1. Kweendelana alugwalo lwa 3 Johane 3, 4, niinzi chipa kuti tubotelwe?

MWAAPOSTOLO Johane wakabotelwa loko naakamvwa kuti bantu mbaakayiisya kasimpe bakali kuzumanana kubelekela Jehova. Bakali kuswaanana abuyumu-yumu alubo Johane wakabeleka changuzu kuti asimye lusyomo lwabo. Munzila iikozyenie, andiswe tulabotelwa kuti bana besu abantu mbitwiiyaabo Bbayibbele balipeda kuli Jehova akuzumanana kumubelekela.—Bala 3 Johane 3, 4.

2. Nkamboonzi Johane naakalemba magwalo aakwe aatatu?

² Kuyeeyelwa kuti mu98 C.E., Johane wakali kukkala kuEfeso naakuti afwiifwi ankuko. Kweelede kuti wakaakukkala nkuko chiindi naakagwisigwa mujele kukasuwa kaPatimo. Achiindi eecho mpawo Jehova mpakazulwida Johane kuti alembe magwalo aatatu. Makanze amagwalo aaya akali aakuti asungwaazye maKristu kuti bazumanane kusyoma Jesu akweenda mukasimpe.

3. Njiili mibuzyo njitutasandule?

³ Johane nguwe mwaapostolo wakachaala kachipona bamwi baapostolo kabali bafwa. Alubo wakali kukataazikana azintu zyakali kuchitika akaambo kakuti basiluleyo bakali kuyiisya zyakubeja mumbungano. * (1 Joh. 2:18, 19, 26) Basiluleyo aabo bakali kwaamba kuti balimuzi Leza pesi teebakali kwiitobela pe milawu yakwe. Muchiiyo eechi tulalanga-langa malayilile Johane ngaakalemba mpawo tulasandula mibuzyo iitobela: Kweenda mukasimpe chaambaanzi? Niinzi chikonzya kupa kuti kutuyumine kuchita oobo? Alubo nga tulagwasyania  biyeni kuti tuzumanane kweenda mukasimpe?

4. Kweendelana alugwalo lwa 1 Johane 2:3-6 alwa 2 Johane 4, 6, kweenda mukasimpe kuswaanizyaanzi?

⁴ Kuti tukonzye kweenda mukasimpe tweelede kuziba kasimpe kali muJwi lyaLeza Bbayibbele. Kuyungizya waawo tweelede “kubamba milawo” yaJehova chaamba kwiiswiilila. (Bala 1 Johane 2:3-6; 2 Johane 4, 6.) Jesu wakatusiila chikozyano chibotu chakuswiilila Jehova. Nkinkaako imwi nzila yakuswiilila Jehova nkubeleka changuzu kutobelezya zyakali kuchitwa aJesu.—Joh. 8:29; 1 Pet. 2:21.

5. Tweelede kuba achoonzyo chanzi?

⁵ Kuti tukonzye kweenda mukasimpe, tweelede kuba achoonzyo chakuti Jehova nguLeza wakasimpe akuti zyoonse nzyaamba muJwi lyakwe Bbayibbele, nzyachoonzyo. Alubo tweelede kuba achoonzyo chakuti Jesu nguMesiya wakasyomezegwa. Bantu biingi tabasyomi pe kuti Jesu wakananikwa kuti abe Mwaami waBwaami bwaLeza. Johane wakachenjezya kuti “basilweeno banji” bakali kukonzya kweena aabo bakali aalusyomo lutasimide muli Jehova aJesu. (2 Joh. 7-11) Johane wakalemba kuti: “Ino nguni mubeji kunze lyayooyo uukaka kuti Jesu ngu Kristo?” (1 Joh. 2:22) Kuti katutayandi kweenwa, tweelede kubala Jwi lyaLeza. Eeyi ninzila iikonzya kutugwasya kuti tuzibe Jehova aJesu. (Joh. 17:3) Kuti twabala Jwi lyaLeza, tulaba achoonzyo chakuti nzitusyoma nkasimpe.

6. Mbuyumu-yumuunzi mbwaakaswaana umwi muchizi uuchikula?

⁶ MaKristu boonse beelede kuchenjelela kuti bateenwi abusongo bwabantu. (1 Joh. 2:26) MaKristu bachikula mbabo beelede kukachenjelela kapati kakole aaka. Umwi muchizi uutegwa Alexia * ulaaminyaka iili 25 ukkala kuFrance wakati: “Nindakachili kuchikolo, ndakayiya njiisyo yakulisandukila kwazintu abusongo bwabantu, eezi zyakapa kuti nditabi achoonzyo atala akasimpe nkindakali kusyoma. Ndakabona kuti teebusongo pe kuzumina zyoonse zyakali kuyiisigwa abayiisi akuti ndileke kusyoma zyaambwa aBbayibbele.” Alexia wakabala bbuku litegwa Life—How Did It Get Here? By Evolution or by Creation? Mumviki ziche, wakali waba achoonzyo atala  akasimpe kali muBbayibbele. Alexia wakati: “Ndakalibonena kuti Bbayibbele lilaakasimpe. Alubo ndakabona kuti kupona kweendelana anzilyaamba kupa kuti tubotelwe akuti tube aluumuno.”

7. Niinzi nzituteelede kuchita, alubo nkamboonzi?

⁷ MaKristu boonse, bapati abaniini tabeelede kuchitaanga bakomba Jehova pesi kabachita zintu zibi kumbali. Johane wakaamba kuti tazichiti pe kuti tweende mukasimpe kumwi katupona buumi bwakutalijata. (1 Joh. 1:6) Kuti katuyanda kuti Jehova atuyande lino amuchiindi chilikunembo, tweelede kuchita zintu zyoonse katuzi kuti kuli uutubwene. Nikuba kuti bantu tabakonzyi pe kubona zintu nzituchita chakusisikizya, pesi Jehova ulazibona zyoonse nzituchita.—Heb. 4:13.

8. Niinzi nzitweelede kukaka?

⁸ Tweelede kukaka maboneno aabantu bali munyika aali atala achibi. Mwaapostolo Johane wakalemba kuti: “Ikuti naa twaamba kuti, ‘Tunyina cibi,’ twalyeena lwesu tobeni.” (1 Joh. 1:8) Muchiindi chamwaapostolo Johane, basiluleyo bakali kwaamba kuti muntu ulakonzya kuchita zibi pesi ayinkilile kunembo kali abweenzinyina aLeza. Nikuba mazubaano, bantu biingi bali aamaboneno ali boobo. Biingi baamba kuti basyoma muli Leza pesi bali aamaboneno aasiyene aaJehova mumakani aachibi kapati munkani yazyakoonana. Kuli michito yakutalijata Jehova njaamba kuti tayili kabotu pe pesi bantu baamba kuti muntu ulakonzya kwiichita kuti kayanda.

9. Kuswiilila malayilile ali muBbayibbele kubagwasya biyeni bachikula?

⁹ MaKristu bachikula basungilizigwa kutobelezya zichitwa abamwi kuchikolo naakuti kumulimu. Eezi nzizyo zyakachitika kuli Aleksandar. Wakaamba kuti: “Bamwi basimbi bakali kundisungilizya kuti ndoone aabo. Nibakabona kuti ndakakaka akuti tandikwe musimbi, bakaamba kuti ndakali kuyandana abalombema.”  Kuti waswaanana amapenzi aali boobo weelede kuziba kuti kubelesya malayilile aali muBbayibbele kupa kuti ulemekwe, ulikwabilile kumalwazi, utakataazikani mumizeezo akuti ukkale kulaabweenzinyokwe busimide aJehova. Kuzunda masunko kupa kuti kukuubile kuchita zintu zilikabotu. Utalubi kuti maboneno atali kabotu ngibalaawo bantu bali munyika atala azyakoonana azwa kuli Saatani. Nkinkaako kuti wakaka kuchita zibi nga “wamuzunda ooyo imubi.”—1 Joh. 2:14.

10. Lugwalo lwa 1 Johane 1:9 lutugwasya biyeni kuti tubelekele Jehova amoyo uutuba?

¹⁰ Tweelede kuziba kuti Jehova nguwe ulaacheelelo chakutubuzya zintu nzituteelede kuchita. Alubo tubeleka changuzu kuti tutachiti chibi. Pesi kuti twachita chibi tulakomba kuli Jehova katukumbila kuti atulekelele. (Bala 1 Johane 1:9.) Alubo kuti twachita chibi chipati tweelede kuya kubaalu nkaambo mbabo bakasalwa aJehova kuti batugwasye. (Jak. 5:14-16) Nikuba boobo tatweelede kulipa mulandu atala azibi nzitwakachita chiindi. Nkamboonzi? Nkaambo Taateesu siluyando wakatupa Mwanaakwe kuti atufwide kuchitila kuti tulekelelwe zibi zyesu. Kuti Jehova waamba kuti ulabalekelela basizibi, nga wabalekelela choonzyo. Nkinkaako tatweelede kuzumizya kufumbwa chintu kuti chitukachizye kubelekela Jehova amoyo uutuba.—1 Joh. 2:1, 2,12; 3:19, 20.

11. Nga tulalikwabilila biyeni kunjiisyo zikonzya kupa kuti lusyomo lwesu lucheye?

¹¹ Tweelede kukaka njiisyo zyabasiluleyo. Kuzwa niyakatalika mbungano yachiKristu, Dyabbulosi ulikubelesya basiluleyo kuti beene bakombi baLeza basyomeka kuti batabi achoonzyo atala anzibasyoma. Nkinkaako tweelede kukonzya kusiyanisya njiisyo zyakubeja anjiisyo zyakasimpe. * Basiluleyo  balakonzya kubikka makani atali kabotu atala andiswe aaIntaneti kabayanda kuti tutamusyomi pe Jehova akuti tutabayandi pe bakombima. Utaasyomi pe makani aayo nkaambo azwa kuli Saatani.—1 Joh. 4:1, 6; Ciy. 12:9.

12. Nkamboonzi nitweelede kusimya lusyomo lwesu mukasimpe nkitwakayiya?

¹² Kuti tukonzye kukazya Saatani tweelede kusyoma Jesu akusyoma kuti nguwe ubelesegwa aLeza kuti azuzikizye makanze aakwe. Alubo tweelede kusyoma bantu Jehova mbabelesya kuti azulwide mbunga yakwe. (Mt. 24:45-47) Lusyomo lwesu lulasima kuti twakkala katubala Jwi lyaLeza. Kuti twachita oobo, lusyomo lwesu lulaba mbuli munsamu uli amiyanda iinikide. Pawulu wakalemba majwi ayendelana ayaaya chiindi naakali kulembela mbungano yakuKkolose. Wakati: “Mbubonya mbomwakamuzumina Kristo Jesu Mwami, amuzumanane kweenda kamukamantene anguwe, kamusimpide miyanda akuyakwa mulinguwe alimwi akukkalikila mulusyomo lwanu.” (Kol. 2:6, 7) Nkinkaako kuti twabeleka changuzu kuti tusimye lusyomo lwesu, Saatani abaabo balikubbazu lyakwe tabakatukachizyi kweenda mukasimpe.—2 Joh. 8, 9.

13. Tweelede kuzibaanzi alubo nkamboonzi?

¹³ Tweelede kuziba kuti nyika ilatuzonda. (1 Joh. 3:13) Johane wakaamba kuti, “nyika yoonse ili mumaanza aamubi.” (1 Joh. 5:19) Saatani wanyema loko nkaambo ulizi kuti mamanino asika. (Ciy. 12:12) Saatani tabelesyi bwaamu abasiluleyo luzutu kuti atukachizye kweenda mukasimpe. Pesi ubelesya zimwi nzila ziboneka mbuli kupenzegwa. Saatani ulizi kuti wasyaalilwa chiindi chifwiifwi nkinkaako ulikweezya anzila zyoonse kuti atulesye kukambawuka akupa kuti lusyomo lwesu lumane. Nkinkaako tazitugambyi pe kubona kuti mulimu wesu ulikukasigwa muli zimwi nyika. Nikuba boobo bakwesu abachizi bali muzisi eezyo balikulisimya. Nzibachita zitondeezya kuti tulakonzya kuzumanana kusyomeka kufumbwa buyumu-yumu mbutuswaana.

14. Nga tulabagwasya biyeni bakwesu abachizi kuti bazumanane kweenda mukasimpe?

¹⁴ Tweelede kweetelela bamwi kuti tukonzye kubagwasya kuti beende mukasimpe. (1 Joh. 3:10, 11, 16-18) Tatweelede kuyandana zintu nizili kabotu luzutu pesi tweelede kuyandana anikwaba mapenzi. Muchikozyano kuli muntu nguzi na wakafwidwa amuntu ngwayanda uyanda kuumbulizigwa naakuti kugwasigwa muli zimwi nzila? Naakuti kuli bakombima na mbuwakamvwa bakachitikilwa mapenzi aalichitikila bayanda kugwasigwa kwiinda mukuyakilwa maanda aabo aMaanda aaBwaami? Zintu nzituchita nzizyo zitondeezya kuti tulabayanda akubeetelela bakwesu kwiinda zintu nzitwaambuula.

15. Kweendelana alugwalo lwa 1 Johane 4:7, 8, niinzi nzitweelede kuchita?

¹⁵ Kuti katubayanda bamwi nga tulikutobelezya chikozyano chaTaateesu uulikujulu. (Bala 1 Johane 4:7, 8.) Imwi nzila mpati njitutondeezyaayo luyando nkwiinda mukulekelelana. Muchikozyano, umwi muntu ulakonzya kutubisizya mpawo wakumbila lulekelelo. Tweelede kumulekelela akusiyanaazyo. (Kol. 3:13) Mukwesu uutegwa Aldo wakaliswaana sunko eeli chiindi umwi mukwesu ngwaakali kulemeka naakambuula majwi atali kabotu atala amusyobo wakwe. Aldo wakati: “Ndakazumanana kukomba kuli Jehova kuti andigwasye kuti nditamunyemeni pe mukwesu ooyu.” Pesi kuli zimwi Aldo nzyaakachita.  Wakakumbila mukwesu ooyu kuti bazwe aamwi mumulimu wakukambawuka. Nibakali mumulimu wakukambawuka, Aldo wakabuzya mukwesu ooyo kuti majwi aakwe taakamujata kabotu pe. Aldo wakati: “Mukwesu ooyu naakamvwa kuti zyakandichisa biyeni nzyakaamba wakakumbila lulekelelo. Nikuba nzila njaakali kwaambuulaayo yakali kutondeezya kuti wakali kulisola atala anzyaakaamba. Kuzwa waawo, twakayinkilila kunembo katumvwanana.”

16-17. Tweelede kukanza kuchitaanzi?

¹⁶ Mwaapostolo Johane wakali kubayanda bakombinyina alubo wakali kuyanda kuti babe alusyomo lusimide. Wakatondeezya kuti ulabayanda kwiinda mukubalembela malayilile ajanika mumagwalo aakwe aatatu. Kulabotezya kuziba kuti bakwesu abachizi bakananikwa kuti bakeendelezye aKristu kujulu bali aluyando mbuli Johane.—1 Joh. 2:27

¹⁷ Atwaabikke mumoyo malayilile ngitwayiya muchiiyo eechi. Atube amakanze akuzumanana kweenda mukasimpe akuswiilila Jehova muzintu zyoonse nzituchita mubuumi. Kkala kubala Jwi lyakwe akusyoma nzilyaamba. Ba alusyomo lusimide muli Jesu. Kaka busongo bwabantu anjiisyo zyabasiluleyo. Utachitaanga ulikukomba Jehova kumwi kuli kuchita zintu zibi alubo utazumini kweenwa kuti uchite zintu zibi. Pona kweendelana amilawu yaJehova iluleme. Atugwasye bamwi kuti bazumanane kweenda mukasimpe kwiinda mukubalekelela kuti batubisizya akugwasya aabo bayanda lugwasyo. Eezi ziyoopa kuti tuzumanane kweenda mukasimpe nikuba kuti katuswaana masunko.