1. Mbuli Mwaami Davida, nguuli mubuzyo bamwi ngubakonzya kubaawo?

TOONSE tuyanda kupona muluumuno. Takwe muntu pe ukuyanda kukataazikana. Pesi chimwi chiindi nga twakataazikana. Bamwi bakombi baJehova basyomeka nga baba amubuzyo Mwaami Davida ngwaakabuzya Jehova wakuti: “Ino ndilalibilika kwaciindi cilamfwu buti akuusa mumoyo wangu buzuba abuzuba?”—Int. 13:2.

2. Tulalanga-langaanzi muchiiyo eechi?

² Nikuba kuti tatukonzyi pe kumaninsya kukataazikana pesi kuli zintu nzitukonzya kuchita kuti tutakataazikani loko. Muchiiyo eechi, tulasaanguna kubona zintu zikonzya kupa kuti tukataazikane. Mpawo tulabona nzila zili 6 zikonzya kutugwasya kuti tukkale katubateme chiindi nituli mumapenzi.

3. Tuswaanana aazyiimo zili ziyumu alubo tulakonzya na kuzilesya?

³ Kuli zintu zyiingi zikonzya kupa kuti tukataazikane. Zimwi tatukonzyi pe kuzilesya. Muchikozyano, tatukonzyi pe kupa kuti chakulya, zigogo alenti zileke kudula munyaka amunyaka. Alubo tatukonzyi kulesya bantu mbitwiiyaabo ambitubelekaabo kuti baleke kutusungilizya kutasyomeka naakuti kuchita bwaamu. Alubo tatukonzyi pe kukasya bantu kuchita zintu zitali kabotu kundawu nkutukkala. Tuswaanana aazyiimo zili boobu nkaambo tupona aabantu bataponi kweendelana amalayilile amuBbayibbele. Saatani mweendelezi wanyika  eeyi ulizi kuti bamwi bantu bayoozumizya “kulibilika kwamubweende bwazintu obuno” kuti kubakachizye kubelekela Jehova. (Mt. 13:22; 1 Joh. 5:19) Nkinkaako, tatugambi pe kubona munyika kamuzwide zintu zipa kuti bantu bakataazikane.

4. Niinzi chikonzya kuchitika kuti twakataazikana loko akaambo kamapenzi eesu?

⁴ Chimwi chiindi tulakonzya kukataazikana zyakuti tulakachilwa kuyeeya zintu zigwasya. Muchikozyano, tulakonzya kukataazikana kuti tulayijana na mali yakuula zintu ziyandikana naakuti tulakonzya kuchiswa akukachilwa kuya kumulimu naakuti kumaninwa mulimu. Alubo tulakonzya kukataazikana kuti amwi tuzookachilwa kusyomeka mpawo tuzootyole mulawu waJehova kuti twasunkwa. Lino-lino, Saatani uzoopa kuti bantu mbeendelezya balwane bakombi baJehova. Nkinkaako, tulakonzya kukataazikana kuti tuzoochita biyeni aachiindi eecho. Alubo tulakonzya kulibuzya kuti, ‘Zilikabotu na kuti ndikataazikane loko akaambo kazintu zili boobu?’

5. Jesu wakali kwaambaanzi naakati: “Amuleke kulibilika”?

⁵ Tulizi kuti Jesu wakabuzya batobeli bakwe kuti: “Amuleke kulibilika.” (Mt. 6:25) Eezi zyaamba kuti tatweelede kukataazikana na atala azintu zyoonse? Teembubo pe. Nkaambo bamwi bakombi baJehova basyomeka bachiindi bakali kukataazikana pesi Jehova wakachili kubayanda. * (1 Bam. 19:4; Int. 6:3) Jesu naakaamba majwi aaya wakali kuyanda kutusimya alubo wakali kwaamba kuti tatweelede kukataazikana atala abuumi bwesu zyakuti tukachilwe kubelekela Jehova. Niinzi nzitweelede kuchita kuti twakataazikana?—Langa kabbokesi kati “ Mbukonzya Kuzichita.”

6. Kweendelana alugwalo lwa Bafilipi 4:6, 7, niinzi chikonzya kupa kuti tubatame?

⁶ (1) Kkala kukomba. MaKristu bakataazikene balakonzya kugwasigwa kuti bakomba kuli Jehova kazizwa aansi aamoyo. (1 Pet. 5:7) Jehova ulakonzya kusandula nkombyo zyesu kwiinda mukutupa “luumuno lwa Leza oolo lwiinda maano oonse.” (Bala Bafilipi 4:6, 7.) Alubo ulakonzya kupa kuti tubatame mumizeezo kabelesya muuya wakwe uusalala.—Gal. 5:22.

7. Niinzi nzitweelede kuyeeya chiindi nitukomba kuli Jehova?

⁷ Chiindi nukomba kuli Jehova weelede kwaamba zyoonse zili aansi amoyo wako. Mubuzye penzi lyako mpawo umubuzye kuti ulikumvwa biyeni atala andilyo. Kuti kakuli nzila yakumaninsya penzi eelyo kumbila Jehova kuti akupe busongo bwakuti ubone nzila eeyo amanguzu akuti uyibelesye. Kuti kutakonzyi kumaninsya penzi eelyo, kumbila Jehova kuti akugwasye kuti utakataazikani loko. Kuti Jehova wamuzwida aantanganana kwiinda mukumubuzya mapenzi aako uyoobona mbazisandula nkombyo zyako. Kuti Leza taafwambaana kusandula nkombyo yako utaleki pe kukomba. Jehova tayandi kuti tumuzwide aantanganana luzutu pe munkombyo pesi uyanda kuti tuzumanane kukomba.—Lk. 11:8-10.

8. Niinzi nzitweelede kuswaanizya munkombyo zyesu?

⁸ Chiindi nubuzya Jehova zintu zili kukukataazya, utalubi pe kumulumba. Tatweelede kuluba zintu zibotu Jehova nzyaakatuchitila nikuba kuti tuli mubuyumu-yumu buli biyeni. Kuti waabula majwi akupandulula atala ambuli kukataazikana, utalubi pe kuti Jehova  ulazisandula nkombyo mfwiifwi mbuli yakuti, ‘Ndikumbila lugwasyo.’—2 Mak. 18:31; Rom. 8:26.

9. Niinzi nzitweelede kuchita kuti twayoowa?

⁹ (2) Syoma Jehova kutali maanu aako pe. Muchiindi chamupolofita Isaya, banaAsuri bakali kuyanda kulwana maJuda. Akaambo kakuyoowa, maJuda bakakumbila lugwasyo kubanaEgepita. (Is. 30:1, 2) Jehova wakabachenjezya kuti kusyoma banaEgepita kwakali kukonzya kubanjizya mumapenzi. (Is. 30:7, 12, 13) Alubo wakabuzya bantu bakwe zintu nzibakeelede kusyoma chiindi nibakali kuyoowa kabelesya mupolofita Isaya. Wakati: “Mulaba anguzu kufwumbwa buyo kuti mubatame akuba alusyomo” muli Jehova.—Is. 30:15b.

10. Muzyiimo zili mutweelede kutondeezya kuti tulamusyoma Jehova?

¹⁰ Nga tulatondeezya biyeni kuti tulamusyoma Jehova? Atubone zikozyano zitobela. Kujana wachita biyeni kuti wajana mulimu ukufozya mali nyingi pesi kuutakupi chiindi chakuti uchite zintu zyabukombi? Ani kuti umwi muntu kumulimu kali kutondeezya kuti ulakuyanda pesi muntu ooyo katali Kamboni waJehova pe? Alubo uyoochita biyeni kuti umwi wamumpuli wakubuzya kuti: “Weelede kusala kuti uyanda Jehova na naakuti uyanda ndime?” Muzyiimo eezi zyoonse kulakonzya kukuyumina kusala kabotu pesi Bbayibbele lili aamalayilile aakonzya kukugwasya. (Mt. 6:33; 10:37; 1 Kor. 7:39) Zili kuli nduwe kuti uyoowasyoma na akwaabelesya malayilile aayo.

11. Nziizili zikozyano zyamuBbayibbele zikonzya kutugwasya kuti tukkale katubateme kuti twakazigwa?

¹¹ (3) Yiya kuzwa kuzikozyano zilikabotu azitali kabotu. MuBbayibbele muli zikozyano zyiingi zyabantu bakakkala kababeteme alubo bakasyoma Jehova. Chiindi nubala atala azikozyano eezi zyabakombi baJehova basyomeka, yeeyesesya kuti niinzi chakabagwasya kuti bakkale kababateme chiindi nibakali kukazigwa. Muchikozyano, chiindi nkuta yamaJuda niyakabuzya baapostolo kuti baleke kukambawuka, taakwe nibakayoowa pe. Pesi kabali aachibindi bakababuzya kuti: “Tweelede kumvwida Leza mbwali mweendelezi kutali bantu.” (Mil. 5:29) Nikuba chiindi nibakazwa kuumwa baapostolo teebakayoowa pe. Nkamboonzi? Nkaambo bakabona kuti Jehova wakali ambabo akuti nzibakali kuchita zyakali kumubotezya. Eezi zyakapa kuti bayinkilile kunembo kukambawuka. (Mil. 5:40-42) Chiindi sikwiiya Stefani naakali kuyanda kujegwa wakakkala kali aluumuno alubo kabateme zyakuti busyu bwakwe bwakaba “mbuli busyu bwamungelo.” (Mil. 6:12-15) Nkamboonzi naakabeteme? Nkaambo wakalizi kuti Jehova wakali kumuyanda.

12. Kweendelana alugwalo lwa 1 Petro 3:14; 4:14, nkamboonzi nitweelede kubotelwa chiindi nitupenzegwa?

¹² Baapostolo bakali aabumboni buli aantanganana bwakuti Jehova wakali ambabo. Jehova wakabapede nguzu zyakuti bachite zigambyo. (Mil. 5:12-16; 6:8) Pesi Jehova tachitupi nguzu zyakuchita zigambyo pe mazubaano. Nikuba boobo, muJwi lyakwe utusyomezya kuti, kuti twalipeda kupenzegwa akaambo kazina lyakwe ulabotelwa alubo ulatupa muuya uusalala kuti utugwasye. (Bala 1 Petro 3:14; 4:14.) Eechi teechiindi chakuti tukataazikane akuti tuyoochitaanzi nitwazoopenzegwa pesi nchiindi chakubeleka changuzu kuti tusimye lusyomo lwesu lwakuti, Jehova uyootusimya akuti uyootuvuna. Mbuli zyakachitwa abasikwiiya, tweelede kusyoma majwi aaJesu aakuti: “Ndiyoomupa majwi abusongo, eezyo basikumukazya boonse nzyobatakakonzyi kukaka naa kukazya.” Alubo Jesu wakatusyomezya kuti:  “Kwiinda mukuliyumya kwanu, muyoofwutula buumi bwanu.” (Lk. 21:12-19) Alubo tatweelede kuluba pe kuti Jehova tazilubi pe zintu ziniini zyakachitwa abakombi bakwe basyomeka. Eezi ziyoopa kuti azoobabusye.

13. Kubala atala azikozyano zyabantu bakakachilwa kubatama akusyoma Jehova kutugwasya biyeni?

¹³ Tulakonzya kujana zyiiyo kuzwa kubantu bakakachilwa kubatama akusyoma Jehova. Kubala atala azikozyano eezi zitali kabotu kulakonzya kutugwasya kuti tutachiti zintu zibi nzibakachita. Muchikozyano, chiindi Mwaami Asa naakaba Mwaami waJuda, wakasyoma Jehova chiindi basinkondonyina bakali amasoja miingi nibakali kuyanda kumulwana. Jehova wakamugwasya kuti abazunde. (2 Mak. 14:9-12) Pesi mukuya kwachiindi, Mwaami Bbasa wakali amasoja mache naakasika kuti azoomulwane, Asa wakaleka kusyoma Jehova kuti amuvune mbuli mbaakachita chiindi pesi wakakumbila maAsuri kuti bamugwasye. (2 Mak. 16:1-3) Alubo Mwaami Asa naakachiswa wakaleka kusyoma Jehova.—2 Mak. 16:12.

14. Twiiyaanzi kuzwa kuli zyakachitwa a-Asa?

¹⁴ Kumasaangunino, Asa wakali kusyoma Jehova kuti waswaanana aabuyumu-yumu. Pesi mukuya kwachiindi taakachili kumusyoma pe Leza, wakazoosaanguna kulisalila zyakuchita. Zyakachitwa a-Asa, kukumbila banaAsuri kuti bamugwasye kulwana maIsrayeli zilakonzya kubonekaanga zyakali kabotu pesi zyakali kuyoomugwasya kwachiindi chifwiifwi. Kabelesya mupolofita wakwe Jehova wakabuzya Asa kuti: “Akaambo kakuti wakasyoma mwami wa Siriya muciindi cakusyoma Jehova Leza wako, impi yabasikalumamba yamwami wa Siriya yaloboka mumaanza aako.” (2 Mak. 16:7) Tweelede kuchenjelela kuti tutalisyomi akuchita zintu kweendelana ambutuyeeya. Pesi tweelede kusyoma Jehova akubelesya malayilile aajanika muJwi lyakwe. Nikuba kuti twaswaanana aachiimo chiyanda kusala chakufwambaana, tweelede kubatama akusyoma Jehova alubo uyootugwasya kuti tusale kabotu.

15. Niinzi nzitukonzya kuchita chiindi nitubala Bbayibbele?

¹⁵ (4) Azibe aamutwe mavesi. Kuti waswaanana aavesi iiwambuula atala amuntu wakabatama akusyoma Jehova ulakonzya kwiijata aamutwe. Kwiibalila aajulu, kwiilemba aansi naakuti kukkala kwiilanga-langa kulakonzya kukugwasya kuti wiijate. Jehova wakabuzya Joshuwa kuti akkale kabala bbuku lyamulawu chaansaansi kuchitila kuti akonzye kusala chabusongo. Nzyaakabala mubbuku lyamulawu zyakamugwasya kuti atayoowi pe pesi abe aachibindi chakuzulwida maIsrayeli. (Jos. 1:8, 9) MuBbayibbele muli mavesi miingi akonzya kukugwasya kuti ube aaluumuno muzeezo akuti ubatame chiindi nwaaswaanana aazyiimo zikonzya kupa kuti ukataazikane naakuti uyoowe.—Int. 27:1-3; Tus. 3:25, 26.

16. Jehova ubabelesya biyeni bakombima kuti atugwasye kuti tubatame akuti tusyome nguwe?

¹⁶ (5) Liswaanizye aabakombi baLeza. Jehova ubelesya bakwesu abachizi kuti batugwasye kuti tubatame akuti tusyome nguwe. Nituli kumiswaangano tulakonzya kusungwaazigwa aankani, nsandulo akwaambuuzyania nkutuchita abakwesu abachizi. (Heb. 10:24, 25) Alubo tulakonzya kusungwaazigwa kuti twabuzya mukombima ngutusyoma atala azintu zitukataazya. “Jwi libotu” lizwa kumweenzuma lilakonzya kupa kuti tutakataazikani loko chiindi nituli mumapenzi.—Tus. 12:25.

17. Kweendelana alugwalo lwa Bahebrayo 6:19, bulangilizi bwesu butugwasya biyeni kuti tubatame chiindi nituli mubuyumu-yumu?

¹⁷ (6) Ba aabulangizi busimide. Bulangilizi buli “mbuli ngobyo yiimika bwato yabuumi  bwesu” nkaambo bupa kuti tubatame nituli mubuyumu-yumu anitukataazikene mumizeezo. (Bala Bahebrayo 6:19.) Yeeya atala abuumi bwakunembo Jehova mbwaakatusyomezya. Aachiindi eecho, kukataazikana takuchinoliwo pe. (Is. 65:17) Libone kuli munyika mpya aawo zintu zipa kuti tukataazikane kazitachiwo pe. (Mik. 4:4) Imwi nzila iikonzya kupa kuti bulangilizi bwako busime nkubuzya bamwi atala ambubo. Chita zyoonse nzukonzya mumulimu wakukambawuka akugwasya bantu kuti babe basikwiiya. Kuti wachita oobo uyooba “alusyomo luyumu mubulangizi kusikila kumamanino.”—Heb. 6:11.

18. Tulangilila kuzooswaananaanzi muchiindi chili kunembo alubo niinzi chikonzya kuzootugwasya?

¹⁸ Mbukunga mamanino aanyika eeyi aba afwiifwi, tulangilila kuzooswaanana aabuyumu-yumu bwiingi azintu zyiingi zipa kuti tukataazikane. Lugwalo lwamunyaka wa2021 lulatugwasya kuti chiindi nituswaanana abuyumu-yumu tubatame akusyoma Jehova kutali kusyoma maanu eesu pe. Mumunyaka uuno, atutondeezye kwiinda mumichito kuti tulachisyoma chisyomezyo chaJehova chakuti: “Mulaba anguzu kufwumbwa buyo kuti mubatame akuba alusyomo.”—Is. 30:15.