1. Nkamboonzi chimwi chiindi nitukonzya kuyoowa?

 CHIMWI chiindi, toonse tulayoowa. Kwiiya Bbayibbili kwakatwaangununa kuti tutayoowi bantu bafwide, madimoni azintu zitazoochitikile bantu muchiindi chilikunembo. Nikuba oobo, tulikupona muchiindi muli “zintu ziyoosya,” mbuli nkondo, kuvula kwamilandu amalwazi. (Lk. 21:11) Tulakonzya kuyoowa bantu kuswaanizya amfulumende zitatujati kabotu naakuti bamumpuli bakazya bukombi bwesu bwakasimpe. Bamwi balakonzya kuyoowa kuti tabazookonzyi pe kulisimya kusunko ndibaswaana naakuti ndibakonzya kuzooswaana muchiindi chilikunembo.

2. Pandulula chiimo chaDavida mbuchakabede chiindi naakali kuGati.

² Aali zimwi ziindi, Davida wakayoowa. Muchikozyano, Mwaami Sawulu naakali kumwaandila kuti amujaye, Davida wakasala kuchijila kumuunzi wamaFilisiti uutegwa Gati. Mwaami wakuGati uutegwa Akkisi wakamvwa kuti Davida wakali sinkondo ulaanguzu alubo wakali kulumbayizigwa mulwiimbo luti “wajaya makumi aazyuulu” zyamaFilisiti. Davida “wakayoowa kapati.” (1 Sam. 21:​10-12) Davida wakali kukataazikana kuti Mwaami Akkisi wakali kuzootyeni atala anguwe. Davida wakalizunda biyeni penzi lyakuyoowa?

3. Kweendelana alugwalo lwa Intembauzyo 56:​1-3, 11, Davida wakakuzunda biyeni kuyoowa?

³ Muli Intembauzyo chaandaano 56, Davida wakaamba mbaakali kulimvwa chiindi naakali kuGati. Muntembauzyo eeyi, Davida wakaamba kaambo kakali kupa kuti ayoowe alubo wakaamba chintu chakamugwasya kuti azunde kuyoowa. Chiindi naakali kuyoowa, Davida wakasyoma Jehova. (Bala Intembauzyo 56:​1-3, 11.) Wakali aatwaambo twakali kupa kuti asyome Jehova. Kagwasigwa aaJehova, Davida wakayeeya pulani yakali kukonzya kumugwasya njaakatayinachita pe mubuumi bwakwe. Wakachitaanga muntu uupengede alubo pulani eeyo yakazwidilila.  Kwiinda kuti Akkisi abone Davida mbuli sinkondonyina, pesi wakabona kuti zintu nzyaakali kuchita Davida zyakali kumusesemya nkinkaako, Davida wakakonzya kuchija.—1 Sam. 21:13–22:1.

4. Nga tulalusimya biyeni lusyomo lwesu muli Jehova? Amba chikozyano.

⁴ Andiswe tulakonzya kuzunda kuyoowa kuti twasyoma Jehova. Pesi nga tulalusimya biyeni lusyomo lwesu muli Jehova, kapati chiindi nituyoowede? Atubone chikozyano. Kuti wajatwa bumwi bulwazi, kumasaangunino ulakonzya kuyoowa. Pesi kuyoowa ooko kulakonzya kumana kuti wasyoma dokotela wako. Kulakonzeka kuti dokotela ooyo wakasilika bantu biingi bakali aabulwazi bukozyenie aabwako. Dokotela ulakonzya kukuswiilila akuchita zintu zitondeezya kuti ulakumvwisisisya. Alubo ulakonzya kukupa musamu wakagwasya bantu mbaakasilika. Munzila iikozyenie, tulakonzya kusimya lusyomo lwesu muli Jehova kwiinda mukulanga-langa zintu nzyaakachita kale, nzyalikuchita lino anzyatazootuchitile kunembo. Eezi nzizyo nzyaakachita Davida. Chiindi nitwanoolanga-langa aamwi majwi aali muli Intembauzyo chaandaano 56, yeeya atala ambukonzya kusimya lusyomo lwako muli Jehova ambukonzya kuzunda kuyoowa.

NZYAAKACHITA KALE JEHOVA

5. Niinzi nzyaakali kuyeeyesesya Davida kuti azunde kuyoowa? (Intembauzyo 56:​12, 13)

⁵ Nikuba kuti buumi bwaDavida bwakali mungoozi, pesi wakayeeyesesya atala azintu Jehova nzyaakali wamuchitila kale. (Bala Intembauzyo 56:​12, 13.) Eezi nzizyo nzyaakali kukkala kachita Davida mubuumi bwakwe. Muchikozyano, aali chimwi chiindi wakayeeyesesya atala azintu nzyaakalenga Jehova, eezi zyakagwasya Davida kuti abone kuti Jehova ulaamanguzu akuti ulabayanda bantu. (Int. 65:​6-9) Alubo wakayeeyesesya atala azintu Jehova nzyaakachitila bamwi. (Int. 31:19; 37:​25, 26) Alubo Davida wakayeeyesesya atala aJehova mbaakamugwasya lwakwe kumugama. Jehova wakamugwasya Davida alubo wakamukwabilila kuzwa kachili muniini. (Int. 22:​9, 10) Nisimpe, kuyeeyesesya nkwaakali kuchita Davida kwakamugwasya kuti asimye lusyomo lwakwe muli Jehova.

6. Chiindi nuyoowede, niinzi chikonzya kukugwasya kuti usyome Jehova?

 ⁶ Chiindi nuyoowede, libuzye kuti, ‘Niinzi Jehova nzyaakachita kale?’ Yeeyesesya atala azintu Jehova nzyaakalenga. Muchikozyano, kuti ‘twalangisisya’ Jehova mbalangania bayuni amaluba nikuba kuti zintu eezi teezyakalengwa muchikozyano chakwe akuti tazikonzyi pe kumukomba, tulasimya lusyomo lwesu lwakuti andiswe ulakonzya kutulangania. (Mt. 6:​25-32) Alubo yeeyesesya atala azintu Jehova nzyaakachitila bakombi bakwe. Ulakonzya kwiiya atala awumwi muntu wamuBbayibbili wakatondeezya lusyomo naakuti kubala atala azintu zyakachitikila umwi mukombi waLeza mazubaano. a Mukuyungizya, yeeyesesya atala aJehova mbaakakugwasya. Wakakukwela biyeni kuti uze mukasimpe? (Joh. 6:44) Wakazisandula biyeni nkombyo zyako? (1 Joh. 5:14) Buzuba abuzuba, ulikugwasigwa biyeni achipayizyo chaMwanaakwe ngwayandisya?—Ef. 1:7; Heb. 4:​14-16.

7. Zyakachitikila mupolofita Daniyele zyakamugwasya biyeni Vanessa kuti azunde kuyoowa?

⁷ Umwi muchizi uutegwa Vanessa, b wakuHaiti wakaswaana chiimo chiyoosya loko. Umwi mwaalumi wamuchilawu chakwe wakali kumufoonena buzuba abuzuba akumusendela mameseji kalikumusungilizya kuti awonaawe. Vanessa wakakaka. Pesi mwaalumi ooyo wakali wasaanguna kuchita zintu zipa kuti Vanessa ayoowe alubo wakamuyoosezya kumuchisa. Vanessa wakaamba kuti, “Ndakayoowa.” Niinzi nzyaakachita Vanessa kuti azunde kuyoowa? Wakabweza ntaamu kuti alikwabilile. Umwi mwaalu wakamusungwaazya kuti abuzye mapolisa. Alubo Vanessa wakayeeyesesya atala aJehova mbaakagwasya bakombi bakwe bachiindi. Wakaamba kuti, “Ndakasaanguna kuyeeya atala amupolofita Daniyele. Wakawaalilwa mumulindi mwakali balavu bakali aanzala nikuba kuti taakalikwe mulandu pe. Pesi Jehova wakamugwasya. Ndakakumbila Jehova kuti ape kuti mwaalumi ooyo ayimikile kundiyeeya akuti aleke kundikataazya. Kuzwa waawo, teendakachili kuyoowa pe.”—Dan. 6:​12-22.

NZYALIKUCHITA LINO JEHOVA

8. Davida wakali aachoonzyo chanzi? (Intembauzyo 56:8)

⁸ Nikuba kuti Davida wakali mungoozi yakali kukonzya kupa kuti ajayigwe chiindi naakali kuGati, pesi taakazumizya kuyoowa kuti kumuzunde. Wakasala kuyeeyesesya atala azintu Jehova nzyaakali kumuchitila aachiindi eecho. Davida wakali kubona Jehova mbaakali kumuzulwida, mbaakali kumukwabilila ambaakali kutondeezya kuti ulamumvwisisisya. (Bala Intembauzyo 56:8.) Alubo Davida wakabona Jehova mbaakamugwasya kabelesya beenzinyina basyomeka mbuli Jonatani aMupayizi Mupati Ahimelekki. (1 Sam. 20:​41, 42; 21:​6, 8, 9) Nikuba kuti Mwaami Sawulu wakali kuyanda kujeya Davida, pesi Davida wakachija. Davida wakali aachoonzyo chakuti Jehova wakalilizi sunko ndyaakali kuswaana akuti wakalizi kuti sunko eelyo lyakali kupa kuti amvwe biyeni.

9. Niinzi Jehova nzyabona muli umwi awumwi wesu?

⁹ Kuti waswaana sunko lipa kuti uyoowe, yeeya kuti Jehova ulilibwene sunko eelyo akuti ulizi mbulilikupa kuti ulimvwe. Muchikozyano, Jehova wakalibwene kuti ma-Israyeli bakali kujatwa munzila iitali kabotu ku-Ijipiti alubo wakali kwaabona “mapenzi” ngibakali kuswaana. (Kul. 3:7) Davida wakayimba kuti Jehova ulakubona “kupenga” kwakwe ‘amapenzi aakwe mapati.’ (Int. 31:7) Alubo bakombi baLeza nibakali kuswaana mapenzi nikuba kuti mapenzi aayo akabawo akaambo kakuti bakali kusala munzila yabufuba-fuba, Jehova “wakali  kupenga mumoyo awalo.” (Is. 63:9) Chiindi nuyoowede, Jehova ulamvwisisisya mbulimvwa alubo ulaachiyandisyo chakukugwasya kuti uzunde kuyoowa.

10. Nkamboonzi nuli aachoonzyo chakuti Jehova ulakuyanda akuti ulakugwasya kuti ulisimye chiindi nwaswaana sunko?

¹⁰ Kuti waswaana sunko liyoosya, ulakonzya kutabona Jehova mbalikukugwasya. Kuti kakuli oobo, mukumbile kuti akugwasye kubona mbalikukugwasya. (2 Bam. 6:​15-17) Kuzwa waawo, ulange-lange mibuzyo iitobela: Kuli nkani na naakuti nsandulo yakapegwa kumiswaangano yambungano yakakusimya? Kuli bbuku, vidiyo naakuti lwiimbo lwaBroadcasting na lwakakusugwaazya? Kuli umwi na wakakubuzya majwi aasungwaazya naakuti wakakubalila lugwalo lusungwaazya? Tulakonzya kutazibona zintu nzibatuchitila bakombima naakuti kutachibona kachiyandikana chakulya chamubukombi nchitujana. Pesi zintu eezi nzipo ziyandikana zizwa kuli Jehova. (Is. 65:13; Mk. 10:​29, 30) Zitondeezya kuti Jehova ulakuyanda kukugama. (Is. 49:​14-16) Alubo zitondeezya kuti uyanda kuti umusyome.

11. Niinzi chakagwasya Aida kuti azunde kuyoowa?

¹¹ Aida uukkala kuSenegal wakabona Jehova mbaakamugwasya chiindi naakaswaana sunko. Mbukunga nguwe mwana mupati mumpuli yabo, bazyali bakwe bakali kulangilila kuti abe aamali nyingi kuchitila kuti abagwasye. Pesi Aida nakawubya buumi bwakwe kuti akonzye kupayona, taakachilikwe mali nyingi pe. Bazyali bakwe bakamunyemena alubo bakasola nzyaakasala. Aida wakaamba kuti, “Ndakayoowa kuti teendakali kuzookonzya pe kugwasya bazyali bangu akuti muntu woonse wakali kuzoondikaka. Alubo ndakasola Jehova akaambo kakuti wakazumizya zintu eezi kuti zyiinkilile kunembo kubija.” Aida wakazoomvwa nkani kumiswaangano yambungano. Wakaamba kuti, “Sikwaambuula wakatuyeezya kuti Jehova ulaazi mapenzi woonse aatukataazya mumoyo. Kusungwaazigwa aabaalu abamwi kwakandigwasya mbichaani-mbichaani kubona kuti Jehova ulandiyanda. Ndakasaanguna kukomba kuli Jehova kandili aachoonzyo chakuti ulandigwasya alubo ndakalimvwa kandili aaluumuno chiindi nindakali kubona Jehova mbaakali kusandula nkombyo zyangu.”  Mukuya kwachiindi, Aida wakazoojana mulimu wakali kumufozya mali yakamugwasya kuti ayinkilile kunembo kapayona akuti agwasye bazyali bakwe abamwi. Wakaamba kuti, “Ndakayiya kusyoma Jehova chakumaninina. Lino, kuti ndamana kukomba kuyoowa koonse nga kwamana.”

NZYAZOOCHITA JEHOVA MUCHIINDI CHILIKUNEMBO

12. Kweendelana alugwalo lwa Intembauzyo 56:​9, Davida wakali aachoonzyo chanzi?

¹² Bala Intembauzyo 56:9. Vesi eeyi itondeezya chimwi chintu chakagwasya Davida kuti azunde kuyoowa. Nikuba kuti buumi bwakwe bwakali mungoozi, wakayeeyesesya atala azintu Jehova nzyaakali kuzoomuchitila kunembo. Davida wakalizi kuti Jehova wakali kuzoomugwasya aachiindi cheelede. Kwiinda zyoonse, Jehova wakaamba kuti Davida nguwe wakali kuzooba mwaami wama-Israyeli uutobela. (1 Sam. 16:​1, 13) Davida wakali kubona zisyomezyo zyaJehova mbuli kuti zyazuzikizigwa kale.

13. Tulakonzya kuba aachoonzyo chakuti Jehova uzootuchitilaanzi?

¹³ Jehova wakakusyomezyaanzi? Tatulangilili kuti Jehova atukwabilile kumapenzi woonse ngituswaana. c Nikuba oobo, kufumbwa masunko ngituswaana munyika eeyi yeendelezegwa aaSaatani, Jehova uzoowagwisya munyika mpya. (Is. 25:​7-9) Mulengi wesu uli aamanguzu aakubusya bafwide, aakutuponia akugwisya bantu boonse batukazya.—1 Joh. 4:4.

14. Niinzi nzitukonzya kuyeeyesesya?

¹⁴ Chiindi nuyoowede, yeeyesesya atala azintu Jehova nzyatazookuchitile kunembo. Yeeya atala ambutuyoolimvwa chiindi Saatani natazoonyonyoonwe, bantu babi nibatazoonyonyoonwe mpawo kuzoobe bantu baluleme achibi mbuchitazoomane mbichaani-mbichaani buzuba abuzuba. Pulogilamu yamuswaangano wabbooma yamu2014 yakatondeezya mbutukonzya kuyeeyesesya atala ambuziyoochitika zintu eezi. Aamuswaangano ooyu kwakali chitondeezyo chawumwi mwaalumi wakali kwaambuuzyania aampuli yakwe atala ambulukonzya kulembwa munzila iisiyene lugwalo lwa 2 Timoti 3:​1-5 kuti kakuli kuti lugwalo oolu lwaambuula atala ambubunoobede buumi muParadayizi. Wakati: “Kuzooba ziindi zibotezya munyika mpya, nkaambo bantu bazooyanda bamwi, bazooyandisya kasimpe, bazi mpubagolela, balibombya, balumbayizya Leza, baswiilila bazyali, balumba, basyomeka, bayandisya mpuli zyabo, bazuminana aabamwi, baambuula zintu zibotu atala abamwi, balinyona, bali aamoyo uubombede, bayanda bubotu, batawuzyi bamwi, bamvwisisisya, balibikka aansi, bayandisya Leza kwiinda zyakulikondelezya, bayanda Leza akumukomba alubo utalitantamuni kubantu bali boobu.” Nga wachijana chiindi na chakwaambuuzyania atala ambubunoobede buumi munyika mpya kuli aabamumpuli yako naakuti abakombinyokwe?

15. Niinzi chakagwasya Tanja nikuba kuti wakaliyoowede?

¹⁵ Umwi muchizi wakuNorth Macedonia uutegwa Tanja wakazunda kuyoowa kwiinda mukuyeeyesesya atala azilongezyo zilikunembo. Bazyali bakwe bakali kumukazya loko chiindi naakali kwiiya Bbayibbili. Wakaamba kuti: “Zimwi zintu nzindakali kuyoowa kuti zilakonzya kuchitika zyakachitika. Chiindi choonse nindakali kuzwa kumiswaangano baama bakali kunduuma. Bazyali bangu bakandiyoosezya kundijeya kuti ndaba Kamboni waJehova.” Kumamanino, Tanja wakazootandwa aang’anda. Wakachita biyeni? Wakaamba kuti: “Ndakayeeyesesya atala akubotelwa nkundakali kuzoojana kusikila kukabe kutamani kuti ndasala kusyomeka  kuli Jehova. Alubo ndakayeeyesesya atala azintu zyiingi Leza nzyatazoondipe munyika mpya kwiinda eezyo nzindakasweekelwa munyika eeyi akuti zintu zyoonse zitali kabotu zilikuchitika lino tuzooziluba.” Tanja wakakkala kasyomeka kuli Jehova. Alubo kwiinda mukugwasigwa aaJehova, wakajana ndawu yakukkala. Lino Tanja ukwetwe aamukwesu uusyomeka alubo balikubotelwa kabali aamwi mumulimu wachiindi choonse.

SIMYA LUSYOMO LWAKO LINO

16. Niinzi chikonzya kuzootugwasya kuti tukkale katuli aachibindi chiindi nitwazoobona zintu zyaambidwe muli Lukka 21:​26-28 kazili kuzuzikizigwa?

¹⁶ Muchiindi chamapenzi mapati, bantu biingi “bazoomana manguzu akaambo kakuyoowa.” Pesi bakombi baLeza banoobeteme alubo banooli aachibindi. (Bala Lukka 21:​26-28.) Nkamboonzi nitunooli aachibindi? Nkaambo tunooli twakayiya kusyoma Jehova. Tanja waambwa musule wakaamba kuti zyakamuchitikila zyakamugwasya kuti alibambile kuswaana zyiimo ziyumu. Wakaamba kuti: “Ndakayiya kuti taakwe chiimo pe chiyumina Jehova kuti atugwasye akutulongezya. Chimwi chiindi bantu batupenzya babonekaanga bali aamanguzu pesi Jehova ulaamanguzu miingi kwiinda mbabo. Alubo nikuba kuti sunko nditwaswaana lyayuma biyeni, lilamana.”

17. Lugwalo lwamunyaka wa2024 lutugwasya biyeni? (Langa chifanikisyo chili aachivumbyo.)

¹⁷ Kuli zintu zyiingi zipa kuti tuyoowe. Pesi mbuli Davida tatweelede kuzumizya kuyoowa kuti kutuzunde. Lugwalo lwamunyaka wa2024 ninkombyo yaDavida njaakakomba kuli Jehova kati: “Ciindi nendiyoowede, ndisyoma nduwe.” (Int. 56:3) Limwi bbuku lipandulula Bbayibbili lyaamba kuti atala avesi eeyi: “Davida taakali kukkala kayeeya zintu zipa kuti ayoowe naakuti kuyeeya mapenzi aakwe, pesi wakali kulangila kuli Ooyo uukonzya kumufutula.” Mumyeezi iitobela, yeeya atala alugwalo lwamunyaka ikapati chiindi nwazooswaana zyiimo ziyoosya. Lipe chiindi chakuyeeyesesya atala anzyaakachita Jehova chiindi, nzyalikuchita lino anzyazoochita muchiindi chilikunembo. Mbuli Davida, ulakonzya kwaamba kuti: “Ngu Leza ngondisyoma; tandiyoowede pe.”—Int. 56:4.