1. Jehova wakachitaanzi chiindi Adamu aEva nibakazwa aakubisya? (Matalikilo 3:15)

 KAKUTANAYINDA chiindi chilamfu Adamu aEva kababisizye, Jehova wakapa bana baAdamu bulangilizi kwiinda mukwaamba atala abupolofita buyandikana loko. Nzyakaamba Leza zijanika muli Matalikilo 3:15—Bala.

2. Nkamboonzi bupolofita oobu nibuyandikana loko?

² Bupolofita oobu bujanika mubbuku lyakusaanguna muBbayibbele. Nikuba oobo, amwi mabbuku aamuBbayibbele anjililana abupolofita oobu munzila zisiyene-siyene. Mbuli ntambo yabbuku mbiijatanizya mapeeji oonse aabbuku, mbukubede akumajwi aajanika muli Matalikilo 3:15, ajatanizya makani woonse alembedwe mulaamwi mabbuku amuBbayibbele kuti ube mulumbe uujisini wakuti Mufutuli wakali kuzootumwa kuti azonyonyoone Dyabbulosi abatobeli bakwe boonse. * Eechi chiyooba chilongezyo chipati loko kulibaabo bayanda Jehova.

3. Njiili mibuzyo njitutasandule muchiiyo eechi?

³ Muchiiyo eechi, tulasandula mibuzyo iitobela iilaatala abupolofita buli muli Matalikilo 3:15, yakuti: “Mbaani baambidwe mubupolofita oobu? Bupolofita oobu buli kuzuzikizigwa biyeni? Akuti tugwasigwa biyeni abupolofita oobu?”

4. “Nzoka” ngwani alubo tuzizi biyeni?

⁴ Aabo baambidwe mulugwalo lwa Matalikilo 3:14, 15 baswaanizya “nzoka,” ‘lunyungu’ lwanzoka, ‘mukaintu’ “alunyungu” lwamukayintu. Bbayibbele lilakonzya kutugwasya kuziba nchizyiiminina zintu eezi. * Lino atusaangune kubona kuti nzoka yiimininaanzi. Teezyakali kuchita kuti nzoka yachoonzyo imvwisisisye makani ngaakaamba Jehova mumuunda waEdeni. Nkinkaako, lubeta Jehova ndwaakaamba lwakali kuya kuchilenge chili aamaanu. Nchiichili chilenge eecho? Lugwalo lwa Ciyubunuzyo 12:9 lukabikka aantanganana kaambo aaka. Lutondeezya kuti “imuzoka . . . wakaindi” nguSaatani Dyabbulosi. Ani lunyungu lwanzoka mbaani?

5. Lunyungu lwanzoka mbaani?

⁵ Chiindi Bbayibbele nilibelesya bbala lyakuti lunyungu munzila yakukozyanisya, nga lilikwaamba aabo batobelezya umwi muntu zyakuti nga babonwa kuba bana bakwe. Nkinkaako, lunyungu lwanzoka luswaanizya zilenge zyamuuya abantu bakaka kuswiilila Jehova Leza alubo bakazya bantu bakwe mbuli mbachita Saatani. Lunyungu oolo luswaanizya bangelo bakasiya milimu yabo kujulu muchiindi chaNowa abantu babi bachita mbuli wisi wabo Dyabbulosi.—Matl. 6:1, 2; Joh. 8:44; 1 Joh. 5:19; Jud. 6.

6. Nkamboonzi ‘mukaintu’ uuli mubupolofita oobu natali Eva ?

⁶ Lino atulange-lange kuti ‘mukaintu’ ngwani. Mwanakazi ooyu taakali Eva pe. Nkamboonzi? Atubone kamwi kaambo. Bupolofita bwakaamba kuti lunyungu lwamwanakazi lwakali ‘kuyoopwayaula’ mutwe wanzoka. Mbuli mbutwabona, nzoka nguSaatani alubo taakwe muntu uuli aachibi wakazwa kuli Eva  uukonzya kuba aamanguzu aakumupwayawula. Nkinkaako, Saatani uzoonyonyoonwa biyeni?

7. Mbuli mbukutondeezedwe muli Ciyubunuzyo 12:1, 2, 5, 10, ngwani mwanakazi waambidwe muli Matalikilo 3:15?

⁷ Bbuku lyaCiyubunuzyo lilatugwasya kuti tuzibe mwanakazi waambidwe muli Matalikilo 3:15. (Bala Ciyubunuzyo 12:1, 2, 5, 10.) Ooyu tali mwanakazi biyo waanyika. Uli aamweezi kumawulu aakwe alubo kumutwe wakwe uli aamusini uuli aanyenyeezi zili 12. Wakazyala mwana uusiyene abamwi bana. Mwana ooyo Mbwaami bwaLeza. Mbukunga Bwaami mbwakujulu, anguwe mwanakazi weelede kuba wakujulu. Mwanakazi ooyu wiiminina mbunga yaJehova yakujulu iipangwa aabangelo basyomeka.—Gal. 4:26.

8. Ngwani wiiminina chipanzi chakusaanguna chalunyungu lwamwanakazi alubo ndiilili naakaba oobo? (Matalikilo 22:15-18)

⁸ Jwi lyaLeza lilatugwasya kuti tuzibe muntu wiiminina chipanzi chakusaanguna chalunyungu lwamwanakazi. Lunyungu oolo lwakeelede kuzwa kubana baAbbrahamu. (Bala Matalikilo 22:15-18.) Nzizyo biya zyakachitika, Jesu wakazwa kubana baAbbrahamu. (Lk. 3:23, 34) Pesi lunyungu oolo lwakeelede kuba aamanguzu aayinda aabantu akaambo kakuti lwakali kuyoonyonyoona Saatani Dyabbulosi. Nkinkaako, chiindi Jesu naakali aaminyaka iisika ku30, wakananikwa aamuuya uusalala. Chiindi Jesu naakananikwa aamuuya, wakaba chipanzi chakusaanguna chalunyungu lwamwanakazi. (Gal. 3:16) Jesu naakafwa akubusigwa, Leza “wakamusamika musini wabulemu abwami” alubo wakamupa “nguzu zyoonse kujulu alimwi aanyika,” kuswaanizya anguzu zyakuti “anyonyoone milimo ya Diabolosi.”—Heb. 2:7; Mt. 28:18; 1 Joh. 3:8.

9-10. (a) Mbaani bamwi bapanga lunyungu lwamwanakazi alubo ndiilili nibaba balunyungu oolo? (b) Tuyanda kulanga-langaanzi lino?

⁹ Nikuba oobo, kwakali kuyooba bamwi bakali kuyooyiminina chipanzi chabili chalunyungu lwamwanakazi. Mwaapostolo Pawulu wakayubununa chipanzi chalunyungu oolu, chiindi naakabuzya maJuda abamwi maKristu bamasi bakananikidwe kuti: “Ikuti kamubalilwa kuli Kristo, nkokuti muli lunyungu lwa Abrahamu ncobeni, basikukona kweelana acisyomezyo.” (Gal. 3:28, 29) Chiindi Jehova nananika muntu amuuya uusalala, muntu ooyo nga waba walunyungu lwamwanakazi. Nkinkaako, lunyungu oolu lupangwa aaJesu abali 144 000 mbatazoondelezyaabo kujulu. (Ciy. 14:1) Boonse aaba batobelezya buntu bwaWisi wabo, Jehova Leza.

¹⁰ Mbukunga twabona kuti mbaani baambidwe muli Matalikilo 3:15, lino atubone kuti Jehova ulikubuzuzikizya biyeni bupolofita oobu akuti butugwasya biyeni.

11. Lunyungu lwamwanakazi lwakalumwa biyeni “kukasindi”?

¹¹ Kweendelana abupolofita buli muli Matalikilo 3:15, nzoka yakali kuyooluma lunyungu lwamwanakazi “kukasindi.” Bupolofita oobu bwakazuzikizigwa chiindi Saatani naakapa kuti maJuda amaRoma bajaye Mwana waLeza. (Lk. 23:13, 20-24) Kuti muntu waba aachilonda kukasindi, ulakonzya kukachilwa kweenda kwachiindi chifwiifwi. Lufu lwaJesu lwakapa kuti akachilwe kuchita zimwi zintu kwachiindi chifwiifwi alubo wakalifwide mukabanda kwamazuba aatatu.—Mt. 16:21.

12. Mutwe wanzoka uzoopwayawulwa biyeni alubo uzoopwayawulwa lili?

¹² Kuti bupolofita buli muli Matalikilo 3:15 buzuzikizigwe, Jesu takeelede kukkalilila  mukabanda. Nkamboonzi? Nkaambo bupolofita oobo bwaamba kuti lunyungu oolo lwakeelede kuyoopwayawula mutwe wanzoka. Eezi zyakali kwaamba kuti Jesu wakeelede kupona kuchilonda chakwe chakukasindi. Alino wakapona. Mubuzuba bwachitatu kali wafwa, Jesu wakabusigwa kali kali waba chilenge chamuuya chitafwi. Nichazookkwana chiindi chaLeza, Jesu uzoonyonyoona Saatani. (Heb. 2:14) Aabo batazooyendelezye aaKristu, bazoomugwasilizya kunyonyoona basinkondonyina baLeza boonse bali aanyika, chaamba lunyungu lwanzoka.—Ciy. 17:14; 20:4, 10. *

13. Kuzuzikizigwa kwabupolofita oobu, kuli kutugwasya biyeni?

¹³ Kuti kuli mukombi waLeza, ulikugwasigwa loko akuzuzikizigwa kwabupolofita oobu. Jesu wakaza aanyika kali muchiimo chamuntu. Alubo wakatondeezya buntu bwaWisi munzila iimaninide. (Joh. 14:9) Nkinkaako, kwiiya atala aJesu kulakonzya kutugwasya kuti tumuzibe kabotu Jehova akuti tumuyande. Akaambo kakuti nguwe uulikuzulwida mbungano yachiKristu mazubaano, njiisyo zyakwe amalayilile aakwe zilikutugwsya. Wakatuyiisya mbutweelede kupona kuchitila kuti tukonzye kubotezya Jehova. Alubo toonse tulakonzya kugwasigwa alufu lwaJesu, lwiimininwa aakuchisigwa kukasindi nkwaakachita. Biyeni? Chiindi Jesu naakabusigwa, wakapa ganzi lyakwe liyandikana kalili chipayizyo chimaninide ‘litusalazya kuzibi zyoonse.’—1 Joh. 1:7.

14. Bupolofita bwakaambilizigwa mumuunda waEdeni bwakali kuyoofwambaana kuzuzikizigwa na? Pandulula.

¹⁴ Majwi ngakaamba Jehova mumuunda waEdeni akali kuyootola chiindi kuti azuzikizigwe chakumaninina. Zyakali kuyootola chiindi kuti mwanakazi azyale lunyungu lwakasyomezedwe, Dyabbulosi abunganie batobeli bakwe akuti kuzondana kusaangune kuba aakati kankamu eezi zibili. Kuziba bupolofita oobu kulatugwasya nkaambo kupa kuti tuzibe kuti bantu beendelezegwa aaSaatani bayoozonda bakombi baJehova. Mukuya kwachiindi, Jesu wakachenjezya basikwiiya bakwe atala amakani aaya. (Mk. 13:13; Joh. 17:14) Tulikubona kuzuzikizigwa kwachipanzi chabupolofita oobu, ikapati muminyaka iili 100 yayinda. Chilikuzuzikizigwa biyeni?

15. Nkamboonzi bantu beendelezegwa aSaatani nibali kutuzonda loko pesi nkamboonzi nituteelede kuyoowa Saatani?

¹⁵ Kakuli kwayinda chiindi chifwiifwi Jesu kali waba Mwaami mu1914, Saatani wakatandwa kujulu. Lino mpali aanyika alubo ulikulinda kunyonyoonwa. (Ciy. 12:9, 12) Pesi talikulinda kakkede biyo pe, ulikubeleka changuzu. Saatani wagolelwa, ulinyemede alubo ulikutondeezya bukali bwakwe kubakombi baLeza. (Ciy. 12:13, 17) Akaambo kazeezi, nyika ilookwiindilila kubazonda bakombi baLeza. Nikuba oobo, tatweelede kumuyoowa pe Saatani abatobeli bakwe. Tulakonzya kuba aamaboneno ngaakalaawo mwaapostolo Pawulu chiindi naakalemba kuti: “Ikuti Leza kalaandiswe, ino nguni uukonzya kutulwana?” (Rom. 8:31) Tulakonzya kusyoma Jehova amoyo wesu woonse nkaambo mbuli mbutwabona, chimwi chipanzi chabupolofita bulembedwe muli Matalikilo 3:15 chakazuzikizigwa kale.

16-18. Curtis, Ursula aJessica bakagwasigwa biyeni akumvwisisisya bupolofita buli muli Matalikilo 3:15?

¹⁶ Chisyomezyo chaJehova chijanika muli Matalikilo 3:15 chitugwasya kuti tulisimye kufumbwa masunko ngituswaana. Curtis uubeleka kali mumishinali kuGuam wakaamba kuti: “Ndakaswaana zintu zyakasunka lusyomo  lwangu. Pesi kuyeeyesesya atala abupolofita bujanika muli Matalikilo 3:15 kwakandigwasya kuti ndikkale kandisyomeka kuli Taata wakujulu.” Curtis uchilangilila aameso aasalala chiindi Jehova natazoomanisye masunko woonse.

¹⁷ Muchizi wakuBavaria uutegwa Ursula wakaamba kuti, kumvwisisisya bupolofita buli muli Matalikilo 3:15 kwakapa kuti asyome kuti Bbayibbele lyakalembwa aaLeza. Wakabona bupolofita boonse mbubunjililana abupolofita oobu alubo eezi zyakamusika aamoyo. Alubo wakayungizya kuti: “Zyakandisika aamoyo kubona kuti Jehova wakafwambaana kubweza ntaamu kuti ape kuti bantu babe aabulangilizi.”

¹⁸ Jesicca uukkala kuMicronesia wakaamba kuti: “Ndichiyeeyede mbundakalimvwa chiindi nindakasaanguna kuziba kasimpe. Bupolofita bulembedwe muli Matalikilo 3:15 bwakazuzikizigwa kulindime. Bwakandigwasya kuti ndibone kuti buumi mbutuli kupona teembubo pe Leza mbwaakali kuyanda kuti tupone. Bupolofita oobu bwandigwasya kubona kuti kubelekela Jehova nkuko akulikke kukonzya kupa kuti ndipone buumi bubotezya lino amuchiindi chilikunembo.”

19. Niinzi chipa kuti tube aachoonzyo chakuti chipanzi chamamanino chabupolofita oobu chiyoozuzikizigwa?

¹⁹ Mbuli mbutwabona, lugwalo lwa Matalikilo 3:15 lulikuzuzikizigwa. Twababona bayiminina lunyungu lwamwanakazi alunyungu lwanzoka. Jesu, ooyo wiiminina chipanzi chakusaanguna chalunyungu lwamwanakazi wakapona kuchilonda nchaakalaacho kukasindi alubo lino wakaba Mwaami uulemekwa uutafwi. Aabo bapanga chipanzi chabili chalunyungu kwaba aafwiifwi kuti namba yabo ikkwane.. Akaambo kakuti chipanzi chakusaanguna chabupolofita oobu chakazuzikizigwa kale, tuli aachoonzyo chakuti chipanzi chamamanino chakupwayawulwa kwamutwe wanzoka chizoozuzikizigwa. Bakombi baLeza basyomeka bayoobotelwa chiindi Saatani natazoonyonyoonwe. Katuchilinda kuti chiindi eecho chisike, tutabweedi musule pe. Leza wesu ulasyomeka. Kwiinda mulunyungu lwamwanakazi, uyoopa kuti “masi oonse aamunyika” azoojane zilongezyo zyiingi.—Matl. 22:18.