CHIIYO 4
Jehova Ulazilongezya Nzituchita Kuti Tunjile Chiyubulusyo
“Amukkale kamuchita oobu kamundiyeeya.”—LK. 22:19.
LWIIMBO 19 Mulalilo wa Mwami
ZITAYIIGWE a
1-2. Niinzi chipa kuti tunjile Chiyubulusyo munyaka amunyaka?
KWAMINYAKA iiyanda kusika ku 2 000 yayinda, Jesu wakatufwida, kuchitila kuti tuzoojane buumi butamani. Mubusiku katanafwa, wakalayilila batobeli bakwe kuti bayeeye lufu lwakwee lutondeezya mbatuyanda kwiinda mukuchita pobwe litayandi zintu zyiingi, liyanda chinkwa awayini luzutu.—1 Kor. 11:23-26.
2 Tulawuswiilila mulawu waJesu nkaambo tulamuyanda. (Joh. 14:15) Munyaka amunyaka, muchiindi chaChiyubulusyo nga twatondeezya mbutumuyanda Jesu kwiinda mukukomba akuyeeyesesya atala alufu lwakwe. Alubo nga twasala kumana chiindi chiingi katuli mumulimu wakukambawuka katuli kutamba bantu biingi kuti bazoonjile Chiyubulusyo. Alubo tatuzumizyi kufumbwa chintu kuti chitukachizye kunjila Chiyubulusyo.
3. Tulalanga-langaanzi muchiiyo eechi?
3 Muchiiyo eechi, tulalanga-langa zintu zitatu zichitwa aabakombi baJehova kuti bayeeye lufu lwaJesu: (1) batobelezya chikozyano nchaakasiya Jesu, (2) batamba bamwi kuChiyubulusyo alubo (3) banjila Chiyubulusyo nikuba kabali muzyiimo ziyumu.
KUTOBELEZYA ZYAKACHITWA AAJESU KUZWA KUMASAANGUNINO
4. Nga twayiyaanzi kuChiyubulusyo alubo nkamboonzi nituzibona kaziyandikana loko zintu nzitwiiya? (Lukka 22:19, 20)
4 Munyaka amunyaka mubuzuba bwaChiyubulusyo, nga twaswiilila nkani yaBbayibbili iisandula mibuzyo iisiyene-siyene. Nga twayiya kaambo kapa kuti bantu bayande chinunuzyo akuti lufu lwamuntu uumwi luzibbadala biyeni zibi zyabantu biingi. Alubo nga twayeezegwa kuti chinkwa awayini zyiimininaanzi akuti mbaani beelede kulya chinkwa akunywa wayini. (Bala Lukka 22:19, 20.) Alubo nga twayeesesya atala azilongezyo nzibatazoojane bantu bali aabulangilizi bwakuzoopona kukabe kutamani aanyika. (Is. 35:5, 6; 65:17, 21-23) Zintu nzituyiya tuzibona kaziyandikana loko. Pesi bantu biingi tabazizi pe zintu eezi alubo tabakwe ndaba pe alufu lwaJesu. Alubo bamwi babamba Chiyubulusyo munzila yabo kutali njaakatuyiisya Jesu. Nkamboonzi?
5. Nibakafwa baapostoli, bantu bakasaanguna kuluyeeya biyeni lufu lwaJesu?
5 Nibakamana biyo kufwa baapostoli baJesu, maKkristu bakubeja bakanjila mumbungano. (Mt. 13:24-27, 37-39) Bakali kwaambuula “zintu zipilingene kuti bapambule basikwiiya.” (Mil. 20:29, 30) Zimwi zintu “zipilingene” nzibakasaanguna kuyiisya maKristu aaya aakubeja nzyakuti, Jesu taakapa mubili wakwe “kamwi biyo kuti abweze zibi zyabantu biingi,” mbuli mbulyaamba Bbayibbili. Pesi bakali kuyiisya kuti chinunuzyo chaJesu cheelede kunoopegwa lubbe. (Heb. 9:27, 28) Bantu biingi mazubaano balayisyoma njiisyo eeyi yakubeja. Nga baba aamazuba ngibabunganaamwi kumacheechi, alubo bamwi nga basala kubungana buzuba abuzuba kuti bakayeeye lufu lwaJesu kwiinda mukuchita nchibaamba kuti “Chipayizyo chaMasi.” b Zimwi zikombelo zili aachiindi nchizibikkide kuti bantu babo bayeeye lufu lwaJesu, pesi biingi babo nga tabazi pe kuti chinunuzyo eecho chigwasyaanzi. Bamwi nga balibuzya kuti, ‘Nisimpe na kuti lwaJesu lulakonzya kupa kuti zibi zyangu zilekelelwe?’ Nkamboonzi nibalibuzya mubuzyo ooyu? Kulakonzeka kuti chimwi chiindi nga bakapambanisigwa aabantu batasyomi kuti chipayizyo chaJesu chilakonzya kupa kuti zibi zyesu zilekelelwe. Pesi batobeli baJesu bachoonzyo kujana babagwasya biyeni bantu kuti bamvwisisisye kuti chinunuzyo chaJesu chaambaanzi akuti chiyubulusyo cheelede kubambwa biyeni?
6. Mu1872, kabunga kabasikwiiya Bbayibbili kakajanaanzi?
6 Kuma1800, kabunga kabasikwiiya Bbayibbili bakali kuzulwidwa aaCharles Taze Russell, bakayanduulisisya atala ankani eeyi kababelesya Magwalo. Bakali kuyanda kuziba kuti chipayizyo chaJesu chigwasyaanzi akuti lufu lwakwe lweelede kubambwa biyeni. Mu1872, bakajana kuti nichoonzyo kuti Jesu wakafwa kuti anunune bantu boonse. Makani aaya taakaba aabo luzutu pe, pesi bakaabuzya bantu boonse kababelesya mabbuku, manyuzipepa amamagazini. Mukuya kwachiindi, bakasaanguna kutobelezya maKkristu bakusaanguna, kwiinda mukubunganaamwi kamwi mumunyaka kuti bachite Chiyubulusyo.
7. Kuyanduulisisya nkubakachita basikwiiya baBbayibbili bachiindi kulikutugwasya biyeni?
7 Mazubaano, tulikugwasigwa akuyanduulisisya kwakachitwa aakabunga kabasikwiiya Bbayibbili. Biyeni? Jehova ulikutugwasya kuti tumvwisisisye kuti chipayizyo chaJesu chambaanzi akuti chili kutugwasya biyeni. (1 Joh. 2:1, 2) Alubo twaziba nzilyaamba Bbayibbili atala abulangilizi mbubalaabo bantu bachita kuyanda kwaLeza. Bamwi bazoojana buumi butamani kujulu mpawo bamwi bazoopona kukabe kutamani aanyika. Chiindi nitubona mbatuyanda Jehova ambuchitugwsya chipayizyo chaJesu, nga twaswena aafwiifwi aJehova. (1 Pet. 3:18; 1 Joh. 4:9) Mbuli bakwesu basyomeka bachiindi, nga twatamba bamwi kuti tuzoochite Chiyubulusyo kweendelana ambakatulayilila Jesu.
KUTAMBA BAMWI KUCHIYUBULUSYO
Niinzi nzweelede kuchita kuti utole lubazu mubbelekelaamwi lyakutamba bantu kuChiyubulusyo? (Langa fuka 8-10) e
8. Niinzi nzitulikuchita kuti tutambe bantu kuChiyubulusyo? (Langa chifanikisyo.)
8 Bakombi baJehova baba achiindi kabatamba bamwi kuChiyubulusyo. Kutalikila mu1881, bakwesu abachizi baku-United States, bakapegwa chizibisyo muNgaziyakulinda chakuti babungane aang’anda yawumwi mukwesu kuAllegheny, Pennsylvania kuti bachite muswaangano ooyu uuyandikana. Mukuya kwachiindi, mbungano imwi ayimwi, yakali kuchita Chiyubulusyo. MuMarch 1940, basikupupulula bakabuzigwa kuti batambe kufumbwa muntu wamuchilawu chabo wakali aachiyandisyo. Mu1960, mbunga yakasaanguna kutumizya tupepa twakutamba bantu kuChiyubulusyo. Kuzwa kuchiindi eecho, mabbiliyoni aatupepa twakutamba bantu kuChiyubulusyo akasaanguna kupegwa bantu. Niinzi chipa kuti tubelesye chiindi chesu amanguzu kuti tutambe bamwi?
9-10. Mbantu bali biyeni mbitutamba kuChiyubulusyo? (Johane 3:16)
9 Kamwi kaambo kapa kuti tutambe bamwi kuChiyubulusyo nkakuti tuyanda kuti bazooyiye kasimpe kali atala azintu nzitwakachitilwa aJehova aJesu. (Bala Johane 3:16.) Tusyoma kuti nzibatazoobone akumvwa kuChiyubulusyo, zilakonzya kupa kuti bayiye zyiingi akuti babe bakombi baJehova. Pesi kuli bamwi bagwasigwa aaChiyubulusyo. Mbaani?
10 Bamwi bantu mbitutamba mbaabo bakaleka kukomba Jehova. Kubatamba nkutuchita nga tuyanda kuti babone kuti Leza uchibayanda. Biingi babo nga basika kuChiyubulusyo, eezi zipa kuti tubotelwe. Kunjila Chiyubulusyo kubayeezya kubotelwa nkubakalaako chiindi nibakali kukomba Jehova. Atubone chikozyano chaMonica. c Wakasaanguna lubo kukomba Jehova muchiindi chakkorona. Naakanjila Chiyubulusyo chamu2021 wakaamba kuti: “Chiyubulusyo eechi, chakali kuyandikana loko kulindime. Ndakali ndaba aaminyaka iili 20 kanditachichiti mulimu, pesi lino ndakakonzya kukambawukila bantu akubatamba kuChiyubulusyo. Ndakabeleka amoyo woonse kuti nditambe bantu biingi, nkaambo ndilamulumba Jehova aJesu akaambo kazintu nzibakandichitila.” (Int. 103:1-4) Kazitakwe ndaba pe kuti bantu balasika naakuti tabakoosika pe kuChiyubulusyo, tatuleki pe kubatamba, nkaambo tulizi kuti kuchita oobo kubotezya Jehova.
11. Jehova ulikuulongezya biyeni mulimu wesu wakutamba bantu kuChiyubulusyo? (Hagai 2:7)
11 Jehova ulikwiilongezya milimu yesu njituchita nitutamba bantu kuChiyubulusyo. Nikuba kuti mu2021 kwakali bulwazi bwakkorona, bantu bakanjila Chiyubulusyo bakali kusika ku21 367 603. Eeyi namba ibayindulula tubili ahafu Bakamboni baJehova bali munyika yoonse. Jehova tabikkili maanu kunamba yabantu bakanjila Chiyubulusyo, pesi ubikkila maanu kumuntu umwi awumwi. (Lk. 15:7; 1 Tim. 2:3, 4) Chiindi nitutamba bantu kuChiyubulusyo, Jehova nga ulikutugwasya kuti tujane bantu bali aamyoyo iilibambilide kutambula makani mabotu.—Bala Hagai 2:7.
KUNJILA CHIYUBULUSYO NIKUBA KAKULI KUYUMU
Jehova ulabotelwa akubeleka changuzu nkutuchita kuti tunjile Chiyubulusyo (Langa fuka 12) f
12. Niinzi zikonzya kutukachizya kuti tunjile Chiyubulusyo? (Langa chifanikisyo.)
12 Jesu wakaamba kuti kumazuba aakumamanino, tuzooswana zyiimo ziyumu loko, ziswaanizya kukazigwa mumpuli, kupenzegwa, nkondo, malwazi azimwi. (Mt. 10:36; Mk. 13:9; Lk. 21:10, 11) Chimwi chiindi, zyiimo eezi zilakonzya kupa kuti kutuyumine kuyeeya lufu lwaJesu. Niinzi nzibali kuchita bakwesu abachizi kuti bazunde buyumu-yumu oobu alubo Jehova ulikubagwasya biyeni?
13. Jehova wakamugwasya biyeni Artem kuti abe aachibindi akuti alipede kuchita Chiyubulusyo naakali mujele?
13 Kusungwa. Bakwesu bali mumajele akaambo kalusyomo lwabo nga bachita zyoonse nzibakonzya kuti bayeeye lufu lwaJesu. Atulange-lange chikozyano cha-Artem. Nichakaswena Chiyubulusyo chamu2020, wakabikkwa muchitookesi chakali kulampa mamita aali 17 kumabazu woonse. Muchitookesi eecho wakali aabamwi basungwa bali 5. Nikuba kuti wakalisungidwe pesi wakakonzya kujana zintu zyakubelesya kuChiyubulusyo alubo wakalibambila kupa nkani yaChiyubulusyo kali aalikke. Pesi basungwanyina bakali kufwepa akwaambuula chisapi. Wakali kuyoochita biyeni Artem? Wakabakumbila kuti bajane buleka kutukila akufwepa kwa-awa iimwi biyo. Mukwesu ooyu wakagamba loko basungwanyina nibakazumina kuti tabakoofwepa pe akutukila chiindi nachita Chiyubulusyo. Artem wakati, “Ndakakumbila kubabuzya atala aChiyubulusyo.” Nikuba kuti bakaamba kuti teebakali kuyanda kumvwa atala azyaChiyubulusyo, pesi nibakabona Artem kalikuchita Chiyubulusyo bakamubuzya mibuzyo myiingi loko atala aChiyubulusyo.
14. Ngaali mabambe aakachitwa aabakombi baJehova kuti bakonzye kunjila Chiyubulusyo nikuba kuti kwakali kkorona?
14 Bulwazi bwakkorona. Chiindi nikwakaba bulwazi oobu, bakombi baJehova teebakachili kukonzya pe kunjila Chiyubulusyo aandawu iimwi. Pesi eezi teezyakapa kuti baleke kunjila Chiyubulusyo. d Mbungano zyakali aa-intaneti zyakanjila Chiyubulusyo kazibelesya vidiyo kkoolu. Ani bakwesu bakkala kundawu zikataazya netiwekki, bakachita biyeni kuti banjile Chiyubulusyo? Kuli zimwi nyika kwakachitwa mabambe aakuti nkani yaChiyubulusyo ipupululwe aaTV naakuti aarediyo. Alubo, mitabi yakalekkooda nkani yaChiyubulusyo mumilaka yiinda ku500, kuchitila kuti bantu aabo bakkala kundawu zili kule loko bakonzye kunjila Chiyubulusyo. Alubo bakwesu bakachita mabambe aakuti nkani yakalekkoodwa itolwe kubakwesu bakali kwiiyanda.
15. Twiiyaanzi kuzintu zyakachitwa aaSue?
15 Kukazigwa aabamumpuli. Chimwi chiimo chiyumu loko nchibaswaana bamwi kuti banjile Chiyubulusyo, nkukazigwa aabamumpuli. Atubone chimwi chikozyano chamuntu wakali kwiiya Bbayibbili uutegwa Sue. Mu2021, kakusyeede buzuba bumwi kuti kube Chiyubulusyo, Sue wakabuzya muchizi wakali kumuyiisya Bbayibbili kuti taakali kukonzya pe kunjila Chiyubulusyo akaambo kakuti bamumpuli yakwe bakali kumukazya. Muchizi wakali kumuyiisya Bbayibbili wakamubalila lugwalo lwa Lukka 22:44. Mpawo wakamupandulwida kuti, chiindi nituswaana buyumu-yumu, tweelede kutobelezya chikozyano chaJesu kwiinda mukukomba kuli Jehova akumusyoma. Buzuba bwakatobela, Sue wakalibambila chinkwa awayini zyakubelesya kuChiyubulusyo mpawo wakeebela pulogilamu yakuKomba kwaKuseeni aa jw.org. Buzuba oobo goko, kali aalikke mung’anda wakaswiilila nkani yaChiyubulusyo aafooni yakwe. Kuzwa waawo, Sue wakalembela muchizi wakali kumuyiisya Bbayibbili kuti: “Mwakandisungwaazya loko jilo. Ndakachita zyoonse nzindikonzya kuti ndinjile Chiyubulusyo alubo Jehova wakandigwasya. Tandikonzyi pe kupandulula mbundilikubotelwa. Ndalumba loko.” Ubonaanga Jehova ulakonzya kukugwasya na anduwe kuti waba muchiimo chili boobu?
16. Nkamboonzi nituli aachoonzyo chakuti Jehova ulabotelwa azintu zyoonse nzituchita kuti tunjile Chiyubulusyo? (Baroma 8:31, 32)
16 Jehova ulabotelwa chiindi nituchita zyoonse nzitukonzya kuti tuyeeye lufu lwaJesu. Jehova ulabotelwa chiindi nitutondeezya mbutumulumba akaambo kazintu nzyaakatuchitila. (Bala Baroma 8:31, 32.) Atukanze kunjila Chiyubulusyo munyaka uuno akuti tuchite nzitukonzya kuti tuyungizye mulimu wesu muzintu zyabukombi muchiindi chaChiyubulusyo.
LWIIMBO 18 Kulumba Akaambo ka Cinunuzyo
a Muli Bwabili 4 April, mamiliyoni aabantu munyika yoonse bazooyeeya lufu lwaKkristu. Kubantu biingi batazoosike kanooli kakusaanguna kunjila Chiyubulusyo. Bamwi batachichiti mulimu bazoosika. Alubo bamwi bali muzyiimo ziyumu, bazoochita zyoonse nzibakonzya kuti banjile Chiyubulusyo. Kufumbwa mbuchibede chiimo chako, Jehova uzoobotelwa loko kuti wachita zyoonse nzukonzya kuti unjile Chiyubulusyo.
b Basimacheechi basyoma kuti chiindi nibachita pobwe eeli chinkwa awayini nga zyachincha choonzyo zyaba mubili aganzi lyaKkristu. Nga bayeeya kuti mubili waJesu aganzi nga zilikupayizigwa chiindi muntu umwi awumwi natola lubazu muchiyanza eechi.
c Amwi mazina akachinchwa.
d Langa zyiiyo zili aa jw.org aamutwe utii, “2021 Memorial Commemoration.”
