CHIIYO 3
LWIIMBO 35 “Amusinizye Zintu Ziyandikana Kapati”
Sala Kuchita Zintu Zibotezya Jehova
“Kuyoowa Jehova ngamatalikilo aabusongo, alimwi kumuzyiba Ooyo Uusalalisya ngamaano.”—TUS. 9:10.
NZITUTAYIYE
Tulayiya mbutukonzya kusala chabusongo katubelesya luzibo akumvwisisisya.
1. Mbuubuli buyumu-yumu mbutuswaana toonse?
BUZUBA abuzuba tweelede kusala. Zimwi zintu tazikataazyi pe kusala, mbuli kuti tulalyaanzi kuseeni naakuti tulalala chiindiinzi. Zimwi nkani nziyumu loko kusala. Zintu nzitusala zilakonzya kujatikizya mibili yesu, kubotelwa kwesu, bamumpuli yesu naakuti bukombi bwesu. Tuyanda kuti zintu nzitusala zitugwasye akuti zigwasye mpuli yesu. Kwiinda zyoonse, tweelede kuba aachoonzyo chakuti zintu nzitusala zibotezya Jehova.—Rom. 12:1, 2.
2. Ntuutuli twaambo tukonzya kukugwasya kuti usale munzila yabusongo?
2 Ulakonzya kusala munzila yabusongo kuti (1) waziba twaambo tuswaanizidwe, (2) wayeeya atala aJehova mbayibona nkani eeyo alubo (3) wayeeyesesya zintu nzukonzya kusala. Muchiiyo eechi, tulalanga-langa twaambo ootu alubo tulabona mbutukonzya kubelesya maanu eesu aakuyeeya.—Tus. 2:11.
ZIBA TWAAMBO TUSWAANIZIDWE
3. Amba chikozyano chitondeezya kuti nkamboonzi nikuyandikana kuziba twaambo tuswaanizidwe kutanasala.
3 Ntaamu yakusaanguna njukonzya kubweza kuti kuyanda kusala munzila iilikabotu, nkuziba twaambo tuswaanizidwe. Nkamboonzi nikuyandikana? Muchikozyano, atuteedi muntu uuchiswa bulwazi bubi waya kuli dokotela. Dokotela ulafwambaana na kumupa mapilisi katanamulanga-langa naakuti katanamubuzya mibuzyo? Peepe. Anduwe ulakonzya kusala kabotu kuti wayeeyesesya atala atwaambo tuswaanizidwe tweendelana aachiimo chako. Kujana wazichita biyeni eezi?
4. Kweendelana a Tusimpi 18:13, niinzi nzukonzya kuchita kuti ube aachoonzyo chakuti ulituzi twaambo tuswaanizidwe? (Langa chifanikisyo.)
4 Chiindi chiingi, ulakonzya kuziba twaambo tuswaanizidwe kwiinda mukubuzya mibuzyo. Atuteedi watambwa kupobwe, weelede kwiinka na? Kuti kutamwizi kabotu sikutamba, naakuti mabambe ngaakachita, ulakonzya kumubuzya mibuzyo iili mbuli yakuti: “Nkuukuli alubo ndiilili nilitazoochitwe pobwe eeli? Kunooli bantu bangane? Ngwani uutanoolyeendelezye? Mbaani batanooliwo? Bantu banoochitaanzi nkukooko? Kuyoonywigwa bukande na?” Nsandulo zyamibuzyo eeyi, zilakonzya kukugwasya kuti usale kabotu.—Bala Tusimpi 18:13.
Ziba twaambo tuswaanizidwe kwiinda mukubuzya mibuzyo (Langa fuka 4) a
5. Niinzi nzweelede kuchita kuti waziba twaambo tuswaanizidwe?
5 Kuti waziba twaambo tuswaanizidwe, yeeyesesya atala ambukutanoobede. Muchikozyano, niinzi nzukonzya kuchita kuti waziba kuti bantu bataalemeki pe malayilile aamuBbayibbili banooliwo kupobwe eelyo, naakuti umwi awumwi unoonywa bukande mbuli mbayanda? Ubonaanga pobwe eeli lilakonzya kupa kuti bantu balijate munzila iitali kabotu na? (1 Pet. 4:3) Alubo niinzi nzweelede kuchita kuti waziba kuti pobwe eelyo lizoochitwa chiindi nweelede kunjila miswaangano yambungano naakuti mubuzuba nweelede kuya kukukambawuka? Kuti wayeeyesesya twaambo tuswaanizidwe, zilakonzya kukugwasya kuti usale kabotu. Pesi kuli zimwi nzweelede kuchita. Webo ulizi mbulimvwa atala apobwe eelyo, pesi Jehova ulimvwa biyeni atala apobwe eelyo?—Tus. 2:6.
YEEYA ATALA AJEHOVA MBAYIBONA NKANI EEYO
6. Kweendelana a Jakkobo 1:5, nkamboonzi nitweelede kukomba kuli Jehova kuti atugwasye?
6 Kumbila Jehova kuti akugwasye kumvwisisisya mbayeeya atala ankani eeyo. Jehova utusyomezya kutupa busongo butugwasya kuti tusale munzila iimubotezya. Ulatupa busongo ‘amoyo woonse katatusampawuli pe.’—Bala Jakkobo 1:5.
7. Niinzi nzukonzya kuchita kuti uzibe Jehova mbayeeya atala ankani eeyo? Amba chikozyano.
7 Kuti wakomba kuli Jehova kuti akuzulwide, bikkila maanu kunzila Jehova njatakusandulaayo nkombyo yako. Muchikozyano, kuti wasweeka kuli mulweendo, ulakonzya kukumbila muntu wiizi kabotu ndawu eeyo kuti akugwasye. Pesi ulayinkilila kunembo na alweendo lwako katanakubuzya kuti weelede kweenda biyeni? Inee. Ulaswiilila naanookubuzya mbuyelede kweenda. Munzila iikozyenie, nwaazwa aakukumbila Jehova kuti akupe busongo, yezya kubona nsandulo yakwe kwiinda mukulanga-langa milawu yamuBbayibbili amalayilile aayendelana aachiimo chako. Muchikozyano, chiindi nusala kuti ulayinka na naakuti tukooyinka pe kupobwe lyaambwa mumafuka aayinda, ulakonzya kulanga-langa kuti Bbayibbili lityeni atala amapobwe aatanyoneki, kuliswaanizya aabantu batali kabotu ambukuyandikana kubikka Bwaami mubusena bwakusaanguna muzintu ziyandwa aamoyo wako.—Mt. 6:33; Rom. 13:13; 1 Kor. 15:33.
8. Niinzi nzukonzya kuchita kuti kuyanda kugwasigwa kuti ujane makani ngulikuyanduula? (Langa chifanikisyo.)
8 Nikuba oobo, chimwi chiindi nga wayanda kugwasigwa kuti ujane makani ngulikuyanduula. Ulakonzya kukumbila kugwasigwa aamukwesu naakuti muchizi uusimide mubukombi. Alubo ulakonzya kugwasikana kwiinda mukuyanduulisisya kuli aawulikke. Kuli makani miingi aakonzya kukugwasya aali muzibelesyo zyesu, zili mbuli Bbuku Ligwasya Kuvwuntauzya lya Bakamboni ba Jehova amubbuku litii, Magwalo Aagwasya MaKkristu Mubuumi. Utalubi kuti makanze aako ngakuti usale zintu munzila iibotezya Jehova.
Yeeya atala ambayibona Jehova nkani eeyo (Langa fuka 8) b
9. Niinzi zikonzya kupa kuti tube aachoonzyo chakuti zintu nzitusala zilakonzya kubotezya Jehova? (Ba-efeso 5:17)
9 Niinzi zikonzya kupa kuti tube aachoonzyo chakuti zintu nzitusala zilamubotezya Jehova? Chakusaanguna, tweelede kumuziba kabotu. Bbayibbili lyaamba kuti, “Kumuzyiba Ooyo Uusalalisya ngamaano.” (Tus. 9:10) Kuziba buntu bwaJehova, makanze aakwe azintu nzyayanda anzyazonda kupa kuti tujane kumvwisisisya kwachoonzyo. Libuzye kuti, ‘Kweendelana azintu nzindizi atala aJehova, nkuukuli kusala nkundikonzya kuchita kukonzya kupa kuti abotelwe?’—Bala Ba-efeso 5:17.
10. Nkamboonzi malayilile aamuBbayibbili naayandikana kwiinda nzila njibasalaayo kuchita zintu bamumpuli naakuti ziyanza zyankutukkala?
10 Chimwi chiindi, kuti tubotezye Jehova tweelede kuchita zintu nzibatayandi babbululu besu. Muchikozyano, bamwi bazyali, kabali aamakanze aalikabotu balakonzya kusungwaazya mwanaabo musimbi kuti akwatwe aamwaalumi uunotede loko naakuti uukonzya kubasela mali nyingi nikuba kuti mwaalumi ooyo katasimide mubukombi. Nichoonzyo bayanda kuti mwanaabo akkale aantobo pesi ngwani uutamugwasye kuti ayinkilile kunembo kusima mubukombi? Jehova uyibona biyeni nkani eeyi? Nsandulo tuyijana muli Mateyo 6:33. Lugwalo oolu lusungwaazya maKkristu kuti, “amwiinkilile kunembo kusaanguna kuyanduula Bwaami.” Nikuba kuti tulabalemeka bazyali besu abantu bamuchilawu chesu, pesi chintu chiyandikana loko kulindiswe nkubotezya Jehova.
YEEYESESYA ATALA NZUKONZYA KUSALA
11. Mbuubuli buntu buli muli Bafilipi 1:9, 10 bukonzya kukugwasya kuti uyeeyesesye atala azintu nzukonzya kusala?
11 Nwaazwa aakulanga-langa malayilile aamuBbayibbili aajatikizya zintu nzuyanda kusala, weelede kuyeeyesesya atala azintu nzukonzya kusala. (Bala Bafilipi 1:9, 10.) Kumvwisisisya kulakugwasya kuti uyeeyele zintu zikonzya kuchitika akaambo kakusala kwako. Chimwi chiindi, kusala kulakonzya kuuba, pesi chimwi chiindi kulakonzya kuyuma. Kumvwisisisya kulakonzya kutugwasya kuti tusale munzila iilikabotu nikuba muzyiimo ziyumu.
12-13. Kumvwisisisya kujana kwakugwasya biyeni kuti usale mulimu uulikabotu?
12 Yeeya atala achiimo eechi. Atuteedi ulikuyanduula mulimu uukonzya kukugwasya kuti usanine mpuli yako. Kuli milimu iibili iiliwo. Wabona twaambo tuswaanizidwe tuli atala amilimu eeyo, kuti milimuunzi, unoobeleka biyeni, unoomanisya chiindi chilamfu biyeni kuti ukasike kumilimu eeyo azimwi. Taakwe magwalo pe aakasya kuti muKkristu ayibeleke milimu eeyi. Amwi uyanda umwi kwiinda umwi mulimu aakati kamilimu eeyi njuwajana akaambo kakuti nguwo mulimu nguyandisya naakuti akaambo kakuti ufozya mali nyingi. Kuli tumwi twaambo ntweelede kuyeeyesesya kutanasala.
13 Muchikozyano, mulimu ooyo ulakonzya na kukukachizya kuti unjile miswaangano yambungano? Mulimu ooyo upa kuti utajani chiindi na chakuti ugwasye mpuli yako kuchitila kuti ilimvwe kayikwabililidwe, kayibotelwa akuti iswene aafwiifwi aJehova? Kulibuzya mibuzyo iili boobu, kulakugwasya kuti ubikkile maanu ‘kuzintu ziyandikana loko’ chaamba bukombi bwako azintu ziyandwa aampuli yako kutali kubikkila maanu mukujana mali nyingi. Eezi zilakonzya kupa kuti usale munzila iipa kuti Jehova akulongezye.
14. Kumvwisisisya akuyanda bamwi kutugwasya biyeni kuti tutabalebyi?
14 Alubo kumvwisisisya kupa kuti tubone kuti kusala nkutuchita kubajatikizya biyeni bamwi kuchitila kuti ‘tutabalebyi.’ (Flp. 1:10) Eezi zilayandikana chiindi nitusala zintu zili mbuli zigogo nzitutazwaate anzila njitutalibambaayo. Muchikozyano, tulakonzya kuyandisya kuzwaata naakuti kulibamba munzila njibatajayide pe bamumbungano naakuti bantu bakunze, iikonzya kubalebya. Kumvwisisisya kulakonzya kutugwasya kuti tulemeke mbubalimvwa. Luyando lulakonzya kutugwasya kuti tuyanduule zintu zigwasya ‘bamwi’ alubo zili aabulemu. (1 Kor. 10:23, 24, 32; 1 Tim. 2:9, 10) Kuti twachita oobo, tulasala munzila iitondeezya kuti tulabayanda akuti tulabalemeka bamwi.
15. Niinzi nzweelede kuchita kutanabweza ntaamu kuzintu zipati nzwaasala kuchita?
15 Kuti kuli kusala zintu zipati, yeeya zintu nzweelede kuchita kuti uchite kweendelana akusala ooko. Jesu wakatuyiisya kuti tulange-lange “mali iiyandikana.” (Lk. 14:28) Nkinkaako, langa-langa chiindi nchukonzya kumaninsya, zintu nzweelede kubelesya anguzu ziyandikana kuti kusala ooko kuzwidilile. Muli zimwi zyiimo, ulakonzya kukumbila bamumpuli yako kuti ubone kuti umwi awumwi wamumpuli kuli nzyakonzya kuchita na kuti akugwasye kuti kusala ooko kuzwidilile. Nkamboonzi kuchita munzila eeyi nikuyandikana? Zilakonzya kukugwasya kubona kuti kusala kwako mpaali na mpukuyanda kuti kubambululwe naakuti usale iimwi nzila. Alubo kuti wabuzya bamumpuli yako akuswiilila maboneno aabo, balakonzya kukugwasya kuti kusala kwako kuzwidilile.—Tus. 15:22.
SALA ZINTU ZIKONZYA KUZWIDILILA
16. Ntuutuli twaambo tukonzya kukugwasya kuti usale munzila iizwidilila? (Langa kabbokesi katii, “ Mbukonzya Kusala Munzila Yabusongo.”)
16 Kuti wabelesya twaambo twaambwa mumafuka aaya aayinda, nga walibambila kuti usale munzila yabusongo. Nga watuziba twaambo tuswaanizidwe alubo nga walanga-langa malayilile aakonzya kukugwasya kuti usale munzila iibotezya Jehova. Kumbila Jehova kuti akugwasye kuti kusala kwako kuzwidilile.
17. Niinzi chiyandikana loko kuti usale kabotu?
17 Nikuba kuti chiindi wakali wasala zintu munzila iizwidilila, utalubi kuti kusala kulikabotu takuyeeme aabusongo bwako naakuti kuzintu zyakakuchitikila, pesi kuyeeme aabusongo buzwa kuli Jehova. Jehova alikke nguwe uukonzya kukupa luzibo lwachoonzyo akumvwisisisya, eezi nzizyo ziyandikana kuti ube aabusongo. (Tus. 2:1-5) Jehova ulakonzya kukugwasya kuti usale zintu zimubotezya.—Int. 23:2, 3.
LWIIMBO 28 Ikumvwana a Jehova
