1. Bantu biingi mazubaano nziizili zintu nzibabikkila maanu loko?

 KULAKONZEKA kuti wakazibona kuti bantu biingi mazubaano balibikkila maanu loko kwiinda kuti babikkile bamwi maanu. Muchikozyano, bamwi babelesya intaneti kuti balidunde atala ambubabede alubo nga babikka zintu nzibakazwidilila mubuumi kuti bamwi bazibone. Nikuba oobo, mbache loko bantu bamupa bulemu Jehova Leza. Muchiiyo eechi, tulalanga-langa kuti chaambaanzi loko kupa Jehova bulemu akuti niinzi zikonzya kutugwasya kuti tumupe bulemu. Alubo tulabona mbutukonzya kumupa bulemu bumweelede Leza ambatazoolipe bulemu zina lyakwe muchiindi chilikunembo.

CHAAMBAANZI KUPA JEHOVA BULEMU?

2. Jehova wakabutondeezya biyeni bulemu bwakwe kuChilundu chaSinayi? (Langa chifanikisyo chili aachivumbyo.)

² Bulemu niinzi? MuBbayibbili bbala lyakuti “bulemu” lilakonzya kwaamba kufumbwa chintu chipa kuti umwi muntu ayemuzike. Kakwiindide chiindi chifwiifwi ma-Israyeli kabali bazwa kubuzike ku-Ijipita, Jehova wakatondeezya bulemu bwakwe. Muchikozyano, ma-Israyeli bakabunganaamwi aafwiifwi aChilundu chaSinayi kuti bamvwe nzyaakali kuyanda kubabuzya Leza. Aachilundu kwakaba joba lisiya mbi. Kakutanayinda chiindi, nyika yakazuzuma changuzu alubo kwakaba kudilima atulabi akulila kupati kwamweembo. (Kul. 19:​16-18; 24:17; Int. 68:8) Chiindi Jehova naakachita zintu eezi, kulakonzeka kuti ma-Israyeli bakagamba nibakabona nguzu nzyalaazyo.

3. Tumupa biyeni bulemu Jehova?

³ Kutegwani abantu? Tulakonzya na kumupa bulemu Jehova? Iiyi, tulakonzya. Imwi nzila njitukonzya kumupaayo bulemu nkwiinda mukubuzya bamwi atala amanguzu aagambya ngalaawo abuntu bwakwe bubotu. Alubo chiindi bamwi nibatulumbayizya  akaambo kazimwi zintu nzitwachita, tutondeezya kuti tupa Leza bulemu kwiinda mukwaamba kuti nguwe uutupa manguzu aakuti tukonzye kuchita zintu eezyo. (Is. 26:12) Mwaami Davida wakali chikozyano chibotu munkani yakupa Jehova bulemu. Naakali kukomba kunembo lyambungano yama-Israyeli, Davida wakaamba kuti atala aLeza: “Yebo O Jehova, bupati, nguzu, bweebesi, lulemeko abulemu nzizyako, nkaambo zintu zyoonse kujulu alimwi aanyika nzizyako.” Naakamanisya kukomba Davida, “mbungano yoonse yakatembaula Jehova.”—1 Mak. 29:​11, 20.

4. Jesu wakatondeezya biyeni kuti wakali kumupa bulemu Jehova?

⁴ Jesu naakali aanyika, wakali kumupa bulemu Wisi kwiinda mukwaamba kuti nguwe wakali kumupa manguzu aakuti achite zigambyo. (Mk. 5:​18-20) Alubo Jesu wakamupa bulemu Jehova kwiinda mukubuzya bamwi atala aWisi anzila njaakali kubajataayo bantu. Aali chimwi chiindi, Jesu wakali kuyiisya muchikombelo, aakati kabaswiilizi bakwe kwakali umwi mwanakazi wakali aadimoni kwaminyaka iili 18. Dimoni eelyo lyakapede kuti mwanakazi ooyo agogomane zyakuti taakali kukonzya pe koololoka. Wakali muchiimo chiyumu mwanakazi ooyu! Naakamweetelela, Jesu wakayinka kuyoowambuulaawe, alubo munzila yaluzyalo wakamubuzya kuti: “Yoomwanakazi, waangununwa kubulwazi bwako.” Kuzwa waawo, wakamubikka maboko, mpawo mwanakazi ooyo wakoololoka mpawaawo alubo “wakasaanguna kulumbayizya Leza.” Mwanakazi ooyo wakapona mpawo wakasima lubo. (Lk. 13:​10-13) Kuli kaambo kabotu kakapa kuti mwanakazi ooyo alumbayizye Jehova, andiswe mbutweelede kuchita.

NIINZI CHIPA KUTI TUMUPE BULEMU JEHOVA?

5. Ntuutuli twaambo tupa kuti tumulemeke Jehova?

⁵ Tumupa bulemu Jehova akaambo kakuti tulamulemeka kazizwa aansi aamoyo. Kuli twaambo twiingi tupa kuti tumulemeke. Jehova ngusinguzuzyoonse alubo ulaamanguzu miingi loko. (Int. 96:​4-7) Busongo bwakwe bulalibonia chaantanganana muzintu nzyaakalenga. Jehova nguwe wakatupa buumi azintu zyoonse zipa kuti tupone. (Chi. 4:11) Jehova ulasyomeka. (Chi. 15:4) Zintu zyoonse nzyachita zilazwidilila, alubo ukkala kazuzikizya zisyomezyo zyakwe. (Jos. 23:14) Nzizyo zyakapa kuti mupolofita Jeremiya aambe kuti atala aJehova: “Akati kabasongo boonse bamumasi alimwi aakati kamami aabo oonse, kunyina naba omwe uuli mbuli nduwe”! (Jer. 10:​6, 7) Nkinkaako, tulaatwaambo twiingi loko tupa kuti tumulemeke Taateesu wakujulu. Tatugoleli aakumulemeka kupela pe Jehova, pesi tulamuyanda.

6. Niinzi chipa kuti tumuyande Jehova?

⁶ Tumupa bulemu Jehova akaambo kakuti tumuyanda loko. Tulamuyanda Jehova akaambo kakuti ulaabuntu bubotu. Jehova ngusiluzyalo alubo ngusilweetelelo. (Int. 103:13; Is. 49:15) Chiindi nitumvwa kuchisa, anguwe nga wamvwa kuchisa. (Zek. 2:8) Jehova wakapa kuti kube kuuba kuti tumvwanane aanguwe akuti tube beenzinyina. (Int. 25:14; Mil. 17:27) Alubo Jehova ulalibombya, nkaambo “ulooka kuti alange julu anyika, nguubusya muntu uupengede kuzwa mulusuko.” (Int. 113:​6, 7) Akaambo katwaambo ootu, ngazyapa kuti tumupe bulemu Leza wesu mupati.—Int. 86:12.

7. Nguuli mweenya uuyandikana ngutulaawo?

⁷ Tumupa bulemu Jehova akaambo kakuti tuyanda kuti bamwi bamuzibe. Bantu biingi tabakazi pe kasimpe atala aJehova. Nkamboonzi? Akaambo kakuti Saatani wakoofwaazya mizeezo yabo kwiinda mukwaambuula manwa atala aJehova. (2 Kor. 4:4) Saatani wakaamba manwa aakuti bantu bayeeye kuti Jehova ubweedezya chibi kuchibi, takwe ndaba pe ambabo akuti nguwe uulikupa kuti munyika muzule mapenzi. Pesi iswe, tulikazi kasimpe atala  aLeza wesu. Tulaamweenya wakubuzya bamwi kasimpe atala aLeza akubagwasya kuti ambabo bamupe bulemu. (Is. 43:10) Intembauzyo 96 yaambuula atala akumupa bulemu Jehova. Chiindi nitwanoolanga-langa amwi mavesi aali muchaandaano eechi, tulabona mbutukonzya kumupa bulemu bumweelede Jehova.

KUJANA TWAMUPA BIYENI BULEMU BUMWEELEDE JEHOVA?

8. Nziizili nzitweelede kuchita kuti tutondeezye kuti tumupa bulemu Jehova? (Int. 96:​1-3)

⁸ Bala Intembauzyo 96:​1-3. Tulakonzya kumupa bulemu Jehova kwiinda muzintu nzitwaambuula atala anguwe. Mavesi aaya aamba kuti “amumwiimbile Jehova,” “amutembaule zina lyakwe,” “amwaambilizye makani mabotu aalufwutuko lwakwe” alubo “amwaambilizye bulemu bwakwe akati kamasi.” Kuti twachita zintu eezi, ngatuli kumupa bulemu Taateesu wakujulu. MaJuda basyomeka amaKkristu bamumwaanda wamunyaka wakusaanguna bakali aachiyandisyo chakubuzya bamwi atala abuntu bubotu mbwalaabo Jehova akubabuzya atala azintu nzibotu nzyaakabachitila. (Dan. 3:​16-18; Mil. 4:29) Kujana twazichita biyeni eezi andiswe?

9-10. Twiiyaanzi kuli zyakachitikila Angelena? (Langa chifanikisyo.)

⁹ Atubone zyakachitikila umwi muchizi uukkala ku-United States uutegwa Angelena. a Wakatondeezya chibindi alubo wakaambuula atala abubotu bwaJehova kumulimu. Mbukunga wakali mupya kukkampani eeyi alubo kwakali bamwi bakali bapya, kwakachitwa mabambe aakuti babelesi boonse babungane aamwi kuchitila kuti bazibane kabotu. Angelena wakasala mapikicha aakutondeezya bamwi kuti babone mbabotelwa akaambo kakuba Kamboni waJehova. Nikuba oobo, kachitanasika chiindi chakuti aambuule, umwi mubelesinyina wachaalumi wakanyampuka mpawo wakaamba kuti wakakomezegwa aaBakamboni baJehova. Mwaalumi ooyo wakasaanguna kwaambuula makani mabi atala anzitusyoma. Angelena wakaamba kuti: “Ndakayoowa. Mpawo ndakalibuzya kuti: ‘Ndilamulekela na muntu ooyu kuti aambe makani aakubeja atala aJehova? Naakuti ndeelede kubabuzya choonzyo mbabede Jehova?’”

¹⁰ Chiindi mwaalumi ooyo naakamanisya kwaambuula, Angelena wakakombela mumoyo. Kuzwa waawo, wakabuzya mwaalumi ooyo  munzila yaluzyalo kuti: “Andime ndakakomezegwa mbuli nduwe. Andime ndakakomezegwa aaBakamboni baJehova, ambuli sunu ndichili Kamboni.” Nikuba kuti chiimo eechi chakali chiyumu, pesi Angelena wakabatama alubo wakatondeezya bamwi mapikicha ngaakabweza nibakali kuchita zintu zyamubukombi kalaamwi abakombinyina kabali kubotelwa alubo wakayiminina nzyasyoma munzila yabupampu. (1 Pet. 3:15) Njiili mpindu yakaba? Naakamaninsya kwaambuula Angelena, mwaalumi ooyo anguwe wakabatama. Mpawo mubelesinyina ooyo wakazoozumina kuti kuli bubotu mbwaakajana anguwe naakachili muniini kachiliswaanizya aaBakamboni baJehova. Angelena wakaamba kuti: “Kulayandikana kuti twiiminine Jehova. Nchilongezyo biya kwaambuula atala azina lyakwe.” Andiswe tuli aachilongezyo chakulumbayizya Jehova achakumupa bulemu nikuba bamwi kabali kwaambuula zibi atala anguwe.

11. Kuzwa chiindi bakombi baLeza bakasimpe batondeezya biyeni kuti batobelezya malayilile aali muli Intembauzyo 96:8?

¹¹ Bala Intembauzyo 96:8.Tulakonzya kumupa bulemu Jehova kwiinda mukumupa zintu zyesu. Bakombi baJehova bakasimpe bakkala kabamulemeka Jehova kwiinda mukumupa zintu nzibalaazyo. (Tus. 3:9) Muchikozyano, ma-Israyeli bakasanga zintu zyakali kuyandikana kuti kuyakwe akubambulula tempele. (2 Bam. 12:​4, 5; 1 Mak. 29:​3-9) Basikwiiya baKkristu bakagwasilizya Jesu abaapostoli bakwe ‘azintu zyabo.’ (Lk. 8:​1-3) MaKkristu bamumwaanda wamunyaka wakusaanguna ambabo bakasanga zintu nzibakalaazyo kuti bagwasye bakombinyina bakali munzala. (Mil. 11:​27-29) Andiswe mazubaano, tulakonzya kumupa bulemu Jehova kwiinda mukulipeda kusanga.

12. Zintu nzitusanga zimupa biyeni bulemu Jehova? (Langa chifanikisyo.)

¹² Atubone chikozyano chimwi chitondeezya zintu nzitusanga mbuzimupa bulemu Jehova. Mulipoti imwi yamu 2020, kwakaambwa kuti muZimbabwe kwakaba bbalangwe lyakatola chiindi chilamfu. Bantu biingi bakali munzala, kuswaanizya amuchizi uutegwa Prisca. Nikuba kuti kwakali bbalangwe, Prisca taakaleka pe kuya kukukambawuka muli Bwatatu amuli Bwasanu, nikuba muchiindi chakulima. Basimayakilane bakwe bakali kumuseka akaambo kakuti wakali kwiinka kukukambawuka kwiinda kuti ayinke kumuunda, bakali kuti, “uzoofwa aanzala.” Prisca wakali kubasandula kati, “Jehova tabalekelezyi pe bakombi bakwe.” Kakutanayinda chiindi,  Prisca wakapegwa chakulya azimwi ziyandikana ambunga. Mbunga yakakonzya kumupa chakulya eecho Prisca abamwi akaambo kazintu nzitusanga. Basimayakilane baPrisca bakagamba, mpawo bakamubuzya kuti, “Nichoonzyo Leza taakakulekelezya pe, andiswe tuyanda kwiiya zyiingi atala aLeza.” Basimayakilane bakwe bali 7 bakasaanguna kunjila miswaangano yambungano.

13. Nzila njitulijataayo imupa biyeni bulemu Jehova? (Intembauzyo 96:9)

¹³ Bala Intembauzyo 96:9. Tulakonzya kumupa bulemu Jehova kwiinda munzila njitulijataayo. Bapayizi bakali kubelekela mutente lyakuswaanganina alubo mukuya kwachiindi mutempele lyaJehova, bakeelede kusamba. (Kul. 40:​30-32) Andiswe tweelede kusamba alubo tweelede kulijata munzila iilikabotu. (Int. 24:​3, 4; 1 Pet. 1:​15, 16) Tweelede kubeleka changuzu kuti tuzwaatunune “buntu bwachiindi,” chaamba mizeezo iitali kabotu amichito iitali kabotu alubo tuzwaate “buntu bupya” chaamba kuba aamizeezo iilikabotu akuchita zintu munzila iibotezya Jehova. (Kol. 3:​9, 10) Kwiinda mukugwasigwa aaJehova, nikuba muntu wiindilide mukutalijata kabotu amuntu uuyandisya zyankondo ulakonzya kuchincha akuzwaata buntu bupya.

14. Twiiyaanzi kuli zyakachitikila Jack? (Langa chifanikisyo.)

¹⁴ Atubone zyakachitikila umwi mwaalumi uutegwa Jack, mwaalumi ooyu wakali kuyandisya zyakulwana alubo wakali kuyoosya. Bantu bakamupa kazina kakuti Dimoni. Akaambo kamilandu njaakachita, Jack wakagwechelwa lufu. Nikuba oobo, naakali kulindila kuti mazuba aakwe akujayigwa asike, wakazumina kwiiya Bbayibbili awumwi mukwesu wakali kuswaya kujele nkwaakabede. Nikuba kuti wakachita zibi zyiingi loko, Jack wakazwaatununa buntu bwachiindi alubo wakazoobbabbatizigwa. Jack wakachincha zyakuti buzuba nibwakasika bwakuti ajayigwe, bamwi magadijele yakabeenda misozi nibakali kwaambuulaawe kamamanino. Umwi musoja wakali kubeleka aajele wakaamba kuti: “Jack wakali munyama mujele eeli. Pesi lino nimbelele yamuntu.” Kakuli kwiinda mviki Jack kali wajayigwa, bakwesu bakabweeda kujele eelyo kuti bakachitisye miswaangano mpawo bakabona umwi musungwa wakanjila miswaangano kakusaanguna. Niinzi zyakapa kuti musungwa ooyu anjile miswaangano? Wakaamba kuti wakagamba naakabona Jack mbaakachincha alubo wakayanda kuziba kuti niinzi nzyakeelede kuchita kuti akombe Jehova. Zili  aantanganana kuti nzila njitulijataayo imupa bulemu Taateesu wakujulu!—1 Pet. 2:12.

JEHOVA UYOOLIPA BIYENI BULEMU ZINA LYAKWE MUCHIINDI CHILIKUNEMBO?

15. Muchiindi chilikunembo, Jehova uyoolisalazya biyeni zina lyakwe munzila iimaninide? (Intembauzyo 96:​10-13)

¹⁵ Bala Intembauzyo 96:​10-13. Mavesi aaya aakumamanino aa Intembauzyo 96 apandulula kuti Jehova muBetesi alubo Mwaami uululeme. Jehova uzoolipa biyeni bulemu zina lyakwe muchiindi chilikunembo? Kwiinda mukweeta bululami. Lino-lino, Jehova uzoonyonyoona Bbabbiloni Mupati akaambo kakuti ulikupa kuti zina lyakwe lisalala lisampawulwe. (Chi. 17:​5, 16; 19:​1, 2) Bamwi nibaakubona Bbabbiloni Mupati kalikunyonyoonwa, balakonzya kuzooza mubukombi bwakasimpe. Chamamanino, lya-Amagedoni, Jehova uzoonyonyoona bweende bwanyika eeyi bwaSaatani abaabo boonse bali kubbazu lyakwe, uzoobanyonyoona aabo bakazya bweendelezi bwakwe alubo basampawula zina lyakwe pesi uzoofutula aabo bamuyanda abamuswiilila alubo bamupa bulemu. (Mk. 8:38; 2 Tes. 1:​6-10) Nikwaakwiinda kusunkwa kwamamanino minyaka iili 1 000 kayili yamana, Jehova unooli walisalazya chakumaninina zina lyakwe. (Chi. 20:​7-10) Aachiindi eecho, “nyika izoozula luzibo lwabulemu bwaJehova mbuli maanzi mbaazuzya lwizi.”—Hab. 2:14.

16. Ukanzide kuchitaanzi? (Langa chifanikisyo.)

¹⁶ Tuchilangilila aameso aasalala chiindi aawo muntu woonse natazoolipe bulemu bulyeelede zina lyaJehova! Katuchilindila chiindi eecho, tulakonzya kuchita zyoonse nzitukonzya kuti tumupe bulemu Leza wesu kufumbwa mputwajana mweenya. Kuti tukonzye kuzichita eezi, bamuKabunga Keendelezya bakasala Intembauzyo 96:8 kuti ibe lugwalo lwamunyaka wamu 2025: “Amupe Jehova bulemu ibweelede zina lyakwe.”