CHIIYO 4
LWIIMBO 18 Kulumba Akaambo ka Chinunuzyo
Chinunuzyo Chituyiisyaanzi?
“Leza wakatutondeezya luyando lwakwe.”—1 JOHN 4:9.
NZITUTAYIYE
Tulayiya buntu bubotu Jehova Leza aJesu Kkristu mbubakatondeezya nibakatupa chinunuzyo.
1. Kujanika kuChiyubulusyo chalufu lwaKkristu munyaka amunyaka kutugwasya biyeni?
JEHOVA wakatupa chipo chiyandikana loko naakatuma Mwanaakwe kuti atufwide. (2 Kor. 9:15) Akaambo kakuti Jesu wakatufwida, tulakonzya kuba aabweenzuma bulikabotu aJehova Leza. Alubo tulaabulangilizi bwakuzoopona kukabe kutamani. Tulaatwaambo twiingi tupa kuti tumulumbe Jehova wakatupa chinunuzyo akaambo kakuti ulatuyanda. (Rom. 5:8) Kuti atugwasye kuti tuchibone kachiyandikana alubo kuti tutachiboni kachitagwasyi chinunuzyo, Jesu wakatulayilila kuti tukkale katunjila Chiyubulusyo chalufu lwakwe munyaka amunyaka.—Lk. 22:19, 20.
2. Tulayiyaanzi muchiiyo eechi?
2 Mumunyaka uuno, Chiyubulusyo chizoochitwa muMugibelo 12 April 2025. Nichoonzyo, toonse tulikulibambila kuti tuzoojanike kuChiyubulusyo mubuzuba oobu. Muchiindi chaChiyubulusyo, tulagwasikana kuti twayeeyesesya a atala azintu Jehova aMwanaakwe nzibakatuchitila. Muchiiyo eechi, tulayiya kuti chinunuzyo chituyiisyaanzi atala aJehova aMwanaakwe. Muchiiyo chitobela, tuzoobona mbutukonzya kugwasigwa aachinunuzyo ambutukonzya kutondeezya kuti tulachilumba.
CHINUNUZYO CHITUYIISYAANZI ATALA AJEHOVA?
3. Nkamboonzi bantu nibakonzya kwaangununwa kuchibi alufu akaambo kalufu lwamuntu uumwi? (Langa chifanikisyo.)
3 Chinunuzyo chituyiisya kuti Jehova uyandisya bululami. (Dt. 32:4) Tuzizi biyeni? Akaambo kakuti Adamu taakaswiilila Leza, wakaba sizibi alubo wakazoofwa. Akaambo kakuti tuli bana bakwe, andiswe tuli basizibi alubo tulafwa. (Rom. 5:12) Kuti atwaangunune kuchibi alufu, Jehova wakatuma Jesu kuti ape buumi bwakwe kabuli chinunuzyo. Zyakachitika biyeni kuti lufu lwamuntu uumwi uumaninide lwaangunune bantu biingi kuchibi alufu. Mwaapostoli Pawulu wakapandulula kuti: “Mbukunga kutaswiilila kwamuntu uumwi [Adamu] kwakapa kuti biingi babe basizibi, nkinkaako, kwiinda mukuswiilila kwamuntu uumwi [Jesu], biingi bazooba balulami.” (Rom. 5:19; 1 Tim. 2:6) Mulaamwi majwi, muntu uumwi uumaninide wakataswiilila Leza wakapa kuti tube bazike bachibi alufu. Nkinkaako, kuti twaangununwe kuchibi alufu kwakali kuyandikana muntu uumwi uumaninide wakayelede kuswiilila Leza.
Muntu uumwi wakapa kuti tube bazike kuchibi alufu. Akaambo kamuntu uumwi, Jesu, twakaangununwa kuchibi alufu (Langa fuka 3)
4. Nkamboonzi Jehova naakatazumizya bana ba-Adamu bakali kumuswiilila kuti bapone kukabe kutamani?
4 Jesu wakeelede kufwa chachoonzyo na kuti atufutule? Nkamboonzi Jehova naakatazumizya bana ba-Adamu bakali kumuswiilila kuti bapone kukabe kutamani? Kubantu balaachibi, eeyi yakali kukonzya kubonekaanga ninzila yaluzyalo alubo mbotu yakubambulula zintu zyakali zyapambanisigwa aa-Adamu. Pesi eezi teezyakali kunootondeezya bululami bwaJehova bumaninide. Zyakali kunooba mbuli kuti Adamu taakachita chibi chipati loko pe akuti bana bakwe teebakali basizibi. Pesi eezi teenzizyo pe.
5. Nkamboonzi nitukonzya kuba aachoonzyo chakuti Jehova unoochita zintu zilikabotu chiindi choonse?
5 Alubo kaansinga Jehova taakatupa chinunuzyo akuzumizya bana ba-Adamu batamaninide kuti bapone kukabe kutamani, wakali kunootondeezya kuti takwe ndaba pe azyeelelo zyakwe zyachibotu achibi. Eezi zyakali kunoopa kuti bantu bakataazikane kuti wakali kuzootondeezya kuti takwe ndaba pe azyeelelo zyakwe akuti taakali kunoochita zintu nzyaakali wasyomezya kuti uzoochita kunembo. Tatweelede kukataazikana pe kuti Jehova uzoozizuzikizya na zisyomezyo zyakwe. Nkamboonzi? Akaambo kakuti Jehova wakachita zintu munzila iiluleme nikuba kuti wakeelede kupayizya Mwanaakwe kuti achite oobo. Nkinkaako, tulaachoonzyo kuti unoochita zintu zilikabotu chiindi choonse.
6. Njiili imwi nzila Jehova njatondeezyaayo kuti ulatuyanda kwiinda muchinunuzyo? (1 Johane 4:9, 10)
6 Nikuba kuti chinunuzyo chitugwasya kumvwisisisya kuti Jehova uliluleme, pesi chitugwasya loko kuti tumvwisisisye mbululi lupati luyando lwakwe. (Joh. 3:16; bala 1 Johane 4:9, 10.) Jehova wakatuma Mwanaakwe kuti azootufwide akaambo kakuti uyanda kuti tupone kukabe kutamani akuti tube mumpuli yakwe. Adamu naakabisya, taakachili mumpuli yabakombi baJehova pe. Akaambo kazeezi, toonse twakazyalwa katutali mumpuli yaLeza. Akaambo kachinunuzyo, Jehova ulatulekelela zibi zyesu. Bantu boonse batondeezya lusyomo mulinguwe alubo bamuswiilila bazooba bamumpuli yakwe. Nikuba lino, tulakonzya kuba aabweenzuma bulikabotu aJehova abakombima. Jehova ulatuyanda chachoonzyo!—Rom. 5:10, 11.
7. Kupenzegwa nkwaakachitwa Jesu kutugwasya biyeni kuti tumvwisisisye Jehova mbatuyanda?
7 Tulakonzya kumvwisisisya mbatuyanda Jehova kuti twabona nzyaakasweekelwaazyo chiindi naakatupa chinunuzyo. Saatani wakaamba kuti taakwe mubelesi waLeza uukonzya kukkala kasyomeka kuli Leza chiindi naaswaana chiimo chiyumu. Kuti atondeezye kuti Saatani ulabeja, Jehova wakazumizya kuti Jesu aswaane buyumu-yumu katanafwa. (Job. 2:1-5; 1 Pet. 2:21) Jehova wakalizibwene Jesu naakali kufubaazigwa abasikukazya bazikombelo, naakali kuumwa amasooja anaakagankaminwa aachisamu. Alubo Jehova wakabona Mwanaakwe ngwayanda loko kalikufwa munzila iichisa loko. (Mt. 27:28-31, 39) Jehova wakali kukonzya kupa kuti zintu zyoonse eezi zileke kuchitika. Muchikozyano, chiindi basikukazya nibakaamba kuti: “Amuvune Leza wakwe kuti kamuyanda,” Jehova wakali kukonzya kuchita mbuli mbubakaamba. (Mt. 27:42, 43) Nikuba oobo, kaansinga Jehova wakanjilila, nikunga taakwe chinunuzyo pe chakali kunoobbadalwa alubo twakali kunoosyaala katutakwe bulangilizi pe. Nkinkaako, Jehova wakazumizya Mwanaakwe kuti alisimye chiindi naakali kupenzegwa kusikila naakafwa.
8. Nkamboonzi nituli aachoonzyo chakuti Jehova zyakamuchisa naakabona Mwanaakwe kali kupenzegwa? Pandulula. (Langa chifanikisyo.)
8 Akaambo kakuti Leza ngusinguzuzyoonse, tatweelede kuyeeyaanga tamvwi kuchisa pe. Wakatulenga muchikozyano chakwe, munzila iipa kuti katuwusa naakuti katubotelwa. Nkinkaako anguwe Jehova ulamvwa kuchisa naakuti kubotelwa. Bbayibbili lipandulula kuti ulamvwa ‘kuchiswa moyo’ ‘akuusa.’ (Int. 78:40, 41) Yeeya atala achikozyano cha-Abbrahamu a-Izakka. Jehova wakabuzya Abbrahamu kuti amupe mwanaakwe wakazyedwe aalikke kali chipayizyo. (Matl. 22:9-12; Heb. 11:17-19) Tulakonzya kuyeeyela kuchisa nkwaakamvwa Abbrahamu naakali kulibambila kuti ajaye mwanaakwe. Anguwe Jehova wakawusa loko naakabona Mwanaakwe kali kujayigwa abantu munzila yalunya.—Langa vidiyo itii, Amwiiye Lusyomo Lwabo—Abrahamu, Cibeela II aajw.org.
Zyakamuchisa Jehova kubona Mwanaakwe kali kupenzegwa (Langa fuka 8)
9. Lugwalo lwa Baroma 8:32, 38, 39 lutuyiisyaanzi atala aluyando lwaJehova?
9 Chinunuzyo chituyiisya kuti taakwe muntu uutuyanda mbuli Jehova naba bbululu wesu naakuti mweenzuma. (Bala Baroma 8:32, 38, 39.) Zilaantanganana kuti Jehova utuyanda loko kwiinda mbutuliyanda. Ulayanda na kupona kukabe kutamani? Nichoonzyo kuti ulayanda. Pesi Jehova uyandisya loko kuti upone kukabe kutamani. Ulayanda na kuti zibi zyako zilekelelwe? Nichoonzyo kuti ulayanda, pesi Jehova ulaachiyandisyo chipati chakuti ulekelelwe. Zintu nzyalangilila kupela kuti tuchite nkumulumba kuzintu nzyaakatuchitila, kuba aalusyomo mulinguwe akumuswiilila. Chinunuzyo nchipo chiyandikana chitondeezya mbululi lupati luyando ndwalaalo Jehova kulindiswe. Alubo munyika mpya tuzooyiya zyiingi atala aluyando lwaJehova.—Muk. 3:11.
CHINUNUZYO CHITUYIISYAANZI ATALA AAJESU?
10. (a) Nkamboonzi Jesu naakali kukataazikana atala alufu lwakwe? (b) Jesu wakalisalazya biyeni zina lyaJehova? (Langa kabbokesi katii, “ Kusyomeka kwaJesu Mbukwakasalazya Zina lyaJehova.”)
10 Jesu ulaandaba atala azintu bantu nzibayeeya atala aWisi. (Joh. 14:31) Jesu wakakataazikana loko atala akuti bantu bakali kunooyeeya zintu zibi atala aWisi nkaambo wakali kuyanda kujayigwa mbuli muntu wakatalemeka Leza alubo mbuli chigwebenga. Eezi nzizyo zyakapa kuti akombe. Wakakomba kati: “Taata, kuti kazichita, nkomeki eeyi ayindiinde.” (Mt. 26:39) Pesi akaambo kakuti wakakkala kasyomeka kuli Jehova kusikila naakafwa, wakatondeezya aantanganana kuti majwi ngaakaamba Saatani atala aWisi ngakubeja.
11. Jesu wakatondeezya biyeni kuti wakali kubayanda loko bantu? (Johane 13:1)
11 Chinunuzyo chituyiisya kuti Jesu ulaandaba abantu, ikapati basikwiiya bakwe. (Tus. 8:31; bala Johane 13:1.) Muchikozyano, Jesu wakalizi kuti zimwi zintu nzyaakeelede kuchita aanyika zyakali kuzoomuyumina, kapati nzila njaakali kuzoofwaayo iichisa. Pesi Jesu wakachita zintu zyoonse eezi ziyumu kutali akaambo kakuti nzizyo Jehova nzyaakamutuma kuti achite pesi akaambo kakuti wakali kubayanda bantu. Jesu wakatondeezya kuti wakali kubayanda bantu kwiinda mukubakambawukila, kubayiisya akubagwasya. Nikuba mubuzuba mbwaakafwa, Jesu wakabelesya chiindi chakwe kuti asanzye mawulu aabaapostoli akubabuzya majwi miingi aakumamanino aawumbulizya alubo aasungwaazya. (Joh. 13:12-15) Naakali aachisamu, Jesu wakabelesya chiindi chiche nchaakalaacho kuti ape bulangilizi kuchigwebenga alubo wakakumbila Johane kuti alanganie bayina. (Lk. 23:42, 43; Joh. 19:26, 27) Nkinkaako, Jesu wakatondeezya kuti wakali kubayanda loko bantu kutali kwiinda mukubafwida kupela, pesi kwiinda mukubajata munzila yaluyando ayaluzyalo.
12. Jesu ulikutugwasya biyeni mazubaano?
12 Nikuba kuti Jesu wakafwa “kamwi biyo” pesi ulikutuchitila zintu zyiingi. (Rom. 6:10) Nziizili zintu nzyalikutuchitila? Ulikubeleka kuti tujane zintu zibotu ziba akaambo kachinunuzyo. Atubone nzyalikuchita. Ubeleka kali Mwaami wesu, Mupayizi Mupati amutwe wambungano. (1 Kor. 15:25; Ef. 5:23; Heb. 2:17) Nguwe ulaamulimu wakubunganizya bananike abankamu mpati. Mulimu ooyu uzoomana kuchitwa mapenzi mapati kaatanamana. b (Mt. 25:32; Mk. 13:27) Ubelesya muzike uusyomeka kuti akkale katupa chakulya chamubukombi mumazuba aaya aakumamanino. (Mt. 24:45) Alubo natazootweendelezye kwaMinyaka Iili 1 000 unookkala katugwasya. Nichoonzyo Jehova wakatupa Mwanaakwe!
UTALEKI KWIIYA
13. Kuyeeyesesya kutugwasya biyeni kuti twiiye atala aluyando Leza aKkristu ndubalaalo kulindiswe?
13 Ulakonzya kwiinkilila kunembo kwiiya atala aluyando Jehova Leza aJesu Kkristu ndubalaalo kulindiswe kuti wayeeyesesya atala andulo. Ulakonzya kubala bbuku limwi naakuti amwi Mabbuku aaMakani Mabotu muchiindi chaChiyubulusyo munyaka uuno. Utabali mavesi miingi aachiindi chimwi pesi bala mavesi mache ubone tumwi twaambo tutondeezya kuti nkamboonzi nitweelede kumuyanda Jehova aJesu. Alubo buzya bamwi nzwaajana nwaalikubala.
14. Kweendelana alugwalo lwa Intembauzyo 119:97 amakani aamunsi, kuyanduulisisya kutugwasya biyeni kuti tukkale katwiiya atala achinunuzyo azimwi nkani? (Langa chifanikisyo.)
14 Kuti waba aaminyaka myiingi kubbabbatizidwe, ulakonzya kukataazikana kuti kuchili zimwi na zintu zipya nzukonzya kwiiya kunkani zili atala abululami bwaLeza, luyando lwakwe achinunuzyo. Simpe ndyakuti, tunookkala katuli aazintu zipya zyakwiiya munkani eezi azimwi. Niinzi nzweelede kuchita? Bala akuyeeyesesya kubelesya mabbuku eesu aapandulula Bbayibbili alaamakani aagwasya. Kuti waswaana imwi vesi njutamvwisisisyi, yanduulisisya. Mubuzuba boonse, yeeyesesya atala azintu nzwaabala akuti zikuyiisyaanzi atala aJehova, Mwanaakwe aluyando lwabo.—Bala Intembauzyo 119:97 amakani aamunsi.
Nikuba kuti tuli aaminyaka myiingi katuli mukasimpe tulakonzya kwiiya zintu zyiingi kuchinunuzyo zikonzya kupa kuti tumuyande loko Jehova aJesu atala azintu nzibakatuchitila (Langa fuka 14)
15. Nkamboonzi nitweelede kukkala katweezya kuyanduula zintu zipya chiindi nitubala Bbayibbili?
15 Utamani manguzu kuti teewajana chintu chipya naakuti chikunoneezya chiindi nubala akuyanduulisisya. Muliimwi nzila, uli mbuli muntu uuyanduula ngolida. Chiindi chiingi, muntu uuyanduula ngolida utola chiindi chilamfu naakuti mazuba miingi kuti ayijane. Pesi tateyi mulenga pe, ulakkala kayiyanduula akaambo kakuti ulizi kuti nikuba niini njajana, ilayandikana kulinguwe. Choonse chipya nchitujana muBbayibbili nchibotu kwiinda ngolida! (Int. 119:127; Tus. 8:10) Nkinkaako, kkala kubala Bbayibbili alubo kkala kuyanduula zintu zipya chiindi nubala.—Int. 1:2.
16. Kujana twamutobelezya biyeni Jehova aJesu?
16 Chiindi nwaanoobala akuyanduulisisya, yeeya atala ambukonzya kubelesya zintu nzubala mubuumi bwako. Muchikozyano, tobelezya bululami bwaJehova kwiinda mukutabasaluula bamwi. Tobelezya nzila Jesu njaakali kumuyandaayo Wisi abamwi kwiinda mukulipeda kuswaana buyumu-yumu akaambo kazina lyaJehova akulipeda kugwasya bakombinyokwe. Alubo, tobelezya Jesu kwiinda mukukambawukila bamwi kuchitila kuti ambabo bajane mweenya wakujana chipo chaJehova chiyandikana loko.
17. Tuzooyiyaanzi muchiiyo chitobela?
17 Kuti twakkala katwiiya atala achinunuzyo, tulamuyanda loko Jehova aJesu. Akaambo kakuti tulabayanda, ambabo balatuyanda loko. (Joh. 14:21; Jak. 4:8) Atwiinkilile kunembo kubelesya zintu zyoonse Jehova nzyatupa kuti tukkale katwiiya atala achinunuzyo. Muchiiyo chitobela, tuzooyiya atala azilongezyo nzitulikujana akaambo kakuti Jesu wakatufwida ambutukonzya kutondeezya kuti tulamulumba Jehova akaambo kaluyando lwakwe.
LWIIMBO 107 Chitondezyo cha Leza Chaluyando
a BUPANDULUZI BWABBALA: “Kuyeeyesesya” chaamba kubikkila maanu kuliimwi nkani akwiiya zyiingi kulinjiyo kuchitila kuti uyimvwisisisye.
b Kubunganizigwa kwazintu “kujulu” Pawulu nkwaakaamba muli Ba-efeso 1:10, kulisiyene akubunganizigwa ‘kwabasalidwe’ Jesu nkwaakaamba muli Mateyo 24:31 amuli Makko 13:27. Pawulu wakali kwaamba chiindi Jehova natazoosale aabo batazooyendelezye aaJesu kwiinda mukubananika aamuuya uusalala. Jesu wakali kwaamba chiindi aabo bananike bachinooli aano aanyika nibatazoobunganizigwe kuti baye kujulu muchiindi chamapenzi mapati.
