kalusyomo lwabo?

⁹ Kuti tukkale katunjila miswaangano chiindi choonse, chimwi chiindi kuyandikana kuti tutondeezye kutayoowa muzyiimo ziyumu. Bamwi bakwesu abachizi banjila miswaangano nikuba kuti baswaana buyumu-yumu bwakufwidwa, kukataazikana naakuti kuchiswa. Bamwi batondeezya kutayoowa kwiinda mukunjila miswaangano nikuba kuti balakazigwa abamumpuli naakuti amfulumende. Yeeya chikozyano chesu mbuchibagwasya bakombima bali mumajele akaambo kalusyomo lwabo. (Heb. 13:3) Kumvwa kuti tulikwiinkilila kunembo katukomba Jehova nikuba katuswaana masunko, kubasungwaazya kuti bayinkilile kunembo kabatondeezya lusyomo, kutayoowa akusyomeka. Mwaapostolo Pawulu wakaswaana chiimo chikozyenie achechi. Naakali mujele kuRoma, wakali kubotelwa chiindi choonse naakali kumvwa kuti bakombinyina bakali kukomba Leza chakusyomeka. (Flp. 1:3-5, 12-14) Naakali waba aafwiifwi kuti aangununwe naakuti kaangunwidwe, Pawulu wakalemba lugwalo lwakali kuya kumaHebbrayo. Mulugwalo oolo, wakasungwaazya maKristu aabo basyomeka kuti bazumanane kutondeezyania ‘luyando lwabunyina’ akuti bataleki kubunganaamwi.​—Heb. 10:24, 25; 13:1.

10-11. (a) Mbaani mbitweelede kutamba kuChiyubulusyo? (b) Kweendelana amajwi aali muli BaEfeso 1:7, nkamboonzi nitweelede kubatamba?

¹⁰ Tutondeezya kutayoowa chiindi nitutamba nzubo zyesu, mbitubelekaabo naakuti basimayakilane kuti basike kuChiyubulusyo. Nkamboonzi nitubatamba bantu aaba? Nkaambo tulazilumba zintu zyoonse Jehova aJesu nzibakatuchitila, nkinkaako, kuziba makani  aaya kupa kuti tutaleki kutamba bamwi kuChiyubulusyo. Tuyanda kuti ambabo bayiye mbubakonzya kugwasigwa ‘aluzyalo’ lwaJehova kabelesya chinunuzyo.​—Bala BaEfeso 1:7; Ciy. 22:17.

¹¹ Chiindi nitutondeezya kutayoowa kwiinda mukubunganaamwi, tutondeezya bumwi buntu bubotu Leza aMwanaakwe mbubatondeezya munzila zisiyene-siyene.

12. (a) Nzitwiiya kumiswaangano zikusimya biyeni mbutumuyanda Jehova aJesu? (b) Majwi aali muli 2 BaKorinto 5:14, 15, atusungwaazya kuchitaanzi kuti tutobelezye chikozyano chaJesu?

¹² Kuyanda Jehova aJesu kupa kuti tutaleki kunjila miswaangano. Kuyungizya waawo, nzitwiiya kumiswaangano zisimya mbutumuyanda Jehova aMwanaakwe. Kumiswaangano, tuyeezegwa zintu nzibakatuchitila. (Rom. 5:8) Chiyubulusyo chituyeezya mbululi lupati luyando lwabo kulindiswe akuli baabo batanaziba mbuchiyandikana chinunuzyo. Kulumba kupa kuti tutobelezye chikozyano chaJesu munzila njituponaayo buzuba abuzuba. (Bala 2 BaKorinto 5:14, 15.) Kuyungizya waawo, myoyo yesu ipa kuti tutembawule Jehova akaambo kakutupa chinunuzyo. Imwi nzila njitukonzya kutondeezya kulumba, nkwiinda mukwaamba nsandulo zisungwaazya kumiswaangano.

13. Kujana twatondeezya biyeni kuti tulamuyanda Jehova aMwanaakwe? Pandulula.

¹³ Tulakonzya kutondeezya mbutumuyanda Jehova aMwanaakwe kwiinda mukulipeda kusiya zimwi zintu kuti tukonzye kuswiilila nzibayanda. Chiindi chiingi, tweelede kulipeda kuti tukonzye kunjila miswaangano. Mumbungano zyiingi, umwi muswaangano uchitwa aakati kamviki goko alubo chiindi chiingi ngatulikatede. Umwi muswaangano uchitwa kumamanino amviki bantu biingi nibayanda kulyookezya. Jehova ulatubona na chiindi nitunjila miswaangano nikuba katukatede? Iiyi, ulatubona! Jehova ulabotelwa akaambo kaluyando ndututondeezya kwiinda mukunjila miswaangano nikuba kuti chimwi chiindi kulatuyumina kuchita oobo.​—Mk. 12:41-44.

14. Nchiichili chikozyano Jesu nchaakatusiila chakutondeezya luyando lwakulipeda?

¹⁴ Jesu wakatusiila chikozyano chitondeezya mbutukonzya kutondeezya luyando lwakulipeda. Taakalipedelede kufwida basikwiiya bakwe luzutu pesi wakalilipedelede nikuba kubikka nzibayanda mubusena bwakusaanguna buzuba abuzuba. Muchikozyano, wakali kuba aachiindi chakubaamwi abasikwiiya  bakwe nikuba naakakatede anaakakataazikene mumizeezo. (Lk. 22:39-46) Alubo, wakali kubikkila maanu kuzintu nzyaakali kuyanda kubapa kutali kuzintu nzyaakali kuyanda kupegwa. (Mt. 20:28) Kuti Jehova abakombima katubayanda amoyo woonse, tuyoobeleka changuzu kuti tunjile muswaangano waChilalilo chaMwaami Chagoko, kuswaanizya ayimwi miswaangano yambungano yoonse.

15. Mbaani loko mbituyanda kugwasya?

¹⁵ Tuli aakati kamaKristu bakasimpe alubo tulabotelwa kubeleka changuzu kuti tutambe bamwi kuti tuzoobaamwi. Nikuba boobo, tuli aachiyandisyo chakugwasya “baciinga calusyomo” lwesu, chaamba aabo batachichiti kabotu mubukombi. (Gal. 6:10) Tutondeezya kuti tulabayanda kwiinda mukubasungwaazya kuti banjile miswaangano yesu, kapati Chiyubulusyo. Mbuuli Jehova aJesu, tulabotelwa chiindi muntu wakatali kuchita kabotu mubukombi naaboola kuli Jehova, Taateesu uuli aaluyando alubo Mweembezi wesu.​—Mt. 18:14.

16. (a) Kujana twasungwaazyania biyeni alubo miswaangano yesu itugwasya biyeni? (b) Nkamboonzi eechi nichili chiindi chilikabotu chakuyeeya majwi Jesu ngaakaamba muli Johane 3:16?

¹⁶ Mumviki zitobela, tamba bantu biingi kuti bazoonjile Chiyubulusyo chinooli muli Bwasanu goko, April 19, 2019. (Langa kabbokesi kati “Uzoobatamba Na?”) Chiindi choonse, atusungwaazyanie kwiinda mukunjila miswaangano yoonse Jehova njatubambila. Mbukunga mamanino aabweende bwazintu oobu abaafwiifwi, kunjila miswaangano kutugwasya kuti tube bantu balibombya, batayoowi alubo bali aaluyando. (1 Tes. 5:8-11) Atutondeezye mbutulimvwa amoyo wesu woonse akaambo kaluyando lupati Jehova aMwanaakwe ndubatutondeezya!​—Bala Johane 3:16.