1-3. Nziizili zyiimo zipa kuti bakombi baJehova balile?

WAKACHINKA lili kulila? Chimwi chiindi tulalila akaambo kakuti ngatwabotelwa loko. Pesi chiindi chiingi, tulalila kuti kakuli chintu chilikutukataazya mumoyo. Muchikozyano, tulalila kuti twafwidwa aamuntu ngutuyanda. Muchizi Lorilei uukkala kuUnited States wakaamba kuti: “Chimwi chiindi ndakali kumvwa kuchisa loko akaambo kakufwidwa aamwanaangu zyakuti ndakali kubonaanga taakwe chintu chikonzya kunduumbulizya. Aaziindi eezyo, ndakali kubonaanga tandikookonzya pe kuzumanana kupona nkaambo ndakali kumvwa kuchisa.” *

² Kuli zimwi zintu zikonzya kupa kuti tulile. Muchizi Hiromi uubeleka kali payona kuJapan wakaamba kuti: “Chimwi chiindi ngandamana manguzu akaambo kakuti bantu mbindikambawukila tabatondeezyi chiyandisyo pe. Ngandakomba kuli Jehova kandilila, kandimukumbila kuti andigwasye kujana muntu uuyanda kasimpe.”

³ Ngawalimvwa mbuli mbubalimvwa na bachizi aaba? Biingi besu ngatwalimvwa munzila iikozyenie. (1 Pet. 5:9) Tuyanda ‘kubelekela Jehova cakukondwa’ pesi ngatwamubelekela katulila akaambo kakufidwa, kumana manguzu naakuti akaambo kazyiimo zipa kuti kutuyumine kuti tukkale katusyomeka kuli Leza. (Int. 6:6; 100:2) Niinzi nzitweelede kuchita kuti twalimvwa munzila iili boobu?

4. Tulalanga-langaanzi muchiiyo eechi?

⁴ Tulakonzya kujana zyiiyo kuzwa kuchikozyano chaJesu. Aali zimwi ziindi, Jesu wakaswaanana aazyiimo zyakali kumukataazya loko zyakapa kuti ‘imweende misozi.’ (Joh. 11: 35; Lk. 19:41; 22:44; Heb. 5:7) Atulange-lange zyiimo eezyo azyiiyo nzitujana. Alubo tulabona nzitukonzya kuchita kuti twaswaanana aazyiimo zipa kuti tulile.

5. Lwaano luli muli Johane 11:32-36, lutuyiisyaanzi atala aJesu?

⁵ Muchiindi champeyo mu32 C.E., mweenzinyina waJesu, Lazaro wakachiswa mpawo wakazoofwa. (Joh. 11:3, 14) Lazaro wakali aabachizi babili, Mariya aMarta alubo Jesu wakali kwiiyanda loko mpuli eeyi. Bachizi baLazaro bakaliwuside akaambo kakuti munyandumi wabo wakali wafwa. Lazaro kali wafwa, Jesu wakayinka kuBbetaniya ooko kwakali kukkala Mariya aMarta. Chiindi Marta naakamvwa kuti Jesu wakali kuza, wakayinka kuti akaswaananaawe. Amuyeeyele Marta mbaakali kumvwa kuchisa chiindi naakabuzya Jesu kuti: “Mwami, ikuti nookaliko kuno, mukwesu naatakafwa.” (Joh. 11:21) Nikwakayinda kayindi, Jesu naakazoobona Mariya abamwi bakali kulila, “yakamweenda misozi.”​—Bala Johane 11:32-36.

6. Nkamboonzi Jesu naakalila?

⁶ Nkamboonzi Jesu naakalila chiindi mweenzinyina naakafwa? Bbuku litegwa Insight on the Scriptures lyaamba kuti: “Kufwa kwaLazaro akubona bachizi baLazaro kabawuside kwakapa kuti Jesu ‘anyongane kapati mumoyo akuti alile.’” * Kulakonzeka kuti Jesu wakali kuyeeya atala akuchisa nkwaakali kumvwa mweenzinyina chiindi naakali kuchiswa alubo kulakonzeka kuti wakayeeya atala ambaakali kulimvwa Lazaro chiindi naakabona kuti waba aafwiifwi kufwa. Alubo Jesu wakalila naakabona Mariya aMarta mbubakalimvwa akaambo kakufwidwa aamunyandumi wabo. Kuti kuli wakafwidwa aamweenzinyokwe naakuti umwi wamumpuli, kweelede kuti wakalimvwa munzila iikozyenie. Atubone zyiiyo zitatu nzitukonzya kwiiya kuzwa kuli zyakachitika eezi.

7. Kulila nkwaakachita Jesu kutuyiisyaanzi atala aJehova?

 ⁷ Jehova ulamvwisisisya mbulimvwa. Jesu ‘ncikozyanyo cini-cini citondezya mbwabede’ Wisi. (Heb. 1:3) Chiindi Jesu naakalila, wakatondeezya mbalimvwa Wisi. (Joh. 14:9) Kuti kuli wakafwidwa aamuntu nguyanda, baachoonzyo chakuti Jehova ulakubona kuchisa nkulikumvwa akuti ulamvwisisisya mbulimvwa. Uyanda kukuponia kukuchisa nkulikumvwa mumoyo.​—Int. 34:18; 147:3.

8. Nkamboonzi nitweelede kuba aachoonzyo chakuti Jesu uyoobabusya babbululu besu bakafwa?

⁸ Jesu uli aachiyandisyo chakubusya babbululu besu bakafwa. Jesu katanalila, wakabuzya Marta kuti: “Imunyoko ulabuka.” Marta wakamusyoma Jesu. (Joh. 11:23-27) Akaambo kakuti Marta wakali mukombi waJehova, wakalizi kuti mupolofita Eliya aElisha bakabusya bantu bafwide. (1 Bam. 17:17-24; 2 Bam. 4:32-37) Alubo kweelede kuti wakali wamvwa atala abantu mbaakali wabusya Jesu. (Lk. 7:11-15; 8:41, 42, 49-56) Andiswe tulakonzya kuba aachoonzyo chakuti tuyoobabona lubo babbululu besu bafwide. Kulila nkwaakachita Jesu chiindi naakali kuumbulizya beenzinyina kutondeezya kuti ulaachiyandisyo chakubusya bafwide.

9. Ngatulabagwasya biyeni bantu bakafwidwa aababbululu babo mbuli mbaakachita Jesu? Amba chikozyano.

⁹ Tulakonzya kugwasya aabo bakafwidwa aababbululu babo. Jesu wakalilaamwi aaMarta aMariya alubo wakali kubaswiilila akubawumbulizya. Andiswe tulakonzya kuchita oobo kubantu bakafwidwa. Mwaalu uutegwa Dan uukkala kuAustralia wakaamba kuti: “Chiindi nindakafwidwa aamwanakazi wangu, ndakali kuyanda kugwasigwa. Bakwesu biingi abanakazi babo bakali kundiswiilizya chiindi nindakali kwaamba mbundilimvwa. Ndakali kulila kunembo lyabo alubo taakwe nibakali kuba aabweeme akaambo kakulila kwangu. Bakali kundigwasya aazintu zisiyene-siyene mbuli kundisanzizya moota, kunduulila zintu akundijikila chiindi nindakatali kukonzya pe kuchita milimu eeyi. Alubo bakali kukomba aandime chiindi chiingi. Bakatondeezya kuti mbeenzuma baachoonzyo ‘bakazyalilwa kuti bandigwasye muziindi zyamapenzi.’”​—Tus. 17:17.

10. Pandulula zyakachitika zilembedwe muli Luka 19:36-40.

¹⁰ MuNisani 9, 33 C.E., Jesu wakanjila mumuunzi waJerusalemu. Pesi kanatanjila, bantu bakabungana alubo bakasaanguna kuyala zisani mumugwagwa kunembo lyakwe kabatondeezya kuti bakali kuzumina kuti Mwaami wabo. Eechi chakali chiindi chibotezya loko. (Bala Luka 19:36-40.) Nkinkaako, kweelede kuti zyakazootobela teebakali kuzilangilila pe basikwiiya bakwe. Niinzi zyakachitika? “Naakasika munsi-munsi, [Jesu] wakalila naakaubona munzi.” Jesu naakali kulila, wakaamba atala azintu zitali kabotu zyakali kuyoochitikila bantu bamuJerusalemu.​—Lk. 19:41-44.

11. Nkamboonzi Jesu naakalila akaambo kabantu bakali kukkala muJerusalemu?

¹¹ Nikuba kuti Jesu wakatambulwa kabotu pesi zyakamuchisa kuti maJuda biingi bakali batondeezya kuti teebakali kuyoowuswiilila pe mulumbe waBwaami. Nzibakachita maJuda, zyakali kuyoopa kuti Jerusalemu inyonyoonwe. Aabo bakali kuyoofutuka bakali kuyootolwa mubuzike. (Lk. 21:20-24) Zilawusisya kuti bantu biingi bakamukaka Jesu mbuli mbaakaambide. Bantu bawubona biyeni mulumbe waBwaami kundawu nkukkala? Kuti  kakuli mbache bawutambula, niinzi nzukonzya kwiiya kuzwa kumisozi yaJesu? Atubone zimwi zyiiyo zitatu.

12. Kulila nkwaakachita Jesu akaambo kabantu mbaakali kukambawukila kutuyiisyaanzi atala aJehova?

¹² Jehova ulaandaba abantu. Kulila nkwaakachita Jesu kutondeezya kuti Jehova ubayanda loko bantu nkaambo “tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2 Pet. 3:9) Mazubaano, tutondeezya kuti tulabayanda bantu kwiinda mukuchita zyoonse nzitukonzya kuti tubakambawukile makani mabotu.​—Mt. 22:39.

13-14. Jesu wakatondeezya biyeni kuti ulabeetelela bantu alubo ngatulabutondeezya biyeni buntu oobu?

¹³ Jesu wakabeleka changuzu mumulimu wakukambawuka. Wakatondeezya kuti ulabayanda bantu kwiinda mukubelesya myeenya yoonse kuti abakambawukile. (Lk. 19:47, 48) Niinzi chakali kupa kuti achite oobo? Wakali kubeetelela. Aali zimwi ziindi, bantu biingi bakali kuyanda kuyiisigwa aaJesu zyakuti Jesu abasikwiiya bakwe bakakachilwa kulya. (Mk. 3:20) Umwi mwaalumi naakali kuyanda kwaambuula aaJesu mansiku, Jesu wakalipeda kwaambuulaawe. (Joh. 3:1, 2) Bantu biingi bakali kumvwa Jesu kayiisya teebakaba basikwiiya bakwe pe pesi chiliwo nchakuti bakawumvwa mulumbe ngwaakali kukambawuka. Mazubaano, tuyanda kukambawukila bantu boonse makani mabotu. (Mil. 10:42) Kuti tukonzye kuchita oobo, tweelede kuchincha-chincha chiindi nchitukambawukaacho.

¹⁴ Lipede kuchincha-chincha chiindi nchukambawukaacho. Kuti twaleka kuchincha-chincha chiindi nchitukambawukaacho, tulakonzya kutajana bantu bali aachiyandisyo chakuswiilila makani mabotu. Muchizi uupayona uutegwa Matilda wakaamba kuti: “Ime amulumaangu, ngatweezya kukambawukila bantu aaziindi zisiyene-siyene. Kuseeni, ngatwakambawukila kundawu zyamabbizinesi. Sikati, ngatwakambawuka katubelesya kangolo nkaambo bantu biingi ngabasaanguna kweenda mumigwagwa. Mpawo goko, ngatwakambawuka aang’anda ang’anda.” Tatweelede kukambawuka chiindi cheendelana aazyiimo zyesu luzutu pesi tweelede kuchincha-chincha kuchitila kuti tukonzye kukambawukila  bantu chiindi nibajanika. Kuchita oobo, kupa kuti Jehova abotelwe.

15. Kweendelana alugwalo lwa Luka 22:39-44, niinzi zyakachitika mubusiku bwamamanino Jesu katanajayigwa?

¹⁵ Kalili lyaba goko muNisani 14, 33 C.E., Jesu wakayinka kumuunda waGetsemane. Kali nkukooko, wakakomba kuli Jehova kamubuzya zyakali aansi aamoyo wakwe. (Bala Luka 22:39-44.) Aachiindi eecho, Jesu “wakapaila mipailo yakukombelezya . . . kacita boobo cakulila kapati akuzwa misozi.” (Heb. 5:7) Jesu wakali kukombelaanzi aachiindi eecho? Wakali kukombela kuti Jehova amupe nguzu zyakuti akkale kasyomeka kulinguwe akuti achite kuyanda kwakwe. Jehova wakayimvwa nkombyo yaMwanaakwe alubo wakatuma mungelo kuti akamusimye.

16. Nkamboonzi Jesu naakakataazikene chiindi naakali kukomba mumuunda waGetsemane?

¹⁶ Kweelede kuti Jesu wakali kulila chiindi naakali kukomba mumuunda waGetsemane nkaambo wakalikataazikene akaambo kakuti bantu bakali kumwaamba kuti ulikusampawula zina lyaLeza. Wakalizi mbukuyandikana kuti akkale kasyomeka akuti asalazye zina lyaWisi. Kuti kuli kuswaanana aachiimo chipa kuti kukuyumine kukkala kusyomeka kuli Jehova, niinzi nzukonzya kwiiya kuzwa kumisozi yaJesu? Atubone zimwi zyiiyo zitatu.

17. Nkombyo zyaJesu zituyiisyaanzi atala aJehova?

¹⁷ Jehova ulaziswiilila nkombyo zyesu zyakukombelezya. Jehova wakamuswiilila Jesu naakali kukomba kulinguwe kazizwa aansi aamoyo. Nkamboonzi? Nkaambo kaambo kapati nkaakali kukombela Jesu nkakuti akkale kasyomeka kuli Wisi akuti asalazye zina lyakwe. Andiswe kuti twakombela kuti tukkale katusyomeka kuli Jehova akuti tusalazye zina lyakwe, Jehova ulazisandula nkombyo zyesu.​—Int. 145:18, 19.

18. Nkamboonzi nitukonzya kwaamba kuti Jesu mweenzuma uutumvwisisisya mbutubede?

¹⁸ Jesu ulatumvwisisisya mbutulimvwa. Kuti katukataazikene, tulabotelwa kuumbulizigwa amweenzuma uutumvwisisisya mbutulimvwa, ikapati kuti kali wakaswaanana aamapenzi aali mbuli eesu. Jesu ngumweenzuma ooyo. Ulizi mbukubede kumana manguzu  achiindi nituyanda lugwasyo. Ulizi mputugolela alubo nga ulaachoonzyo chakuti twajana lugwasyo “aciindi ceelede.” (Heb. 4:15, 16) Mbuli Jesu mbaakazumina kugwasigwa aamungelo chiindi naakali mumuunda waGetsemane, andiswe tweelede kuzumina kugwasigwa aaJehova kazitakwe ndaba kuti wabelesya mabbuku eesu na, mavidiyo, nkani, mwaalu naakuti muKristu uusimide mubukombi kuti atusungwaazye.

19. Niinzi chikonzya kutugwasya kuti tube aamanguzu kuti twaswaanana aachiimo chipa kuti kutuyumine kusyomeka kuli Leza? Amba chikozyano.

¹⁹ Jehova ulatupa “luumuno lwa Leza.” Jehova utusimya biyeni? Chiindi nitukomba, tujana “luumuno lwa Leza oolo lwiinda maano oonse.” (Flp. 4:6, 7) Luumuno ndwatupa Jehova lupa kuti tubatame akuti tubone zintu munzila iilikabotu. Eezi nzizyo zyakachitika kumuchizi uutegwa Luz. Wakaamba kuti: “Ngandalimvwa kandilendeledwe. Eezi ngazyapa kuti zimwi ziindi ndibonaanga Leza tandiyandi pe. Pesi kuti ndaba aamaboneno aliboobu, ngandafwambaana kukomba kuli Jehova kandimubuzya mbundilimvwa. Nkombyo indigwasya kuti ndibone zintu munzila iilikabotu.” Mbuli zyakaambwa aamuchizi Luz, nkombyo itugwasya kuti tube aaluumuno.

20. Twayiyaanzi kuzwa kumisozi yaJesu?

²⁰ Twajana zyiiyo zyiingi zituumbulizya kuzwa kumisozi yaJesu. Twayiya kuti tweelede kugwasya bamwi bawuside akusyoma kuti Jehova aJesu balatugwasya kuti twafwidwa aabbululu wesu. Twazoobona kuti tweelede kuba aalweetelelo chiindi nitukambawuka akuyiisya nkaambo Jehova Leza aJesu Kristu bali aabuntu oobu. Alubo zilatuumbulizya kuziba kuti Jehova aMwanaakwe balatumvwisisisya mbutulimvwa akuti balayanda kutugwasya kuti tulisimye. Atuzumanane kubelesya nzitwayiya kusikila mubuzuba oobo Jehova nayoozuzikizya chisyomezyo chakwe chakuti “uyoosindula misozi yoonse kumeso [eesu].”​—Ciy. 21:4.