1-2. Mungelo wakababuzyaanzi banakazi bakasika kukabanda kaJesu, alubo Jesu wakababuzyaanzi?

KWAKALI kuseeni muNisani 16, 33 C.E. Kwakali kwayinda mazuba aabili Jesu kali wazikkwa. Kabakataazikene, banakazi bayoowa Leza bakayinka kukabanda kakwe kuti bakananike chidumbu chaMwaami Jesu Kristu mafuta anunkilila. Nibakasika kukabanda bakagamba nibakajana kamutakwe chintu pe. Pesi mungelo wakabuzya banakazi aaba kuti Jesu wakali wabuka mpawo wakati: “Wamusolweda kuya ku Galilaya. Muyoomubona okuya.”​—Mt. 28:1-7; Lk. 23:56; 24:10.

² Chiindi banakazi aaba nibakazwa kukabanda bakaswaanana aJesu mpawo wakababuzya kuti: “Kamuya, mukabaambile bakwesu kuti baunke ku Galilaya, eelyo ooko bayoondibona.” (Mt. 28:10) Mbukunga ooyu wakali muswaangano wakusaanguna Jesu kali wabusigwa, kweelede kuti kuli malayilile aayandikana loko ngaakali kuyanda kubapa.

3-4. Tuzizi biyeni kuti mulawu uujanika muli Matayo 28:19, 20 teewakapegwa baapostolo luzutu? (Langa chifanikisyo chili achivumbyo.)

³ Bala Matayo 28:16-20. Aamuswaangano Jesu ngwaakachita abasikwiiya bakwe, wakabapa mulimu uuyandikana ngubakali kuyoochita mumwaanda wakusaanguna. Andiswe tulikuuchita mulimu ooyo mazubaano. Jesu wakati: “Aboobo kamuya mukayiisye bantu bazisi zyoonse, . . . mukabayiisye kutobela zintu zyoonse nzyondakamulailila.”

⁴ Jesu uyanda kuti batobeli bakwe boonse bakambawuke. Taakapa baapostolo bali 11 luzutu mulimu ooyu. Tuzizi biyeni  eezi? Chiindi Jesu naakapa mulawu ooyu kuchilundu chakuGalilaya, baapostolo teembabo pe abalikke bakaliwo. Mutalubi kuti mungelo wakaambila banakazi kuti: “Muyoomubona [kuGalilaya].” Nkinkaako zilaantanganana kuti nikuba banakazi basyomeka bakaliwo aamuswaangano ooyo. Pesi kuli zimwi lubo. Mwaapostolo Pawulu wakatondeezya kuti Jesu “wakalibonya kubakwesu bainda ku 500 aciindi comwe.” (1 Kor. 15:6) Kuli?

5. Tuzizi biyeni kuti lugwalo lwa 1 Bakorinto 15:6 lwaamba muswaangano wakachitilwa kuGalilaya?

⁵ Kuli twaambo tupa kuti tusyome kuti Pawulu wakali kwaamba muswaangano wakachitilwa kuGalilaya waambwa muli Matayo 28. Kaambo kakusaanguna nkakuti basikwiiya baJesu biingi bakali kuzwa kuGalilaya. Nkinkaako kwakali kuuba kuti bantu biingi babungane kuchilundu chakuGalilaya kwiinda kuti babungane mung’anda kuJerusalemu. Kaambo kachibili nkakuti Jesu wakali wabonana kale abaapostolo bakwe bali 11 mung’anda kuJerusalemu. Pesi taakabapa pe mulawu ooyu kabali abalikke. Wakazoobapa kabalaamwi abanakazi kuswaanizya abamwi kuGalilaya.​—Lk. 24:33, 36.

6. Lugwalo lwa Matayo 28:20 lutugwasya biyeni kubona kuti mulawu wakuchita bantu kuti babe basikwiiya ulabeleka mazubaano, alubo ulikuzwidilila biyeni?

⁶ Atubone kaambo kachitatu kayandikana. Jesu taakapa maKristu bamumwaanda wakusaanguna luzutu mulawu ooyu. Tuzizi biyeni eezi? Mumajwi aakwe aakumamanino naakali kubapa mulawu ooyu wakati: “Ndilaandinywe mazuba oonse mane kusikila kumamanino aabweende bwazintu.” (Mt. 28:20) Kweendelana amajwi aaJesu, mulimu wakuchita bantu kuti babe basikwiiya ulikuchitwa munzila iigambya mazubaano. Amuyeeye, bantu basika ku300 000 balikubbabbatizigwa munyaka amunyaka kuti babe Bakamboni baJehova akuba basikwiiya baJesu Kristu.

7. Tulalanga-langaanzi muchiiyo eechi alubo nkamboonzi?

⁷ Bantu biingi mbitwiiyaabo Bbayibbele ngabazoobbabbatizigwa. Pesi bamwi mbitwiiyaabo balayoowa kuba basikwiiya. Balanoneezegwa kwiiya andiswe pesi tabayandi kubbabbatizigwa. Kuti kwiiya Bbayibbele amuntu weelede kumugwasya kuti abelesye nzyayiya akuti abe sikwiiya waKristu. Lino tuyanda kulanga-langa mbutukonzya kuyiisya bantu munzila iibasika amoyo ambutukonzya kubagwasya kuti bayande Jehova akumukomba. Nkamboonzi nitweelede kulanga-langa nkani eeyi? Nkaambo chimwi chiindi kuyandikana kuti tusale kuti tulayinkilila kunembo na kwiiya amuntu naakuti tulaleka.

8. Nkamboonzi nikukonzya kubayumina bantu mbitwiiyaabo kuti bayande Jehova?

⁸ Jehova uyanda kuti bantu basale kumubelekela akaambo kakuti balamuyanda. Nkinkaako tweelede kugwasya bantu mbitwiiyaabo kuti babone kuti Jehova ulaandaba ambabo akuti ulabayanda. Tweelede kubagwasya kuti babone Jehova kali “usyi wabamucaala alimwi mukwabilizi wabamukabafwu.” (Int. 68:5) Kuti babona kuti Leza ulabayanda ziyoopa kuti ambabo bamuyande. Bamwi bantu mbitwiiyaabo kulabayumina kubona kuti Jehova ulabayanda nkaambo bakakomezegwa abazyali bakatali kubatondeezya luyando. (2 Tim. 3:1, 3) Nkinkaako tweelede kusimatizya buntu bubotu bwaJehova chiindi nitwiiya abantu Bbayibbele. Alubo tweelede kubagwasya kuti babone kuti Leza siluyando uyanda kuti bakajane buumi butamani akuti ulilibambilide kubagwasya. Niinzi zimwi nzitweelede kuchita?

9-10. Ngaali mabbuku ngitweelede kubelesya nitwiiya abantu alubo nkamboonzi?

 ⁹ Belesya bbuku liti “IBbayibbele Nga Lilatuyiisyaanzi?” aliti “Mbutukonzya Kukkala Katuli Muluyando lwaLeza.”Mabbuku aaya akalembelwa kuti atugwasye kubasika amoyo bantu mbitwiiyaabo. Muchikozyano, chaandaano 1 chabbuku lyaNzilituyiisya, chisandula mibuzyo yakuti: Leza ulaandaba na andiswe naa kuti ngusilunya?, Leza ulimvwa biyeni atala abantu bafwaba?, Zilacita na kuti ube mweenzinyina waJehova? Ani bbuku liti Kukkala Katuli Muluyando lwaLeza? Bbuku eeli lilamugwasya muntu ngutwiiyaawe Bbayibbele kuti abone kuti kubelesya zintu nzyayiya kulakonzya kupa kuti apone kabotu akuti aswene aafwiifwi aJehova. Kulakonzeka kuti kuli bamwi bantu mbuwakayiisya bbuku eeli, pesi weelede kulibambila lubo kuti wabuyiya awumwi muntu alubo ziba ziyandwa amuntu nguyiyaawe.

¹⁰ Tweelede kuchitaanzi kuti muntu ngutwiiyaawe kayanda kumvwisisisya imwi nkani iijanika muli limwi bbuku litajaniki pe muZibelesyo  Nzitubelesya Kukuyiisya Bantu? Mulakonzya kumupa bbuku eelyo kuti alibalile kuchitila kuti mwiinkilile kunembo achiiyo chanu kamubelesya bbuku lijanika muZibelesyo Nzitubelesya Kukuyiisya Bantu.

11. Ndiilili nitweelede kutalisya kukomba kuchiiyo chaBbayibbele alubo nga tulabagwasya biyeni bantu mbitwiiyaabo kuti bayimvwisisisye nkani eeyi?

¹¹ Talisya chiiyo ankombyo. Kwaamba simpe, tweelede kutalisya akumaninsya chiiyo chimwi achimwi kwiinda mukukomba alubo tweelede kuzichita eezi katuchisaanguna-saanguna kwiiya amuntu. Tweelede kugwasya muntu ngutwiiyaawe kuti abone kuti tulakonzya kumvwisisisya Jwi lyaLeza kwiinda mukugwasigwa amuuya uusalala luzutu. Bamwi basikupupulula batalisya nkani eeyi kwiinda mukubala Jakobo 1:5 yaamba kuti: “Ikuti muntu umwi akati kanu kabulizyide busongo, azumanane kumulomba Leza.” Mpawo sikupupulula nga wabuzya muntu ngwayiyaawe kuti: “Nga tulabukumbila biyeni busongo kuli Leza?” Zilaantanganana kuti ulasandula kuti kwiinda mukukomba kuli Leza.

12. Nga tulalubesya biyeni lugwalo lwa Intembauzyo 139:2-4 kugwasya muntu ngutwiiyaawe mbayelede kukomba?

¹² Yiisya muntu nguyiyaawe mbayelede kukomba. Mupandulwide kuti Jehova uyanda kumvwa zili mumoyo wakwe. Pandulula kuti kukomba katuli atulikke kulatugwasya kuti tukonzye kubuzya Jehova zyoonse zili aansi amoyo, kuswaanizya azintu nzitutakonzyi pe kubuzya bantu. Kuyungizya waawo, Jehova ulizizi zili mumyoyo yesu. (Bala Intembauzyo 139:2-4.) Alubo tulakonzya kusungwaazya bantu mbitwiiyaabo kuti bakumbile Leza kuti abagwasye kuchincha mizeezo amichito yabo. Atuteedi umwi muntu ngutwiiyaawe Bbayibbele uyandisya limwi pobwe liteendelani amagwalo. Ulizi kuti talilikabotu pe pesi kuli zimwi zintu nzyaachita zyeendelana apobwe eelyo. Tweelede kumusungwaazya kuti abuzye Jehova mbalimvwa alubo akumbile lugwasyo lwakuti atalisye kuyanda zintu ziyandwa aLeza.​—Int. 97:10.

13. (a) Nkamboonzi nitweelede kufwambaana kumutamba kumiswaangano muntu ngutwiiyaawe? (b) Nga tulachita biyeni kuti tugwasye muntu ngutwiiyaawe kuti alimvwe kaangunukide naasika kumiswaangano?

¹³ Fwambaana kutamba muntu nguyiyaawe Bbayibbele kumiswaangano yambungano. Zintu nzyatazoomvwe akubona kumiswaangano zilakonzya kumusika amoyo akupa kuti ayinkilile kunembo mubukombi. Mutondeezye kavidiyo kati Niinzi Cicitika kuN’anda yaBwami? alubo mukumbile kuti muzooyinke aamwi kumiswaangano. Ulakonzya kwiinda kumubweza nuya kumiswaangano. Alubo tweelede kwiinka abasikupupulula basiyene-siyene kumuntu ngutwiiiyaawe. Eezi zipa kuti azibane abantu biingi alubo zilamugwasya kuti azoolimvwe kaangunukide nazoonjila miswaangano.

14. Niinzi chikonzya kupa kuti muntu ngutwiiyaawe asime mubukombi?

¹⁴ Makanze eesu ngakugwasya muntu ngutwiiyaawe kuti asime mubukombi. (Ef. 4:13) Kuti muntu wazumina kwiiya Bbayibbele, chiindi chiingi nga uyanda kuti agwasigwe lwakwe alikke. Kuti watalisya kuyanda Jehova, ulakonzya kuyeeya mbakonzya kugwasya bamwi kuswaanizya aBakamboni. (Mt. 22:37-39) Kuti kazikonzeka ulakonzya kumubuzya atala akugwasilizya mulimu wabwaami kwiinda mukusanga.

15. Nga tulamugwasya biyeni muntu ngutwiiyaawe kuti achite kabotu nikwaba kutamvwanana?

¹⁵ Yiisya muntu nguyiyaawe Bbayibbele  mbayelede kuchita nikwaba kutamvwanana. Atuteedi muntu nguyiyaawe wakaba sikupupulula utanabbabbatizigwa wakubuzya kuti kuli muntu wamumbungano wamubisizya. Muchiindi chakumubuzya ulikabotu awutali kabotu, mupandulwide zyaambwa aaMagwalo nzyayelede kuchita. Ulakonzya kumulekelela naakuti kusiyanaazyo pesi kuti katakonzyi kuchita oobo, ulakonzya kwaambuula aamuntu ooyo munzila yaluzyalo kali amakanze ‘akupilusya munyina.’ (Kozyanisya a Matayo 18:15) Gwasya muntu nguyiyaawe kulibambila majwi mabotu ngayoowamba. Mutondeezye mbakonzya kuyanduulisisya mumabbuku eesu kuchitila kuti akonzye kwiiya zyiingi atala ankani eeyi. Kuti wayiya zyiingi katanabbabbatizigwa zizoomugwasya kuti azookonzye kumvwanana abamwi mumbungano kunembo.

16. Mbubotuunzi buliko kuti twatamba bamwi basikupupulula kuchiiyo chesu?

¹⁶ Tamba bamwi basikupupulula naakuti mulangizi wabbazu kuti mwiinkaamwi kuchiiyo chako. Nkamboonzi nitweelede kuchita oobo? Kuyungizya kutwaambo twaambwa musule, bamwi basikupupulula balakonzya kugwasya muntu nguyiyaawe munzila njuwatali kukonzya pe. Atuteedi muntu nguyiyaawe ulookweezya kuleka kufwepa pesi ulikukachilwa. Tamba mukwesu wakazunda penzi eeli kalili lyamukataazya kuti akusindikile kuchiiyo chako. Mukwesu ooyu ulakonzya kupa muntu nguyiyaawe malayilile akonzya kumugwasya. Kuti kutakonzyi kuchitisya chiiyo kakuli mukwesu ulaaluzibo, ulakonzya kukumbila mukwesu ooyo kuti achitisye. Chiindi choonse nuzwa abakwesu balaaluzibo, weelede kwiiya zyiingi kuzwa kuli mbabo. Utalubi kuti makanze eesu ngakuti bantu mbitwiiyaabo basime mubukombi.

17-18. Niinzi nzitweelede kulanga chiindi nitusala kuti tuleke na kwiiya amuntu?

¹⁷ Kuti muntu nguuli kwiiyaawe katayinkilili kunembo mubukombi, weelede kulibuzya kuti: ‘Ndileke na kwiiyaawe?’ Pesi kutanasala, weelede kubona kuti muntu nguyiyaawe ujata biyeni. Zitola chiindi kuti bamwi babweze ntaamu pesi bamwi balafwambaana. Libuzye kuti: ‘Muntu ngundiyiyaawe Bbayibbele ulikwiinkilila kunembo na kweendelana achiimo chakwe?’ ‘Uuli “kutobela” na naakuti kubelesya zintu nzyalikwiiya?’ (Mt. 28:20) Muntu ulakonzya kwiinkilila kunembo mbichaani-mbichaani pesi zyeelede kuboneka.

¹⁸ Niinzi nzitweelede kuchita kuti umwi muntu waba achiindi kali kwiiya pesi katatondeezyi kuti ulikwiinkilila kunembo mubukombi? Atulange-lange chikozyano chitobela: Atuteedi muntu nguyiyaawe wamaninsya bbuku lyaNzilituyiisya, amwi amwi mwasaanguna kwiiya alitegwa Kukkala Katuli Muluyando lwaLeza, pesi takwe naakali wanjila muswaangano naakuti Chiyubulusyo biyo! Alubo  chimwi chiindi ulakaka kwiiya akaambo katwaambo tutakwe mutwe pe. Muchiimo chili boobu weelede kumubuzya simpe. *

19. Niinzi nzukonzya kumubuzya muntu ubonekaanga tayandi pe kwiinkilila kunembo, alubo niinzi nzuyelede kulanga-langa?

¹⁹ Ulakonzya kusaanguna kumubuzya kuti: ‘Niinzi chikukachizya kuba umwi waBakamboni baJehova?’ Ulakonzya kusandula kuti ndilakuyanda kwiiya Bbayibbele pesi tandizoofwi ndaba Kamboni pe! Kuti kali amaboneno aaliboobu, ubonaanga zilachita na kwiinkilila kunembo kwiiyaawe? Kuli limwi bbazu, muntu nguyiyaawe ulakonzya kukubuzya twaambo tumupede kuti atayinkilili kunembo. Muchikozyano, ulakonzya kubonaanga kuzoomuyumina kukambawuka kung’anda ang’anda. Kuti waziba mbalimvwa, kulakuubila kuziba mbukonzya kumugwasya.

20. Lugwalo lwa Milimo 13:48 lutugwasya biyeni kusala kuti twiinkilile kunembo katwiiya amuntu naakuti tuleke?

²⁰ Chuusisya nchakuti bamwi bantu bali mbuuli maIsrayeli bamuchiindi chaEzekkiyele. Kaambuula atala ambabo, Jehova wakabuzya Ezekkiyele kuti: “Bona! Yebo uli mbuli muntu wiimba nyimbo zibotu zyaluyando, iwiimba ajwi libotu alimwi uucibwene kulizya kantimbwa. Bayoomvwa majwi aako, pele kunyina naba omwe uuyakwaacita.” (Ezk. 33:32) Kulakonzya kutuyumina kubuzya muntu kuti tuyanda kuleka kwiiyaawe. Pesi “ciindi casyaala caceya.” (1 Kor. 7:29) Tatweelede kumaninsya chiindi katuli kwiiya amuntu utayinkilili kunembo pe, pesi tweelede kuyanduula bantu batondeezya kuti ‘balilibambilide kutambula buumi butamani.’​—Bala Milimo 13:48.

21. Lugwalo lwamunyaka wa2020 lutyeni alubo nkamboonzi nilweelela?

²¹ Lugwalo lwamunyaka wamu2020 lutugwasya kuti tuyungizye luzibo mumulimu wesu wakuchita bantu kuti babe basikwiiya. Luswaanizya majwi akaambwa aJesu aamuswaangano uuyandikana loko kuchilundu chakuGalilaya aakuti: “Aboobo kamuya mukayiisye bantu . . . , kuti babe basikwiiya, akubabbapatizya.”​—Mt. 28:19.