Ndakazyalwa mu1954 kuSt. Paul, Minnesota iili kuUnited States. Bazyali bangu bakali maRoma, teetwakali azintu zyiingi pesi teetwakali kufwaba. Ndili wachibili aakati kabana bali 5. Ndakayiya kuchikolo chamaRoma alubo ndakali kugwasya mupayizi. Nikuba boobo, ndakali aluzibo luche atala aBbayibbele. Ndakali kusyoma kuti Leza mpali akuti mulengi, pesi teendakali kusyoma kuti chikombelo eechi chilakonzya kundigwasya kuti ndibe alusyomo.

Mumunyaka wakusaanguna kandili kukkoleji yazyamulawu, Bakamboni baJehova bakandiswaya kung’anda. Bakajana kandili kuwacha mpawo bakaamba kuti bazooboola. Nibakaboola, ndakababuzya mubuzyo wakuti: “Nkamboonzi bantu babi nibazwidilila kwiinda bantu bachita zibotu?” awakuti “Niinzi chinga chilapa kuti tubotelwe mubuumi?” Bakandipa bbuku litegwa The Truth That Leads to Eternal Life aBbayibbele bbotu lya Busanduluzi Bwanyika Mpya lyagreen. Ndakazumina kwiiya Bbayibbele. Ndakayiya  zyiingi. Ndakabotelwa kapati kwiiya kuti Bwaami bwaLeza njiyo mfulumende iyoomaninsya mapenzi munyika. Ndakabona kuti bantu tabakonzyi pe kulyeendelezya akuti mfulumende zyabo zipa kuti kube mapenzi, kufwaba akutalulamisya munyika.

Kumasaangunino aa1982, ndakalipeda kuli Jehova mpawo ndakazoobbabbatizigwa kumuswaangano waBbooma wakali aamutwe uti: “Kasimpe Kali Atala aBwaami” (Kingdom Truth) wakachitilwa kuliimwi ng’anda mpati iili kuSt. Paul. Mumviki yakatobela, ndakazoobweeda lubo kubusena oobo kuyoolemba misunko yazyamilawu yakumamanino yakuti ndibe loya. Kumasaangunino aOctober ndakaziba kuti ndakali ndapasa alubo ndakeelede kusaanguna kubeleka.

Kumuswaangano ooyu waBbooma ndakaswaanana aamukwesu uutegwa Mike Richardson wakali kubeleka kuBbeteli yakuBrooklyn. Wakandibuzya kuti kwakali kwaba dipatimenti yazyamilawu kumawofesi mapati. Ndakazwa ndayeeya majwi amuItiyopiya ajanika muli Milimo 8:36 mpawo ndakalibuzya kuti, ‘Niinzi chindikachizya kuti ndikabeleke kuDipatimenti yaZyamilawu? Nkinkaako ndakalembela kuti ndikabeleke kuBbeteli.

Bazyali bangu teebakabotelwa pe kuti ndakali ndaba uumwi waBakamboni baJehova. Ndeende wakandibuzya kuti kubeleka kuBbeteli kwakali kuyoondigwasyaanzi mbukunga ndakali loya. Ndakamubuzya kuti mulimu ooyu wakali wakulipeda akuti ndakali kuyoopegwa $75, mali yakali kupegwa bantu babeleka kuBbeteli mweezi amweezi.

Mbukunga ndakali loya kuliimwi kunkuta, teendakabuka kuya kuBbeteli pe pesi ndakazooyinka mu1984. Ndakategwa ndikabelekele kuDipatimenti yaZyamilawu. Luzibo ndundakajana nindakali kubeleka kunkuta lwakazoondigwasya muzyiimo zyakatobela.

MuNovember 1983, mbunga yakawula Stanley Theater kuJersey City, New Jersey. Bakwesu bakalembela balupati-pati bamfulumende magwalo kabakumbila kuzumizigwa kubambulula ng’anda eeyo. Bakapandulwida balupati-pati aaba kuti bakali kuyanda kubelesya ng’anda eeyi kuchita miswaangano mipati yaBakamboni baJehova. Teezyakabeendela kabotu pe. Milawu yamuJersey City yakali kwaamba kuti maanda akukombela ayelede kubaamwi amaanda akkala bantu. Nkinkaako teebakabazumizya  pe nkaambo Stanley Theater yakali mundawu ichitilwa mabbizinesi. Bakwesu bakatola nkani eeyi kunkuta pesi nkuta yakakaka kubaswiilila.

Mumviki njindakasika aaBbeteli, mbunga yakatola nkani eeyi kunkuta yabbooma. Mbukunga ndakali ndabeleka kunkuta yabbooma iili kuSt. Paul kuMinnesota kwaminyaka iibili, ndakali ndazibila kumvwa nkani zili boobu. Umwi loya ngutwakali aawe wakaamba kuti Stanley Theater yakali kubelesegwa kuchita zintu zisiyene-siyene zili mbuli kweebela mamuvi akwiimba. Nkamboonzi nibali kukaka kuti ibelesegwe muli zyabukombi? Nkuta yabbooma niyakalanga-langa nkani eeyi yakaamba kuti zyakachitwa abalupati-pati aaba teezyakali kabotu pe. Nkuta eeyo yakabuzya balupati-pati kuti batupe mvumo. Eezi zyakapa kuti ndibone kuti Jehova wakali kulongezya mbunga kwiinda mukubelesya dipatimenti eeli kuti lisumpule mulimu wakwe. Kutola lubazu munkani eeyi kwakandibotezya.

Bakwesu bakasaanguna mulimu mupati wakubambulula ng’anda eeyo, alubo kakutanayinda munyaka kkilasi yachi79 yaGiliyadi yakagilajuwetela mumo mu8 September 1985. Chakali chilongezyo chipati loko kugwasilizya kusumpula mulimu waBwaami kandili mudipatimenti lyazyamilawu. Alubo ndakamvwa kandikkutisikene loko kwiinda mbundakali kulimvwa kandichili loya kunyika. Teendakalizi pe kuti Jehova wakachili kuyanda kundibelesya munzila zyiingi.

Kuma1980, madokotela abazyabusilisi teebakali kuzumina kuti umwi waBakamboni wasala kusilikwa kaatabikkwi ganzi naakuti tupanzi twaganzi. Banakazi bakali aamada bakali kuswaanana apenzi pati nkaambo babetesi bakaamba kuti banakazi tabakwe cheelelo chakukaka kubikkwa ganzi. Babetesi bakali kwaamba kuti mwanakazi ulakonzya kufwa kuti waleka kubikkwa ganzi alubo eezi zyakali kupa kuti mwana asyaale katakwe banyina.

Mu29 December 1988, Muchizi Denise Nicoleau wakasweekelwa ganzi jingi loko naakali kutumbuka mwanaakwe mulombe. Buumi bwakwe bwakali bwaba muntenda zyakuti dokotela wakwe wakamubuzya kuti ayungizigwe ganzi. Muchizi ooyu wakakaka. Mubuzuba bwakatobela chibbadela chakakumbila nkuta kuti ibazumizye kumubikka ganzi. Mubetesi wakazumizya bakuchibbadela kuti bamubikke ganzi muchizi ooyu katamubuzizye pe naakuti kubuzya mulumaakwe.

Muli Bwasanu 30 December bakuchibbadela bakamubikka ganzi Muchizi Nicoleau nikuba kuti mulumaakwe abamwi babbululu bakwe teebakali kuyanda pe. Mubuzuba mbuboobo goko bamwi babbululu bamuchizi ooyo abamwi baalu  bakasungwa akaambo kakuti bakali kuyanda kujalila bakuchibbadela kuti batamubikki ganzi pe. Mubuzuba bwakatobela makani aali atala akusungwa kwabakwesu aaba akapupululwa mumanewspaper, muTV amumalediyo kuNew York akuli zimwi ndawu.

MuMuvulo kuseeni, ndakaambuula amubetesi wankuta mpati uutegwa Milton Mollen. Ndakamupandulwida nkani eeyi akuti umwi mubetesi wakazumizya chibbadela kuti chibikke muchizi Nicoleau ganzi kabatamubuzizye pe. Mollen wakati ndisike kuwofesi yakwe sikati kuchitila kuti tuzoowambuuzyanie atala aamwi makani ayandikana azimwi zipanzi zyamulawu. Ndakayinkaamwi amukwesu Philip Brumley wakali mulangizi waDipatimenti lyaZyamilawu kuBbeteli. Alubo Mollen wakayita loya wakuchibbadela kuti asike. Twakakazyania loko zyakuti Mukwesu Brumley wakandilembela mukabbuku kakwe kuti, “batama.” Kwaamba choonzyo lulayo oolu lwakandigwasya nkaambo ndakali ndanyema.

Kakuli kwayinda awa Mollen wakaamba kuti juunza nkani eeyi yakali kuyooba yakusaanguna kwaambuulwa munkuta. Nitwakali kuzwa mumawofesi aakwe Mollen wakaamba kuti loya wakuchibbadela “uyoozwa zitukuta juunza.” Eezi zyakali kwaamba kuti kwakali kuyoomuyumina kuti atondeezye kuti chibbadela tachikwe mulandu. Eezi zyakandigwasya kuti ndibe achoonzyo chakuti Jehova wakali kuyoopa kuti tuzunde. Zyakandigambya kubona kuti Jehova wakali kutubelesya kuti tuchite kuyanda kwakwe.

Twakabeleka mansiku katuli kulibambila nzitwakali kuyoowamba juunza. Mbukunga nkuta yakali aafwiifwi akuBbeteli, bakwesu biingi babeleka kuDipatimenti yaZyamilawu bakeenda kunkuta. Nitwakaambuula nkani yesu kunembo lyababetesi bali 4, bakazoowamba kuti chibbadela teechakeelede kumubikka ganzi muchizi Nicoleau. Nkani eeyi yakazunda alubo nkuta mpati yakazibikka aantanganana kuti kubikka muntu ganzi kabatamupede mweenya wakwaamba nzyayeeya kwakali kutyola mulawu.

Nkuta mpati yakuNew York yakaamba kuti muchizi Nicoleau wakali acheelelo chakusala kutabikkwa ganzi. Nkani eeyi yakali yakusaanguna aakati kankani zili 4 zili atala akubikkwa ganzi nzindakaba achilongezyo chakugwasilizya kuti  zizunde munkuta. (Langa kabbokesi kati “ Nkani Zyakazunda kuNkuta Mpati”) Ndakabelekaamwi aamwi maloya kuBbeteli munkani zili atala akukomezegwa kwabana, kulekana akwaabana masitendi amaanda.

Nindakasaanguna kubonana aDawn, wakazooba mwanakazi wangu, wakali walekana amulumaakwe alubo wakali abana batatu. Wakali kubeleka kumwi kapayona. Wakaswaanana abuyumu-yumu mubuumi bwakwe pesi nchindakayandisya loko nkuti wakalilipedelede kubelekela Jehova. Mu1992 twakanjilaamwi Muswaangano waBbooma kuNew York wakali amutwe utii, “Kuba Basimumuni” (Light Bearers) mpawo ndakamukumbila kuti tuyandane. Twakazookwatana nikwakayinda munyaka. Jehova wakandilongezya kwiinda mukundipa mwanakazi uubikkila maanu muzintu zyabukombi alubo ulaaluyando. Dawn wakali kukkala kandichitila zintu zibotu.—Tus. 31:12.

Nitwakakwatana bana bakali aminyaka iili 11, 13 a16. Ndakali kuyanda kuba muzyali ulikabotu nkinkaako ndakayanduulisisya akubelesya zyoonse nzindakajana mumabbuku eesu zili atala akukomezya bana batali bako. Kumasaangunino twakali kuswaanana abuyumu-yumu pesi chibotezya nchakuti bana bakazoondibona mbuli mweenzinyina amuzyali wabo ulaaluyando. Twakali kubazumizya kuti baze abeenzinyina kung’anda alubo twakali kubotelwa kubaamwi abeenzinyina.

Mu2013 ime aDawn twakalongela kuWisconsin kuti tukagwasye bazyali besu nkaambo bakali bachembaala. Teendakali kuyeeyela kuti ndilayinkilila kunembo kandigwasilizya kuBbeteli. Pesi ndakali kutambwa kuti ndizoogwasye mbunga kuti kwabuka zimwi nkani ziswaanizya zyamilawu.

MuSeptember 2018 ndakabona kuti ndakali kukkala kandikola-kola naakuti kandikosola-kosola. Dokotela wakandilanga-langa pesi taakwe nchaakabona. Mukuya kwachiindi ndakazoobona umwi dokotela. MuJanuary 2019 dokotela ooyo wakandibuzya kuti ndakali abulwazi butajayinkene bwakali kuyoopambanisya mubili wangu.

Nikwakayinda mazuba aatatu ndakali kusaana umwi musobano ngundiyandisya mpawo ndakawa akutyoka kuboko. Ndakali ndaba chiindi kandisaana musobano ooyu alubo ndakaluuzi kabotu zyakuti nindakawa ndakaziba kuti bulwazi oobu bwakali kundikomenena akuti teendakachili kukonzya kunyona mubili wangu. Alubo kwakali kwabundiyumina kwaambuula, kweenda akumena.

Ndakaba achilongezyo chakubelesya luzibo lwangu lwabuloya kuti ndichite mulimu muniini loko mukusumpula mulimu waBwaami. Ndakaba aachilongezyo chakulemba aamwi makani aajanika mumamagazini akuba aachilongezyo chakwaambuula kunembo lyamadokotela ababetesi kandili kulwanina cheelelo chaBakamboni baJehova chakukaka kubikkwa ganzi. Ndilakonzya kwaamba majwi ajanika muli Luka 17:10 kuti: ‘Ndili muzike buyo. Ndachita nzindayelede kuchita.’