1. Niinzi chipa kuti buzuba bwaChiyubulusyo buyandikane loko? (Lukka 22:​19, 20)

 MUNYAKA amunyaka, bakombi baJehova babubona kabuyandikana loko buzuba bwakuyeeya lufu lwaKkristu. Mbubo buzuba buyandikana Jesu mbwakalayilila batobeli bakwe kuti kababuyeeya. (Bala Lukka 22:​19, 20.) Kuli twaambo twiingi tupa kuti tubulangilile aameso aasalala buzuba oobo. Atulange-lange tumwi.

2. Ntuutuli tumwi twaambo tupa kuti tuchilangilile aameso aasalala Chiyubulusyo?

² Chiyubulusyo chitugwasya kuti tuyeeyesesye atala ambuchiyandikana chinunuzyo chaJesu. Chituyeezya atala anzitukonzya kuchita kuti tutondeezye kuti tulachilumba chinunuzyo chaJesu. (2 Kor. 5:​14, 15) Alubo chitugwasya kuti tujane mweenya wakuti “tusungwaazyanie” abakwesu abachizi. (Rom. 1:12) Munyaka amunyaka, bakwesu biingi batachinjili miswaangano ngabanjila Chiyubulusyo. Bamwi ngababoola kuli Jehova akaambo kanzila njibatambulwaayo nibanjila Chiyubulusyo. Alubo bantu biingi nga basaanguna kwiiya Bbayibbili akaambo kazintu nzibabona anzibamvwa chiindi nibanjila Chiyubulusyo. Zyoonse eezi zipa kuti tuchibone kachiyandikana loko Chiyubulusyo.

3. Chiyubulusyo chitujatanisya biyeni abakombima bali munyika yoonse? (Langa chifanikisyo.)

³ Chiyubulusyo chijatanisya bakombi baJehova munyika yoonse. Bakamboni baJehova munyika yoonse nga babunganaamwi chiindi zuba nilyaamba kubbila kuti banjile Chiyubulusyo. Nga twamvwa nkani itugwasya kubona mbuchiyandikana chinunuzyo. Nga twiimba miimbo aabili aakutembawula Leza, nga tweenzya chinkwa awayini alubo nga twaamba kuti ameni kunkombyo zili 4. Muma-awa aali 24, mbungano zyoonse nga zyachita zintu eezi. Yeeyela kubotelwa nkwabaako, Jehova aJesu, chiindi nibatubona katuchita zintu eezi katujisini alubo katuli kubalemeka.

4. Tulayiyaanzi muchiiyo eechi?

 ⁴ Muchiiyo eechi, tulasandula mibuzyo iitobela: Kujana twayibambila biyeni myoyo yesu kuti tunjile Chiyubulusyo? Nga tulabagwasya biyeni bantu bali aachiyandisyo chakwiiya Bbayibbili kuti ambabo bagwasigwe aaChiyubulusyo? Alubo nga tulabagwasya biyeni bakwesu abachizi batachinjili miswaangano? Nsandulo zyamibuzyo eeyi zilatugwasya kuti tulibambile kuzoogwasigwa aaChiyubulusyo.

NGA TULAYIBAMBILA BIYENI MYOYO YESU?

5. (a) Nkamboonzi nitweelede kuyeeyesesya atala ambuchiyandikana chinunuzyo? (Intembauzyo 49:​7, 8) (b) Wayiyaanzi kuzwa mukavidiyo katii, Jesu Wakafwidaanzi?

⁵ Imwi nzila iiyandikana njitukonzya kulibambilaayo myoyo yesu nkwiinda mukuyeeyesesya atala ambuchiyandikana chinunuzyo chaJesu Kkristu. Teetwayinookonzya pe kulinununa atulikke kuzwa kuchibi alufu. (Bala Intembauzyo 49:​7, 8; alubo langa kavidiyo kati, Jesu Wakafwidaanzi?) a Nkinkaako, Jehova wakachita mabambe aakuti Jesu atununune. Nkulipeda kupati nkwaakachita Jehova aJesu kuti batununune. (Rom. 6:23) Kuti twayinkilila kunembo katuyeeyesesya atala akulipeda nkwaakachita Jehova aJesu, tulayungizya kuchibona kachiyandikana chinunuzyo. Tulalanga-langa zintu ziche zyakachitwa aaJehova aJesu kuti tunununwe. Pesi atusaangune kubona kuti chinunuzyo niinzi.

6. Chinunuzyo niinzi?

⁶ Chinunuzyo muulo uubbadalwa kuti kuboozegwe chintu chakasweeka. Muntu wakusaanguna, Adamu, wakalimaninide chiindi naakalengwa. Chiindi naakabisya, taakachilikwe bulangilizi bwakupona kukabe kutamani alubo wakapa kuti bana bakwe boonse ambabo batajani chilongezyo eechi. Jesu wakapa buumi bwakwe bumaninide kabuli chipayizyo kuti abbadale zintu Adamu nzyaakasweekelwa. Kwabuumi bwakwe boonse Jesu naakali aanyika, “taakwe chibi nchaakachita pe, alubo taakwe lweeno lwakajanika munkanwa lyakwe.” (1 Pet. 2:22) Jesu naakafwa, wakalimaninide mbuli mbaakabede Adamu katanabisya. Kwiinda mukupa buumi bwakwe, wakabbadala zintu nzyaakasweekelwa Adamu.—1 Kor. 15:45; 1 Tim. 2:6.

7. Ngaali masunko ngaakaswaana Jesu naakali aanyika?

⁷ Jesu wakakkala kaswiilila Wisi munzila iimaninide nikuba kuti wakaswaana masunko miingi naakali aanyika. Kachili mwana, wakeelede kuswiilila bazyali bakwe bakatamaninide nikuba kuti wakalimaninide. (Lk. 2:51) Kali waba mulombe, wakeelede kutantamuka zintu zyakali kukonzya kupa kuti aleke kuswiilila bazyali bakwe naakuti aleke kusyomeka kuli Jehova. Kali wakomena, wakeelede kutantamuka masunko aaSaatani Dyabbulosi kuswaanizya asunko ndyaakabuzigwa aaDyabbulosi lwakwe kuti aleke kusyomeka kuli Leza. (Mt. 4:​1-11) Saatani wakali kuyanda kuti Jesu abisye kuchitila kuti atakonzyi kupa buumi bwakwe kuti bube chinunuzyo.

8. Ngaali amwi masunko ngaakaswaana Jesu?

⁸ Kuli amwi masunko Jesu ngaakaswaana chiindi naakali kuchita mulimu wakwe waanyika. Wakapenzegwa alubo basinkondonyina bakeezya kumujaya. (Lk. 4:​28, 29; 13:31) Wakeelede kulisimya chiindi batobeli bakwe nibakali kulubizya. (Mk. 9:​33, 34) Naakali waamba kujayigwa, wakapenzegwa alubo wakafubaazigwa. Kuzwa waawo, wakajayigwa munzila iichisa loko alubo wakajayigwa mbuli chigwebenga. (Heb. 12:​1-3) Naakali aachisamu chakupenzezya, wakeelede kulisimya kusunko lyakwe lyamamanino katakwabililidwe aaJehova. b—Mt. 27:46.

9. Kupa buumi bwakwe nkwaakachita Jesu kuti atununune kupa kuti tuchiteenzi? (1 Petro 1:8)

 ⁹ Zilaantanganana kuti Jesu wakaswaana mapenzi miingi loko chiindi naakali kuyanda kupa buumi bwakwe kuti bube chinunuzyo. Kuti twayeeyesesya atala akulipeda nkwaakachita Jesu kuti atufwide, zipa kuti tumuyande loko.—Bala 1 Petro 1:8.

10. Niinzi Jehova nzyaakachita kuti atupe chinunuzyo?

¹⁰ Kutegwani atala aJehova? Niinzi nzyaakalipeda kuchita Jehova kuchitila kuti Jesu atununune? Jehova aJesu bakali kumvwanana loko mbuli mbachita wisi amwanaakwe. (Tus. 8:30) Zilaantanganana kuti zyakamuchisa loko Jehova chiindi naakali kubona Jesu kali kulisimya kumasunko miingi aanyika. Nichoonzyo, zyakali kumuchisa loko Jehova kubona Mwanaakwe katali kujatwa kabotu, kukakwa alubo kali kusunkwa.

11. Amba chikozyano chitondeezya Jehova mbaakalimvwa chiindi Jesu naakajayigwa.

¹¹ Muzyali woonse wakafwidwa aamwana ulikuzi mbukuchisa kufwidwa. Tuli aalusyomo lusimide lwakuti bafwide bazoobuka, pesi eezi tazipi kuti tuleke kumvwa kuchisa chiindi nitwafwidwa muntu ngutuyanda. Chikozyano eechi chitugwasya kumvwisisisya Jehova mbaakamvwa kuchisa chiindi naakabona Mwanaakwe ngwayandisya kali kupenzegwa anaakafwa mu33 C.E. c—Mt. 3:17.

12. Niinzi nzitukonzya kuchita mumviki ziche buzuba bwaChiyubulusyo kabutanasika?

¹² Kuzwa lino kuyoosika muchiindi chaChiyubulusyo, ulakonzya kubala akuyanduulisisya atala achinunuzyo chiindi nuli aawulikke naakuti nimuli kuchita Kukomba Kwampuli. Belesya Bbuku Ligwasya Kuvwuntauzya lya Bakamboni ba Jehova naakuti ubelesye amwi mabbuku aapandulula Bbayibbili kuchitila kuti uyimvwisisisye kabotu nkani eeyi. d Alubo baachoonzyo chakuti watobelezya pulogilamu yakubala Bbayibbili muchiindi chaChiyubulusyo iinga ili mukabbuku kategwa Buumi Bwesu bwachiKristu Amulimu Wesu—Kabbuku Kamuswaangano. Mubuzuba bwaChiyubulusyo, utalubi kweebela pulogilamu iiyandikana yaKukomba Kwakuseeni. Kuti twabambila myoyo yesu kuti tuzoonjile Chiyubulusyo, nga twalibambila kugwasya bantu bali aachiyandisyo chakwiiya Bbayibbili kuti ambabo bazoogwasigwe aaChiyubulusyo.—Ezr. 7:10.

 GWASYA BAMWI KUTI BAGWASIGWE AACHIYUBULUSYO

13. Nga tulabagwasya biyeni bamwi kuti bagwasigwe aaChiyubulusyo?

¹³ Nga tulabagwasya biyeni bamwi kuti bagwasigwe aaChiyubulusyo? Nzila yakusaanguna, nkubatamba. Tulakonzya kulembaansi bamwi bantu mbituyanda kuzootamba kuyungizya aali baabo mbitukkala katubona mumulimu wakukambawuka. Bantu aaba balakonzya kuswaanizya babbululu besu, mbitubelekaabo, mbitwiiyaabo kuchikolo abamwi. Kuti katuli aamapepa mache aakubatamba, tulakonzya kubasendela linki iibatola aawebbusayiti yesu. Tulakonzya kugamba kuzoobona bantu biingi kabasika kuChiyubulusyo.—Muk. 11:6.

14. Amba chikozyano chitugwasya kuti tutakulangilaansi kutamba bantu mbituzi kuChiyubulusyo.

¹⁴ Tatweelede kukulangilaansi kutamba bantu nkutuchita. Bumwi buzuba, muchizi uukwetwe aamwaalumi uutali Kamboni, wakagamba chiindi mulumaakwe naakamubuzya kuti uyanda kuzoonjilaamwi anguwe Chiyubulusyo. Nkamboonzi muchizi ooyu naakagamba? Nkaambo kwaminyaka myiingi, wakali kusungwaazya mulumaakwe kuti anjile Chiyubulusyo pesi taakwe naakazumina pe. Niinzi chakapa kuti mwaalumi ooyu ayande kunjila Chiyubulusyo? Wakaamba kuti wakapegwa kapepa kakutamba awumwi mwaalu ngwaakazibenaawe. Mwaalumi ooyu wakazoonjila Chiyubulusyo mumunyaka ooyo ayimwi minyaka yakazootobela.

15. Niinzi nzitweelede kukkala katuyeeya chiindi nitutamba bantu kuChiyubulusyo?

¹⁵ Kulayandikana kuti tukkale katuzi kuti bantu mbitutamba ngabali aamibuzyo ikapati kuti kabatananjila miswaangano yesu. Tulakonzya kuyeeyela mibuzyo njibakonzya kubaayo mpawo tulibambile kubasandula. (Kol. 4:6) Muchikozyano, bamwi balakonzya kubuzya kuti: ‘Niinzi zitakachitike kuChiyubulusyo?’ ‘Chilatola chiindi chilamfu biyeni?’ ‘Kuzwaatwa biyeni?’ ‘Kuli mali na yeelede kubbadalwa kuti ndinjile?’ ‘Kweendelezegwa ndido yamali na?’ Chiindi nituli kutamba muntu kuChiyubulusyo, tulakonzya kumubuzya kuti: “Kuli mibuzyo njulaayo na?” Kuti kalaayo, tulakonzya kumusandula. Tulakonzya kubelesya kavidiyo  kategwa Yeeya Lufu lwaJesu akati, Niinzi Cicitika kuN’anda yaBwami? kuchitila kuti tumugwasye kubona mbiichitwa miswaangano yesu. Alubo chiiyo 28 chabbuku litegwa Mbukonzya Kubotelwa Mubuumi Kukabe Kutamani! chili aatwaambo tubotu loko ntutukonzya kubelesya.

16. Njiili imwi mibuzyo njibakonzya kubaayo aabo banjila Chiyubulusyo?

¹⁶ Nichamana Chiyubulusyo, bapya balakonzya kuba aamibuzyo iimbi. Balakonzya kubuzya kuti, Nkamboonzi nikutakwe muntu walya chinkwa akunywa wayini naakuti nkamboonzi nikwalya bantu bache kupela akunywa wayini? (Kuti kabaliwo balya akunywa.) Balakonzya kuyanda kuziba kuti tuchichita tungane Chiyubulusyo. Alubo balakonzya kubuzya kuti miswaangano yaBakamboni baJehova ichitwa munzila iikozyenie na aChiyubulusyo. Nikuba kuti twaambo twiingi ngatwapandululwa munkani yaChiyubulusyo, pesi bapya ngabachiyanda kupandulwidwa zyiingi. Chiiyo chijanika aajw.org chitii, “Nkamboonzi Bakamboni baJehova Nibachita Mulalilo waMwaami Munzila Iisiyene Azimwi Zikombelo?” chilakonzya kutugwasya kuti tusandule iimwi mibuzyo njibakonzya kubaayo. Tuyanda kuchita zyoonse nzitukonzya katutananjila Chiyubulusyo, njitwanjila anitwamana kuti tugwasye aabo bali “aamyoyo iilibambilide kujana buumi butamani” kuti bagwasigwe aaChiyubulusyo.—Mil. 13:48.

GWASYA AABO BATACHINJILI MISWAANGANO

17. Niinzi baalu nzibakonzya kuchita kuti bagwasye aabo batachinjili miswaangano? (Ezekieli 34:​12, 16)

¹⁷ Muchiindi chaChiyubulusyo, baalu nga balabagwasya biyeni bakwesu abachizi batachinjili miswaangano? Balakonzya kutondeezya kuti bali aandaba ambabo. (Bala Ezekieli 34:​12, 16.) Kabutanasika buzuba bwaChiyubulusyo, balakonzya kubafoonena naakuti kubaswaya. Balakonzya kubabuzya kuti balabayanda akuti bali aachiyandisyo chakubagwasya kufumbwa mpubayanda kugwasigwa. Balakonzya kubatamba kuti bazoonjile Chiyubulusyo. Kuti banjila Chiyubulusyo, amubatambule kabotu. Nichamana Chiyubulusyo, baalu balakonzya kwiinkilila kunembo kubafoonena bakwesu abachizi aaba alubo beezye anzila zyoonse  kuti babagwasye mubukombi kuchitila kuti baboole lubo kuli Jehova.—1 Pet. 2:25.

18. Kujana toonse twabagwasya biyeni bakwesu abachizi batachinjili miswaangano? (Baroma 12:10)

¹⁸ Toonse mumbungano tulakonzya kugwasya bakwesu abachizi batachinjili miswaangano kuti bazoonjile Chiyubulusyo. Biyeni? Tulakonzya kubatondeezya luyando, luzyalo akubalemeka. (Bala Baroma 12:10.) Tweelede kuyeeya kuti teekwali kuuba pe kuti banjile miswaangano. Kulakonzeka kuti bakali kuyoowa kuti tuzoobatambula kabotu na. e Tatweelede kubabuzya mibuzyo iipa kuti babe aabweeme naakuti kwaamba zintu zikonzya kubachisa. (1 Tes. 5:11) Bakwesu abachizi aaba mbakombima. Tulabotelwa kuti basika kuti tuzookombe Jehova katulaamwi lubo.—Int. 119:176; Mil. 20:35.

19. Mbuubuli bubotu mbutujana akaambo kakuyeeya lufu lwaJesu?

¹⁹ Tulamulumba Jesu akaambo kakuti wakatusiila mulawu wakuti tuyeeye lufu lwakwe munyaka amunyaka alubo tulamvwisisisya kuti nkamboonzi nikuyandikana kuchita oobo. Chiindi nituchita oobo, tulagwasikana lwesu alubo nga twagwasya bamwi munzila zisiyene-siyene. (Is. 48:​17, 18) Nga twayungizya kumuyanda Jehova aJesu. Nga tulikutondeezya kuti tulazilumba nzibakatuchitila. Nga twajatana abakombima. Alubo nga twagwasya bamwi kuti ambabo babone zilongezyo nzituyoojana akaambo kachinunuzyo. Atuchite zintu zyoonse nzitukonzya kuti tulibambile kunjila Chiyubulusyo munyaka uuno mubuzuba buyandikana loko bwamunyaka.