1. Jehova uyanda kuti tuchiteenzi mazubaano?

 MAZUBAANO, Leza uyanda kuti makani mabotu aaBwaami akambawukwe munyika yoonse. (Mk. 13:10; 1 Tim. 2:3, 4) Mulimu ooyu nguwaJehova. Alubo chintu chiyandikana loko nchakuti wakasala Mwanaakwe ngwayandisya kuti azulwide mumulimu ooyu. Tulaachoonzyo chakuti, ansi abweendelezi bwaJesu bulikabotu, mulimu wakukambawuka uyoochitwa mbuli mbayanda Jehova, mamanino kaatanasika.—Mt. 24:14.

2. Tulalanga-langaanzi muchiiyo eechi?

² Muchiiyo eechi, tulabona Jesu mbalikubelesya “muzike uusyomeka alimwi uucenjede” kuti atupe chakulya chamubukombi ambalikugwasya batobeli bakwe kuti bachite mulimu ooyu uuyandikana loko, wakukambawuka. (Mt. 24:45) Alubo, tulabona nzitweelede kuchita toonse kuti tugwasilizye Jesu amuzike uusyomeka.

3. Jesu wakapegwa manguzu aakuchitaanzi?

³ Jesu ulikuzulwida mumulimu wakukambawuka. Tuzizi biyeni eezi? Kali wasyaalilwa aachiindi chifwiifwi kuti ayinke kujulu, wakabunganaamwi abatobeli bakwe basyomeka kuchilundu chaGalilaya. Mpawo wakababuzya kuti: “Ndapegwa nguzu zyoonse kujulu alimwi aanyika.” Alubo wakayungizya kuti: “Aboobo kamuya mukayiisye bantu bazisi zyoonse kuti babe basikwiiya.” (Mt. 28:18, 19) Kuyungizya kumilimu njaakapegwa Jesu, wakapegwa manguzu aakuzulwida mumulimu wakukambawuka.

4. Nkamboonzi nitukonzya kubaachoonzyo chakuti Jesu uchizulwida mumulimu wakukambawuka nikuba mazubaano?

 ⁴ Jesu wakaamba kuti mulimu wakukambawuka awakugwasya bantu kuti babe basikwiiya wakali kuyoochitwa muzisi zyoonse. Alubo wakali kuyooba aabatobeli bakwe “mazuba oonse mane kusikila kumamanino aabweende bwazintu.” (Mt. 28:20) Majwi aaya atondeezya kuti Jesu wakali kuyoozumanana kuzulwida mumulimu wakukambawuka kusikila mazubaano.

5. Tulikugwasilizya biyeni kuti lugwalo lwa Intembauzyo 110:3 luzuzikizigwe?

⁵ Jesu taakakataazikana pe kuti kwakali kuyoobulika babelesi kumamanino aabweende bwazintu. Wakalizi kuti majwi aabupolofita aakaambwa aasintembawuzyo akali kuyoozuzikizigwa aakuti: “Bantu bako bayoolyaaba cakuliyandila mubuzuba bwampi yako yabasikalumamba.” (Int. 110:3) Kuti kulikutola lubazu mumulimu wakukambawuka, ulikugwasilizya Jesu amuzike uusyomeka. Alubo ulikugwasilizya kuti bupolofita oobu buzuzikizigwe. Mulimu wakukambawuka ulikwiinkilila kunembo, pesi kuli buyumu-yumu.

6. Mbuubuli bumwi buyumu-yumu mbubalikuswaana bakambawusi baBwaami mazubaano?

⁶ Bumwi buyumu-yumu mbubalikuswaana bakambawusi baBwaami nkukazigwa. Basiluleyo, bapati bazikombelo abazyapolitikisi, balikwaambuula zintu zyiingi zitali kabotu atala amulimu wesu. Kuti babbululu besu, bantu mbituzi ababelesima baamvwa makani aaya, balakonzya kutusungilizya kuti tuleke kukomba Jehova akuti tuleke kukambawuka. Kulizimwi nyika, kukazigwa ooku kulikuchitwa munzila zisiyene-siyene. Kulakonzya kuza muchiimo chakuyoosezegwa, kufubaazigwa, kusungwa naakuti kuwaalwa mujele. Tazitugambyi pe kubona bantu kabatujata munzila iili boobu. Jesu wakaamba kuti: “Muyoosulwa amasi oonse akaambo kazina lyangu.” (Mt. 24:9) Kutuzonda nkubachita bantu, kutondeezya kuti Jehova ulatuyanda. (Mt. 5:11, 12) Dyabbulosi nguwe ulikupa kuti tukazigwe, pesi uli mbuli kanyenyeene kuti twamweezyanisya aaJesu. Kwiinda mukugwasigwa aaJesu, makani mabotu alikusika kubantu bazisi zyoonse. Bona bukamboni.

7. Lugwalo lwa Ciyubunuzyo 14:6, 7 lulikuzuzikizigwa biyeni mazubaano?

⁷ Tubakambawusi baBwaami, tulikuswaana bumwi buyumu-yumu bwakusiyana kwamilaka. Muchilengaano nchaakabona mwaapostolo Johane, Jesu wakatondeezya kuti makani mabotu akalikuyoobuzunda buyumu-yumu oobu kumazuba aakumamanino. (Bala Ciyubunuzyo 14:6, 7.) Akali kuyoobuzunda biyeni? Tulikugwasya bantu biingi kuti bazibe mulumbe uuli atala aBwaami. Mazubaano, bantu balimunyika yoonse balakonzya kubala makani aawambuula atala aBbayibbele aajanika aa jw.org akaambo kakuti alajanika mumilaka yiinda ku1 000. BamuKabunga Keendelezya bakazumizya kuti bbuku bbotu ligwasya bantu kuti babe basikwiiya litegwa Mbukonzya Kubotelwa Mubuumi Kukabe Kutamani! lisandululwe mumilaka yiinda ku700. Alubo chakulya chamubukombi chigwasya bantu batamvwi kumatwi chilajanika mumavidiyo aakalekkoodwa alubo kuli mabbuku aabraile aagwasya bantu bataboni. Tulikubona bupolofita oobu bwamuBbayibbele kabulikuzuzikizigwa. Bantu “bazwa mumyaambo yoonse yamasi” balikwiiya “mwaambo uusalala” wakasimpe kamuBbayibbele. (Zek. 8:23; Zef. 3:9) Zyoonse eezi, zilikukonzeka akaambo kakuti Jesu Kristu nguwe uulikuzulwida.

8. Mbuubuli bubotu bulikweetwa aamulimu wakukambawuka?

⁸ Mazubaano, bantu bayinda ku8 000 000 bali munyika zili 240 bali mumbunga  yaJehova. Alubo munyaka amunyaka bantu biingi balikubbabbatizigwa. Chintu chiyandikana loko kwiinda kuyungizya kwanamba yabantu, ‘mbuntu bupya’ mbubali kubelekela basikwiiya aaba bapya. (Kol. 3:8-10) Biingi bakasiya buumi bwakutalijata, kulwana, kusaluula akusumpula zisi zyabo. Bupolofita buli muli Isaya 2:4 bulikuzuzikizigwa nkaambo ‘tabalikwiiya kulwana limbi nkondo.’ Chiindi nitubeleka changuzu kuti tuzwaate buntu bupya, nga tulikugwasya bantu kuti baze mumbunga yaLeza alubo nga tulikutobelezya mulangizi wesu Kristu Jesu. (Joh. 13:35; 1 Pet. 2:12) Eezi tazilichitikili pe. Jesu nguwe ulikutugwasya.

9. Kweendelana alugwalo lwa Matayo 24:45-47, Jesu wakaamba kuti niinzi zyakali kuyoochitika kumazuba aakumamanino?

⁹ Bala Matayo 24:45-47. Jesu wakaamba kuti kuchiindi chakumamanino, wakali kuyoosala “muzike uusyomeka alimwi uucenjede,” kuti ape batobeli bakwe chakulya chamubukombi. Nkinkaako, tulangilila kuti muzike ooyo abeleke changuzu mazubaano. Alino nzizyo biya nzyalikuchita. Mulangizi wesu ulikubelesya kabunga kabaalumi bananikidwe aamuuya uusalala kuti ape bakombi baLeza abamwi bali aachiyandisyo chakulya chamubukombi “aciindi ceelede”. Baalumi aaba, tabaliboni mbuli kuti mbaasimalelo balusyomo lwabamwi pe. (2 Kor. 1:24) Pesi bazi kuti Jesu Kristu “musololi alimwi mweendelezi” wabantu bakwe.—Is. 55:4.

10. Aamabbuku aali aachifanikisyo, ndiilili bbuku lyakakugwasya kuti uze mukasimpe?

¹⁰ Kuzwa mu1919, muzike uusyomeka wakagwisya mabbuku aasiyene-siyene aakagwasya bantu bakali aachiyandisyo chakwiiya Bbayibbele. Mu1921, muzike wakagwisya bbuku litegwa The Harp of God kuti agwasye bantu bakali aachiyandisyo chakwiiya njiisyo zyamuBbayibbele.  Mukuya kwachiindi, kwakazoogwisigwa amwi mabbuku. Ndiilili bbuku lyakakugwasya kuti uzibe Taateesu wakujulu akumuyanda? Ndeeli na litii “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, IBbayibbele Nga Lilatuyiisyaanzi? naakuti ndeeli bbuku pya litegwa Mbukonzya Kubotelwa Mubuumi Kukabe Kutamani!? Mabbuku woonse aaya akatugwasya loko aachiindi naakagwisigwa.

11. Nkamboonzi nikuyandikana kuti tujane chakulya chamubukombi?

¹¹ Bantu bachili bapya mukasimpe, teembabo pe abalikke bayanda chakulya chamubukombi chiyumu. Toonse tulagwasigwa. Mwaapostolo Pawulu wakalemba kuti: “Cakulya ciyumu ncabantu basimide.” Alubo wakayungizya kuti chakulya eechi chilakonzya kutugwasya “kwaandaanya ciluzi acitaluzi.” (Heb. 5:14) Muchiindi eechi chiyumu, bantu nibalikuyungizya kutalijata, kulakonzya kutuyumina kuti tuswiilile milawu yaJehova yakulijata. Pesi Jesu ubaachoonzyo chakuti twajana chakulya chamubukombi chitugwasya kuti tusimye lusyomo lwesu. Chakulya eecho, chizwa muJwi lyaLeza, Bbayibbele. Muzike uusyomeka ulatujikila akutupa chakulya eecho kazulwidwa aaJesu Kristu.

12. Niinzi zitondeezya kuti tulalilemeka zina lyaLeza mbuli mbaakali kuchita Jesu?

¹² Tutobelezya chikozyano chaJesu, kwiinda mukulipa bulemu bulyeelede zina lyaLeza. (Joh. 17: 6, 26) Muchikozyano, mu1931 twakasaanguna kwiitwa kuti Bakamboni baJehova nkaambo zina eeli lizwa muMagwalo. Eezi zitondeezya kuti tulibona kaliyandikana zina lyaTaateesu wakujulu. (Is. 43:10-12) Kuzwa muOctober mumunyaka ooyo, zina lyaJehova lyakasaanguna kulembwa aakkava yaNgaziyakulinda. Kuzwa waawo, Bbayibbele  lyaBusanduluzi Bwanyika Mpya lyakabweedezya zina lyaLeza mpulyakali kujanika. Zisiyene kule loko azyakachitwa aazimwi zikombelo zyakubeja nkaambo zyakagwisya zina lyaJehova mumaBbayibbele miingi ngibakasandulula.

13. Niinzi chipa kuti ubaachoonzyo chakuti Jesu ulikubelesya “muzike uusyomeka alimwi uucenjede” mazubaano? (Johane 6:68)

¹³ Kabelesya “muzike uusyomeka alimwi uucenjede,” Jesu wakapanga mbunga mbotu aanyika kuti asumpule bukombi busalala. Umvwa biyeni atala ambunga eeyi? Amwi ulakonzya kulimvwa mbuli mbaakalimvwa mwaapostolo Petro, ooyo wakabuzya Jesu kuti: “lno inga twaunka kuli ni? Yebo ujisi majwi aapa buumi butamani.” (Joh. 6:68) Kaansinga tuli kuli, nikuli tatuli mumbunga yaJehova? Kristu ulikubelesya mbunga eeyi kuti atupe chakulya chamubukombi. Alubo ulikutuyiisya kuti tuchite mulimu wesu wakukambawuka munzila iizwidwilila. Kuyungizya waawo, ulikutugwasya kuti tuzwaate “buntu bupya” kuchitila kuti tubotezye Jehova.—Ef. 4:24.

14. Wakagwasigwa biyeni akaambo kakuba mumbunga yaJehova chiindi nikwakabbuka bulwazi bwakkorona?

¹⁴ Jesu ulikutupa malayilile aatugwasya muziindi ziyumu. Twakalibonena mbaagwasya malayilile aayo chiindi nikwakabbuka bulwazi bwakkorona. Nikuba kuti bantu biingi munyika teebakazi pe kuti bachiteenzi, Jesu wakaba aachoonzyo chakuti tujane malayilile aamvwisisika aatugwasya kuti tulikwabilile. Twakasungwaazigwa kuti tuzwaate mamaskki chiindi nitwazwa aang’anda akuti tutantamukane. Baalu bakasungwaazigwa kuti bakkale kabaambuula aabantu boonse bali mumbungano kuchitila kuti bazibe mpubayanda kugwasigwa bakombinyina kuzintu zyakumubili  akuli zyabukombi. (Is. 32:1, 2) Twakatambula amwi malayilile amalipoti aasungwaazya aazwa kuKabunga Keendelezya.

15. Ngaali malayilile ngitwakatambula aali atala ambutweelede kunjila miswaangano akukambawuka muchiindi eechi chakkorona alubo mbuubuli bubotu bwakaba?

¹⁵ Muchiindi eechi chakkorona, twakatambula malayilile aamvwisisika atala ambutweelede kunjila miswaangano yambungano akukambawuka. Mukulaba kwaliso, twakasaanguna kunjila miswaangano yambungano, yamabazu ayabbooma katubelesya intaneti. Alubo twakasaanguna kukambawuka katubelesya magwalo amafooni. Jehova ulikwiilongezya milimu yesu njitulikuchita. Malipoti aakazwa kumitabi myiingi akatondeezya kuti namba yabasikupupulula ilikuyungizya alubo kuli zintu zyiingi zibotu zyakachitika muchiindi eechi.—Langa kabbokesi katii, “ Jehova Ulikuulongezya Mulimu Wesu Wakukambawuka.”

16. Tweelede kubaachoonzyo chanzi?

¹⁶ Bamwi bakali kubonaanga malayilile ngitwakali kupegwa aambunga aali atala abulwazi bwakkorona akali kutuyumisizya. Pesi mukuya kwachiindi, zyakazooba aantanganana kuti malayilile aayo akali kuyandikana akuti akali kugwasya ndiswe. (Mt. 11:19) Chiindi nituyeeyesesya atala ambalikutuzulwida Jesu, nga twaba aachoonzyo chakuti ziyumu zitete, Jehova aMwanaakwe ngwayandisya banooli aandiswe.—Bala Bahebrayo 13:5, 6.

17. Kuziba kuti Jesu mulangizi wesu kupa kuti umvwe biyeni?

¹⁷ Nchilongezyo chipati kubelekaamwi amuzuluzi wesu Jesu. Nikuba kuti tuli aamaponeno aasiyene, tuzwa munyika zisiyene akuti twaambuula milaka iisiyene, toonse tulijisini. Tujana chakulya chamubukombi chikkwene alubo tulaazyo zyoonse nzituyandikana kuti tuchite mulimu wesu wakukambawuka. Toonse tulayiisigwa kuti tuzwaate buntu bupya akuti tuyandane. Tuli aakaambo kapa kuti tulidunde akaambo kakuti Jesu nguumulangizi wesu!