Jesu wakaba Mupayizi Mupati chiindi naakabbabbatizigwa mu29 C.E. Tuzizi biyeni eezi? Chiindi Jesu naakabbabbatizigwa wakatondeezya kuti wakalilipedelede kupa buumi bwakwe aachipayililo chakukozyanisya chiiminina “kuyanda” kwaLeza. (Gal. 1:4; Heb. 10:5-10) Mbukunga chipayililo chakukozyanisya chakaba kuzwa chiindi Jesu naakabbabbatizigwa kaziya kunembo, kweelede kuti tempele pati lyakumuuya lyiiminina bukombi busalala bwaJehova buyeeme muchinunuzyo lyakaba achiindi nchicheecho. Alubo chipayililo nchintu chiyandikana loko mutempele eelyo lyakumuuya.—Mt. 3:16, 17; Heb. 5:4-6.

Mbukunga kwakali kwaba tempele pati lyakumuuya kwakeelede kuba mupayizi mupati. Nkinkaako Jehova wakananika Jesu “amuuya uusalala anguzu” kuti abe mupayizi mupati. (Mil. 10:37, 38; Mk. 1:9-11) Pesi tuzizi biyeni kuti Jesu wakananikwa kuba Mupayizi Mupati katanafwa akubusigwa? Tulakonzya kusandula mubuzyo ooyu kwiinda mukulanga-langa chikozyano chaAroni abamwi bakabeleka kabali bapayizi bapati aansi aMulawu waMozesi.

Kweendelana aMulawu, mupayizi mupati nguwe luzutu wakali kuzumizigwa kunjila Mubusena Busalalisya bwatente lyakukombela alubo nikwakazooba tempele nguwe wakali kunjila Mubusena Busalalisya. Busena Busalalisya aBusena Busalala bwakali kwaanzanisigwa aamulembo. Mupayizi mupati wakali kuzubuka mulembo ooyu kaya Mubusena Busalalisya muBuzuba Bwakumania Milandu luzutu. (Heb. 9:1-3, 6, 7) Aroni abamwi bapayizi bapati bakali kunanikwa kuba bapayizi kabatanazubuka “mumulembo” watente lyakukombela. Munzila iikozyenie, kweelede kuti Jesu wakananikwa kuba Mupayizi Mupati watempele pati lyaJehova lyakumuuya katanafwa. Kuzwa waawo, wakayinda “mumulembo wakusitilizya, nkokuti mubili wakwe” chiindi naakaya kujulu. (Heb. 10:20) Akaambo kazeezi, mwaapostolo Pawulu wakaamba kuti Jesu wakaza “kali mupaizi mupati” alubo “wakainda mutente lipati alimwi lilondokede kwiinda leelyo lyakayakwa amaanza aabantu,” chaamba “kujulu.”—Heb. 9:11, 24.

Takwe musiyano akati kachiindi chizuminano chipya nichakazumizigwa anichakatalika kubeleka. Nkamboonzi? Chiindi Jesu naakaya kujulu akupa buumi bwakwe bumaninide akaambo kandiswe, wakabweza ntaamu yakusaanguna yakuzumizya naakuti kusinizya chizuminano chipya. Pesi kuli ntaamu zitatu zyakapa kuti chizuminano chipya chitalike kubeleka. Atubone ntaamu eezyo.

Yakusaanguna, Jesu wakalibonia kunembo lyaJehova, yachibili Jesu wakapa buumi bwakwe kuli Jehova alubo yamamanino Jehova wakayitambula mpindu yaganzi lyaJesu lyakatika. Kusikila ntaamu eezi nizyakachitwa chizuminano chipya teechakali kubeleka pe.

Bbayibbele talyaambi pe kuti ndiilili loko Jehova naakatambula mpindu yachinunuzyo chaJesu. Akaambo kazeezi tatukonzyi pe kwaamba buzuba chizuminano chipya nichakazumizigwa anichakatalika kubeleka. Pesi tulizi kuti Jesu wakaya kujulu kakucheede mazuba ali 10 kuti kube Pentekkoste. (Mil. 1:3) Muchiindi nchicheechi chifwiifwi Jesu wakapa mpindu yachinunuzyo chakwe kuli Jehova alubo Jehova wakayitambula. (Heb. 9:12) Eezi zyakaba aantanganana mubuzuba bwaPentekkoste. (Mil. 2:1-4, 32, 33) Kuzwa waawo chizuminano chipya chakali chazumizigwa alubo chakali chatalika kubeleka.

Mubufwiifwi, chizuminano chipya chakazumizigwa alubo chakatalika kubeleka kuzwa chiindi Jehova naakatambula mpindu yaganzi lyaJesu lyakatika. Jesu nguMupayizi Mupati wachizuminano eechi alubo ubeleka kali Simwiimaakati.—Heb. 7:25; 8:1-3, 6; 9:13-15.