1. Niinzi nzyaakakuchitila Jehova?

WAKAKAJANA biyeni kasimpe? Kulakonzeka kuti wakakambawukilwa “makani mabotu” abazyali bako, muntu ngubelekaawe, ngwiiyaawe kuchikolo naakuti umwi Kamboni waJehova wakali kukambawuka aang’anda ang’anda. (Mk. 13:10) Kuzwa waawo, amwi wakasaanguna kwiiya aanduwe Bbayibbele. Zintu nzwaakayiya zyakapa kuti uyande Jehova alubo wakabona kuti anguwe ulakuyanda. Jehova wakakukwela kulinguwe mpawo wakaba sikwiiya waJesu Kristu. Lino wakaba aabulangilizi bwakuyoopona kukabe kutamani. (Joh. 6:44) Zilaantanganana kuti ulamulumba Jehova nkaambo wakabelesya umwi muntu kuti akuyiisye kasimpe alubo ulamulumba akaambo kachilongezyo chakuba aakati kabakombi bakwe.

2. Tulalanga-langaanzi muchiiyo eechi?

² Mbukunga twakakaziba kasimpe andiswe tuli aachilongezyo chakugwasya bamwi kuti baze munzila iitola kubuumi. Kulakonzya kutuubila kukambawuka aang’anda ang’anda pesi kulakonzya kutuyumina kutalisya zyiiyo zyaBbayibbele. Kulakuyumina na anduwe? Kuti kakuli boobu, chiiyo eechi chili aamalayilile aatakugwasye. Tuyoolanga-langa kuti niinzi chipa kuti tugwasye bantu kuti babe basikwiiya. Alubo tuyoobona mbutukonzya kuzunda buyumu-yumu bukonzya kutukachizya kuti twiiye Bbayibbele abantu. Pesi kwalino, atubone kuti nkamboonzi nitweelede kukambawuka makani mabotu akuyiisya bantu.

3. Niinzi chipa kuti tukambawuke?

³ Chiindi Jesu naakali aanyika wakalayilila batobeli bakwe  kuti bachite zintu zibili. Chakusaanguna, wakabalayilila kuti bakambawuke makani mabotu aali atala aBwaami alubo wakabatondeezya mbubakonzya kukambawuka. (Mt. 10:7; Lk. 8:1) Wakababuzya nzibakeelede kuchita kuti bantu baswiilila naakuti bakaka. (Lk. 9:2-5) Alubo Jesu wakabuzya basikwiiya bakwe kuti bakali kuyoopa “bumboni kumasi oonse.” Eezi zitondeezya kuti bakali kuyookambawukila bantu biingi amundawu zisiyene-siyene. (Mt. 24:14; Mil. 1:8) Basikwiiya bakwe bakeelede kukambawuka makani mabotu aali atala aBwaami bwaLeza azintu nzibuyoochita kazitakwe ndaba kuti bantu baswiilila na naakuti pe.

4. Kweendelana alugwalo lwa Matayo 28:18-20, niinzi chimwi Jesu nchaakalayilila basikwiiya bakwe kuti bachite?

⁴ Nchiichili chintu chachibili Jesu nchaakalayilila batobeli bakwe? Wakabalayilila kuti bayiisye bantu kutobela zintu zyoonse nzyaakabalayilila. Bamwi babonaanga mulimu ooyu wakukambawuka akuyiisya wakeelede kuchitwa aamaKristu bakusaanguna luzutu. Pesi teembubo pe. Nkaambo Jesu wakaamba kuti mulimu ooyu wakeelede kuchitwa “kusikila kumamanino aabweende bwazintu.” (Bala Matayo 28:18-20.) Chiindi Jesu naakalibonia kuli basikwiiya bakwe bayinda ku500 kweelede kuti nchichiindi mpaakalayilila kuti kuchitwe mulimu ooyu wakukambawuka awakuyiisya. (1 Kor. 15:6) Alubo muchiyubunuzyo Jesu nchaakayubunwida Johane, wakatondeezya kuti basikwiiya bakwe boonse beelede kuyiisya bantu atala aJehova.—Ciy. 22:17.

5. Kweendelana alugwalo lwa 1 Bakorinto 3:6-9, Pawulu wakawukozyanisyaanzi mulimu wakukambawuka awakuyiisya?

⁵ Mwaapostolo Pawulu wakakozyanisya mulimu wakugwasya bantu kuti babe basikwiiya azichitwa aamulimi. Mulimi weelede kuchita zyiingi kutali kubyala mbuto luzutu. Wakabuzya maKristu bakuKkorinto kuti: “Mebo ndakasyanga, Apolo wakatilila . . . muli muunda wa Leza uulimwa.” (Bala 1 Bakorinto 3:6-9.) Mbukunga tubeleka ‘mumuunda waLeza,’ tubyala mbuto kwiinda mukukambawuka alubo tutiliila mbuto eeyo chiindi nituyiisya bantu. (Joh. 4:35) Pesi tulizi kuti Leza nguwe uukomezya.

6. Mulimu wesu wakuyiisya uswaanizyaanzi?

⁶ Chiindi nitukambawuka tuyanduula aabo bali ‘amyoyo mibotu ibalibambilide kutambula buumi butamani.’ (Mil. 13:48) Kuti tugwasye bantu aabo kuti babe basikwiiya tweelede kubagwasya kuti (1) bamvwisisisye nzibayiya, (2) bazisyome alubo (3) babelesye zintu nzibayiya kuzwa muBbayibbele. (Joh. 17:3; Kol. 2:6, 7; 1 Tes. 2:13) Toonse mumbungano tuli aamulimu wakubatondeezya luyando bantu bayiya Bbayibbele akubatambula kabotu chiindi nibasika kumiswaangano. (Joh. 13:35) Munaachiiyo weelede kubeleka changuzu kuti agwasye muntu ngwayiyaawe kuti achinche buumi bwakwe akuti aleke kusyoma njiisyo “ziyumu nta” zitazwi muMagwalo. (2 Kor. 10:4, 5) Zilakonzya kutola myeezi myiingi kuti muntu achinche buntu bwakwe akuti ayelele kubbabbatizigwa. Pesi kuchita oobo kuyoomugwasya.

7. Nkamboonzi nitukambawuka akugwasya bantu kuti babe basikwiiya?

⁷ Nkamboonzi nitukambawuka akugwasya bantu kuti babe basikwiiya? Kaambo kakusaanguna nkakuti tuyanda Jehova. Kuti wabeleka changuzu mumulimu wakukambawuka awakugwasya bantu kuti babe basikwiiya nga ulikutondeezya kuti ulamuyanda Leza. (1 Joh. 5:3) Kuyanda Jehova nkuko kwakapa kuti  usaangune kukambawuka aang’anda ang’anda nikuba kuti teekwakali kuuba pe kuchita oobo. Kulakonzeka kuti wakali kuyoowa chiindi nwaakasaanguna kukambawuka. Pesi teewakaleka pe nkaambo wakali kuyanda kuswiilila mulawu ngwaakaamba Jesu. Mukuya kwachiindi, teewakachili kuyoowa pe kukambawuka. Pesi kutegwani atala akutalisya chiiyo chaBbayibbele? Amwi ulayoowa. Pesi kuti wakomba kuli Jehova kumukumbila kuti akugwasye kuti ube aachibindi achiyandisyo chakuti utalisye chiiyo chaBbayibbele uyookugwasya.

8. Kweendelana alugwalo lwa Marko 6:34, niinzi chipa kuti tuyiisye bantu?

⁸ Kaambo kachibili kapa kuti tuyiisye bantu nkakuti tulabayanda. Aali chimwi chiindi Jesu abasikwiiya bakwe bakali bakatala akaambo kakuti bakali bakambawuka loko. Bakali kuyanda busena bwakulyookezezya pesi nkamu yabantu yakabatobela. Jesu wakabeetelela alubo wakasaanguna kubayiisya “zintu zinji.” (Bala Marko 6:34.) Wakalipeda kubayiisya nikuba kuti wakalikatede. Nkamboonzi? Nkaambo wakalizi mbubakali kulimvwa bantu aaba. Wakali kuyanda kubagwasya nkaambo bakali kukataazikana alubo teebakalikwe bulangilizi pe. Bantu biingi mazubaano baswaanana aamapenzi aasiyene-siyene nikuba kuti babonekaanga balabotelwa akuti balakkutisikana mubuumi bwabo. Bali mbuli mbelele zisweekede zitakwe mweembezi. Mwaapostolo Pawulu wakaamba kuti bantu bali boobu tabamwizi pe Leza alubo tabakwe bulangilizi pe. (Ef. 2:12) Bali munzila “mpati itola kulunyonyooko.” (Mt. 7:13) Luyando luyoopa kuti tubone kuti bantu bamuchilawu chesu bayanda kugwasigwa. Nzila iilinjiyo njitukonzya kubagwasya nkwiiyaabo Bbayibbele.

9. Kweendelana alugwalo lwa Bafilipi 2:13, kujana Jehova wakugwasya biyeni?

⁹ Kulakonzeka kuti ulayoowa kusaanguna kwiiya Bbayibbele amuntu akaambo kakuti ubonaanga kuli mulimu mwiingi. Kuti kakuli boobo, komba kuli Jehova umubuzye mbulimvwa. Mukumbile kuti akugwasye kutalisya chiiyo chaBbayibbele akuti ube aachiyandisyo chakuyiisya. (Bala Bafilipi 2:13.) Mwaapostolo Johane wakaamba kuti Leza ulazisandula nkombyo zyeendelana aakuyanda kwakwe. (1 Joh. 5:14, 15) Baachoonzyo chakuti Jehova uyookugwasya kuti ube aachiyandisyo chakugwasya bantu kuti babe basikwiiya.

10-11. Niinzi chikonzya kupa kuti kutuyumine kwiiya aabantu Bbayibbele?

¹⁰ Tulizi kuti mulimu wakugwasya bantu kuti babe basikwiiya ulayandikana pesi tulakonzya kuswaana buyumu-yumu bukonzya kupa kuti tutachiti zyiingi mumulimu ooyu. Atulange-lange kuti mbuubuli buyumu-yumu oobo akuti nga tulabuzunda biyeni.

¹¹ Tulakonzya kukachilwa kuchita zyiingi akaambo kazyiimo. Muchikozyano, bamwi basikupupulula bachembaala alubo bamwi balachiswa. Uli muchiimo chili boobu na anduwe? Kuti kakuli boobo, ulakonzya kubelesya nzila zyakukambawuka nzitwakayiya akaambo kabulwazi bwaCorona. Twakabona kuti tulakonzya kwiiya aabantu katubelesya mafooni. Nkinkaako, ulakonzya kwiiya aamuntu kuli kung’anda yako alubo kuchita oobo kulakonzya kupa kuti wiiye aabamwi bantu batajaniki pe mumaanda chiindi nituli kukambawuka. Bamwi nga balaangunukide kwiiya kuseeni-seeni naakuti mansiku. Ulakonzya kuchita mabambe aakuti wiiye aabantu aabo. Jesu wakayiisya Nikkodimasi mansiku akaambo kakuti nchichiindi Nikkodimasi nchakaangunukide.—Joh. 3:1, 2.

12. Niinzi chitupa choonzyo chakuti tulakonzya kuyiisya bamwi?

 ¹² Tulakonzya kubonaanga tatukonzyi kwiiya aamuntu. Ulakonzya kubonaanga weelede kusaanguna kuba aaluzibo kuchitila kuti wiiye aamuntu Bbayibbele. Kuti kakuli boobo, atubone zintu zitatu zikonzya kupa kuti ube aachoonzyo chakuti ulakonzya kuyiisya muntu. Chakusaanguna, Jehova ukubona kuti uleelela kuyiisya bamwi. (2 Kor. 3:5) Chachibili, Jesu uuli aanguzu zyoonse “kujulu alimwi aanyika” ngwaakakupa mulimu ooyu wakuyiisya bamwi. (Mt. 28:18) Alubo chachitatu, ulakonzya kugwasigwa aabamwi. Jesu wakali kwaamba zintu nzyaakali kuyiisigwa aawisi anduwe ulakonzya kubelesya zintu nzuyiisigwa aaJehova. (Joh. 8:28; 12:49) Kuyungizya aali zeezi, ulakonzya kukumbila mulangizi wakabunga kamulimu, payona naakuti sikupupulula uuli aaluzibo kuti akugwasye mbukonzya kutalisya chiiyo chaBbayibbele. Zimwi zikonzya kukugwasya nkuzwa mumulimu wakukambawuka abasikwiiya bali aaluzibo.

13. Nkamboonzi nitweelede kuchincha nzila njituyiisyaayo?

¹³ Kulakonzya kutuyumina kubelesya nzila azibelesyo zipya zyakuyiisya bantu. Nzila njituyiisyaayo bantu yakachincha. Mbukunga twabubelesya bbuku litegwa Mbukonzya Kubotelwa Mubuumi Kukabe Kutamani! nkinkaako, tweelede kulibambila akuyiisya bantu munzila iisiyene anjitwakali kuyiisyaayo chiindi. Tubala mafuka mache mpawo zyiingi nzyakwaambuuzyania asikwiiya. Chiindi nituyiisya, twaabubelesya mavidiyo miingi azimwi zibelesyo ziswaanizya JW Library^®. Kuti kutakonzyi kubelesya zibelesyo eezi, ulakonzya kukumbila umwi kuti akugwasye. Tubantu tulaachiimbo chakukakatila kuzintu nzitwakazibila kuchita. Alubo kulatuyumina kuti tuchinche. Pesi kwiinda mukugwasigwa aaJehova abamwi, tulakonzya kuchincha alubo tuyoobotelwa kwiiya aabantu. Umwi payona wakaamba kuti: “Nzila eeyi mpya yakuyiisya ipa kuti sikupupulula asikwiiya banoneezegwe chiindi nibalikwiiya.”

14. Niinzi nzitweelede kuziba kuti katukkala mundawu mukuli kuyumu kutalisya zyiiyo zyaBbayibbele alubo lugwalo lwa 1 Bakorinto 3:6, 7, lutuyiisyaanzi?

¹⁴ Kulakonzeka kuti tukkala mundawu mukataazya kutalisya zyiiyo zyaBbayibbele. Bamwi balakonzya kutaba aachiyandisyo amulumbe ngutukambawuka naakuti kutukazya. Niinzi zikonzya kutugwasya kuti tuzumanane kukambawuka muzyiimo zili boobu? Tweelede kuziba kuti bantu balakonzya kuchincha akaambo kazyiimo nzibaswaana. Alubo bakatalikwe chiyandisyo kumasaangunino, mukuya kwachiindi nga bazoobona kuti bayanda kugwasigwa aaLeza mubuumi bwabo. (Mt. 5:3) Bamwi bakatali kutambula mabbuku eesu, mukuya kwachiindi bakazoozumina kwiiya Bbayibbele. Alubo tweelede kuyeeya kuti Jehova nguSimalelo wabutebuzi. (Mt. 9:38) Wesu mulimu ngwakubyala akutiliila mpawo Jehova nguwe uukomezya. (1 Kor. 3:6, 7) Alubo chimwi chuumbulizya nchakuti, Jehova ubona kubeleka changuzu nkutuchita kutali kuti twiiya aabantu bangane. *

15. Jehova ulimvwa biyeni kuti umwi watambula kasimpe kamuBbayibbele akubelesya nzyayiya?

¹⁵ Jehova ulabotelwa kuti muntu watambula kasimpe kamuBbayibbele akukayiisya bamwi. (Tus. 23:15, 16) Zilaantanganana kuti ulikubotelwa loko nabona bakombi bakwe kabali kubeleka changuzu mumulimu wakukambawuka awakuyiisya. Muchikozyano, mumunyaka wamulimu  wamu2020, twakachitisya zyiiyo zyaBbayibbele zili 7 705 765 alubo bantu bali 241 994 bakalipeda kuli Jehova akubbabbatizigwa nikuba kuti kwakali Corona. Basikupupulula aaba bachili bapya bayoogwasya bamwi kuchitila kuti ambabo babe basikwiiya. (Lk. 6:40) Zilaantanganana kuti tupa kuti Jehova abotelwe chiindi nitugwasya bamwi kuti babe basikwiiya.

16. Tweelede kukanza kuchitaanzi?

¹⁶ Mulimu wakugwasya bantu kuti babe basikwiiya muyumu pesi kwiinda mukugwasigwa aaJehova tulakonzya kupa kuti bantu bamuzibe Taateesu wakujulu. Atube aamakanze aakutalisya chiiyo chaBbayibbele chimwi biyo. Chiindi nukambawukila muntu mukumbile kuti mwiiye Bbayibbele. Kuti muntu ooyo wazumina, uyoobotelwa alubo Jehova uyookulongezya.

17. Kuyiisya bantu Bbayibbele kupa kuti tumvwe biyeni?

¹⁷ Tuli aachilongezyo chipati chakukambawuka achakuyiisya bamwi kasimpe. Mulimu ooyu upa kuti tubotelwe loko. Mwaapostolo Pawulu iwakagwasya bantu biingi kuTesalonikka kuti babe basikwiiya wakaamba kuti: “Ino bulangizi bwesu naa kukondwa kwesu naa musini wesu walukkomano kumeso aa Mwami wesu Jesu kuciindi cakubako kwakwe ninzi? Sena tamuli ndinywe? Masimpe, nywebo ndendinywe bulemu bwesu akukondwa kwesu.” (1 Tes. 2:19, 20; Mil. 17:1-4) Basikupupulula biingi mazubaano balimvwa munzila iikozyenie. Muchizi uutegwa Stéphanie amulumaakwe bakagwasya bantu biingi kuti babbabbatizigwe. Muchizi ooyu wakaamba kuti: “Taakwe chintu chibotezya mbuli kugwasya bantu kuti balipede kuli Jehova akuti babbabbatizigwe.”