1. Niinzi zisika mumizeezo yako kuti wayeeya atala aJehova?

 KULI nwaakali weezya kuyeeyela mbabede na Jehova? Niinzi nzuyeeya chiindi nwaambuulaawe munkombyo? Nikuba kuti Jehova taboneki, pesi Bbayibbili limupandulula munzila zisiyene-siyene. Jehova waambwa kuti “ndizuba alimwi nintobo” alubo “mulilo uumpa cakumaninina.” (Int. 84:11; Heb. 12:29) Ezekkiyele wakapandulula mbaboneka Jehova muchilengaano nchaakabona, wakaamba kuti Jehova uli mbuli bbwe lyasafire, nsimbi iimweka afulichoongo. (Ezk. 1:​26-28) Bumwi bupanduluzi oobu bulakonzya kutuyoosya naakuti kupa kuti tumulemeke.

2. Niinzi chikonzya kukachizya bamwi kuti baswene aafwiifwi aJehova?

² Akaambo kakuti Jehova tatumuboni pe, kulakonzya kutuyumina kusyoma kuti Jehova ulatuyanda. Bamwi babonaanga Jehova tazoobayandi pe akaambo kazintu zyakachitika mubuumi bwabo. Kulakonzeka kuti bakakomena kabatakwe wisi uubatondeezya luyando pe. Jehova ulamvwisisisya mbutulimvwa alubo ulizi kuti nkamboonzi nikutuyumina kusyoma kuti ulatuyanda. Kuti atugwasye, wakatupa Jwi lyakwe Bbayibbili kuchitila kuti tuzibe buntu bwakwe.

3. Nkamboonzi nitweelede kwiiya zyiingi atala ambulubede luyando lwaJehova?

³ Bbayibbili lyaamba kuti Jehova nduyando. (1 Joh. 4:8) Zintu zyoonse nzyachita Jehova, uzichita akaambo kaluyando. Luyando lwaLeza talusaluuli pe alubo luli aanguzu zyakuti ubatondeezya luyando aabo batamuyandi pe. (Mt. 5:​44, 45) Muchiiyo eechi, tulalanga-langa mbabede Jehova ambulubede luyando lwakwe. Kwiiya zyiingi atala aLeza kupa kuti tumuyande loko.

JEHOVA UTUYANDA LOKO

4. Luyando lwaJehova lupati lupa kuti umvwe biyeni? (Langa chifanikisyo.)

⁴ “Jehova ulaaluyando lupati.” (Jak. 5:11) MuBbayibbili,  Jehova ulikozyanisya aamwanakazi uulaaluyando. (Is. 66:​12, 13) Yeeyela mwanakazi mbamutondeezya luyando mwanaakwe mutete. Ulamulela akumubbwantusya-bbwantusya akwaambuulaawe ajwi libombede. Mwanaakwe nalila naakuti namvwa kuchisa, uba aachoonzyo chakuti wamupa nzyayanda. Chiindi nitukataazikene, tulakonzya kuba aachoonzyo chakuti Jehova ulatuyanda. Sintembawuzyo wakalemba kuti: “Mizeezo minji iilibilisya neyakandikatazya, yebo wakanduumbulizya akunditontozya.”—Int. 94:19.

5. Luyando lwaJehova lutamani lukugwasya biyeni?

⁵ Jehova ulasyomeka. (Int. 103:8) Taleki pe kutuyanda nikuba kuti twabisya. Ma-Israyeli bakali kunyemya Jehova chiindi achiindi, pesi Jehova wakali kubatondeezya luyando lwakwe lutamani bakombi bakwe bakali kusanduka. Wakabuzya umwi awumwi kuti: “Wakali kuyandika kapati mumeso aangu, wakalemekwa, alimwi mebo ndakuyanda.” (Is. 43:​4, 5) Luyando lwaLeza taluchinchi pe. Tulakonzya kwiinkilila kunembo kusyoma kuti unootuyanda. Nikuba kuti twachita chibi chipati, Jehova tatusiyi pe. Kuti twasanduka akubweeda kulinguwe, tulalibonena atulikke kuti uchituyanda. Utusyomezya kuti ‘uyootulekelela cakumaninina.’ (Is. 55:7) Kuti Jehova watulekelela, tulaba ‘aziindi zyakubusilizigwa . . . kuzwa kuli Jehova lwakwe.’—Mil. 3:19.

6. Lugwalo lwa Zekariya 2:8 lutuyiisyaanzi atala aJehova?

⁶ Bala Zekariya 2:8. Akaambo kakuti Jehova ulatuyanda, ulafwambaana kubona mbutulimvwa alubo uli aachiyandisyo chakutukwabilila. Umvwa kuchisa chiindi nitukataazikene. Eezi zipa kuti tukombe kulinguwe katwaamba kuti: “Kondibamba mbuli imboni yaliso lyako.” (Int. 17:8) Liso nchipanzi chamubili chiyandikana loko alubo chitayandi kujatwa-jatwa. Nkinkaako, chiindi Jehova natukozyanisya aamboni yaliso lyakwe, nga kuli mbuli kuti ulikwaamba kuti, ‘Nibantu bangu, muntu uumuchisa, nga ulikuchisa chipanzi chiyandikana loko aalindime.’

7. Niinzi zikonzya kutugwasya kuti tube aachoonzyo chakuti Jehova ulatuyanda?

⁷ Jehova uyanda kuti tube aachoonzyo chakuti ulamuyanda umwi awumwi wesu. Pesi ulizi kuti akaambo kazintu zyakatuchitikila mubuumi bwesu, tulakonzya kutaba aachoonzyo chakuti ulatuyanda. Alubo ulizi kuti amwi  zintu nzitulikuswaana lino zilikupa kuti tutabi aachoonzyo chakuti ulatuyanda. Niinzi chikonzya kutugwasya kuti tube aachoonzyo chakuti Jehova ulatuyanda? Kwiiya atala aJehova mbamutondeezya luyando Jesu, mbabayanda maKkristu bananikidwe ambatuyanda kulatugwasya.

JEHOVA MBATONDEEZYA LUYANDO

8. Nkamboonzi Jesu naakali aachoonzyo chakuti Wisi ulamuyanda?

⁸ Kwaminyaka myiingi, Jehova aMwanaakwe ngwayandisya bakali kutondeezyania luyando lupati. Mbabo kupela bapona kwaminyaka myiingi kabali kutondeezyania luyando. Kweendelana alugwalo lwa Mateyo 17:​5, Jehova wakaamba mbamuyanda Jesu. Jehova wakali kukonzya kwaamba kuti: ‘Ooyu ngunguwe uundibotezya.’ Pesi Jehova wakali kuyanda kuti tuzibe mbamuyanda Jesu, nkinkaako, wakamwaamba, kuti “Mwanaangu uuyandwa.” Jehova wakali kubotelwa loko anzyaakali kuchita Jesu, ikapati naakalipeda kuti afwe. (Ef. 1:7) Alubo Jesu taakwe naakazumbuuzya pe kuti Wisi ulamuyanda na. Wakali aachoonzyo chakuti Wisi ulamuyanda amoyo woonse. Kwaziindi zyiingi, wakaamba kali aachoonzyo kuti Wisi ulamuyanda.—Joh. 3:35; 10:17; 17:24.

9. Jehova ubayanda biyeni maKkristu bananikidwe? Pandulula. (Baroma 5:5)

⁹ Jehova ulabayanda maKkristu bananikidwe. (Bala Baroma 5:5.) Kweendelana abbuku lipandulula Bbayibbili, bbala lyakuti “lwakatilwa” lili aamuzeezo wakuti luyando “lwakatilwa mulindiswe kalweenda mbuli kalonga.” Majwi aaya atondeezya luyando lupati Jehova ndwabatondeezya maKkristu bananikidwe. MaKkristu bananikidwe balizi kuti “bayandwa aaLeza.” (Jud. 1) Mwaapostoli Johane wakatondeezya mbubalimvwa maKkristu bananikidwe, wakati: “Amubone mbululi lupati luyando Taata ndwaakatutondeezya, kuti twiitwe kuti tuli bana baLeza!” (1 Joh. 3:1) Eezi zyaamba kuti luyando lwaJehova lumanina kumaKkristu bananikidwe kupela na? Peepe, Jehova ulatuyanda toonse.

10. Nchiichili chintu chipati chitondeezya kuti Jehova ulatuyanda?

¹⁰ Niinzi chintu chipati chipa kuti tube aachoonzyo chakuti Jehova ulatuyanda toonse? Nchinunuzyo. Kwiinda mukutupa chinunuzyo, Jehova wakatondeezya kuti ulatuyanda toonse kwiinda zikonzya kuchitwa aawumwi muntu. (Joh. 3:16; Rom. 5:8) Jehova wakatupa Mwanaakwe ngwayandisya kuchitila kuti tulekelelwe zibi zyesu akuti tukonzye kuba beenzinyina. (1 Joh. 4:10) Kuti twakkala katuyeeyesesya atala amuulo wakabbadalwa aaJehova aJesu, tulamvwisisisya mbubamuyanda muntu umwi awumwi. (Gal. 2:20) Chinunuzyo teechakabbadalwa akaambo kakuti Jehova wakali kuyanda kuti kube bululami kupela, pesi nchipo chitondeezya mbatuyanda. Jehova wakatondeezya kuti ulatuyanda kwiinda mukutupa Mwanaakwe ngwayandisya, Jesu, kuti abe chipayizyo. Jehova wakazumizya Mwanaakwe kuti apenzegwe akuti atufwide.

11. Wayiyaanzi muli Jeremiya 31:3?

¹¹ Mbuli mbutwabona, Jehova togoleli aakubona kupela pe kuti weelede kututondeezya luyando, pesi ulatubuzya kuti ulatuyanda amoyo woonse. (Bala Jeremiya 31:3.) Jehova wakatukwelela kulinguwe akaambo kakuti ulatuyanda. (Kozyanisya a Deuteronomo 7:​7, 8.) Taakwe chintu naakuti muntu uukonzya kutwaanzaania kuluyando lwaLeza. (Rom. 8:​38, 39) Luyando ndwakutondeezya Leza lupa kuti umvwe biyeni? Bala Intembauzyo 23 ubone Davida mbaakalimvwa aluyando ndwaakatondeezegwa aaJehova ambutulimvwa toonse akaambo kaluyando ndwatutondeezya Jehova. 

 LUYANDO LWAJEHOVA LUPA KUTI UMVWE BIYENI?

12. Lugwalo lwa Intembauzyo 23 lwaambuula atalaanzi?

¹² Bala Intembauzyo 23:​1-6. Intembauzyo 23 ndwiimbo lwaDavida ndwaakayimba kali aachoonzyo kuti Jehova ulamuyanda amoyo woonse. Davida wakapandulula mbubwakasimide bweenzinyina mbwaakalaabo aJehova, ooyo ngwaakaamba kuti Mweembezi wakwe. Davida wakalimvwa kakwabililidwe kwiinda mukuzumizya Jehova kuti amuzulwide alubo wakasyoma Jehova chakumaninina. Davida wakalizi kuti Jehova wakali kunoomutondeezya luyando buzuba abuzuba. Niinzi chakapa kuti Davida abe aachoonzyo chakuti Jehova ulamuyanda?

13. Nkamboonzi Davida naakali aachoonzyo chakuti Jehova wakali kumulangania?

¹³ “Kunyina ncondiyoobula pe.” Davida wakabona kuti Jehova ulamulangania nkaambo taakwe nchaakali kubula pe. Alubo Davida wakalizi kuti Jehova mweenzinyina akuti ulamuyanda. Eezi nzizyo zyakapa kuti Davida abe aachoonzyo chakuti Jehova wakali kuzooyinkilila kunembo kumupa zintu zyoonse nzyaakali kuyanda nikuba kuti zyiimo kunembo zyazoochincha. Akaambo kakuti Davida wakali kusyoma kuti Jehova ulamuyanda akuti ulamulangania, taakwe naakakataazikana pe, pesi wakali kubotelwa alubo wakali kukkutisikana.—Int. 16:11.

14. Jehova utondeezya biyeni kuti ulatulangania akututondeezya luyando?

¹⁴ Jehova ulatuyanda alubo ulatulangania ikapati nitwasikilwa mapenzi mubuumi. Claire, a waba aaminyaka yiinda ku20 kabelekela kuBbeteli wakalimvwa katachigwasyi pe chiindi bamumpuli yakwe nibakasikilwa mapenzi kaatobelana. Wisi wakalebuka mubili, mwanike  wakwe wakagwisigwa mumbungano alubo bamumpuli yakwe teebakachilikwe mali pe andawu yakukkala. Jehova wakabalangania biyeni? Claire wakaamba kuti: “Jehova wakaba aachoonzyo chakuti bamumpuli yangu bazijana nzibayanda buzuba abuzuba. Chiindi aachiindi, Jehova wakali kubapa nzibayanda kwiinda mbundakali kuyeeyela. Ndikkala kandiyeeya Jehova mbaakatugwasya alubo tandizoolulubi pe luyando lwakwe. Kuyeeya zintu eezi kundigwasya kuti ndikkale kandibelekela Jehova kandibotelwa chiindi nindaswaana masunko.”

15. Nkamboonzi Davida naakalimvwa kali wakatalusigwa? (Langa chifanikisyo.)

¹⁵ “Ulandikatalusya.” Chimwi chiindi, Davida wakali kukataazikana akaambo kamapenzi amasunko ngaakali kuswaana. (Int. 18:​4-6) Pesi luyando lwaJehova lupati anzila njaakali kumulangania aayo zyakamukatalusya. Jehova wakatola Davida ‘kumacelelo aamweemvwe’ ‘akumasena aakulyookezyela aajisi maanzi’ naakamanide manguzu. Eezi zyakapa kuti Davida abe aamanguzu lubo akuti ayinkilile kunembo kubelekela Jehova kabotelwa.—Int. 18:​28-32.

16. Luyando lwaJehova lwakakukatalusya biyeni?

¹⁶ Munzila iikozyenie, mazubaano “nduyando lutamani lwa Jehova ilwapa kuti tutalobi,” chiindi nitwaswaana mapenzi mubuumi. (Malo. 3:22; Kol. 1:11) Atubone chikozyano chaRachel. Wakamana manguzu chiindi mulumaakwe naakamusiya anaakasiya Jehova muchiindi chakkorona. Jehova wakamugwasya biyeni? Wakaamba kuti: “Jehova wakaba aachoonzyo chakuti chiindi choonse ndilimvwe kandiyandikana. Wakandipa beenzuma, bakali kujana chiindi chakubaamwi andime, bakali kundeetela chakulya, kundisendela mameseji aasungwaazya amagwalo, bakali kumwemwetela alubo bakali kukkala kabandiyeezya kuti Jehova ulikundilangania. Chiindi choonse, ndilamulumba Jehova akaambo kakundipa mpuli mpati iili aaluyando.”

17. Nkamboonzi Davida naakaamba kuti taakwe chintu chibi nchayoowa?

¹⁷ “Kunyina cintu cibi ncondiyoowa, nkaambo yebo ulaandime.” Chiindi chiingi, buumi bwaDavida bwakali mungoozi alubo wakali aabasinkondonyina biingi bakali aanguzu. Nikuba oobo, luyando lwaJehova lwakapa kuti alimvwe kakwabililidwe. Davida wakabona kuti Jehova wakali aanguwe kufumbwa muchiimo nchaakabede alubo wakaba aachoonzyo chakuti unoomugwasya. Nkinkaako, wakayimba kati: “[Jehova] wakandivwuna kuzintu zyoonse izyakali kundiyoosya.” (Int. 34:4) Nikuba kuti chimwi chiindi Davida wakali kuyoowa, pesi wakazunda kuyoowa ooko akaambo kakuti Jehova wakali kumuyanda.

18. Kuziba kuti Jehova ulakuyanda kukusimya biyeni chiindi nuyoowede?

¹⁸ Kuziba kuti Jehova ulatuyanda kutusimya  biyeni nitwaswaana zyiimo ziyoosya? Umwi payona uutegwa Susi wakaamba mbaakalimvwa amulumaakwe chiindi mwanaabo mulombe naakalijaya. Wakati: “Kuti chimwi chintu chiyoosya chakuchitikila mubuumi, chilakonzya kupa kuti umvwe kuchisa akupa kuti ulimvwe kutachigwasyi. Pesi luyando lupati lwaJehova lwakapa kuti tulimvwe katukwabililidwe.” Rachel waambwa musule, wakaamba kuti: “Bumwi buzuba mansiku nindakayoowede alubo nindakakataazikene, ndakalila kandikomba kuli Jehova ajwi lilaajulu. Mbuli mbachita muzyali chiindi mwanaakwe nalila, nindakamana kukomba ndakalimvwa mbuli kuti Jehova watontozya moyo wangu akupa kuti ndibatame, mpawo ndakoona. Tandizoozilubi pe eezi.” Umwi mwaalu uutegwa Tasos wakakkala mujele kwaminyaka iili 4 akaambo kakuti wakakaka kunjila mulimu wachisooja. Jehova wakamulangania biyeni alubo wakatondeezya biyeni kuti ulamuyanda? Wakaamba kuti: “Jehova wakandipa zyoonse nzindakali kuyanda. Eezi zyakapa kuti ndibe aachoonzyo chakuti ndilakonzya kumusyoma chakumaninina. Alubo kwiinda mukubelesya muuya wakwe uusalala, Jehova wakapa kuti ndibotelwe nikuba kuti ndakali muchiimo chiyumu. Eezi zyakandigwasya kubona kuti, kuti ndakkala kandisyoma Jehova, ndinookkala kandibona mbandiyanda. Nkinkaako, ndakabweza bupayona bwachiindi choonse kandili mujele.”

SWENA AAFWIIFWI ALEZA UULAALUYANDO LUPATI

19. (a) Kuziba kuti Leza ulatuyanda kupa kuti tumubuzyeenzi chiindi nitukomba kulinguwe? (b) Ngaali majwi aapandulula mbulubede luyando lwaJehova nguyandisya? (Langa kabbokesi katii, “ Majwi Aatugwasya Kuti Tubone Mbatuyanda Jehova.”)

¹⁹ Zintu zyoonse zyakachitikila bamwi nzitwalanga-langa zitondeezya kuti Jehova, “Leza siluyando,” ulaandiswe. (2 Kor. 13:11) Jehova ulamuyanda umwi awumwi wesu kumugama. Tuli aachoonzyo chakuti ‘tuzyungulukidwe aluyando lwakwe lutamani.’ (Int. 32:10) Kuti twakkala katuyeeyesesya atala ambatutondeezya luyando lwakwe, tunoobona mbatulangania alubo tunooswena aafwiifwi anguwe. Tulakonzya kwaambuulaawe katwaangunukide katumubuzya mbutuyanda kugwasigwa aaluyando lwakwe. Tulakonzya kumubuzya zintu zyoonse zitukataazya katuli aachoonzyo chakuti ulatumvwisisisya akuti ulaachiyandisyo chakutugwasya.—Int. 145:​18, 19.

20. Luyando lwaJehova lutukwela biyeni kuti tuswene aafwiifwi anguwe?

²⁰ Mbuli mbutuyanda kuyota mulilo chiindi nikutontola, andiswe tuyanda kuti Jehova atutondeezye luyando lwakwe. Luyando lwaJehova luli aanguzu alubo ndupati. Nkinkaako, botelwa akaambo kakuti Jehova ulakuyanda. Anduwe utondeezye mbumuyanda Jehova kwiinda mukwaamba majwi aakuti: “Ndilamuyanda Jehova.”—Int. 116:1.