Harvey wakali mutaanzi aakati kabana balombe bali 4. Mpuli yabaHarvey yakali kukkala kuMidland Junction kuAustralia nkwiili kububbila. Alubo bakayiya kasimpe kuma1930 nikwakali penzi lyakubula mali. Harvey wakali kumuyanda Jehova mpawo wakabbabbatizigwa kali aaminyaka iili 14. Wakayiya kuti tayelede kukaka milimu yamumbungano. Naakachili mulombe, wakakaka kubala Ngaziyakulinda kumiswaangano kayeeya kuti tanayelela pe. Umwi mukwesu wakabuzya Harvey kuti: “Kuti umwi muntu mumbunga yaJehova wakubuzya kuti uchite chimwi chintu nga wakubona kuti uleelela.”—2 Kor. 3:5.

Ime abaama amukulana wangu musimbi twakayiya kasimpe kuEngland. Kumasaangunino ndeende taakali kubayanda pe Bakamboni pesi mukuya kwachiindi wakazooyiya kasimpe mpawo wabaKamboni. Ndakabbabbatizigwa kandili aaminyaka iili 9 nikuba kuti ndeende taakali kuyanda pe. Ndakali kuyanda kuzoopayona mpawo ndizoobe mumishinali. Pesi ndeende wakandikasya mpawo wandibuzya kuti ndizoopayona nindaba aaminyaka iili 21. Teendakali kuyanda pe kulindila kwachiindi chilamfu oobo. Nkinkaako,  nindakaba aaminyaka iili 16, ndeende wakandizumizya kuti ndikakkale kuAustralia kwakali kwalongela mukulana wangu mupati musimbi. Mpawo nindakaba aaminyaka iili 18 ndakasaanguna kupayona.

Nindakali kuAustralia ndakaswaanana aHarvey. Anguwe wakali kuyanda kubelekela Jehova kali mumishinali mbuli ndime. Twakachada mu1951. Nitwakapayona kwaminyaka iibili, twakakumbilwa kuti tunjile mumulimu wabbazu. Bbazu lyesu lyakali kuswaanizya ndawu mpati iili kububbila kwaAustralia nkinkaako twakali kweenda mundawu zili kule alubo zitawi mvula nyingi katubelesya moota.

Mu1954 twakatambwa kuti tukanjile kkilasi yachi25 yaGiliyadi. Chiyandisyo chesu chakuba mamishinali chakali chaba aafwiifwi kuzuzikizigwa. Twakayinka kuNew York katubelesya bwaato mpawo nitwakasika, twakatalisya kwiiya Bbayibbele kutali zyakusaana. Chimwi nchitwakali kwiiya kuchikolo nchiSpanish pesi chakali kumuyumina Harvey nkaambo taakali kukonzya pe kwaambuula mabala ali aa ‘r.’

Katuli kuchikolo, bayiisi besu bakaambilizya kuti bantu bayanda kuyoobelekela kuJapan balakonzya kulembesya mazina aabo kuchitila kuti bayiisigwe chiJapan. Twakayeeya kuti tweelede kuzisiila mumaboko aambunga yaJehova kuti itusalile nkutweelede kuyoobelekela. Kakutanayinda chiindi, mukwesu Albert Schroeder umwi wabayiisi bakuGiliyadi wakabona kuti teetwakalinalembesya pe. Wakati: “Amuyeeyesesye atala ankani eeyi.” Mukwesu Albert Schroeder naakabona kuti tatulembesezye lubo, wakatubuzya kuti: “Ime abamwi bayiisi twamulemba. Amweezye kwiiya chiJapan.” Harvey chakamuubila chiJapanese kwiinda chiSpanish.

Twakasika kuJapan mu1955, achiindi eecho kwakali basikupupulula bali 500 luzutu. Harvey wakali aaminyaka iili 26 alubo ndakali aminyaka iili 24. Twakakumbilwa kuti tukabelekele kudolopo lyaKobe alubo twakabelekela nkuko kwaminyaka iili 4. Kuzwa waawo, twakabotelwa nitwakakumbilwa kuti tubeleke lubo mumulimu wakweendeenda mpawo twakakumbilwa kuti tukabelekele kudolopo lili aafwiifwi akuNagoya. Zintu zyoonse zyakali kutunoneezya mumulimu wesu, bakwesu, chakulya akubona ndawu zyeebeka. Kakutanayinda chiindi, twakajana umwi mweenya wakutakaka mulimu Jehova ngwaatupa.

Nitwakabeleka mumulimu wakweendeenda kwaminyaka iitatu, mutabi wakuJapan wakatukumbila  kuti tukabelekele kuTaiwan kuchitila kuti tukagwasilizye kundawu iikkala bantu bachiAmis. Kwakali kwaba basikupapila kuTaiwan mpawo kwakali kuyandikana mukwesu uuchaambuula kabotu chiJapan kuchitila kuti akabambulule nkani eeyi. * Kwakali kutuyumina kusiya mulimu ngutwakali kuchita kuJapan nkaambo twakali kuuyanda. Pesi Harvey wakali wayiya kuti tatweelede kukaka mulimu ngutwapegwa aaJehova, nkinkaako twakayinka.

Twakasika kuTaiwan muNovember 1962. Aachiindi eecho kwakali basikupupulula bali 2 271 luzutu alubo biingi babo bakali maAmis. Kumasaangunino twakeelede kwiiya chiChina. Pesi twakachikonzya nikuba kuti twakali aabbuku limwi luzutu alubo muntu wakali kutuyiisya taakachizi pe chikuwa.

Mbutwakasika biyo kuTaiwan, Harvey wakasalwa kuti abe Mubelesi waMutabi (waambwa kuti waMukkomiti yaMutabi.) Mulimu wakali aamutabi wakali muche nkinkaako, Harvey wakali kukonzya kubeleka muwofesi mpawo akabeleke aabakwesu bachiAmis kwamviki zitatu mweezi amweezi. Chimwi chiindi wakali kubeleka kali mulangizi waBbooma. Mulimu ooyu wakali kuswaanizya kupa nkani kumiswaangano yabbazu. Harvey wakali kunookonzya kupa nkani zyakwe muchiJapan mpawo bakwesu bachiAmis bakali kunoomumvwa. Pesi mfulumende yakaamba kuti miswaangano yoonse yeelede kuchitwa muchiChina. Eezi zyakapa kuti Harvey ape nkani zyakwe muchiChina nikuba kuti taakachizi kabotu. Mpawo umwi mukwesu wakali kumutolekela muchiAmis.

Aachiindi eecho, Taiwan yakali kweendelezegwa aamasoja nkinkaako, bakwesu bakeelede kukumbila mvumo yakuti bachite miswaangano mipati. Teekwakali kuuba pe kuti bapegwe mvumo eeyi. Alubo mapulisa chimwi chiindi bakali kunonoka kubapa. Kuti mapulisa anonoka kubapa mvumo kusikila mumviki yamuswaangano, Harvey wakali kukkala kukkeempu yamapulisa kusikila bamupa. Pulani eeyo yakabeleka nkaambo zyakali kubafwisya bweeme mapulisa kuti muntu wakuli iimwi nyika alindile kwachiindi chilamfu akkeempu yabo.

Chiindi nitwakali kuswaya mbungano twakali kweenda kwa-awa naakuti kwiinda katutanta milundu akuzubuka milonga. Ndichiyeeyede buzuba nindakasaanguna kutanta mulundu. Nitwakamana kulya kuseeni, twakajata bbaasi lya5:30. Nitwakaseluka, twakeenda aamawulu mpawo twazubuka mulonga mupati. Kuzwa waawo, twakatanta mulundu mulamfu. Mulundu ooyo wakali mulamfu zyakuti nindakali kulanga kunembo ndakali kubona ndyato zyamuntu wakali kweenda kunembo lyangu.

Nitwakasika, Harvey wakabeleka aabamwi bakwesu mumulimu wakukambawuka. Alubo ime ndakakambawuka andilikke muli iimwi ndawu yakali aabantu bakali kwaambuula chiJapan. Kali waamba kuchaya 1 sikati, ndakali ndaamba kusuntuka anzala nkaambo ndakali ndaba aachiindi kanditalide pe. Chiindi nindakazoobonana aHarvey, bakwesu bakali beenda. Harvey wakali wachinchanisya magazini amayi aankuku aatatu. Aachiindi eecho Harvey wakandiyiisya kulya mayi atapekedwe pe kwiinda mukudonkola kapako kaniini mpawo akuliswiimpa. Nikuba kuti zyakali kubonekaanga tazichiti pe, ndakadonkola limwi akulilya. Ani mpo ngwani wakalya lyachitatu?  Ndime ndakalilya, nkaambo Harvey wakabona kuti taakali kuyookonzya pe kuseluka mulundu kandibbede kuti ndafenta anzala.

Aali uumwi muswaangano mupati, ndakaswaanana aachimwi chiimo chindakatalizi pe. Twakali kukkala aang’anda yawumwi mukwesu wakali kukkala aafwiifwi aNg’anda yaBwaami. Mbukunga bantu bachiAmis bakubona kakuyandikana kusamba, mwanakazi wamulangizi wabbazu wakatukasaazizya meenda aakusamba. Harvey kuli mulimu ngwaakali kuchita nkinkaako, wakandikumbila kuti ndikasambe saansi. Mwanakazi wamulangizi wabbazu wakabikka zintu zitatu, peyili lili aamaanzi atontola alili aamaanzi apya naakuti awumpa abbavu litakwe chintu. Pesi chakandigambya nchakuti, wakazibikka aanze kubbazu lilangene aaNg’anda yaBwaami. KuNg’anda yaBwaami eeyo kwakali bakwesu bakali kulibambila muswaangano. Ndakakumbila kuti andipe mulembo mpawo wakandipa pepa libalangala. Ndakayeeya kuyoosambila kusule aang’anda nkaambo kwakalisitikide pesi kwakali tuyuni tutegwa mageese twakali kukonzya kundiluma. Ndakazooyeeya kuti bakwesu aaba balijisikini zyakuti balakonzya kutazibona kuti ndili kusamba. Alubo ndakayeeya kuti, kuti ndaleka kusamba baamuunzi tazikoobajata kabotu pe mpawo ndakazoosamba.

Harvey wakabona kuti bakwesu bachiAmis teebakali kwiinkilila kunembo pe mubukombi akaambo kakuti biingi babo teebakali kukonzya pe kulemba alubo teebakalikwe mabbuku pe mumulaka wabo. Mbukunga mulaka wachiAmis wakali wasaanguna kulembwa kakubelesegwa mabbi akuRoma, Harvey wakakubona kakweelela kuti bakwesu bayiisigwe kubala mumulaka wabo. Ooyu wakali mulimu mupati pesi bakwesu bakazookonzya kulibalila. Kuma1966 mabbuku achiAmis akasaanguna kupupululwa mpawo mu1968 kwakapupululwa Ngaziyakulinda.

Pesi mukuya kwachiindi mfulumende yakasaanguna kukasya mabbuku aatalembedwe muchiChina. Akaambo kazeezi, bakwesu bakasala kuti Ngaziyakulinda ilembwe munzila zisiyene-siyene. Muchikozyano, bakali kulemba milaka iibili muNgaziyakulinda, chiChina achiAmis. Eezi twakazichitila kuti, kuti kwaba mibuzyo kubonekaanga twakali kuyiisya bantu chiChina. Kuzwa aachiindi eecho, mbunga yaJehova yakapupulula mabbuku achiAmis kuti  igwasye bantu baJehova kuti bayiye kasimpe kali muBbayibbele.—Mil. 10:34, 35.

Kwaminyaka myiingi, bakwesu biingi bachiAmis teebakali kupona kweendelana amalayilile aJehova pe. Akaambo kakuti teebakali kwaamvwisisisya kabotu pe malayilile aamuBbayibbele, bamwi bakwesu bakali kuchita bwaamu, kukolwa, kufwepa akunyeela musamu uukola uutegwa betel nut. Harvey wakaswaya mbungano zyiingi kali kweezya kugwasya bakwesu kuti babone kuti Bbayibbele liyiisyaanzi atala ankani eezi. Aali chimwi chiindi nitwakali kuswaya imwi mbungano, kwakachitika zintu nzindaamba kumasaangunino.

Bakwesu balibombya bakazumina kuchincha pesi zilawusisya kuti biingi babo bakakaka. MuTaiwan mwakali basikupupulula bayinda ku2 450, pesi kwaminyaka iili 20, bakacheya zyakusika kuma900. Eezi zyakatumana manguzu. Pesi twakalizi kuti Jehova uyanda kuti mbunga yakwe ikkale kayisalala. (2 Kor. 7:1) Mukuya kwachiindi, bakwesu bakali baabukomba Jehova munzila iilikabotu alubo Jehova wakayilongezya Taiwan nkaambo lino kuli basikupupulula bayinda ku 11 000.

Kuzwa kuma1980 kaziya kunembo, mbungano zyachiAmis zyakali zyasima mubukombi. Harvey wakali waabumaninsya chiindi chiingi kali ambungano zyaambuula chiChina. Harvey wakabotelwa kugwasya balumi babamwi bachizi kuti babe Bakamboni. Harvey wakandibuzya mbaakabotelwa chiindi umwi mwaalumi ngwaakagwasya kuti abe Kamboni naakakomba kuli Jehova kakusaanguna. Andime ndakabotelwa kugwasya bamwi banakazi bali aamyoyo iibombede kuti babe Bakamboni. Alubo ndakabotelwa kubeleka kumutabi wakuTaiwan kandili aamwi abana babantu mbindakayiya aabo Bbayibbele.

Mulumi wangu wakandisiya. Harvey wakafwa aabulwazi bwakkensa mu1 January 2010. Twakali twaba aaminyaka iisika ku59 katukwetene. Wakali waba aaminyaka iisika ku60 kali mumulimu wachiindi choonse. Ndilabotelwa kuti ndayeeya kumugwasya nkundakachita chiindi nitwakali kubeleka munyika zibili zibotu. Twakayiya milaka iibili miyumu yakuAsia alubo Harvey wakayiya kwiilemba yoonse.

Nikwakayinda minyaka miche, bamuKabunga Keendelezya bakasala kuti ndiye kuAustralia akaambo kakuti ndakali ndachembaala. Kwaamba choonzyo, teendakali kuyanda pe kweenda, pesi Harvey wakandiyiisya kuti tandeelede kukaka pe mulimu ngundapegwa ambunga yaJehova nkinkaako ndakeenda. Lino ndikubona kuti kwakali kabotu kuti ndibweede kuAustralia.

Lino ndibeleka kumutabi wakuAustralasia, kumamanino amviki nga ndilikukukambawuka ambungano njindinjilaayo. Ndilabotelwa kubelesya chiJapan achiChina chiindi ninditondeezya bantu mbiibede Bbeteli. Ndibulangilila aameso aasalala buzuba bwabubuke Jehova mbwaakasyomezya nkaambo ndilizi kuti Harvey wakayiya kutakaka mulimu ngwapegwa uzoobusigwa.—Joh. 5:28, 29.