1. Niinzi nzitweelede kuchita kuti tubotezye Jehova?

 ATUTEEDI wapa muntu nguyanda chipo chibotu loko alubo chikonzya kumugwasya. Tukoobotelwa pe kuti wachilondola alubo kuti taachibelesya pe akuti tachikwe ndaba pe anchicho. Pesi ulabotelwa kuti muntu ooyo wachibelesya kabotu chipo eecho akuti wakulumba. Chikozyano eechi cheendelana biyeni achipo nchaakatupa Jehova chachinunuzyo? Jehova wakatupa Mwanaakwe kuti atufwide. Jehova ulabotelwa kuti twatondeezya kulumba chipo eechi chiyandikana chachinunuzyo nchaakatupa akaambo kaluyando lwakwe.—Joh. 3:16; Rom. 5:​7, 8.

2. Tulalanga-langaanzi muchiiyo eechi?

² Mukuya kwachiindi, tulakonzya kusaanguna kubona chipo chachinunuzyo kachibaanga tachichiyandikani loko pe. Kuchita oobo nga kuli mbuli kuti tulikulondola chipo chaLeza aandawu mpututakonzyi kuchibona pe naakuti aandawu iipa kuti tutakonzyi pe kuchiyeeya. Kuti eezi zitatuchitikili, tweelede kukkala katulumba zintu nzyaakatuchitila Leza aKkristu. Chiiyo eechi chilatugwasya kuchita oobo. Tulabona mbuchitugwasya chinunuzyo lino ambuchizootugwasya muchiindi chilikunembo. Alubo tulabona nzitweelede kuchita kuti tutondeezye kuti tulamulumba Jehova akaambo kaluyando lwakwe kapati muchiindi chaChiyubulusyo.

MBUCHITUGWASYA CHINUNUZYO LINO

3. Tugwasigwa biyeni aachinunuzyo lino?

³ Tulikugwasigwa kale achinunuzyo chaKkristu. Muchikozyano, akaambo kachinunuzyo, Jehova ulatulekelela zibi zyesu. Tatulekeleli akaambo kakuti nzizyo nzyayelede kuchita, pesi ulatulekelela akaambo kakuti uliyandila biya kuti achite oobo. Sintembawuzyo wakalumba nzila Jehova njalekelelaayo, wakaamba kuti: “Nkaambo yebo, O Jehova uli mubotu alimwi ulilibambilide kulekelela zibi.”—Int. 86:5; 103:​3, 10-13.

4. Mbaani Jehova mbaakapa chinunuzyo? (Lukka 5:32; 1 Timoti 1:15)

 ⁴ Bamwi babonaanga tabeeleli pe kulekelelwa aaJehova. Nisimpe toonse tatweeleli pe kulekelelwa aaJehova. Mwaapostoli Pawulu wakali kuzimvwisisisya eezi, wakaamba kuti: “Tandeeleli pe kwiitwa kuti ndili mwaapostoli,” alubo wakayungizya kuti: “Akaambo kaluzyalo lupati lwaLeza, ndili mbuli mbundibede.” (1 Kor. 15:​9, 10) Kuti twasanduka kuzibi zyesu, Jehova ulatulekelela. Nkamboonzi? Kutali akaambo kakuti nzizyo nzyayelede kutuchitila, pesi akaambo kakuti ulatuyanda. Kuti walimvwa kuteeleli kulekelelwa aaJehova, yeeya kuti Jehova wakapa basizibi basanduka chinunuzyo kutali bantu batakwe chibi.—Bala Lukka 5:32; 1 Timoti 1:15.

5. Tweelede kuyeeya kuti tuleelela na kulekelelwa aaJehova? Pandulula.

⁵ Tatweelede kuyeeya kuti tuleelela kulekelelwa aaJehova akaambo kakuti twaba aaminyaka myiingi katuli kumubelekela. Nichoonzyo kuti Jehova ulazilumba zintu nzitwakamuchitila. (Heb. 6:10) Naakatupa chinunuzyo taakatubbadalisya pe alubo kumubelekela nkutuchita tee mbadalo pe yakubbadala chinunuzyo nchaakatupa. Tazili kabotu kuti tuyeeye kuti akaambo kakuti Jehova twakamuchitila zintu zyiingi, weelede kutulekelela. Kuti katuyeeya oobo nga tulikwaamba kuti tatuchiyandi pe chinunuzyo.—Yezyanisya a Bagalatiya 2:21.

6. Nkamboonzi Pawulu naakabeleka changuzu mumulimu waJehova?

⁶ Pawulu wakalizi kuti nikuba kuti wabeleka changuzu biyeni kabelekela Leza, pesi kubeleka ooko teenkuko pe kwakali kupa kuti amulekelele. Pesi nkamboonzi naakabeleka changuzu mumulimu waJehova? Wakazichita katondeezya kulumba Jehova akaambo kaluzyalo lupati alweetelelo lwakwe. (Ef. 3:7) Mbuli Pawulu twiinkilila kunembo kubelekela Jehova chabusungu kutali akaambo kakuti tuyanda kuti atulekelele pesi akaambo kakuti tuyanda kumulumba.

7. Njiili nzila iimbi mutugwasigwa aachinunuzyo lino? (Baroma 5:1; Jakkobo 2:23)

⁷ Imwi nzila mutugwasigwa aachinunuzyo lino nkuba aabweenzuma bulikabotu aJehova. a Mbuli mbutwakabona muchiiyo chakayinda, nitwakazyalwa teetwakalikwe bweenzuma pe aJehova. Pesi akaambo kachinunuzyo tulakonzya kuba “aaluumuno aLeza” akuswena aafwiifwi anguwe.—Bala Baroma 5:1; Jakkobo 2:23.

8. Nkamboonzi nitweelede kumulumba Jehova akaambo kachilongezyo chankombyo?

⁸ Tulakonzya kuba abweenzuma bulikabotu aJehova kwiinda mukukomba. Jehova ulaziswiilila nkombyo zyabakombi bakwe nibali kumiswaangano alubo ulaziswiilila zyawumwi awumwi nali aalikke. Kuti twakomba nga tatuchikataazikani loko pe, pesi eeyi tee njiyo nzila ayilikke pe nkombyo njiigwasyaayo. Ilakonzya kusimya bweenzuma mbutulaabo aLeza. (Int. 65:2; Jak. 4:8; 1 Joh. 5:14) Naakali aanyika, Jesu wakali kukkala kakomba akaambo kakuti wakalizi kuti Jehova wakali kumuswiilila, alubo nkombyo yakali kupa kuti bweenzinyina aWisi bukkale kabusimide. (Lk. 5:16) Tulamulumba Jehova akaambo kachipayizyo chaJesu chipa kuti tube beenzinyina akuti tukonzye kwaambuulaawe munkombyo.

CHINUNUZYO MBUCHIZOOTUGWASYA KUNEMBO

9. Chinunuzyo chizoobagwasya biyeni bakombi baJehova basyomeka muchiindi chilikunembo?

⁹ Bakombi baJehova basyomeka bazoogwasigwa biyeni achinunuzyo muchiindi chilikunembo? Bazoojana buumi butamani. Bantu  biingi bayeeya kuti eezi tazizoochitiki pe akaambo kakuti bantu baba aachiindi chilamfu kabali kufwa. Pesi makanze aaJehova ngaakalaawo kumasaangunino ngakuti bantu bapone kukabe kutamani. Kaansinga Adamu taakabisya, nikunga taakwe muntu pe uuyeeya kuti kupona kukabe kutamani takukonzeki pe. Nikuba kuti nkuyumu lino kuyeeyela kuti tulakonzya kupona kukabe kutamani, tulasyoma kuti tuzoopona kukabe kutamani akaambo kakuti tulizi kuti Jehova wakabbadala muulo uudula, buumi bwaMwanaakwe kuchitila kuti eezi zizoochitike.—Rom. 8:32.

10. Bananike abazimwi mbelele balangililaanzi?

¹⁰ Nikuba kuti buumi butamani tuzoobujana muchiindi chilikunembo, Jehova uyanda kuti tuyeeye atala ambubo lino. Bananike balangilila buumi bubotu kujulu nibanooyendelezya nyika kabalaamwi aKkristu. (Chi. 20:6) Bazimwi mbelele balangilila kuzoopona muParadayizi aanyika kakutachikwe kuchisa akuusa. (Chi. 21:​3, 4) Uli wazimwi mbelele na? Ulaabulangilizi bwakupona kukabe kutamani aanyika. Bulumbu oobu bulikozyenie ambubatazoojane aabo batazoojane bwakujulu. Jehova wakalenga bantu kuti bakkale aanyika, nkinkaako, kupona kukabe kutamani aanyika kuzoopa kuti tubotelwe chakumaninina.

11-12. Nziizili zimwi zilongezyo nzitulangilila kuzoojana muParadayizi? (Langa zifanikisyo.)

¹¹ Yeeya kuti unoopona biyeni muParadayizi aanyika. Tunoochikataazikani atala akuchiswa naakuti lufu. (Is. 25:8; 33:24) Jehova uyookupa zintu zibotu zyoonse nzuyanda. Nziizili nzuyanda kuzooyiya? Uyanda kuzooyiya zyiingi atala abanyama na naakuti abayuni? Uyanda kuzooyiya kulizya bbanjo na? Uyanda kuzooyiya kudilowa na? Muparadayizi kuyooyandikana bantu bachita zyakuyaka abalimi. Kuyooyandikana bantu bakonzya kujika chakulya, bafula zibelesyo zyakubelesya ababyala minsamu mumyuunda akwiilangania. (Is. 35:1; 65:21) Akaambo kakuti tuyoopona kukabe kutamani, tunooli aachiindi chakuzichita zintu zyoonse eezi azimwi nzitukonzya kuyeeyela.

¹² Tuzoobotelwa loko kutambula bantu batazoobusigwe.  (Mil. 24:15) Yeeyela mbutanoobotelwe kwiiya zyiingi atala aJehova kwiinda mukulangisisya zintu zyiingi nzyaakalenga. (Int. 104:24; Is. 11:9) Kwiinda zyoonse, tunoobotelwa loko kukomba Jehova nkaambo tatunoochibisyi pe alubo takunoochiyandikani kuti tukumbile kuti atulekelele. Ulayanda na kusweekelwa aazilongezyo eezi nzitutazoojane muchiindi chilikunembo akaambo kakuyanda ‘kubotelwa aachibi kwachiindi chifwiifwi’? (Heb. 11:25) Inee. Buumi mbututazoopone bunooli bubotu loko kwiinda kufumbwa zintu nzitukonzya kujana munyika eeyi. Tutalubi kuti Paradayizi izoosika, tatunookkede katwiilindila kupela. Eezi teezyalikunookonzeka pe kaansinga Jehova taakatuyanda kwiinda mukutupa chipo chaMwanaakwe.

LUMBA JEHOVA AKAAMBO KALUYANDO LWAKWE

13. Niinzi nzitweelede kuchita zitondeezya kuti tulamulumba Jehova akaambo kaluyando lwakwe? (2 Bakkorinte 6:1)

¹³ Niinzi nzitweelede kuchita kuti tutondeezye kuti tulamulumba Jehova akaambo kakutupa chinunuzyo? Nkwiinda mukubikka mulimu wakwe mubusena bwakusaanguna mubuumi bwesu. (Mt. 6:33) Kwiinda zyoonse, Jesu wakafwa “kuchitila kuti aabo bapona batachiliponeni pe, pesi baponene ooyo wakabafwida alubo wakabusigwa.” (2 Kor. 5:15) Jehova wakatutondeezya luzyalo lupati alubo wakatulekelela. Kwiinda mukuchita zyoonse nzitukonzya kuti tumubelekele nga tulikutondeezya kuti tulazimvwisisisya nzyaakatuchitila akuti tulamulumba.—Bala 2 Bakkorinte 6:1.

14. Kujana twatondeezya biyeni kuti tulaasyoma malayilile ngitupegwa aaJehova?

¹⁴ Tulakonzya kutondeezya kuti tulamulumba Jehova akaambo kaluyando lwakwe kwiinda mukusyoma malayilile aakwe. Biyeni? Chiindi nituyanda kusala, muchikozyano nituyanda kusala lwiiyo naakuti mulimu, tweelede kuyeeya kuti niinzi Jehova nzyayanda kuti tuchite. (1 Kor. 10:31; 2 Kor. 5:7) Kuti twasala zintu zyeendelana aakuyanda kwaJehova, lusyomo lwesu mulinguwe abweenzuma mbutulaabo anguwe bulasima. Alubo bulangilizi bwesu bwakupona kukabe kutamani bulaba bwachoonzyo.—Rom. 5:​3-5; Jak. 2:​21, 22.

15. Kujana twatondeezya biyeni kuti tulamulumba Jehova akaambo kaluyando lwakwe muchiindi chaChiyubulusyo?

¹⁵ Kuchili iimwi nzila mutukonzya kutondeezya kuti tulamulumba Jehova akaambo kaluyando lwakwe. Nzila eeyo nkuchita zyoonse nzitukonzya muchiindi chaChiyubulusyo kuti tutondeezye kuti tulamulumba Jehova akaambo kachinunuzyo. Mukuyungizya, aajulu aakulibambila kuti tuzoojanike kuChiyubulusyo, tulakonzya kutamba bamwi ambabo kuti bazoojanike. (1 Tim. 2:4) Bapandulwide aabo mbuwatamba zintu zitanoochitike kuChiyubulusyo. Ulakonzya kubatondeezya kavidiyo kati: Jesu Wakafwidaanzi? akati: Yeeya Lufu  lwaJesu aajw.org. Baalu beelede kuba aachoonzyo chakuti babatamba basikupupulula bakatontola mubukombi. Nga kwaba kubotelwa kujulu aanyika kuti zimwi mbelele zyaJehova zisweekede zyaboola mubutanga. (Lk. 15:​4-7) Nitwanoojuzyania kuChiyubulusyo, atubikkile maanu kubantu bapya batuswaya naakuti aabo baba aachiindi kabatanjili Chiyubulusyo. Tuyanda kuti balimvwe kabaangunukide.—Rom. 12:13.

16. Nkamboonzi nitweelede kukubona kakuyandikana kuyungizya mulimu wakukambawuka muchiindi chaChiyubulusyo?

¹⁶ Ulakonzya na kuyungizya mulimu wako kuli Jehova muchiindi chaChiyubulusyo? Kuchita oobo ninzila mbotu iitondeezya kulumba kuzintu zyoonse Leza aKkristu nzibakatuchitila. Kuti twajana chiindi chiingi chakwiinka kukukambawuka, tulabona Jehova mbalikutugwasya munzila zyiingi alubo tulayungizya kumusyoma. (1 Kor. 3:9) Alubo ulakonzya kuba aachoonzyo chakuti watobelezya pulogilamu yakubala Bbayibbili yaChiyubulusyo iijanika mukabbuku kaKulanga-langa Magwalo Buzuba Abuzuba naakuti muchaati iijanika mukabbuku kamuswaangano. Ulakonzya kubala mavesi aaya nwaanoobala akuyanduulisisya kuli awulikke.

17. Niinzi zimubotezya Jehova? (Langa kabbokesi katii, “ Nzila Mututondeezya Kuti Tulamulumba Jehova Akaambo Kaluyando Lwakwe.”)

¹⁷ Zyiimo zyako zilakonzya kutakuzumizya kuti uchite zyoonse zyaambwa muchiiyo eechi. Utalubi kuti Jehova talangi zintu nzupa kazyeezyanisya aanzibapa bamwi, pesi ubona zili mumoyo wako. Ulabotelwa nabona mbutondeezya kulumba kazizwaansi aamoyo akaambo kachipo chakwe chiyandikana loko, chinunuzyo.—1 Sam. 16:7; Mk. 12:​41-44.

18. Nkamboonzi nitumulumba Jehova Leza aJesu Kkristu?

¹⁸ Chinunuzyo nchicho kupela chipa kuti tulekelelwe zibi zyesu, tube aabweenzuma bulikabotu aJehova akuti tube aabulangilizi bwakuzoopona kukabe kutamani. Atukkale katumulumba Jehova akaambo kaluyando lwakwe lwakapa kuti tujane zilongezyo eezi nzitulaazyo. (1 Joh. 4:19) Alubo atutondeezye kuti tulamulumba Jesu wakatutondeezya luyando kwiinda mukupa buumi bwakwe akaambo kandiswe.—Joh. 15:13.