1. Nkamboonzi nitweelede kulibambila kupenzegwa?

MUBUSIKU bwamamanino Mwaami Jesu katanafwa, wakati bantu boonse basala kuba basikwiiya bakwe, bayoopenzegwa. (Joh. 17:14) Ambulisunu, Bakamboni baJehova balikupenzegwa abantu batakombi Jehova. (2 Tim. 3:12) Mbukunga bweende bwanyika eeyi bwabaafwiifwi kumana, tulangilila kuti basinkondoma bazooyindilila kutukazya.​—Mt. 24:9.

2-3. (a) Tweelede kuzibaanzi atala akuyoowa? (b) Tulalanga-langaanzi muchiiyo eechi?

² Tweelede kuchitaanzi kuti tukonzye kulibambila kupenzegwa kuli kunembo? Tatweelede kuyeeyela zintu zibi ziyootuchitikila. Kuchita oobo kulakonzya kupa kuti tuyoowe akukataazikana. Kuyeeya zintu zibi ziyootuchitikila, kulakonzya kupa kuti tuleke kukomba Jehova. (Tus. 12:25; 17:22) Kuyoowa, nchibelesyo chipati ‘sinkondoma, Dyabbulosi’ nchabelesya kuti atweene. (1 Pet. 5:8, 9) Tweelede kuchitaanzi kuti tukakonzye kulisimya twaakupenzegwa?

³ Muchiiyo eechi, tulalanga-langa mbutukonzya kusimya bweenzuma bwesu aaJehova akuti nkamboonzi nitweelede kuchita oobo lino. Alubo tulabona zintu nzitukonzya kuchita lino kuti tube bantu batayoowi. Mpawo kumamanino, tulabona nzitukonzya kuchita chiindi basikutukazya nibatuchitila zintu zibi.

4. Kweendelelana amajwi aali muli Bahebrayo 13:5, 6 tweelede kuba aachoonzyo atala aanzi alubo nkamboonzi?

⁴ Baachoonzyo chakuti Jehova ulakuyanda akuti takakulekelezyi pe. (Bala Bahebrayo 13:5, 6.) Muminyaka myiingi yakiinda,  Ngaziyakulinda yakati: “Muntu uumuzi kabotu Leza, umusyoma loko muchiindi chamapenzi.” Majwi aaya ngachoonzyo! Kuti tulisimye nitupenzegwa, tweelede kuyanda Jehova akumusyoma amoyo woonse. Alubo tatweelede kuzumbuuzya kuti ulatuyanda.​—Mt. 22:36-38; Jak. 5:11.

5. Niinzi chitakugwasye kubona kuti Jehova ulakuyanda?

⁵ Bala Bbayibbele buzuba abuzuba, kuli amakanze akuti uswene aafwiifwi aJehova. (Jak. 4:8) Wanoobala Bbayibbele, langisisya buntu bubotu bwaJehova. Nubala atala amajwi ngaakaamba anzyaakachita, yezya kumvwisisisya mbakuyanda. (Kul. 34:6) Bamwi kulakonzya kubayumina kusyoma kuti Leza ulabayanda nkaambo taakwe muntu wakabatondeezya luyando. Kuti kakuli boobo, buzuba abuzuba lemba zintu Jehova nzyakuchitila, zitondeezya kuti ulakuyanda akuti ulakufwida luzyalo. (Int. 78:38, 39; Rom. 8:32) Wanooyeeya atala azintu zibotu zyakakuchitikila mubuumi akuyeeyesesya atala azintu nzubala muJwi lyaLeza, ulakonzya kulemba zintu zyiingi Jehova nzyakuchitila. Kulumba zintu Jehova nzyakuchitila, kusimya bweenzinyokwe mbulaabo anguwe.​—Int. 116:1, 2.

6. Kweendelana amajwi aali muli Intembauzyo 94:17-19 kukomba kazizwa aansi amoyo kukugwasya biyeni?

⁶ Komba chiindi choonse. Yeeya atala amwana mulombe uuleledwe aawisi. Mwana ooyu ulimvwa kakwabilidwe zyakuti wabuzya wisi atala azintu zibotu azibi zyamuchitikila buzuba oobo kaangunukide. Anduwe ulakonzya kumvwanana aJehova munzila iili boobo kuti waswena aafwiifwi anguwe kwiinda mukukomba kazizwa aansi aamoyo buzuba abuzuba. (Bala Intembauzyo 94:17-19.) Nukomba, “zyoonse zili mumoyo wako kozitila kuli Jehova mbubonya mbuli maanzi,” kubuzya Ndeendaako ulaaluyando zyoonse nzuyoowa azikupa kukataazikana. (Malo. 2:19) Kuchita oobo kupa kuti ujane mpinduunzi? Bbayibbele lyaamba kuti uyoojana “luumuno lwa Leza oolo lwiinda maano oonse.” (Flp. 4:6, 7) Kuti wakomba munzila eeyi, uyooswena aafwiifwi aJehova.​—Rom. 8:38, 39.

7. Nkamboonzi nweelede kusyoma kuti zisyomezyo zyaLeza zili atala aBwaami zizoozuzikizigwa?

⁷ Baachoonzyo chakuti zilongezyo zizooyetwa aaBwaami bwaLeza zizoozuzikizigwa. (My. 23:19) Kuti kutasyomi kuti zisyomezyo zyaLeza zizoozuzikizigwa, kuyoomuubila Saatani abantu bali kubbazu lyakwe kuti bakuyoosye. (Tus. 24:10; Heb. 2:15) Niinzi chitakugwasye kuti usyome Bwaami bwaLeza lino? Lipe chiindi chakubala zisyomezyo zyaLeza zili atala aBwaami bwakwe atwaambo tupa kuti ube aachoonzyo chakuti zizoozuzikizigwa. Kuchita oobo kuyookugwasya biyeni? Atulange zyakachitika kuli Stanley Jones, wakasungwa kwaminyaka iili 7 akaambo kalusyomo lwakwe. * Niinzi chakamugwasya kuti alisimye? Wakati:  “Ndakali aalusyomo lusimide nkaambo ndakalibuzi Bwaami bwaLeza, nzibuyoochita alubo teendakali kuzumbuuzya pe. Taakwe muntu wakali kukonzya kupa kuti ndileke kukomba Jehova.” Kuba aalusyomo lusimide muzisyomezyo zyaLeza, kupa kuti uswene aafwiifwi aJehova akuti utayoowi pe.​—Tus. 3:25, 26.

8. Mbutwiibona miswaangano yambungano kutondeezya kuti tuli bantu bali biyeni? Pandulula.

⁸ Njila miswaangano yachiKristu chiindi choonse. Miswaangano ipa kuti tuswene aafwiifwi aJehova. Maboneno ngituli aawo atala akunjila miswaangano atondeezya mbutuyoozwidilila twaakupenzegwa muchiindi chili kunembo. (Heb. 10:24, 25) Nkamboonzi nikuli boobo? Kuti twazumizya tuntu tuniini kuti tutukachizye kunjila miswaangano lino, niinzi chiyoochitika kunembo mfulumende zyaakutukasya kunjila miswaangano abakombima? Kubbazu limwi, kuti katukanzide kunjila miswaangano, tatukayoowi pe kuti basikutukazya bayanda kutulesya kubunganaamwi. Lino nchichiindi chakuti twiiyande miswaangano yesu. Kuti katwiiyanda miswaangano, tatukazumizyi kukazigwa, nikuba mulawu wamfulumende kuti zitukachizye kuswiilila Leza kwiinda bantu.​—Mil. 5:29.

9. Nkamboonzi kuziba magwalo amutwe niili nzila mbotu yakulibambila kupenzegwa?

⁹ Azibe amutwe magwalo nguyandisya. (Mt. 13:52) Zilakonzeka kuti kujata zintu amutwe kulakuyumina pesi Jehova ulakonzya kubelesya muuya uusalala kuti akuyeezye magwalo ngwaakabala. (Joh. 14:26) Bona zyakachitika kuli umwi mukwesu wakasungidwe alikke kuEast Germany. Wakati: “Ndakabotelwa nkaambo aachiindi eecho magwalo miingi ndakali ndaaziba amutwe. Nindakali andikke, ndakali kuyeeyesesya atala amakani asiyene-siyene aamuBbayibbele.” Magwalo aaya akagwasya mukwesu ooyu kuti akkale kali aafwiifwi aJehova, alisimye akuti akkale kasyomeka.

10. Nkamboonzi nitweelede kuziba nyimbo amutwe?

¹⁰ Zizibe aamutwe nyimbo zitembawula Jehova. Pawulu aSila nibakasungidwe kuFilipi, bakali kwiimba nyimbo zitembawula Jehova nzibakazi amutwe. (Mil. 16:25) Bakombima bakuSoviet Union bakalisimya biyeni nibakatolwa kubuzike kuSiberia? Muchizi Mariya Fedun uchiziyeeyede nzibakali kuchita. Wakati: “Twakali kwiimba nyimbo zyoonse zyamubbuku lyanyimbo, nzitwakazi amutwe.” Wakati nyimbo eezi, zyakali kubasungwaazya boonse akubagwasya kuti baswene aafwiifwi aaJehova.  Kulakusimya na kwiimba nyimbo nzuyandisya zitembawula Jehova? Kuti kakuli boobo, zizibe amutwe nyimbo eezyo lino!​—Langa kabbokesi kati “ Ndigwasye Nditayoowi.”

11-12. (a) Kweendelana amajwi aali muli 1 Samuele 17:37, 45-47 nkamboonzi Davida naakali aachibindi? (b) Twiiyaanzi kuchikozyano chaDavida?

¹¹ Kuti uzunde kupenzegwa, weelede kuba aachibindi. Kujana wachita biyeni kuti kutakwe buntu oobo? Yeeya kuti chibindi chachoonzyo tuchijani akaambo kabupati bwako, manguzu naakuti nzukonzya kuchita. Atulange chikozyano chaDavida naakali kuyanda kulwana aaGoliyati. Davida wakali muniini, kaboneka katakwe manguzu azilwanisyo kuti kakozyanisigwa aaGoliyati. Niliba sumu, taakalikwaalyo pe. Pesi wakali achibindi. Davida wakachijaana akuyoolwana bbabbani eelyo.

¹² Nkamboonzi Davida naakali aachibindi? Nkaambo wakali kusyoma kuti Jehova wakali aanguwe. (Bala 1 Samuele 17:37, 45-47.) Davida taakaliyezyanisya abupati bwaGoliyati nkaambo wakali muniini. Pesi wakabona Goliyati mbaakali muniini kuti wakozyanisigwa aaJehova. Twiiyaanzi kumakani aaya? Tuyooba aachibindi kuti twaba aachoonzyo chakuti Jehova unooli andiswe akuba alusyomo lwakuti basikutukazya mbaniini loko kuti twabakozyanisya aaLeza Singuzuzyoonse. (2 Mak. 20:15; Int. 16:8) Tweelede kuchitaanzi kuti tube aachibindi lino katutanapenzegwa?

13. Niinzi chitatugwasye kuti tube aachibindi? Pandulula.

¹³ Tulakonzya kuba aachibindi lino kwiinda mukukambawuka aantanganana atala amakani mabotu aaBwaami bwaLeza. Nkamboonzi? Nkaambo kukambawuka kutuyiisya kusyoma Jehova akuzunda penzi lyakuyoowa bantu. (Tus. 29:25) Mbuuli mubili mbuusima kuti katu-ekisesayiza, nkinkaako, tuba aachibindi chiindi nitukambawuka kung’anda ang’anda, antanganana, katutalibambilide akumasena kuchitwa zyabbizinesi. Kuti twaba aachibindi chakukambawuka lino, tunoolibambilide kwiinkilila kunembo katukambawuka nikuba chiindi mulimu wesu nuukasigwa.​—1 Tes. 2:1, 2.

14-15. Twiiyaanzi kumuchizi Nancy Yuen aValentina Garnovskaya?

¹⁴ Tulakonzya kwiiya zyiingi kubachizi babili bakali kusyomeka, bakatondeezya chibindi chigambya. Nancy Yuen wakali kulampa mamita aali 1,5 pesi taakali kufwambaana pe  kuyoowa. * Taakaleka pe kukambawuka makani mabotu aaBwaami bwaLeza. Eezi zyakapa kuti asungwe kwaminyaka iili 20 kuChina. Balupati-pati bamfulumende bakamubuzya-buzya mibuzyo bakamwaamba kuti wakali “muntu uuli aamutwe muyumu kwiinda boonse” muchisi chabo.

¹⁵ Munzila iikozyenie, muchizi Valentina Garnovskaya wakasungwa kuSoviet Union kwaziindi zitatu alubo minyaka yoonse njaakasungwa yakasika ku21. * Nkamboonzi naakasungwa? Nkaambo wakalilipedelede kwiinkilila kunembo kakambawuka, zyakuti balupati-pati bamfulumende bakamwaamba kuti “nchigwebenga chipati.” Niinzi chakapa kuti bachizi aaba babili basyomeka, babe aachibindi? Bakali aachoonzyo chakuti Jehova wakali ambabo.

16. Nguuli munsamu wakuti tube aachibindi?

¹⁶ Mbuuli mbutwabona, kuti tube aachibindi, tatweelede kusyoma manguzu eesu azintu nzitukonzya kuchita. Pesi tweelede kusyoma kuti Jehova uuli andiswe akuti nguwe uutulwanina. (Dt. 1:29, 30; Zek. 4:6) Kuchita oobo, ngumunsamu wakuti tube achibindi.

17-18. Kweendelana amajwi aali muli Johane 15:18-21 njiili nchenjezyo Jesu njaakatupa? Pandulula.

¹⁷ Tulabotelwa kuti bamwi kabatulemeka pesi tatweelede kuyeeya kuti tatugwasyi pe kuti bantu kabatatuyandi. Jesu wakati: ‘Mulabotelwa nywebo kufumbwa bantu nibamuzonda, nibamutanda aakati kabo, nibamusampawula akumwaamba kuti muli babi akaambo kaMwanaamuntu.’ (Lk. 6:22) Jesu wakali kwambaanzi?

¹⁸ Jesu taakali kwaamba kuti maKristu bakali kuyoobotelwa akaambo kakuti bantu balabazonda. Pesi wakali kwaamba zintu zyakali kuzoochitika kulindiswe. Tatuli banyika pe. Tupona kweendelana anjiisyo zyaJesu alubo tukambawuka makani ngaakakambawuka. Eezi zipa kuti nyika ituzonde. (Bala Johane 15:18-21.) Akaambo kakuti tuyanda kuchita  zintu zibotezya Jehova, tatukayoowi loko pe nikuba kuti bantu balatuzonda.

19. Kujana twachitobelezya biyeni chikozyano chabaapostolo?

¹⁹ Utazumini kuti majwi ngibaamba bantu anzibachita zipe kuti ube abweeme bwakuti uli Kamboni waJehova. (Mik. 4:5) Tulakonzya kwiiya kutayoowa bantu kwiinda mukulanga-langa chikozyano chabaapostolo bakuJerusalemu, muchiindi chifwiifwi Jesu kali wafwa. Baapostolo bakalizi mbubakali kuzondwa aabeendelezi bachikombelo bachiJuda. (Mil. 5:17, 18, 27, 28) Pesi buzuba abuzuba, baapostolo bakali kwiinka kutempele kabalitondeezya aantanganana kuti mbaasikwiiya baJesu. (Mil. 5:42) Teebakazumina kuti kuyoowa kubakachizye kukambawuka. Andiswe tulakonzya kuzunda penzi lyakuyoowa bantu kwiinda mukwaamba chaantanganana kuti tuli Bakamboni baJehova kumulimu, kuchikolo nikuba muchilawu mutukkala.​—Mil. 4:29; Rom. 1:16.

20. Nkamboonzi baapostolo nibakali kubotelwa nikuba kuti bakali kuzondwa?

²⁰ Nkamboonzi baapostolo nibakali kubotelwa? Bakali kubotelwa nkaambo bakalikazi kaambo kakali kupa kuti bantu babazonde alubo bakali kuchibona kachili chilongezyo kujatwa munzila iitali kabotu akaambo kakuchita kuyanda kwaJehova. (Lk. 6:23; Mil. 5:41) Mwaapostolo Petro wakazoolemba kuti: ‘Nikuba kuti mulakonzya kupenzegwa akaambo kabululami, mulabotelwa.’ (1 Pet. 2:19-21; 3:14) Nikuba kuti twabona kuti bantu balikutuzonda akaambo kakuchita zintu zilikabotu, tatukazumini kuti kuzondwa aabantu kupe kuti tuleke kukomba Jehova.

21-22. (a) Wasala kuchitaanzi kuti ulibambile kupenzegwa? (b) Tuyoolanga-langaanzi muchiiyo chitobela?

²¹ Tatubuzi pe buzuba nituyoopenzegwa naakuti nituyookasigwa amfulumende kuti tuleke kukomba Jehova. Pesi tulizi kuti tweelede kulibambila lino kwiinda mukusimya bweenzuma mbutuli aabo aJehova, kuba aachibindi akwiiya mbutukonzya kulisimya nituzondwa aabantu. Kulibambila lino kuyootugwasya kuti twiinkilile kunembo katukomba Jehova muchiindi chili kunembo.

²² Pesi tuyoochita biyeni kuti mfulumende yatukasya kukomba Jehova? Muchiiyo chitobela, tuyoolanga-langa njiisyo zyamuBbayibbele zikonzya kutugwasya kuti twiinkilile kunembo kukomba Jehova nikuba chiindi nitukasigwa.