1-2. Niinzi chigambya chakachitika mubuzuba bwaPentekkoste yamu33 C.E.?

KWAKALI kuJerusalemu muNsondo kuseeni mumunyaka wa33 C.E. Oobu bwakali buzuba bwaPentekkoste. Basikwiiya basika ku120 bakabungene mung’anda yamujulu. (Mil. 1:13-15; 2:1) Kwakali kwayinda mazuba mache kuzwa Jesu naakababuzya kuti bakkale muJerusalemu nkaambo bakali kuyootambula chipo chiyandikana loko. (Mil. 1:4, 5) Niinzi chakazoochitika?

² “Ndilyonya kujulu kwakamvwugwa muzuzumo uuli mbuli waguwo lyuungisya iwakazuzya ŋanda yoonse.” Kuzwa waawo kwakaba “milaka iili mbuli mulilo” atala aamitwe yabasikwiiya alubo boonse “bakazula muuya uusalala.” (Mil. 2:2-4) Kabunga kamaKristu aaba kakatambula muuya uusalala kuzwa kuli Jehova munzila iigambya. (Mil. 1:8) Alubo mbabo bakusaanguna kunanikwa aamuuya uusalala * akusalwa kuti babe abulangilizi bwakuyooyendelezya aJesu kujulu.

3. Nkamboonzi maKristu bakananikwa mubuzuba bwaPentekkoste nibakatali kuzumbuuzya kuti bananikwa?

³ Nikuli wakali umwi wabasikwiiya baJesu bakali mung’anda eeyo yamujulu, teewakali kunoobuluba pe buzuba  oobo. Wakali kunookkalwa achintu chili mbuuli mulilo aamutwe wako alubo wakali kunoosaanguna kwaambuula mumilaka! (Mil. 2:5-12) Teewakali kunoozumbuuzya pe kuti wananikwa aamuuya uusalala. Pesi eezi zyaamba kuti boonse maKristu bananikwa munzila iigambya alubo muchiindi chikozyenie na? Peepe. Tuzizi biyeni?

4. MaKristu bakusaanguna bakananikwa, boonse bakananikwa muchiindi chikozyenie na? Pandulula.

⁴ Atulange-lange atala achiindi chinanikwa maKristu. MaKristu bali 120 bakananikwa muPestekkoste yamu33 C.E., teembabo pe abalikke bakananikwa aamuuya uusalala mubuzuba oobo. Bamwi basika ku3 000 bakazoonanikwa mubuzuba oobo nibakabbabbatizigwa. (Mil. 2:37, 38, 41) Pesi bakazoonanikwa muminyaka yakatobela, teeboonse pe bakali kunanikwa nibakali kubbabbatizigwa. Muchikozyano, bantu bakuSamariya bakananikwa kakuli kwayinda chiindi kuzwa nibakabbabbatizigwa. (Mil. 8:14-17) Alubo Kkorneliyo abamung’anda yakwe bakananikwa munzila iisiyene nkaambo bakananikwa kabatanabbabbatizigwa.​—Mil. 10:44-48.

5. Kweendelana amajwi aali muli 2 Bakorinto 1:21, 22, niinzi chichitika kuti muntu wananikwa amuuya uusalala?

⁵ Lino atubone kuti niinzi chichitika kuti muntu wananikwa amuuya uusalala. Bamwi bakananikwa kulakonzya kubayumina kutambula kuti Jehova wakabasala. Balakonzya kulibuzya kuti, ‘Nkamboonzi Leza nasala ndime?’ Bamwi balakonzya kutalimvwa oobo. Kufumbwa mbubalimvwa, mwaapostolo Pawulu wakapandulula zichitika kuti muntu wananikwa naakati: “Nomwakasyoma, mwakabikkwa ciganto * camuuya uusalala wakasyomezyegwa. Muuya uusalala ooyu ncisinizyo cakuti tuyoopegwa lukono lwesu kumbele.” (Ef. 1:13, 14) Jehova upa kuti maKristu bananikidwe batazumbuuzyi pe kuti wabasala kabelesya muuya  uusalala. Nkinkaako muuya uusalala ‘nchisinizyo’ Jehova nchaapa maKristu aaba chakuti bazoopona kujulu kukabe kutamani kutali aanyika.​—Bala 2 Bakorinto 1:21, 22.

6. MuKristu uunanikidwe weelede kuchitaanzi kuti azoojane bulumbu bwakwe?

⁶ Nikuba kuti muKristu wananikwa, kuli nzyayelede kuchita kuti azoojane bulumbu bwakwe. Nisimpe tazumbuuzyi pe kuti wakasalwa kuti azooyinke kujulu. Nikuba boobo, weelede kuswiilila nchenjezyo yakuti: “Bakwesu, amusungwaale kapati ikutegwa mubusinizye bwiite alimwi akusalwa kwanu, nkaambo ikuti naa mwazumanana kuzicita zintu eezyi, kunyina nomuyakwaalilwa pe.” (2 Pet. 1:10) Nkinkaako nikuba kuti muKristu wananikwa, pesi uyoojana bulumbu bwakwe kuti wazumanana kusyomeka.—Flp. 3:12-14; Heb. 3:1; Ciy. 2:10.

7. MuKristu uziba biyeni kuti wananikwa?

⁷ Muntu uziba biyeni kuti wasalwa kuti azoopone kujulu? Nsandulo twiijana mumajwi Pawulu ngaakabuzya maKristu bakuRoma “ibakaitwa kuba basalali.” Wakababuzya kuti: “Tiimwakatambula muuya wabuzike uumupa kuyoowa alimwi pe, pele mwakatambula muuya uumupa kuba bana ba Leza, muuya ooyo uutupa koompolola kuti: ‘Abba, Taata!’ Muuya ooyo ulazuminana amuuya wesu kuti tuli bana ba Leza.” (Rom. 1:7; 8:15, 16) Nkinkaako Leza kabelesya muuya uusalala ulamuzibya muntu kakutaakwe kuzumbuuzya kuti ulaabulangilizi bwakuyoopona kujulu.​—1 Tes. 2:12.

8. Lugwalo lwa 1 Johane 2:20, 27 lutondeezya biyeni kuti maKristu bananikidwe tabazumbuuzyi pe kuti bakananikwa?

⁸ Jehova upa kuti maKristu bakananikwa batazumbuuzyi pe kuti balaabulangilizi bwakuyoopona kujulu. (Bala 1 Johane 2:20, 27.) Nikuba boobo, maKristu bananikidwe beelede kuyiisigwa ambungano yaJehova mbuuli maKristu woonse. Jehova upa kuti babe aachoonzyo chakuti bakananikwa kabelesya nguzu zyakwe zigambya, muuya uusalala. Nkinkaako, tabalindili kubuzigwa awumwi muntu kuti bakananikwa.

9. Kweendelana alugwalo lwa Baefeso 1:18, nkuchincha kuli kuchitika kumuKristu kuti wananikwa?

⁹ Bakombi baLeza biingi zilabakataazya kumvwisisisya zichitika kuti muntu wananikwa. Eezi zilamvwisisika nkaambo tabananikidwe pe. Alubo Leza wakalenga bantu kuti bapone aanyika kukabe kutamani kutali kujulu pe. (Matl. 1:28; Int. 37:29) Nikuba boobo, Jehova usala bamwi bantu kuti bakapone kujulu. Nkinkaako kuti bananikwa, bulangilizi bwabo ambubayeeya zilachincha munzila ipa kuti balangilile kuyoopona kujulu.​—Bala Baefeso 1:18.

10. Chaambaanzi ‘kuzyalwa lubo’? (Langa makani aamunsi.)

¹⁰ Chiindi maKristu nibananikwa aamuuya uusalala nga ‘bazyalwa lubo’ naakuti nga ‘bazyalwa kuzwa kujulu.’ * Jesu wakatondeezya kuti takukonzeki pe kupandulwida muntu uutananikidwe mbalimvwa muntu kuti ‘wazyalwa lubo’ naakuti ‘wazyalwa kumuuya.’—Johane 3:3-8, makani aamunsi.

11. Nkuchincha kuli kuchitika mumizeezo yamaKristu kuti bananikwa?

¹¹ Nkuchincha kuli kuchitika mumizeezo yamaKristu kuti bananikwa? Kabatanananikwa, maKristu aaba nga bali aachiyandisyo chakuzoopona aanyika kukabe kutamani. Alubo bakali kulangilila chiindi Jehova  nayoomaninsya bubi boonse akupa kuti nyika ibe paradayizi. Kulakonzeka kuti bakali kuyeeya kabali kutambula babbululu babo bakafwa kabali kubusigwa. Pesi kuzwa nibakananikwa bakachincha mbubayeeya. Nkamboonzi? Teekuti bakasaanguna kubonaanga kupona aanyika takuzoononezyi pe. Teebakachincha mbubayeeya akaambo kamapenzi ngibaswaana aanyika. Alubo teebakayeeya kuti kupona aanyika kuzoobabbowa. Pesi Jehova nguwe wakapa kuti bachinche mbubayeeya abulangilizi mbubalaabo kabelesya muuya uusalala.

12. Kweendelana alugwalo lwa 1 Petro 1:3, 4, maKristu bananikidwe balimvwa biyeni atala abulangilizi mbubalaabo?

¹² MuKristu wananikwa ulakonzya kulibona kateeleli pe kuba muKristu uunanikidwe. Pesi tazumbuuzyi pe kuti Jehova wamusala. Ulabotelwa kapati alubo ulalumba akaambo kabulangilizi mbwalaabo.​—Bala 1 Petro 1:3, 4.

13. MaKristu bananikidwe bamvwa biyeni atala akupona aanyika?

¹³ Eezi zyaamba kuti maKristu bananikidwe balakuyanda na kufwa? Mwaapostolo Pawulu wakatupa nsandulo naakakozyanisya mubili wabo wanyama atente. Wakati: “Mubwini, swebo notuli mutente eeli tulatongela, tulalibilika kapati, nkaambo tatuyandi kuti tulisamunune eeli pe, pele tuyanda kusama leelyo limbi ikutegwa eeli ilifwa limenwe abuumi.” (2 Kor. 5:4) Teekuti maKristu aaba tabachikwe ndaba pe akupona aanyika. Pesi balabotelwa mubuumi alubo bayanda kubelekela Jehova buzuba abuzuba ampuli zyabo abeenzinyina. Nikuba boobo, kufumbwa nzibachita bakkala kabayeeya zintu zili kunembo nzyakabasyomezya Jehova.​—1 Kor. 15:53; 2 Pet. 1:4; 1 Joh. 3:2, 3; Ciy. 20:6.

14. Niinzi chitali chitondeezyo chakuti muntu wakananikwa?

¹⁴ Ubonaanga Jehova wakakusala na kuti uzooyinke kujulu? Kuti kakuli boobo, weelede kulibuzya mibuzyo iitobela: Uli musungu na kukuchita kuyanda kwaJehova? Ulimusungu na mumulimu wakukambawuka? Ulimusungu na kukubala Jwi lyaLeza alubo ulaachiyandisyo chakumvwisisisya “zintu zisisidwe zya Leza”? (1 Kor. 2:10) Jehova ulikukulongezya na zyakuti ulikupa kuti uzwidilile mumulimu wakukambawuka? Ulaachiyandisyo chipati chakubagwasya bamwi mubukombi na? Wakabona nzila zipati Jehova mbaakakugwasya mubuumi bwako na? Kuti wasandula mibuzyo yoonse eeyi kuti iiyi kutazumbuuzyi, zitondeezya kuti wakananikwa na? Peepe, teembubo pe. Nkamboonzi? Nkaambo bakombi baJehova boonse mbubalimvwa kufumbwa kuti balinanikidwe naakuti pe. Alubo Jehova ubapa muuya wakwe uusalala bakombi bakwe boonse kazitakwe ndaba kuti balaabulangilizi bwakuyoopona kuli. Simpe ndyakuti, kuzumbuuzya kuti wakananikwa na nchitondeezyo chipati chakuti tunanikidwe pe. Nkaambo aabo bakasalwa tabazumbuuzyi pe kuti bakananikwa pesi balizi kuti bakasalwa.

15. Kutambula muuya uusalala kwaamba kuti muntu uzooyinka kujulu na? Pandulula.

¹⁵ MuBbayibbele muli zikozyano zyiingi zyabaalumi bakali kusyomeka alubo bakali kuzulwidwa aamuuya uusalala, pesi teebakasalwa kuti baye kujulu. Muchikozyano, Davida wakali kuzulwidwa aamuuya uusalala. (1 Sam. 16:13) Muuya uusalala wakamugwasya kuti amvwisisisye zintu zinikide atala aJehova alubo wakamuzulwida kuti alembe zimwi zipanzi zyaBbayibbele. (Mk.  12:36) Nikuba boobo, mwaapostolo Petro wakati, Davida “kunyina naakaunka kujulu.” (Mil. 2:34) Alubo Johane Mubbabbatizi wakazwide “muuya uusalala.” (Lk. 1:13-16) Jesu wakati taakwe muntu wakali mupati kwiinda Johane. Nikuba boobo, wakaamba kuti Johane taakali abulangilizi bwakuzooyendelezya muBwaami bwakujulu. (Mt. 11:10, 11) Nikuba kuti Jehova wakagwasya baalumi aaba kuti bachite zintu zigambya kabelesya muuya uusalala pesi taakawubelesya kuti abasale kuti bazooyinke kujulu. Eezi zyaamba kuti bakali alusyomo luche na kwiinda aabo bakasalwa kuti bazoopone kujulu? Peepe. Zyaamba kuti Jehova uyoobabusya kuti bazoopone muParadayizi aanyika.​—Joh. 5:28, 29; Mil. 24:15.

16. Mazubaano bakombi baJehova biingi balaabulangilizi bwakuyoopona kuli?

¹⁶ Mazubaano, bakombi baLeza biingi tabakwe bulangilizi bwakuzooyinka kujulu. Mbuuli Abrahamu, Sara, Davida, Johane Mubbabbatizi abamwi baalumi abanakazi bakapona chiindi, balangilila kuzoopona aanyika bwaakweendelezya Bwaami bwaLeza.​—Heb. 11:10.

17. Njiili mibuzyo iiyoosandulwa muchiiyo chitobela?

¹⁷ Tulakonzya kuba amibuzyo nkaambo bamwi maKristu bananikidwe bachili aanyika. (Ciy. 12:17) Muchikozyano, maKristu bananikidwe beelede kulibona biyeni? Kuti umwi wamumbungano watalika kulya chinkwa akunywa wayini kuChiyubulusyo, mweelede kumubona biyeni? Alubo kujana twachita biyeni kuti namba yamaKristu bananikidwe kiili kuyungizya? Tweelede kukataazikana na? Mibuzyo eeyi iyoosandulwa muchiiyo chitobela.