1-2. Majwi aajanika muli Isaya 65:16, 17, atugwasya biyeni kuti tuzumanane kulisimya?

MUSWAANGANO wabbooma wamu2017 wakali aamutwe utii, “Amuzumanane Mutaleki Pe!” Aamuswaangano ooyu twakayiya mbutukonzya kulisimya kumapenzi ngituswaananaawo. Nikuba kuti kwayinda minyaka iili 4 kuzwa nitwakanjila muswaangano ooyu, pesi tuchizumanana kulisimya kumapenzi ngituswaana munyika eeyi.

² Ngaali mapenzi ngwakaswaananaawo lino-lino? Wakafwidwa aawumwi wampuli na naakuti mweenzinyokwe? Ulikuchiswa bulwazi butasilikiki na? Wachembaala na? Wakachitikilwa mapenzi aalichitikila na? Nkukkala kuli nkondo na? Ulikupenzegwa na? Kuli bumwi buyumu-yumu na mbwaakaswaana akaambo kabulwazi bwaCorona? Tuchilangilila aameso aasalala chiindi zintu eezi niziyoomana alubo kazitachisiki pe mumizeezo yesu.—Bala Isaya 65:16, 17.

3. Niinzi nzitweelede kuchita alubo nkamboonzi?

³ Tuswaanana aamapenzi aasiyene-siyene alubo mukuya kwachiindi tulakonzya kuzooswaanana aamapenzi mayumu loko. (Mt. 24:21) Zilaantanganana kuti tweelede kubeleka changuzu kuti tube bantu balisimya. Nkamboonzi? Nkaambo Jesu wakaamba kuti: “Kwiinda mukuliyumya kwanu, muyoofwutula buumi bwanu.” (Lk. 21:19) Kubona bamwi mbubalisimya kumapenzi aakozyenie angituswaana kulatugwasya kuti andiswe tulisimye.

4. Nkamboonzi nituli kwaamba kuti Jehova nguwe uulisimya kwiinda bantu boonse?

⁴ Jehova Leza nguwe uulisimya kwiinda bantu boonse. Amwi makani aaya alakugambya. Pesi yeeya atala azeezi, nyika ilikweendelezegwa aaSaatani alubo izwide mapenzi. Jehova  uli aanguzu zyakumaninsya mapenzi aaya kufumbwa chiindi pesi ulikulindila chiindi cheelede. (Rom. 9:22) Kwalino, Leza ulikuzumanana kulisimya kusikila chikasike chiindi chakwe nchabikkide chakuti azoomaninsye mapenzi woonse. Lino, atulange-lange zintu zili 9 Jehova nzyalikulisimya kuli nzizyo.

5. Zina lyaLeza lyakasampawulwa biyeni alubo ulimvwa biyeni atala anzizyo?

⁵ Kusampawulwa kwazina lyakwe. Jehova ulaliyanda zina lyakwe alubo uyanda kuti bantu boonse balilemeke. (Is. 42:8) Kwayinda minyaka iisika ku6 000 zina lyakwe kalitalemekwi pe. (Int. 74:10, 18, 23) Eezi zyakasaangunina mumuunda waEdeni chiindi Dyabbulosi (chaamba “Sikubejelezya”) naakabuzya Adamu aEva kuti Leza wakali kubayima chimwi chintu chakali kukonzya kupa kuti babotelwe. (Matl. 3:1-5) Kuzwa aachiindi eecho, Jehova ulikutamikizigwa mulandu wakuti tayandi pe kuti bantu kababotelwa. Jesu wakali kukataazikana akaambo kakutalemekwa kwazina lyaWisi. Eezi zyakapa kuti ayiisye basikwiiya bakwe kuti kabakomba kabati: “Taateesu ooli kujulu, alisalazyigwe zina lyako.”—Mt. 6:9.

6. Nkamboonzi Jehova naakatatondeezya kuti mweendelezi ulikabotu chiindi bweendelezi bwakwe nibwakakazigwa?

⁶ Kukazigwa kwabweendelezi bwakwe. Jehova nguwe uli aacheelelo chakweendelezya kujulu aanyika alubo weendelezya munzila iilikabotu. (Ciy. 4:11) Pesi Dyabbulosi wakeena bangelo abantu kuchitila kuti babonaanga Leza taakwe nguzu pe zyakubeendelezya. Zyayinoobweza chiindi kuti kuboneke kuti Jehova nguwe ulaacheelelo chakweendelezya akuti mweendelezi uulikabotu. Nkinkaako, Jehova wakazumizya bantu kuti balyeendelezye kwachiindi chilamfu kuchitila kuti balibonene kuti tabakonzyi pe kuzwidilila kabateendelezegwi aanguwe. (Jer. 10:23) Kutondeezya moyo mulamfu nkwalikuchita Leza kuyoopa kuti bantu bakalibonene kuti nguwe uuli aacheelelo chakweendelezya kujulu aanyika. Alubo bantu bayoobona kuti Bwaami bwakwe mbubo abulikke bukonzya kupa kuti munyika mube luumuno akuti bantu babotelwe.

7. Mbaani bakapapila Jehova alubo uzoobachitaanzi?

⁷ Kupapila kwabamwi bana bakwe. Jehova wakalenga bangelo abantu kabamaninide. Pesi Saatani (chaamba “Sikukazya”) wakamupapila alubo wakapa kuti Adamu aEva ambabo bapapile Jehova. Bamwi bangelo abantu bakasaanguna ambabo kupapila Jehova. (Jud. 6) Mukuya kwachiindi, bamwi maIsrayeli, chisi nchakasalide, bakamupapila alubo bakasaanguna kukomba baleza bakubeja. (Is. 63:8, 10) Eezi zyakamuchisa Jehova. Pesi wakalisimya alubo ulikuzumanana kulisimya kusikila chizoosike chiindi chakwe nchabikkide chakuti azoonyonyoone basikupapila boonse. Eechi chinooli chiindi chibotezya loko kuli Jehova akubakombi bakwe basyomeka nkaambo tabachinooyandikani kulisimya pe.

8-9. Ngaali manwa aambwa atala aJehova alubo tweelede kuchitaanzi atala angawo?

⁸ Manwa aaSaatani. Saatani wakaamba kuti Jobu abamwi bakombi baJehova boonse bakomba Leza akaambo kakuti kuli zintu nzibayanda kutali akaambo kakuti balamuyanda pe. (Job. 1:8-11; 2:3-5) Dyabbulosi ulikuzumanana kubejelezya bantu kusikila lino. (Ciy. 12:10) Kuti twazumanana kusyomeka akulisimya chiindi nituli mumapenzi ngatulikutondeezya kuti tulamuyanda Jehova akuti nzyakaamba Saatani nzyakubeja. Jehova wakamulongezya Jobu, andiswe uyootulongezya kuti twalisimya.—Jak. 5:11.

 ⁹ Saatani ubelesya bapati bazikombelo zyakubeja kuti bayiisye kuti Leza nguwe uupa kuti bantu baswaanane aamapenzi. Kuti mwana wafwa, bamwi baamba kuti Leza nguwe wamubweza akaambo kakuti nga uyanda bangelo kujulu. Nisimpe kuti ooku nkutamulemeka kupati loko Leza. Pesi iswe tulizi kuti Leza nguTaata siluyando. Kuti muntu wafwa naakuti wachiswa, nga tulizi kuti teenguwe pe wapa kuti zichitike. Alubo tuli aabulangilizi bwakuti limwi zuba uzoomaninsya malwazi akubusya bafwide. Kuziba makani aaya kupa kuti tuyiisye bantu kuti Jehova nguTaata siluyando. Eezi zipa kuti akonzye kusandula ooyo umusampawula.—Tus. 27:11.

10. Lugwalo lwa Intembauzyo 22:23, 24, lutondeezyaanzi atala aJehova?

¹⁰ Mapenzi ngibaswaananaawo bakombi bakwe. Jehova nguLeza uli aaluzyalo. Taamubotezyi pe mapenzi ngituswaananaawo aaswaanizya kupenzegwa, kuchiswa naakuti ayetwa akaambo kakulubizya kwesu. (Bala Intembauzyo 22:23, 24.) Akaambo kakuti alamuchisa mapenzi ngituswaananaawo, Jehova uyanda kuzoowamaninsya. (Kozyanisya a Kulonga 3:7, 8; Isaya 63:9) Chiyoosika chiindi nayoosindula “misozi yoonse kumeso [eesu], alimwi lufwu talukabi limbi, akwalo koomoka, kulila nokuba kucisa takukabi limbi pe.”—Ciy. 21:4.

11. Jehova ulimvwa biyeni atala abakombi bakwe basyomeka bakafwa?

¹¹ Kufwidwa abakombi bakwe. Jehova ulimvwa biyeni atala abakombi bakwe bakafwa? Uyanda kuzoobabona lubo. (Job. 14:15) Yeeya atala achiyandisyo Jehova nchalaacho chakuyanda kuzoobona mweenzinyina Abrahamu. (Jak. 2:23) Ani kutegwani aMozesi ngwakali kwaambuulaawe mulomo mpande? (Kul. 33:11) Alubo yeeya atala chiyandisyo nchalaacho chakuyanda kuzoomvwa Davida  abamwi basintembawuzyo kabali kwiimba nyimbo zyakumutembawula. (Int. 104:33) Jehova uchibayeeyede bakombi bakwe bakafwa. (Is. 49:15) Uchiziyeeyede zintu zyoonse nzibakali kuchita nkaambo Bbayibbele lyaamba kuti “boonse mbaumi kulinguwe.” (Lk. 20:38) Limwi zuba uyoobabusya alubo uyoobotelwa kumvwa kabakomba lubo kuli nguwe. Alubo uyoobutambula bukombi bwabo. Kuti kuli wakafwidwa aabbululu wako, majwi aaya alakonzya kukuumbulizya.

12. Niinzi zili kumuchisa Jehova mazubaano aano aakumamanino?

¹² Kupenzegwa kwabakombi bakwe. Kuzwa chiindi bantu nibakabisya mumuunda waEdeni, Jehova wakalizi kuti zintu zyakali kuzooyindilila kubija. Jehova ulakuzonda kutajatwa kabotu kwabantu, kulwana abubi buliwo munyika. Ulaandaba abantu batakwe muntu uubakwabilila ikapati bamukabafu abamuchaala. (Zek. 7:9, 10) Zilamuchisa Jehova kubona bakombi bakwe kabali kupenzegwa akusungwa. Amube aachoonzyo chakuti Jehova ulamuyanda moonse nimuli kulisimya mbuli nguwe.

13. Niinzi nzibali kuchita bantu alubo niinzi nzyayoochita Leza?

¹³ Kuvula kwabwaamu. Saatani ulikweena bantu kuti batalijati kabotu. Muchiindi chaNowa, Leza “wakabona kuti bubi bwabantu bwavwulisya.” Nkinkaako, “Jehova wakausa kuti wakalenga bantu anyika alimwi wakapenga mumoyo.” (Matl. 6:5, 6, 11) Kuzwa aachiindi eecho, bubi bwavulisya munyika. Dyabbulosi ulikubotelwa kubona bantu kabali kuchita misyobo yoonse yabwaamu kazitakwe ndaba kuti bakozyenie zizo na naakuti pe. (Ef. 4:18, 19) Alubo ubotelwa loko kuti mukombi waJehova wachita chibi chipati. Aachiindi chakwe cheelede, Jehova uyootondeezya kuti ulabuzonda bwaamu kwiinda mukunyonyoona bantu boonse bachita bwaamu batayandi kuchincha.

14. Bantu balikwiijata biyeni nyika abanyama?

¹⁴ Kunyonyoona nyika nkubalikuchita bantu. Muntu weendelezya “muntunyina munzila iimuletela mapenzi” alubo bantu balikukachilwa kulangania nyika azintu zili mulinjiyo mbuli banyama. Nzibali kuchita zilakazyania anzyakalayilila Jehova. (Muk. 8:9; Matl. 1:28) Bamwi basyaabusongo bakaamba kuti kuyeeyelwa kuti muminyaka miche iitobela, zintu zyakalengwa zili mbuli banyama ayimwi misamu zisika ku1 000 000 zinooli kazitachijaniki pe akaambo kazintu nzibachita bantu. Eezi zitondeezya kuti zintu zyakalengwa aLeza tazili kujatwa kabotu pe. Pesi Jehova wakasyomezya kuti uyoonyonyoona “baabo banyonyoona nyika” akupa kuti ibe paradayizi.—Ciy. 11:18; Is. 35:1.

15-16. Niinzi chipa kuti tulisimye mbuli Jehova? Amba chikozyano.

¹⁵ Kwaminyaka myiingi, Taateesu wakujulu ulikulisimya kumapenzi aasiyene-siyene. (Langa kabbokesi kati “ Zintu Jehova Nzyalikulisimya Kuli Nzizyo.”) Jehova ulaamanguzu aakumaninsya mapenzi aali munyika kufumbwa chiindi. Pesi kuba aamoyo mulamfu kwakwe kuli kutugwasya. Tulakonzya kuzikozyanisya azeezi, atuteedi mwaalumi amwanakazi wakwe babuzigwa kuti mwana wabo uyoozyalwa kali aabumwi bulwazi akuti tazooponi kwachiindi chilamfu pe. Chiindi mwana naazyalwa, bazyali balabotelwa nikuba kuti balaswaanana aabuyumu-yumu chiindi nibali kumulangania. Akaambo kakuti balamuyanda mwana wabo balalisimya kubuyumu-yumu boonse kuchitila bamupe zyoonse ziyandikana.

¹⁶ Munzila iikozyenie, boonse bana baAdamu  bazyalwa kabali aachibi. Nikuba boobo, Jehova ulabayanda alubo ulaandaba ambabo. (1 Joh. 4:19) Kusiyana abazyali baambwa muchikozyano chili aajulu, Jehova ulakonzya kwaamaninsya mapenzi woonse ngibaswaananaawo bantu. Wakabikka kale buzuba mbwatazoomaninsye mapenzi woonse. (Mt. 24:36) Kuyeeyesesya atala ambatuyanda Jehova kupa kuti tulisimye mbuli nguwe. Teembubo na?

17. Lugwalo lwa Bahebrayo 12:2, 3, lutugwasya biyeni kuti tulisimye mbuli Jesu?

¹⁷ Jehova nguwe uulisimya kwiinda bantu boonse. Jesu anguwe wakalisimya mbuli Wisi. Chiindi naakali aanyika, wakalisimya naakali kusampawulwa, kuusigwa nsoni anaakagankaminwa aachisamu chakupenzezya akaambo kandiswe. (Bala Bahebrayo 12:2, 3.) Zilaantanganana kuti kulisimya kwaJehova kwakagwasya Jesu kuti alisimye. Andiswe kulakonzya kutugwasya.

18. Kweendelana alugwalo lwa 2 Petro 3:9, kulisimya kwaJehova kwakatugwasya biyeni?

¹⁸ Bala 2 Petro 3:9. Jehova ulichizi chiindi chilikabotu chakuti azoonyonyoone nyika iino izwide bubi. Kuba amoyo mulamfu kwakwe kwapa kuti bantu biingi bayiye atala anguwe akuti kube nkamu mpati yabantu bamukomba. Bantu boonse aaba balamulumba Jehova nkaambo wakatondeezya moyo mulamfu alubo eezi zyakapa kuti bazyalwe, bayiye atala anguwe akuti balipede kulinguwe. Kulisimya kwaJehova kuyooboneka kuti kulagwasya chiindi natazoope bulumbu mamiliyoni aabantu batazoolisimye kusikila kumamanino.

19. Tweelede kuzumanana kuchitaanzi alubo tuyoojanaanzi kuti twachita oobo?

¹⁹ Kulisimya kwaJehova kutuyiisya kuti andiswe tuzumanane kulisimya akuti tubotelwe chiindi nituli mumapenzi. Nikuba kuti mapenzi ngalikweeta Saatani munyika alamuchisa Jehova pesi ulikuzumanana ‘kukkomana.’ (1 Tim. 1:11) Andiswe tulakonzya kuzumanana kubotelwa chiindi nitulindila Jehova kuti azoosalazye zina lyakwe, azootondeezye kuti nguwe ulaacheelelo chakweendelezya akuti azoomaninsye bubi amapenzi aali munyika. Atuzumanane kulisimya alubo tukkale katuyeeyesesya kuti Taateesu wakujulu anguwe ulikulisimya. Kuti twachita oobo, majwi aatobela ayoozuzikizigwa kulindiswe akuti: “Ulikkomene muntu ooyo uuzumanana kuliyumya mumasunko, nkaambo ikuti naa Leza wamukkomanina uyootambula musini wabuumi, ooyo Jehova ngwaakasyomezya baabo ibazumanana kumuyanda.”—Jak. 1:12.