1. Niinzi chakachitika kuli umwi mulombe naakamvwa nkani yakapegwa mu1935?

UMWI mulombe wakali aaminyaka iili 18 chiindi naakabbabbatizigwa mu1926. Bazyali bakwe bakali Basikwiiya baBbayibbele. Aachiindi eecho mbubakali kwiitwa Bakamboni baJehova. Bazyali bamulombe ooyu bakali aabana balombe batatu abasimbi babili. Bana babo boonse bakali kubelekela Jehova akutobela chikozyano chaJesu Kristu. Mulombe ooyu wakali kulya chinkwa akunywa wayini kuChiyubulusyo mbuli mbubakali kuchita boonse Basikwiiya baBbayibbele. Pesi bulangilizi bwakwe bwakachincha chiindi Mukwesu J. F. Rutherford naakapa nkani yakali aamutwe uuti “Nkamu Mpati” (“The Great Multitude”). Nkani eeyi yakapegwa mu1935 kumuswaangano mupati wakali kuWashington, D.C. kuU.S.A. Nkaakali kasimpe kayandikana nkibakayiya Basikwiiya baBbayibbele aamuswaangano ooyu?

2. Nkaakali kasimpe kayandikana nkaakapandulula Mukwesu Rutherford munkani yakwe?

² Munkani yakwe Mukwesu Rutherford wakapandulula kuti mbaani bapanga “nkamu mpati” yaambwa muli Ciyubunuzyo 7:9. Aachiindi eecho, Basikwiiya baBbayibbele bakali kusyoma kuti nkamu mpati nkabunga kachibili katazooyinke kujulu, pesi kaswaanizya bantu batakwe lusyomo lusimide. Alubo Mukwesu Rutherford wakapandulula kabelesya Magwalo kuti bankamu mpati tabazooyinki kujulu pe, pesi mbambelele zimbi *  batazoofutuke “mumapenzi mapati” akupona munyika kukabe kutamani. (Ciy. 7:14) Jesu wakati: “Ndilijisi mbelele zimbi izitali zyamucaanda eeci; azyalo eezyo ndeelede kuzileta alimwi ziyooswiilila jwi lyangu, eelyo ziyooba tanga lyomwe alimwi zinooli amweembezi omwe.” (Joh. 10:16) Mbelele eezi Mbaakamboni baJehova basyomeka bali abulangilizi bwakupona muParadayizi aanyika kukabe kutamani. (Mt. 25:31-33, 46) Atubone kuti kumvwisisisya kasimpe aaka kayandikana kwakabuchincha biyeni bulangilizi bwabakombi baJehova biingi kuswaanizya amulombe ngutwaamba wakali aminyaka iili 18.—Int. 97:11; Tus. 4:18.

3-4. Bantu bakali aamuswaangano mu1935 bakamvwisisisyaanzi alubo nkamboonzi?

³ Kuli chintu chibotezya chakachitika chiindi Mukwesu Rutherford naakabuzya baswiilizi kuti: “Ndikumbila kuti boonse bali aabulangilizi bwakupona aanyika banyampuke.” Umwi mukwesu wakaliwo aamuswaangano ooyu wakati, kwakali aabantu basika ku 20 000, bayinda kuhafu yabo bakanyampuka. Mpawo Mukwesu Rutherford wakati: “Amubone nkamu mpati.” Kuzwa waawo, bantu bakoompolola kabali kutondeezya kubotelwa. Bantu bakanyampuka bakamvwisisisya kuti teebakalikwe bulangilizi bwakupona kujulu pe akuti teebakananikidwe pe. Mubuzuba bwakatobela, kwakabbabbatizigwa bantu bali 840, biingi babo bakali bambelele zimbi.

⁴ Kuzwa nibakamvwa nkani eeyi bantu biingi kuswaanizya amulombe ngutwaamba musule bakaleka kulya chinkwa akunywa wayini kuChilalilo chaMwaami Chagoko. Umwi mukwesu wakaamba mbubakalimvwa bantu biingi chiindi naakati: “Ndakajinka kulya chinkwa akunywa wayini kuChiyubulusyo mu1935. Ndakaleka nkaambo ndakabona kuti Jehova taakandinanika pe kuti ndikapone kujulu. Pesi ndakabona kuti ndakali aabulangilizi bwakuzoopona aanyika akuti ndizoogwasilizye kuti nyika eeyi ibe paradayizi.” (Rom. 8:16, 17; 2 Kor. 1:21, 22) Kuzwa aachiindi eecho, bankamu mpati balikuyungizya alubo balikubelekela aamwi amaKristu bananikidwe bachili aanyika.

5. Jehova ubabona biyeni bantu bakaleka kulya kuChiyubulusyo?

⁵ Jehova wakababona biyeni bantu bakaleka kulya chinkwa akunywa wayini kuChiyubulusyo mu1935? Ani mazubaano umubona biyeni Kamboni uleka kulya chinkwa akunywa wayini akaambo kakuti wabona kuti tananikidwe pe? (1 Kor. 11:28) Bamwi bakali kulya akaambo kakuti teebakali kumvwisisisya pe atala abulangilizi mbubalaabo. Pesi nibakabona kuti tabeelede kulya bakaleka akwiinkilila kunembo kabali kubelekela Jehova. Jehova ulabatambula akubabikka kulubazu lwabambelele zimbi. Nikuba kuti tabachilyi pe pesi tabaleki pe kusika kuChiyubulusyo akaambo kakuti balazilumba nzibakachitilwa aJehova aJesu.

6. Jesu wakalayilila bangelo kuti bachiteenzi?

⁶ Mbukunga mapenzi mapati aba aafwiifwi, kulayindikana kuti tulange-lange makani ajanika muli Ciyubunuzyo 7 aali atala amaKristu bananikidwe ankamu mpati yambelele zimbi. Jesu wakalayilila bangelo kuti bazumanane kujata myuuwo yone yakunyonyoona. Tabeelede kwiileka pe myuuwo eeyo kusikila maKristu bananikidwe boonse babikkwe chitondeezyo chamamanino chitondeezya kuti Jehova ulabatambula. (Ciy. 7:1-4) Kuti bazumanana  kusyomeka, maKristu aaba bananikidwe bayoopegwa bulumbu bwakuba baami abapayizi kabali aamwi aJesu kujulu. (Ciy. 20:6) Jehova, Jesu abangelo bayoobotelwa kuba aamwi amaKristu bananikidwe bali 144 000 chiindi nibayootambula bulumbu bwabo kujulu.

7. Kweendelana alugwalo lwa Ciyubunuzyo 7:9, 10, mbaani Johane mbaakabona muchilengaano, alubo bakali kuchitaanzi? (Langa chifanikisyo chili achivumbyo.)

⁷ Naakazwa kwaambuula atala abaami abapayizi bali 144 000, Johane wakabona chimwi chintu chakamubotezya, “nkamu mpati” yabantu bakafutuka muArmagedoni. Kusiyana ankamu yakusaanguna, nkamu yachibili nimpati alubo tayikonzyi kubalika. (Bala Ciyubunuzyo 7:9, 10.) ‘Bakasamide zisani zilamfu zituba’ zitondeezya kuti bakazumanana ‘kulibamba kabatakwe kabala kali koonse’ kamunyika yaSaatani akusyomeka kuli Leza aKristu. (Jak. 1:27) Bakali koompolola ajwi pati kuti lufutuko lwabo luzwa kuli Jehova akuli Jesu Mwanaambelele waLeza. Alubo bakajisi malala mumaboko aabo zitondeezya kuti balazumina kuti Jesu Mwaami wakasalwa aJehova.—Kozyanisya a Johane 12:12, 13.

8. Lugwalo lwa Ciyubunuzyo 7:11, 12 lutubuzyaanzi atala azilenge zyakujulu?

⁸ Bala Ciyubunuzyo 7:11, 12. Zilenge zyakujulu zyakamvwa biyeni chiindi nizyakabona bankamu mpati kabali kulumbayizya Leza? Zyakabotelwa loko. Jehova, Jesu abangelo bazoobotelwa loko chiindi nichiyoozuzikizigwa chilengaano eechi, aawo bankamu mpati nibayoofutuka mumapenzi mapati.

9. Kweendelana alugwalo lwa Ciyubunuzyo 7:13-15, bankamu mpati bali kuchitaanzi mazubaano?

⁹ Bala Ciyubunuzyo 7:13-15. Johane wakaamba kuti bankamu mpati “bawasya zisani zyabo zilamfwu akuzitubya mubulowa bwa Mwanaambelele.” Eezi zyaamba kuti myoyo yabo ilasalala akuti balatambulika kuli Jehova. (Is. 1:18) Bakalipeda kuli Jehova akubbabbatizigwa, balaalusyomo lusimide muchinunuzyo chaJesu Kristu alubo bali aabweenzinyina busimide aJehova. (Joh. 3:36; 1 Pet. 3:21) Nkinkaako, baleelela kwiimikila kunembo lyachuuno chabwaami chaLeza ‘akumubelekela mulimo uusetekene isyikati amasiku’ mulubuwa lwatempele yamubukombi iili aanyika. Alubo mazubaano balikubeleka changuzu mumulimu wakukambawuka awakugwasya bantu kuti babe basikwiiya. Alubo babikka Bwaami mubusena bwakusaanguna.—Mt. 6:33; 24:14; 28:19, 20.

10. Bambelele zimbi bali aachoonzyo chanzi alubo bakasyomezegwaanzi?

¹⁰ Bankamu mpati bayoofutuka mumapenzi mapati balaachoonzyo chakuti Jehova uyoozumanana kubakwabilila nkaambo Bbayibbele liti: “Ooyo uukkede acuuno cabwami uyoobavwumba atente lyakwe.” Alubo Leza wakasyomezya bambelele zimbi chisyomezyo nchibalangilila aameso aasalala chakuti: “Uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciy. 21:3, 4.

11-12. (a) Kweendelana alugwalo lwa Ciyubunuzyo 7:16, 17, bankamu mpati balangililaanzi? (b) Niinzi nzibakonzya kuchita bambelele zimbi kuChiyubulusyo, alubo niinzi chipa kuti bachite oobo?

¹¹ Bala Ciyubunuzyo 7:16, 17. Mazubaano, bamwi bakombi baJehova balikufwa nzala akaambo kakubula mali yakuula chakulya naakuti akaambo kakuti kunyika nkubakkala kuli nkondo. Bamwi balikusungwa akaambo kalusyomo lwabo. Nikuba boobo, balabotelwa nkaambo balizi kuti yazoonyonyoonwa nyika eeyi mbi bayoojana chakulya  chiingi chakumubili achamubukombi. Chiindi Jehova natazoonyonyoone nyika eeyi yeendelezegwa aaSaatani, uyooba aachoonzyo chakuti uyookwabilila bankamu mpati kubukali bwakwe buli mbuli “kutentwa akupya.” Natazoomane mapenzi mapati, Jesu uyoozulwida bantu aaba batazoofutuke ‘kumaanzi aabuumi butamani.’ Biingi batazoonjile munyika mpya bayoobusigwa biya. Pesi bankamu mpati batazoofutuke munkondo yaArmagedoni kulakonzeka kuti tabazooboni lufu pe.—Joh. 11:26.

¹² Bambelele zimbi bali aabulangilizi bubotu loko bupa kuti balumbe Jehova aJesu. Teebakasalwa kuti bayinke kujulu, pesi eezi tazyaambi kuti tabayandikani pe mumeso aaJehova. Bazimwi mbelele amaKristu bananikidwe, bali aachilongezyo chakutembawula Leza aKristu. Imwi nzila mbubakonzya kuchita oobo nkujanika kuChilalilo chaMwaami Chagoko.

13-14. Nkamboonzi maKristu bananikidwe abambelele zimbi nibanjila Chiyubulusyo chaLufu lwaKristu?

¹³ Mazubaano, mbache loko bantu balya kuChiyubulusyo zyakuti aakati kabantu bali 1 000, kulakonzya kulya muntu uumwi biyo. Eezi zyaamba kuti mumbungano zyiingi taakwe muntu uulya pe. Bantu biingi banjila Chiyubulusyo bali aabulangilizi bwakupona aanyika. Ani mpo nkamboonzi nibanjila Chilalilo chaMwaami Chagoko? Eezi zilikozyenie amuntu uunga wayinka kumuchado wamweenzinyina. Ulayinka akaambo kakuti ulabayanda banga balikuchada alubo nga uyanda kubagwasya. Mbukubede, kwiinka kuChiyubulusyo nkubachita bazimwi mbelele kutondeezya kuti balamuyanda Kristu amaKristu bananikidwe akuti bayanda kubagwasya. Alubo bazimwi mbelele balayinka kuChiyubulusyo kuchitila kuti batondeezye kuti balachilumba chinunuzyo chaJesu Kristu, chipa kuti bazookonzye kupona aanyika kukabe kutamani.

¹⁴ Kamwi kaambo kapa kuti bambelele zimbi bayinke kuChiyubulusyo nkakuti, baswiilila mulawu waJesu. Chiindi Jesu naakatalisya mabambe aaChilalilo chaMwaami Chagoko kali aamwi abaapostolo bakwe basyomeka wakababuzya kuti: “Kamucita oobu lyoonse kutegwa kamundiyeeya.” (1 Kor. 11:23-26) Nkinkaako, kufumbwa kuti maKristu bananikidwe kabachiliwo aanyika,  bazimwi mbelele balazumanana kunjila Chilalilo chaMwaami Chagoko. Alubo bambelele zimbi batamba bamwi kuti banjile ambabo Chiyubulusyo.

15. Kujana twamutembawula biyeni Leza aKristu kuChiyubulusyo?

¹⁵ KuChiyubulusyo tujana mweenya wakutembawula Leza aKristu kwiinda mukwiimba akukomba. Nkani yaChiyubulusyo chamunyaka uuno ilaamutwe uti, “Tondeezya Kulumba Kuli Nzwaakachitilwa aLeza aKristu!” Iyootugwasya kuti tutondeezye kulumba kuli Jehova aKristu. Chiindi chinkwa awayini nizyanooyinzigwa kunembo lyesu, ziyootuyeezya atala anchizyiiminina chaamba mubili waJesu aganzi lyakwe. Alubo ziyootuyeezya kuti Jehova wakapa Mwanaakwe kuti atufwide kuchitila kuti tujane buumi. (Mt. 20:28) Kuyanda Jehova aMwanaakwe kweelede kupa kuti tuyande kunjila Chiyubulusyo.

16. MaKristu bananikidwe abambelele zimbi bakozyenie biyeni?

¹⁶ Toonse tulayandikana kuli Jehova kazitakwe ndaba kuti tuli maKristu bananikidwe na naakuti tuli bambelele zimbi. Tulizizi eezi akaambo kakuti Jehova wakapa chinunuzyo kuchitila kuti atununune toonse maKristu bananikidwe abambelele zimbi. Chisiyene luzutu mbulangilizi mbutulaabo. Toonse tweelede kusyomeka kuli Leza aKristu kazitakwe ndaba kuti tulinanikidwe naakuti tuli bambelele zimbi. (Int. 31:23) Alubo Jehova ulatupa muuya uusalala toonse. Eezi zyaamba kuti utupa muuya uusalala kweendelana azyiimo zyesu.

17. MaKristu bananikidwe balangililaanzi?

¹⁷ MaKristu bananikidwe tabazyalwi kabali abulangizi bwakuya kujulu. Leza nguubapa bulangilizi oobu. Bakkala kabayeeya atala abulangilizi bwabo, balakomba atala ambubo alubo balangilila aameso aasalala kuyoopegwa bulumbu bwabo kujulu. Alubo tabazi pe kuti inooli biyeni mibili yamuuya njibatazoopegwe kujulu. (Flp. 3:20, 21; 1 Joh. 3:2) Nikuba boobo balangilila kuyooswaanana aJehova, Jesu, bangelo abamwi bananikidwe. Alubo balangilila kuyooba aamwi ambabo muBwaami bwakujulu.

18. Bambelele zimbi balangililaanzi?

¹⁸ Bambelele zimbi balangilila kuzoopona aanyika kukabe kutamani. Leza wakalenga bantu kabali aachiyandisyo chakupona kukabe kutamani aanyika. (Muk. 3:11) Balangilila chiindi nibatazoobotye nyika yoonse kuti ibe paradayizi. Alubo balangilila kuzooyaka maanda, kulima myuunda akukomezya bana kabatakwe chibi. (Is. 65:21-23) Alubo  balangilila kuzooyendeenda aanyika kababona zintu zili mbuli zilundu, lusaka, lwizi akwiiya atala azintu Jehova nzyaakalenga. Kwiinda zyoonse, kulababotezya kuziba kuti bweenzinyina aJehova buyoosima loko akuti bayooswena aafwiifwi anguwe.

19. Chiyubulusyo chitupa mweenya wakuchitaanzi alubo munyaka uuno chinoolilili?

¹⁹ Jehova upede bakombi bakwe boonse bulangilizi bubotu loko. (Jer. 29:11) Chiyubulusyo chaLufu lwaKristu chitupa mweenya uuyandikana loko wakutembawula Leza aKristu akaambo kazintu nzibakatuchitila kuchitila kuti tujane buumi butamani. Chiyubulusyo muswaangano uuyandikana loko maKristu bakasimpe ngubachita munyaka amunyaka. Munyaka uuno, chizoochitwa lyabbila zuba muMugibelo 27 March 2021. Bantu biingi bakkala mundawu mubaangunukide kukomba bayoochinjila kabaangunukide. Pesi bamwi bayoochinjila nikuba kuti balakazigwa. Alubo bamwi bayoochinjila nikuba kuti bali mumajele. Jehova, Jesu, bangelo abananikidwe bali kujulu banoolangide katuli kuchita Chiyubulusyo. Nkinkaako, toonse atubotelwe amuswaangano ooyu kazitakwe ndaba kuti tuyoonjila katuli mbungano, kabunga naakuti atulikke.