CHIIYO 1
“Aabo Bayandaula Jehova Tabakabuli Cintu Cibotu Niciba Comwe”
LUGWALO LWAMUNYAKA WA2022: “Aabo bayandaula Jehova tabakabuli cintu cibotu niciba comwe.”—INT. 34:10.
LWIIMBO 4 “Jehova Mweembezi Wangu”
ZITAYIIGWE *
Davida wakabona kuti taakali kubula “cintu cibotu niciba comwe” nikuba muziindi ziyumu (Langa fuka 1-3) *
1. Nchiichili chiimo chiyumu Davida nchaakaswaana?
DAVIDA wakali kuchija akaambo kakuti wakali kuyanda kujayigwa aaSawulu mwaami walsrayeli wakali aanguzu. Chiindi Davida naakamaninwa aachakulya wakayinka kuNobbi kuti akakumbile zinkwa zili 5. (1 Sam. 21:1, 3) Mukuya kwachiindi, Davida abaalumi mbaakalaabo bakakuyuba mumpangala. (1 Sam. 22:1) Nkamboonzi Davida naakali muchiimo chili boobu?
2. Sawulu wakalibikka biyeni mumapenzi? (1 Samuele 23:16, 17)
2 Sawulu wakali kumuchitila bbivwe Davida akaambo kakuti Davida wakali kuyandwa aabantu biingi alubo wakali kuzunda munkondo. Sawulu wakalizi kuti kutaswiilila Jehova nkwaakachita kwakapa kuti amukake alubo eezi zyakapa kuti Jehova asale Davida kuti azoobe mwaami. (Bala 1 Samuele 23:16, 17.) Mbukunga aachiindi eecho Sawulu wakachili mwaami walsrayeli, wakali aamasoja miingi abantu biingi bakali kubbazu lyakwe. Eezi nzizyo zyakapa kuti Davida achije chiindi naakali kuyanda kumujaya. Sawulu wakali kubonaanga wakali kuyoozwidilila na kukachizya Jehova kuti abikke Davida kuba mwaami? (Is. 55:11) Bbayibbele talitubuzyi pe pesi choonzyo nchitulaacho nchakuti: Sawulu wakali kulibikka mumapenzi nkaambo bantu balwana aaLeza tabazwidilili pe.
3. Davida wakali kulimvwa biyeni nikuba kuti wakali mumapenzi?
3 Davida wakali kulibombya. Teenguwe pe wakalisala kuti abe mwaami walsrayeli pesi Jehova nguwe wakamusala. (1 Sam. 16:1, 12, 13) Sawulu wakasaanguna kumuzonda loko Davida. Pesi Davida taakwe naakasola Jehova pe akaambo kakuti wakali kuyanda kujayigwa, kubula chakulya akuti wakakukkala mumpangala. Kweelede kuti chiindi naakali mumpangala eelyo mpimpawo mpaakalemba lwiimbo lunoneezya luswaanizya majwi aali mulugwalo luzulwida chiiyo chesu aakuti: “Aabo bayandaula Jehova tabakabuli cintu cibotu niciba comwe.”—Int. 34:10.
4. Njiili mibuzyo njitutasandule alubo nkamboonzi niiyandikana?
4 Bakombi baJehova biingi mazubaano bali kubula chakulya azimwi zintu nzibayanda zyakumubili. * Eezi nzizyo zyalikuchitika ikapati kuzwa nikwakasaanguna bulwazi bwaCorona. Mbukunga “mapenzi mapati” abaafwiifwi, tulangilila kuyooswaanana aamapenzi miingi loko muchiindi chilikunembo. (Mt. 24:21) Katuchili aamuzeezo ooyu, atusandule mibuzyo iili 4 yakuti: Muunzilaanzi Davida mwakatali kubula “cintu cibotu niciba comwe”? Nkamboonzi nitweelede kukkutisikana azintu nzitulaazyo? Nkamboonzi nitukonzya kusyoma kuti Jehova unootulangania? Alubo ngatulalibambila biyeni kumapenzi ngitutakaswaane muchiindi chilikunembo?
“KUNYINA NCONDIYOOBULA PE”
5-6. Intembauzyo 23:1-6 itugwasya biyeni kumvwisisisya majwi aaDavida aakuti bakombi baLeza tabakabuli “cintu cibotu niciba comwe”?
5 Davida wakali kwaambaanzi chiindi naakaamba kuti bakombi baJehova “tabakabuli cintu cibotu niciba comwe”? Kulanga-langa majwi aakozyenie ngaakabelesya muli lntembauzyo 23, kulakonzya kutugwasya kumvwisisisya kuti wakali kwaambaanzi. (Bala Intembauzyo 23:1-6.) Muchaandaano eechi, Davida wakasaanguna aamajwi aakuti: “Jehova Mweembezi wangu. Kunyina ncondiyoobula pe.” Alubo muIntembauzyo eeyi yoonse, Davida wakaamba atala azintu ziyandikana ziswaanizya zilongezyo Jehova nzyaakamuchitila akaambo kakuti wakazumina kuti Jehova abe mweembezi wakwe. Jehova wakali kweenzya Davida “munzila zyabululami” alubo wakali kumugwasilizya muziindi zibotu amuziindi ziyumu. Alubo Davida wakalizi kuti kulazikwa aaJehova “mumacelelo aamweemvwe,” teekwakali kwaamba kuti tachiswaanani aamapenzi pe. Chimwi chiindi wakali kumana manguzu alubo kwakali mbuli kuti ulikweenda “mukkuti lisiya mbi” alubo bamwi bantu bakali kumuzonda. Pesi akaambo kakuti Jehova wakali mweembezi wakwe, Davida taakwe ‘cintu cibi nchaakali kuyoowa.’
6 Lino twayijana nsandulo yamubuzyo wakuti: Muunzilaanzi Davida mwaakatali kubula “cintu cibotu niciba comwe”? Davida wakali aazintu zyoonse ziyandikana kuti akonzye kukkala kali aabweenzinyina busimide aJehova. Kubotelwa kwakwe teekwakali kuzwa kuzintu zyakumubili pe. Wakali kukkutisikana azintu Jehova nzyaakali kumupa. Chintu chakali kuyandikana loko kulinguwe nkuti Leza wakali kumulongezya akuti wakali kumukwabilila.
7. Kweendelana alugwalo lwa Luka 21:20-24, maKristu bakusaanguna bakuJudiya bakaswaanana aabuyumu-yumu buli?
7 Majwi aaDavida atugwasya kubona kuti tatweelede kubona zintu zyakumubili kaziyandikana loko. Tulakonzya kubotelwa azintu zyoonse nzitulaazyo zyakumubili pesi tatweelede kuzibikka mubusena bwakusaanguna pe. Aaka nkikasimpe kayandikana nkibakazoomvwisisisya maKristu bakusaanguna bakuJudiya. (Bala Luka 21:20-24.) Jesu wakabachenjezya kuti muunzi waJerusalemu wakali ‘kuyoozyungulukwa aampi.’ Kuti eezi zyachitika, bakeelede kutalika ‘kuchijila kumalundu.’ Kuchita oobo kwakali kuyoopa kuti bafutuke alubo eezi zyaamba kuti bakali kuyoosiya zintu zyiingi. Imwi Ngaziyakulinda yakaamba kuti: “Bakasiya myuunda amaanda alubo taakwe zintu nzibakabweza pe kuzwa mumaanda aabo. Bakali aachoonzyo chakuti Jehova unoobagwasya akubakwabilila alubo kukomba Jehova bakakubikka mubusena bwakusaanguna.”
8. Twiiyaanzi kuzwa kuli zyakachitika kumaKristu bakusaanguna bakali kukkala kuJudiya?
8 Twiiyaanzi kuzwa kuli zyakachitika kumaKristu bakusaanguna bakali kukkala kuJudiya? Ngaziyakulinda yaambwa mufuka lyayinda yakaamba kuti: “Muchiindi chilikunembo, tuyooswaanana aamapenzi atakasunke nzila njituzibonaayo zintu zyakumubili. Tuyoozibona kaziyandikana loko na kwiinda zintu zyoonse naakuti tuyoobona kufutulwa kwabantu bali kulubazu lwaLeza kakuyandikana loko? Mamanino nayoosika, tuyooswaanana aabuyumu-yumu alubo kuyooyandikana kuti tulipede kusiya zimwi zintu. Tweelede kulipeda kuchita kufumbwa chiyandikana mbuli mbubakachita maKristu bakusaanguna bakuJudiya.” *
9. Malayilile mwaapostolo Pawulu ngaakabuzya maKristu bachiHebbrayo akugwasya biyeni?
9 Amuyeeyele kuti kwakali kuyumu biyeni kumaKristu aaba kuti basiye zintu zyoonse nzibakalaazyo akuti basaangune kupona buumi bupya. Bakeelede kusyoma kuti Jehova wakali kuyoobagwasya kuti bajane zintu ziyandikana. Pesi kwakali chimwi chakali kukonzya kubagwasya. Kakuchili minyakali iili 5 kuti maRoma bazyunguluke Jerusalemu, mwaapostolo Pawulu wakalembela maKristu bachiHebbrayo malayilile aagwasya loko. Wakati: “Ibukkale bwanu butabi bwakuyandisya mali pe, pele amukkutile azintu nzyomujisi lino. Nkaambo wakaamba kuti: ‘Ziyume zitete, tandikakusiyi pe alimwi tandikakulekelezyi pe.’ Kutegwa tube basicamba akwaamba kuti: ‘Jehova ngomugwasyi wangu; tandikooyoowa pe. Ino muntu inga wandityani?’” (Heb. 13:5, 6) Zilaantanganana kuti maKristu bakaswiilila malayilile aaPawulu kwakabawubila kupona aazintu ziche kundawu nkubakachijila. Bakali aachoonzyo chakuti Jehova wakali kuyoobapa zintu ziyandikana. Majwi aaPawulu atondeezya kuti andiswe tulakonzya kuba aachoonzyo chakuti Jehova ulatupa zintu ziyandikana.
‘TUNOOKKUTISIKANA AZINTU EEZI’
10. Niinzi nchaakatubuzya Pawulu chakamugwasya?
10 Pawulu wakazoolembela Timotewo malayilile aakozyenie alubo malayilile aayo alabeleka akulindiswe. Wakati: “Aboobo twanoojisi cakulya azisani, tunookkutila azintu eezyi.” (1 Tim. 6:8) Eezi zyaamba kuti tatweelede kulya chakulya chinona na, kujana aakukkala aalikabotu naakuti kuula zigogo zipya chiindi achiindi? Teenzizyo pe nzyaakali kwaamba Pawulu. Pawulu wakali kwaamba kuti tweelede kukkutisikana azintu nzitulaazyo zyakumubili. (Flp. 4:12) Eezi nzizyo zyakagwasya Pawulu. Chintu chiyandikana loko nkuba aabweenzuma bulikabotu aLeza kutali zintu zyakumubili nzitulaazyo.—Hab. 3:17, 18.
Malsrayeli taakwe chintu chili choonse nchibakabula kwaminyaka iili 40 njibakali munkanda. Andiswe tweelede kukkutisikana azintu nzitulaazyo lino (Langa fuka 11) *
11. Majwi Mozesi ngaakabuzya malsrayeli atuyiisyaanzi atala akukkutisikana?
11 Maboneno eesu atala azintu nzitubonaanga tweelede kubaazyo alakonzya kusiyana amaboneno aaJehova. Kakuli kwayinda minyaka iili 40 malsrayeli kabali munkanda, Mozesi wakababuzya kuti: “Jehova Leza wanu wamulongezya mumilimo yanu yoonse. Ulikuzyi kabotu kweenda nkomweenda munkanda eeyi iitalikomeneni. Jehova Leza wanu walaandinywe mumyaka yoonse eeyi iili 40 alimwi tiimwabula cintu cili coonse pe.” (Dt. 2:7) Muminyaka eeyo iili 40, Jehova wakali kubapa mana malsrayeli kuti balye. Alubo zigogo nzibakazaazyo kuzwa kuEgepita taakwe nizyakazakala pe. (Dt. 8:3, 4) Nikuba kuti bamwi malsrayeli bakali kukonzya kutakkutisikana azintu eezi pesi Mozesi wakababuzya kuti taakwe nchibakabula pe. Jehova ulabotelwa kuti twakkutisikana azintu ziniini nzyatupa alubo uyanda kuti tuzibone kazili chilongezyo chizwa kulinguwe akuti tumulumbe.
SYOMA JEHOVA KUTI ULAKULANGANIA
12. Niinzi zitondeezya kuti Davida taakali kusyoma luzibo ndwaakalaalo?
12 Davida wakalizi kuti Jehova ulasyomeka akuti ulaandaba abaabo bamuyanda. Davida naakalemba Intembauzyo 34, wakali mubuyumu-yumu pesi lusyomo lwakapa kuti abone mbuli kuti “mungelo wa Jehova” wakalimukwabilide “kumabazu oonse.” (Int. 34:7) Kulakonzeka kuti Davida wakali kukozyanisya mungelo waJehova amusooja wakali kulinda muunzi. Musooja ooyo wakalilibambilide kulwana basinkondonyina. Nikuba kuti Davida wakali kuzunda munkondo akuti Jehova wakali wamusyomezya kumubikka kuba mwaami pesi Davida taakasyoma luzibo ndwaakalaalo lwakubelesya nkwicho apanga kuti alwane aabasinkondonyina. (1 Sam. 16:13; 24:12) Wakasyoma Leza alubo wakali aachoonzyo chakuti mungelo waJehova ulabavuna “aabo bamuyoowa Leza.” Nikuba boobo, tatulangilili kuti Leza atukwabilile munzila yachigambyo pe mazubaano. Pesi tulizi kuti muntu woonse uusyoma muli Jehova takanyonyoonwi chakumaninina pe.
Muchiindi chamapenzi mapati, Gogo wakuMagogo uyooyezya kutulwana mumaanda eesu. Pesi tatweelede kuyoowa pe nkaambo Jesu abangelo banoozi zilikuchitika alubo bayootulwanina (Langa fuka 13)
13. Niinzi chiyoopa kuti tukabonekaanga tatukwabililidwe pe chiindi Gogo wakuMagogo nayootulwana pesi nkamboonzi nituteelede kuyoowa? (Langa chifanikisyo chili achivumbyo.)
13 Muchiindi chilikunembo, tuyooswaanana aamasunko ayoopa kuti kutuyumine kusyoma kuti Jehova uyootukwabilila. Chiindi Gogo wakuMagogo chaamba nkamu yazisi nayoobukila bakombi baLeza, tulakonzya kuyoobonaanga uyootujaya. Kuyooyandikana kuti tukabe aalusyomo lwakuti Jehova uyootufutula. Zisi ziyootubona mbuli mbelele zitakwabililidwe. (Ezk. 38:10-12) Tunooli katutakwe zilwanisyo aluzibo lwazyankondo. Nkinkaako, basinkondoma bayoobonaanga kutulwana mbulimo bwakuseeni. Akaambo kakuti tabakwe lusyomo bayookachilwa kuziba kuti bangelo baJehova banooli kabalibambilide kutulwanina pesi iswe tunoozi nkaambo tulaalusyomo. Bayoogamba nibayoobona bangelo kabali kutulwanina.—Ciy. 19:11, 14, 15.
LIBAMBILE LINO KUZINTU ZIYOOCHITIKA KUNEMBO
14. Niinzi nzitukonzya kuchita lino kuti tulibambile kuzintu ziyoochitika kunembo?
14 Kujana twalibambila biyeni kuzintu ziyoochitika kunembo? Chakusaanguna, tweelede kuba aamaboneno aalikabotu atala azintu zyakumubili nkaambo limwi zuba kuyooyandikana kuti tukazisiye zintu eezyo. Alubo chimwi, tweelede kukkutisikana azintu nzitulaazyo alubo tubotelwe akaambo kakuti tuli aabweenzuma busimide aJehova. Kuti twayungizya luzibo lwesu atala aLeza, tuyooba aachoonzyo chakuti uyootukwabilila chiindi Gogo wakuMagogo nayootulwana.
15. Niinzi nzyaakaswaana Davida zyakapa kuti abe aachoonzyo chakuti Jehova taakali kuyoomulekelezya pe?
15 Atubone chimwi chakagwasya Davida chikonzya kutugwasya andiswe kuti tukonzye kulibambila kumapenzi ngituyooswaana. Davida wakati: “Amulabile mubone kuti Jehova mubotu; ulikkomene muntu uuyubila mulinguwe.” (Int. 34:8) Majwi aaya atondeezya chintu chakali kupa kuti Davida asyome kuti Jehova wakali kuyoomugwasya. Davida wakali kukkala kasyoma Jehova alubo Jehova taakwe naakamulekelezya pe. Chiindi Davida naakachili muniini, wakayinka kuyoolwana aamuFilisti uuyoosya alubo ulaanguzu uutegwa Goliyati mpawo wakamubuzya kuti: “Sunu Jehova ulakwaaba mumaanza aangu.” (1 Sam. 17:46) Mukuya kwachiindi, Davida wakabelekela mwaami Sawulu alubo Sawulu wakeezya kuyanda kumujaya kwaziindi zyiingi. Pesi “Jehova wakali” aaDavida. (1 Sam. 18:12) Akaambo kakuti Davida wakabona Jehova mbaakamugwasya, wakali aachoonzyo chakuti unoomugwasya kufumbwa mapenzi ngaswaana.
16. Muuzyiimo zili mutukonzya ‘kulabila’ bubotu bwaJehova?
16 Kuti twakkala katusyoma Jehova kuti ulatuzulwida lino, ziyootugwasya kuti tube aachoonzyo chakuti uyootugwasya muchiindi chilikunembo. Ziyanda kuti tusyome Jehova kuchitila kuti tukonzye kukumbila mazuba kumulimu kuchitila kuti tukonzye kunjila muswaangano wabbazu naakuti wabbooma. Alubo ziyanda lusyomo kuti tukonzye kukumbila kubeleka mazuba mache naakuti ma-awa mache kumulimu kuchitila kuti tujane chiindi chakunjila miswaangano yoonse yambungano akujana chiindi chiingi chakuya mumulimu wakukambawuka. Pesi atuteedi muntu ngubelekela wakukakila alubo wamaninwa mulimu, ulaalusyomo na lwakuti ziyume zitete Jehova takakusiyi pe akuti uyookupa zintu zyoonse ziyandikana? (Heb. 13:5) Bantu biingi bali mumulimu wachiindi choonse bali aazyakuluula zitondeezya Jehova mbaakabagwasya chiindi nibakali kuyanda lugwasyo. Nisimpe, Jehova ulasyomeka.
17. Nduululi lugwalo lwamunyaka wa2022 alubo nkamboonzi nilweelela?
17 Taakwe kaambo pe kapa kuti tuyoowe zintu ziyoochitika kunembo nkaambo Jehova ulikubbazu lyesu. Ziyume zitete, Leza wesu takatulekelezyi pe kuti twakkala katubikka Bwaami mubusena bwakusaanguna. BamuKabunga Keendelezya bakasala lugwalo lwa Intembauzyo 34:10 kuti lube ndulo lugwalo lwamunyaka wa2022, lwaamba kuti: “Aabo bayandaula Jehova tabakabuli cintu cibotu niciba comwe.” Bakasala lugwalo oolu kuchitila kuti batuyeezye kuti tweelede kulibambila lino kumapenzi ngituyooswaana kunembo akuti tusyome kuti Jehova takatulekelezyi pe.
LWIIMBO 38 Uyoomuyumya
^ par 5 Lugwalo lwamunyaka wa2022 luzwa muli Intembauzyo 34:10. Lugwalo oolu lwaamba kuti: “Aabo bayandaula Jehova tabakabuli cintu cibotu niciba comwe.” Bakombi baJehova biingi bali aazintu ziche zyakumubili. Pesi nkamboonzi nitukonzya kwaamba kuti tababuli “cintu cibotu niciba comwe”? Kumvwisisisya nzilwaamba lugwalo oolu, nga kulatugwasya biyeni kuti tulibambile kumapenzi ngituyooswaana muchiindi chilikunembo?
^ par 4 Langa “Mibuzyo Yabasikubala” kuzwa muNgazi Yamulindizi yamuSeptember 15, 2014.
