1-2. (a) Chiindi nitubala atala azintu zyakachitika mubuumi bwaJesu naakachili aanyika nga twalimvwa biyeni? (b) Tulalanga-langaanzi muchiiyo eechi?

 KUTI twafwidwa, nga twawusa loko. Moyo wesu nga wachisa kuti twayeeya machise ngaakamvwa bbululu wesu katanafwa. Pesi chiindi nichiyabweenda, nga twasaanguna kubotelwa lubo.

² Munzila iikozyenie, nga twawusa loko kuti twabala makani aali atala akupenzegwa akujayigwa kwaJesu. Kuchiindi chaChiyubulusyo, nga twalipa chiindi chakuyeeyesesya atala ambuchiyandikana chinunuzyo chaJesu. (1 Kor. 11:24, 25) Nikuba oobo, nga twabotelwa kuti twayeeya atala azintu nzyaakaamba anzyaakachita Jesu chiindi naakali aanyika. Alubo nga twaba aamanguzu kuti twayeeya atala amilimu njalikuchita lino Jesu anjayoochita kunembo. Kuyeeyesesya atala azintu eezi akutuyanda nkwachita, kupa kuti tuyanduule nzila zyakumulumbaazyo mbuli mbututabone muchiiyo eechi.

3. Ntuutuli twaambo tupa kuti tulumbe Jehova aJesu akaambo kachinunuzyo?

³ Chiindi nituyeeya atala abuumi alufu lwaJesu, nga twamaninwa. Jesu naakachili aanyika, wakali kuyiisya bantu atala azintu zibotu zitazoochitwe aaBwaami bwaLeza. Tulaziyanda kaka nziliyiisya Bbayibbili atala achinunuzyo azintu zibotu zitazoobe akaambo kachinunuzyo. Chinunuzyo chitupa mweenya wakuti tube abweenzuma busimide aJehova aJesu. Aabo balaalusyomo muli Jesu bazoojana buumi butamani  alubo bazoobona babbululu babo bakafwa kabali kubusigwa kuti bazoopone lubo. (Joh. 5:28, 29; Rom. 6:23) Taakwe nzitwakachita zipa kuti tweelele kujana zilongezyo eezi alubo tatukonzyi kumubbadala pe Jehova aJesu akaambo kazintu zyoonse nzibakatuchitila. (Rom. 5:8, 20, 21) Nikuba oobo, tulakonzya kutondeezya kuti tulabalumba akaambo kazintu nzibakatuchitila. Kujana twazichita biyeni?

4. Mariya wakatondeezya biyeni kuti muntu uulumba kuzintu nzyaakachitilwa aaJesu? (Langa chifanikisyo.)

⁴ Atuyeeye chikozyano chawumwi mwanakazi wachiJuda uutegwa Mariya Magadalina. Mwanakazi ooyu wakali woomba akaambo kamadimoni aali 7 aakali kumukataazya. Kweelede kuti wakali kubonaanga penzi lyakwe talizoomani pe. Amuyeeye kubotelwa nkwaakabaako chiindi Jesu naakatanda madimoni aakali kumukataazya. Wakatondeezya kuti ulalumba kuzintu nzyaakachitilwa kwiinda mukuba mutobeli waJesu akubelesya chiindi, manguzu azintu nzyaakalaazyo kuti agwasilizye Jesu mumulimu wakukambawuka. (Lk. 8:1-3) Nikuba kuti Mariya wakalumba kuzintu Jesu nzyaakamuchitila, kweelede kuti taakazi pe Jesu wakachili kuyanda kumupa chimwi chipo chipati loko. Jesu wakali kuzoopa buumi bwakwe, “kuchitila kuti muntu woonse uumusyoma,” azoojane buumi butamani. (Joh. 3:16) Nikuba oobo, Mariya wakatondeezya kuti ulalumba kwiinda mukusyomeka kuli Jesu. Chiindi Jesu naakali kupenzegwa aachisamu chakupenzegwa, Mariya wakaliimvwi kumbali kuchitila kuti awumbulizye bakali kulila akuti atondeezye kuti wakali aandaba aJesu. (Joh. 19:25) Jesu naakafwa, Mariya abamwi banakazi babili bakayinka aatununkilizyo kukabanda kakwe. (Mk. 16:1, 2) Jehova wakamulongezya Mariya akaambo kakusyomeka kwakwe. Jesu naakabusigwa, Mariya wakajana chilongezyo chatakajanwa aabasikwiiya biingi, chakubona Jesu akwaambuulaawe.—Joh. 20:11-18.

5. Kujana twatondeezya biyeni kuti tulamulumba Jehova aJesu akaambo kazintu zyoonse nzibakatuchitila?

 ⁵ Andiswe tulakonzya kutondeezya kuti tulamulumba Jehova aJesu akaambo kazintu nzibakatuchitila kwiinda mukubelesya chiindi, manguzu azintu nzitulaazyo kuti tusumpule mulimu waBwaami. Muchikozyano, tulakonzya kulipa chiindi chakugwasilizya chiindi nikuli kuyakwa naakuti kubambululwa mayake akukombela.

6. Nkamboonzi nitukonzya kwaamba kuti chinunuzyo nchipo chako awulikke?

⁶ Kuziba mbatuyanda Jehova aJesu, kupa kuti tubayande ambabo. (1 Joh. 4:10, 19) Nga twabayanda loko kuti twaziba kuti Jesu wakafwida umwi awumwi wesu. Eezi nzizyo nzyaakaamba Pawulu mulugwalo ndwaakalembela mbungano yakuGalatiya. Wakaamba kuti Mwana waLeza, “wakandiyanda akupa buumi bwakwe akaambo kandime.” (Gal. 2:20) Akaambo kakuti Jesu wakutufwida, Jehova ulakonzya kutukwelela kulinguwe kuti tube beenzinyina. (Joh. 6:44) Zilabotezya kaka kuziba kuti Jehova wakabona chimwi chintu chibotu mulinduwe mpo wasala kusweekelwa aamuntu ngwayandisya loko kuti weelele kuba mweenzinyina. Eezi zipa kuti luyando lwesu aJehova aJesu lukomene. Nkinkaako, umwi awumwi wesu weelede kulibuzya kuti, ‘Ndichite biyeni akaambo kaluyando lupati oolu ndubakanditondeezya?’

7. Mbuli mbukutondeezedwe muchifanikisyo, niinzi nzitweelede kuchita kuti tutondeezye kuti tulamuyanda Jehova aJesu? (2 Bakkorinte 5:14, 15; 6:1, 2)

⁷ Kutuyanda nkwaakachita Jehova aJesu kweelede kupa kuti tuyande bamwi. (Bala 2 Bakkorinte 5:14, 15; 6:1, 2.) Imwi nzila mutukonzya kutondeezya kuti tulabayanda bamwi nkwiinda mukutola lubazu chabusungu mumulimu wakukambawuka. Tweelede kwaambuula aamuntu woonse ngutuswaana. Tatweelede kusaluula bantu akaambo kachikanda  chabo, musyobo wabo, nzibalaazyo mubuumi naakuti baliyiide naakuti tabayiide pe. Kuti twachita oobo, tunooli tuli kubelekelaamwi aJehova ooyo uuyanda, “kuti bantu bamisyobo yoonse bafutulwe akuti babe aaluzibo lwachoonzyo lwakasimpe.”—1 Tim. 2:4.

8. Kujana twabatondeezya biyeni luyando bakombima?

⁸ Tulakonzya kutondeezya mbutumuyanda Leza aKkristu kwiinda mukuyanda bakombima. (1 Joh. 4:21) Tweelede kutondeezya kuti tulaandaba ambabo akubagwasya muchiindi chamapenzi. Kuti bafwidwa aababbululu babo, tulakonzya kubawumbulizya. Kuti bachiswa, tulakonzya kubaswaya akuchita zyoonse nzitukonzya kuti tubasungwaazye chiindi nibatakwe manguzu. (2 Kor. 1:3-7; 1 Tes. 5:11, 14) Tweelede kukkala katubakombela, nkaambo tulizi kuti “nkombyo yakukombelezya yamuntu uululeme ilaamanguzu loko.”—Jak. 5:16.

9. Amba imwi nzila mutukonzya kutondeezya kuti tulabayanda bakwesu abachizi.

⁹ Tulakonzya kutondeezya kuti tulabayanda bakombima kwiinda mukubeleka changuzu kuti tubambe luumuno ambabo. Tweelede kweezya kutobelezya Jehova kwiinda mukulekelela bamwi. Kuti kakuli kuti Jehova wakazumina kusweekelwa aaMwanaakwe kuchitila kuti tukonzye kulekelelwa zibi, ani tatweelede kubalekelela na bamwi batubisizya? Tatuyandi kuba mbuli muzike mubi waambidwe muli chimwi chazikozyanisyo zyaJesu. Simalelaakwe naakazima chikwelete chakwe, muzike ooyo wakakachilwa kulekelela muzikenyina wakamukweletede mali nche. (Mt. 18:23-35) Kuti kakuli mukombinyokwe ngupambenaawe mumbungano, zilikabotu kuti ubone zyakuchita mubambe luumuno chiyubulusyo kachitanasika. (Mt. 5:23, 24) Kuchita oobo, kutondeezya kuti ulamuyanda kapati Jehova aJesu.

10-11. Baalu kujana batondeezya biyeni kuti balamuyanda Jehova aJesu? (1 Petro 5:1, 2)

¹⁰ Niinzi nzibeelede kuchita baalu kuti batondeezye kuti balamuyanda Jehova aJesu? Chimwi nchibakonzya kuchita nkweembela butanga bwaJesu. (Bala 1 Petro 5:1, 2.) Jesu wakakabikka aantanganana kaambo aaka naakali kwaambuula aamwaapostolo Petro. Chiindi Petro naakakaka Jesu kwaziindi zitatu, kweelede kuti wakabula kuti ulachita biyeni kuti atondeezye kuti wakachili kumuyanda Jesu. Pesi chiindi Jesu naakabusigwa, wakabuzya Petro kuti: “Simoni, mwana waJohane, ulandiyanda na?” Kweelede Petro wakalikuyoobelesya mweenya ooyu kuti atondeezye kuti wakali kumuyanda Simalelaakwe. Nkinkaako, Jesu wakamuzya kuti: “Sanina tubelele twangu.” (Joh. 21:15-17) Kuzwa kuchiindi eecho kaziya kunembo, Petro wakatondeezya kuti wakali kumuyanda Jesu kwiinda mukweembela butanga bwakwe.

¹¹ Nibaalu, niinzi nzimweelede kuchita kuchiindi chaChiyubulusyo, kuti mutondeezye kuti mwaabona kayandikana majwi Jesu ngaakabuzya Petro? Mulakonzya kutondeezya mbumumuyanda Jehova aJesu kwiinda mukutola lubazu mumulimu wakweembela basikupupulula akugwasya batachichiti mulimu kuti baboole kuli Jehova. (Ezk. 34:11, 12) Mulakonzya kusungwaazya zyiiyo zyaBbayibbili akupa kuti bantu balaachiyandisyo banga basika kuChiyubulusyo balimvwe kabaangunukide, nkaambo tulizi kuti ambabo balakonzya kuzooba batobeli baJesu.

12. Nkamboonzi kuyeeyesesya majwi akaambwa aaJesu mubusiku katanafwa, nikukonzya kupa kuti tube aachibindi? (Johane 16:32, 33)

¹² Mubusiku katanafwa, Jesu wakabuzya basikwiiya bakwe kuti: “Munooli aamapenzi  munyika, pesi mutayoowi pe! Ndayizunda nyika.” (Bala Johane 16:32, 33) Niinzi chakagwasya Jesu kuti abe aachibindi akuti asyomeke kusikila kulufu? Wakasyoma Jehova. Mbukunga wakalizi kuti batobeli bakwe bakali kuzooswaana mapenzi aakozyenie, Jesu wakakumbila Jehova kuti abalange. (Joh. 17:11) Nkamboonzi makani aaya naapa kuti tube aachibindi? Jehova ulaamanguzu kwiinda batulwana. (1 Joh. 4:4) Zyoonse zichitika ulizibwene. Kuti twasyoma Jehova, uyootugwasya kuti tutayoowi pe.

13. Wakachitondeezya biyeni chibindi Josefa waku-Arimateya?

¹³ Atuyeeye chikozyano chaJosefa waku-Arimateya. MaJuda bakali kumulemeka loko mwaalumi ooyu. Wakali wamuNkuta Mpati yamaJuda. Nikuba oobo, chiindi Jesu naakali kuchita mulimu wakwe aanyika, mwaalumi ooyu wakali kuyoowa. Johane wakaamba kuti mwaalumi ooyo wakali “sikwiiya waJesu pesi wakali kulisisa akaambo kakuyoowa maJuda.” (Joh. 19:38) Nikuba kuti Josefa wakali kuuyanda loko mulumbe waBwaami, pesi wakali kulisisa kuchitila kuti bamwi batazibi pe kuti wakali aalusyomo muli Jesu. Kweelede kuti wakali kuyoowa kuti bantu teebakachili kuyoomulemeka pe kuti baziba kuti wakali sikwiiya waJesu. Kufumbwa kaambo kakali kupa kuti ayoowe, Bbayibbili litubuzya kuti chiindi Jesu naakafwa, Josefa “wakaba aachibindi mpawo wakayinka kuli Pilato waakukumbila mubili waJesu.” (Mk. 15:42, 43) Josefa taakachili sikwiiya waJesu uulisisa pe.

14. Niinzi nzweelede kuchita kuti kuli kuyoowa bantu?

¹⁴ Kuli nunga walimvwa mbuli Josefa na? Chiindi nuli kuchikolo naakuti kumulimu, nga wafwa bweeme na kuti bantu baziba kuti uli Kamboni waJehova? Ulikulyata-lyata na kuti ubbabbatizigwe akaambo kakuti uyoowa kuti bantu bazootyeni atala anduwe? Utazumizyi zintu zili boobu kuti zipe kuti uleke kuchita zintu nzuzi kuti zilikabotu. Komba kuli Jehova amoyo woonse, umukumbile kuti akupe chibindi chakuchita kuyanda kwakwe. Kubona Jehova kalikusandula nkombyo zyako, kulakonzya kukusimya akukugwasya kuti ube aachibindi.—Is. 41:10, 13.

15. Kubotelwa nkubakabaako basikwiiya chiindi Jesu naakabusigwa kwakapa kuti bachite biyeni? (Lukka 24:52, 53)

¹⁵ Basikwiiya bakawusa loko chiindi Jesu naakafwa. Amuyeeye biyo mbubakali kulimvwa. Bakali basweekelwa aamuntu ngubakali kuyandisya alubo teebakachilikwe bulangilizi pe. (Lk. 24:17-21) Nikuba oobo, Jesu  wakaboneka kulimbabo, alubo wakalipa chiindi chakubagwasya kuti bamvwisisisye mulimu ngwaakali aawo mukuzuzikizigwa kwabupolofita bwamuBbayibbili. Alubo wakabapa mulimu uuyandikana loko. (Lk. 24:26, 27, 45-48) Chiindi Jesu naakaya kujulu kakuli kwayinda mazuba aali 40 kuzwa naakabusigwa, kuusa kwabasikwiiya kwakachincha kwaba kubotelwa. Bakabotelwa nkaambo bakalizi kuti Simalelaabo wakali muumi akuti wakalilibambilide kubagwasya kuti bazuzikizye mulimu ngwaakabapede. Kubotelwa nkubakalaako kwakapa kuti batembawule Jehova chiindi choonse.—Bala Lukka 24:52, 53; Mil. 5:42.

16. Kujana twabatobelezya biyeni basikwiiya baJesu?

¹⁶ Kujana twabatobelezya biyeni basikwiiya baJesu? Tulakonzya kukomba Jehova katubotelwa chiindi choonse kutali kuchiindi chaChiyubulusyo kupela. Eezi zyaamba kuti tweelede kubikka Bwaami bwaLeza mundawu yakusaanguna. Muchikozyano, biingi bakabambulula mapulogilamu aabo kuchitila kuti bajane chiindi chakuya kukukambawuka, kunjila miswaangano akuchita kukomba kwampuli. Bamwi bakasala kuubya buumi bwabo kwiinda mukutaba aazintu ziyandwa aabantu biingi, kuchitila kuti babe aazyiingi zyakuchita mumbungano naakuti kundawu ziyanda basikupupulula. Nisimpe kuti tweelede kulisimya kuti twiinkilile kunembo kubelekela Jehova, alubo Jehova utusyomezya zilongezyo zyiingi kuti twabikka Bwaami bwakwe mundawu yakusaanguna mubuumi bwesu.—Tus. 10:22; Mt. 6:32, 33.

17. Ukanzide kuchitaanzi kachitanasika Chiyubulusyo? (Langa chifanikisyo.)

¹⁷ Chiyubulusyo tuzoobaacho muli Bwabili 4 April. Nituchilinda kuti chiindi eecho chisike, tweelede kuyeeyesesya atala abuumi alufu lwaJesu azintu zyoonse nzitwakachitilwa aaJehova. Muchikozyano, sala chiindi nutabale akuyeeyesesya atala azintu zilembedwe muchaati iiti, “Nsondo Yamamanino Yabuumi bwa Jesu Bwaanyika” iili muMakani Aayungizyidwe B, muBbaibbele lya Busanduluzi Bwanyika Mpya. Chiindi nubala Bbayibbili, yanduula makani atakugwasye kuti ube muntu uulumba, ulaachibindi alubo uubotelwa. Alubo uyeeye zimwi nzila zikonzya kukugwasya kuti ube muntu uulumba. Jesu uyoobotelwa loko akaambo kazintu zyoonse nzuchita kuti umuyeeye kuchiindi chaChiyubulusyo.—Chi. 2:19.