1-2. (a) Ndiilili nitumuyeeya loko bbululu wesu wakafwa? (b) Jesu wakachitaanzi mubusiku bwamamanino katanafwa?

TATUBALUBI pe babbululu besu bakafwa nikuba kuti baba aachiindi chilamfu kabafwide. Chiindi chiingi ngatwabayeeya kuti bwasika buzuba mbubakafwa.

² Munyaka amunyaka, mamiliyoni aabantu ngababunganaamwi kuti bayeeye lufu lwawumwi muntu ngubayanda loko, Jesu Kristu. (1 Pet. 1:8) Ngatwabungana kuti tuyeeye lufu lwakwe nkaambo wakapa buumi bwakwe kuti atununune kuzwa kuchibi alufu. (Mt. 20:28) Jesu wakali kuyanda kuti batobeli bakwe bakkale kabayeeya lufu lwakwe. Nkinkaako, mubusiku bamamanino katanafwa wakachita chilalilo chagoko chiyandikana alubo wakalayilila kuti: “Kamucita oobu lyoonse kutegwa kamundiyeeya.”​—Lk. 22:19.

3. Tulalanga-langaanzi muchiiyo eechi?

³ Aakati kabantu banjila Chiyubulusyo chaLufu lwaKristu, kuli bantu bache biyo bali aabulangilizi bwakuyoopona kujulu. Pesi biingi bali aabulangilizi bwakupona aanyika. Muchiiyo eechi, tulabona kuti niinzi chipa kuti boonse babe aachiyandisyo chakunjila Chiyubulusyo munyaka amunyaka. Alubo tulabona kuti tugwasigwa biyeni kuti twachinjila. Atusaangune kubona twaambo tupa kuti maKristu bananikidwe banjile Chiyubulusyo.

4. Nkamboonzi maKristu bananikidwe nibalya chinkwa akunywa wayini kuChiyubulusyo?

⁴ Munyaka amunyaka, maKristu bananikidwe balalya chinkwa akunywa wayini kuChiyubulusyo. Nkamboonzi nikweelela kuti balye chinkwa akunywa wayini? Kuti tusandule mubuzyo ooyo, atulange zyakachitika mubusiku bwamamanino Jesu katanafwa. Nibakamana kulya Pasika, Jesu wakatalisya Chilalilo chaMwaami Chagoko. Wakapa baapostolo bakwe bali 11 basyomeka chinkwa awayini mpawo wakababuzya kuti balye akunywa. Alubo Jesu wakababuzya atala azizuminano zibili ziswaanizya chizuminano chipya achizuminano chaBwaami. * (Lk. 22:19, 20, 28-30) Zizuminano eezyo zyakajula mweenya wakuti baapostolo bakwe abamwi bantu bache babe aabulangilizi bwakuyooba baami abapayizi kujulu. (Ciy. 5:10; 14:1) MaKristu bananikidwe bali muzizuminano eezi zibili mbabo luzutu bakonzya kulya chinkwa akunywa wayini kuChiyubulusyo.

5. Niinzi nzibazi maKristu bananikidwe atala abulangilizi bwabo bwakuyoopona kujulu?

⁵ Kamwi kaambo kapa kuti maKristu bananikidwe banjile Chiyubulusyo nkakuti kunjila Chiyubulusyo kubapa mweenya wakuti bayeeyesesye atala abulangilizi bwabo. Jehova wakabapa bulangilizi bubotu bwakuyoopona kujulu kabali amibili iitafwi alubo iitabooli, kababelekaamwi aJesu Kristu abamwi bali 144 000. Alubo kwiinda zyoonse, bayoomubona Jehova Leza. (1 Kor. 15:51-53; 1 Joh. 3:2) MaKristu bananikidwe balizi kuti bayoojana zilongezyo eezi kujulu pesi kuti bakonzye kwiinka kujulu, beelede kuzumanana kusyomeka kusikila kulufu. (2 Tim. 4:7, 8) Eezi zipa kuti babotelwe kuyeeyesesya atala abulangilizi bwakuyoopona kujulu. (Tit. 2:13) Ani kutegwani atala ‘abambelele zimbi?’ (Joh. 10:16) Nkamboonzi nibanjila Chiyubulusyo?

6. Nkamboonzi bambelele zimbi nibanjila Chiyubulusyo munyaka amunyaka?

⁶ Bambelele zimbi tabalyi pe chinkwa akunywa wayini kuChiyubulusyo pesi balabotelwa kubawo. Mu1938, kakali kakusaanguna kuti aabo bali aabulangilizi bwakupona aanyika batambwe kunjila Chiyubulusyo. Ngaziyakulinda yamuMarch 1, 1938 yakaamba kuti: “Kulikabotu kuti bambelele zimbi babewo kuChiyubulusyo akuti babone zinga zilikuchitika. . . . Nchiindi chakuti ambabo babotelwe.” Mbukunga bantu banga batambwa kumuchado balabotelwa kubawo aamuchado, mbukubede abambelele zimbi, balabotelwa kubawo kuChiyubulusyo.

7. Nkamboonzi bambelele zimbi nibayilangilila aameso aasalala nkani yaChiyubulusyo?

⁷ Bambelele zimbi ambabo ngabajana mweenya wakuyeeyesesya atala abulangilizi bwabo. Bayilangilila aameso aasalala nkani yaChiyubulusyo nkaambo nga ilikwaambuula atala azintu Kristu abali 144 000 nzibatakachitile bantu basyomeka muminyaka iili 1 000. Kabazulwidwa aaMwaami Jesu Kristu, aabo bayooyendelezya kujulu bayoochincha nyika kuti ibe paradayizi akupa kuti bantu baswiilila bakabe bantu bamaninide. Mamiliyoni aabantu bayinka kuChiyubulusyo balabotelwa kuyeeyesesya atala abupulofita bwamuBbayibbele buyoozuzikizigwa muchiindi  chilikunembo mbuli bujanika muli Isaya 35:5, 6; 65:21-23; amuli Ciyubunuzyo 21:3, 4. Kulibona kabali munyika mpya ababbululu babo, kubagwasya kuti babe aachoonzyo atala abulangilizi bwabuumi bwakunembo akuti bazumanane kubelekela Jehova.​—Mt. 24:13; Gal. 6:9.

8. Nkaakali kamwi kaambo kapa kuti bambelele zimbi banjile Chiyubulusyo?

⁸ Kamwi kaambo kapa kuti bambelele zimbi banjile Chiyubulusyo nkakuti balabayanda maKristu bananikidwe akuti bayanda kubagwasilizya. Jwi lyaLeza lyakaamba kuti maKristu bananikidwe abaabo bali aabulangilizi bwakupona aanyika bayoobelekelaamwi. Biyeni? Atulange-lange zikozyano ziche.

9. Kweendelana alugwalo lwa Zekariya 8:23, bambelele zimbi balimvwa biyeni atala amaKristu bananikidwe?

⁹ Bala Zekariya 8:23. Bupolofita oobu butugwasya kubona kuti bambelele zimbi balimvwa biyeni atala amaKristu bananikidwe. Mabala aakuti “mu Juda” akuti ‘andinywe’ aamba kabunga kamaKristu bananikidwe bachili aanyika. (Rom. 2:28, 29) “Bantu bali kkumi bazwa mumyaambo yoonse yamasi” bayiminina bambelele zimbi. ‘Bajatisya cikobela camu Juda’ kwiinda mukukakatila kumaKristu bananikidwe akuliswaanizya aambabo mubukombi busalala. Nkinkaako, bambelele zimbi batondeezya kuti balakakatila kumaKristu bananikidwe kwiinda mukubawo kuChiyubulusyo.

10. Niinzi nzyaakachita Jehova kuti azuzikizye bupolofita buli muli Ezekieli 37:15-19, 24, 25?

¹⁰ Bala Ezekieli 37:15-19, 24, 25. Jehova wakazuzikizya bupolofita oobu kwiinda mukupa kuti bambelele zimbi amaKristu bananikidwe bajatane. Bupulofita oobu bwaambuula atala atusamu tubili. Aabo bali aabulangilizi bwakuyoopona kujulu bali mbuli kasamu “ka Juda” (musyobo oomo mwakali kuzwa baami bachiIsrayeli) alubo aabo bali aabulangilizi bwakupona aanyika bali mbuli kasamu “ka Efraimu.” * Jehova wakajatanizya tubunga ootu tubili kuti tube “kasamu komwe buyo.” Eezi zyaamba kuti babelekelaamwi kabajisini kabazulwidwa aaMwaami, Kristu Jesu. Munyaka amunyaka, bambelele zimbi amaKristu bananikidwe banjilaamwi Chiyubulusyo kabali “tanga lyomwe” alubo kabazulwidwa “amweembezi omwe” kutali kunjila kabali tubunga tubili tusiyene.​—Joh. 10:16.

11. “Mbelele” zyaambidwe muli Matayo 25:31-36, 40, zibagwasilizya biyeni maKristu bananikidwe?

¹¹ Bala Matayo 25:31-36, 40. “Mbelele” eezi zyakaambwa aaJesu zyiiminina bantu baluleme balikupona muchiindi eechino chamamanino alubo bali aabulangilizi bwakupona aanyika. Babeleka changuzu kuti bagwasilizye maKristu bananikidwe bachili aanyika kuti bazuzikizye mulimu uuyandikana uuchitwa munyika yoonse wakukambawuka awakugwasya bantu kuti babe basikwiiya.​—Mt. 24:14; 28:19, 20.

12-13. Nziizili zimwi nzila bambelele zimbi mubagwasilizya maKristu bananikidwe?

¹² Munyaka amunyaka, kakuli kwasyaala mviki ziche kuti kube Chiyubulusyo, bambelele zimbi batondeezya kuti balabagwasilizya maKristu bananikidwe kwiinda mukubeleka changuzu mubbelekelaamwi lyakutamba bantu kuti bazoonjile Chiyubulusyo. (Langa kabbokesi kati “ Niinzi Nzukonzya Kuchita Nichasika Chiyubulusyo Anichamana?”)  Alubo bachita zyoonse nzibakonzya kuti Chiyubulusyo chichitwe mumbungano zili munyika yoonse nikuba kuti mumbungano zyiingi ngatamukwe maKristu bananikidwe pe. Bambelele zimbi balabotelwa kugwasilizya maKristu bananikidwe munzila eezi. Balizi kuti Jesu ubona zintu nzibachitila maKristu bananikidwe mbuli kuti bazichitila nguwe.​—Mt. 25:37-40.

¹³ Lino atubone tumwi twaambo tupa kuti toonse tunjile Chiyubulusyo kazitakwe ndaba kuti tuli aabulangilizi bwakuyoopona kujulu na naakuti aanyika.

14. Jehova aJesu bakatondeezya biyeni kuti balatuyanda?

¹⁴ Tuyanda kutondeezya kuti tulamulumba Jehova aJesu akaambo kaluyando ndubakatutondeezya. Jehova ututondeezya luyando munzila zyiingi pesi nzila mpati njakatondeezyaayo kuti ulatuyanda nkwiinda mukutuma Mwanaakwe ngwayandisya kuti azoopenzegwe akutufwida. (Joh. 3:16) Alubo Jesu wakatondeezya luyando lwakwe lupati kwiinda mukulipeda kupa buumi bakwe akaambo kandiswe. (Joh. 15:13) Tatukonzyi pe kubbadala Jehova aJesu akaambo kaluyando ndubakatutondeezya. Pesi tulakonzya kutondeezya kuti tulabalumba kwiinda munzila njituponaayo buzuba abuzuba. (Kol. 3:15) Alubo tunjila Chiyubulusyo kuchitila kuti tuyeeye luyando ndubakatutondeezya akuti andiswe tutondeezye kuti tulabayanda.

15. Nkamboonzi maKristu bananikidwe abambelele zimbi nibachilumba chinunuzyo?

¹⁵ Tuyanda kutondeezya kuti tulachilumba chinunuzyo. (Mt. 20:28) MaKristu bananikidwe bachibona kachiyandikana chinunuzyo nkaambo nchicho chipa kuti babe aabulangilizi bwakuyoopona kujulu. Akaambo kakuti basyoma muchinunuzyo chaKristu, Jehova wakabaamba kuti baliluleme alubo wakabasala kuti babe bana bakwe. (Rom. 5:1; 8:15-17, 23) Bambelele zimbi ambabo balachilumba chinunuzyo. Akaambo kakuti basyoma muchinunuzyo chaKristu, bali aabweenzinyina bulikabotu aLeza, balakonzya kumubelekela mulimu uusalala alubo bali aabulangilizi bwakuyoozwa “mumapenzi mapati.” (Ciy. 7:13-15) Imwi nzila maKristu bananikidwe abambelele zimbi njibakonzya kutondeezyaayo kuti balachilumba chinunuzyo nkwiinda mukunjila Chiyubulusyo munyaka amunyaka.

16. Nkaakali kamwi kaambo kapa kuti tunjile Chiyubulusyo?

¹⁶ Kamwi kaambo kapa kuti tunjile Chiyubulusyo nkakuti tuyanda kutondeezya kuti tulamuswiilila Jesu. Kazitakwe ndaba kuti tulaabulangilizi bwakuyoopona kuli, umwi awumwi wesu weelede kuswiilila mulawu ngwakaamba Jesu mubusiku naakatalisya Chiyubulusyo. Wakati: “Kamucita oobu lyoonse kutegwa kamundiyeeya.”​—1 Kor. 11:23, 24.

17. Chiyubulusyo chitugwasya biyeni kuti tuswene aafwiifwi aJehova?

¹⁷ Kupa kuti tuswene aafwiifwi aJehova. (Jak. 4:8) Mbuli mbutwayiya, Chiyubulusyo chitupa mweenya wakuti tuyeeyesesye atala abulangilizi Jehova mbwakatupa aluyando ndwakatutondeezya. (Jer. 29:11; 1 Joh. 4:8-10) Kuyeeyesesya atala abulangilizi bwakunembo aluyando lwaLeza lutamani ndwakatutondeezya kupa kuti tumuyande loko  Jehova akuti tusimye bweenzuma mbutulaabo anguwe.​—Rom. 8:38, 39.

18. Kuyeeyesesya atala achikozyano chaJesu kupa kuti tuchiteenzi?

¹⁸ Kupa kuti tuyande kutobelezya chikozyano chaJesu. (1 Pet. 2:21) Kuti Chiyubulusyo chaba aafwiifwi, ngatwabala makani aamuBbayibbele aali atala anzyaakachita Jesu mumviki yakwe yamamanino, lufu lwakwe akubusigwa kwakwe. Mpawo nkani iipegwa kuChiyubulusyo goko ituyeezya atala aluyando ndwakatutondeezya Jesu. (Ef. 5:2; 1 Joh. 3:16) Kubala akuyeeyesesya atala akulipeda nkwaakachita kupa kuti tuyande “kuzumanana kweenda mbubonya mbwaakeenda walo.”​—1 Joh. 2:6.

19. Niinzi nzitweelede kuchita kuti tukkale katuli muluyando lwaLeza?

¹⁹ Kupa kuti tulipede kuzumanana kuba muluyando lwaLeza. (Jud. 20, 21) Tulakonzya kukkala katuli muluyando lwaLeza kwiinda mukumuswiilila, kusalazya zina lyakwe akuchita zintu zipa kuti abotelwe. (Tus. 27:11; Mt. 6:9; 1 Joh. 5:3) Kubawo kuChiyubulusyo kupa kuti tulipede kupona munzila iitondeezya kuti tuyanda kukkala katuli muluyando lwaLeza kukabe kutamani buzuba abuzuba.

20. Amba twaambo tubotu tupa kuti tunjile Chiyubulusyo.

²⁰ Kuli twaambo tubotu tupa kuti tunjile Chiyubulusyo kazitakwe ndaba kuti tuli aabulangilizi bwakuyoopona kujulu na naakuti aanyika. Chiindi nitubunganaamwi munyaka amunyaka mubuzuba bwaChiyubulusyo, ngatuli kuyeeya lufu lwawumwi muntu ngutuyanda loko, Jesu Kristu. Kwiinda zyoonse, ngatuli kuyeeya luyando lupati ndwakatutondeezya Jehova kwiinda mukutupa Mwanaakwe kuti abe chinunuzyo. Munyaka uuno, Chiyubulusyo chizoochitwa goko muli Bwasanu 15 April 2022. Tulamuyanda Jehova aMwanaakwe. Nkinkaako, tukubona kakuyandikana loko kuti tubewo kuChiyubulusyo kuchitila kuti tuyeeye lufu lwaJesu.