1-2. MaKkristu bakozyenie biyeni aang’anda ndamfu? (1 Bakkorinte 15:58)

 MU1978, kuTokyo iili kuJapan kwakayakwa ng’anda ndamfu loko. Bantu bakali kugamba kuti nkamboonzi ng’anda eeyo niyakatali kuwa nikuba kuti mudolopo eelyo mwakali kuchitika mizuzumo yanyika myiingi loko. Niinzi nzibakachita bayaki kuti muduli wang’anda eeyo utadiliki akaambo kamuzuzumo wanyika? Bayaki bakayaka munzila yakuti nikuba kuti kwaba muzuzumo wanyika uulaanguzu zilibiyeni, ng’anda eeyo tayidiliki pe. MaKkristu bali mbuli ng’anda eeyo. Muunzilaanzi?

² MuKkristu weelede kukkala kayimvwi nji alubo kakonzya kuchincha kweendelana azyiimo. Weelede kusima akuswiilila milawu yaJehova. (Bala 1 Bakkorinte 15:58.) ‘Ulilibambilide kuswiilila’ alubo taleki pe kuswiilila milawu yaJehova nikuba kuti zintu zyamuyumina. Mukuyungizya, muKkristu ooyo ‘ulamvwisisisya’ naakuti ulazumina kuchincha-chincha kweendelana azyiimo. (Jak. 3:17) MuKkristu uuli aamaboneno aaliboobu uleezya kutaba mumvwa zyakwe naakuti kuba muntu uuzumina tuntu toonse nikuba anatayelede kuchita oobo. Muchiiyo eechi, tulabona zitatugwasye kuti tutasunzuki. Alubo tulabona nzila zili 5 nzyabelesya Saatani kuti ape kuti kutuyumine kwiimikila nji alubo tulabona mbutukonzya kuzitantamuka.

3. Njiili milawu iijanika muli Milimu 15:28, 29?

³ Jehova nguwe uuli aacheelelo chipati chakutubikkila milawu alubo milawu yakwe myuuba zyakuti bakombi bakwe balayimvwsisisya. (Is. 33:22) Muchikozyano, kabunga keendelezya kamumwaanda wakusaanguna kakaamba zintu zitatu maKkristu  mubeelede kwiimikila nji: (1) kukomba Jehova kupela kutali zibumbwa, (2) kulemeka ganzi alubo (3) kuswiilila milawu yamuBbayibbili iili atala akulijata. (Bala Milimu 15:28, 29.) Niinzi nzibeelede kuchita maKkristu mazubaano kuti bakkale kabayimvwi nji muzintu eezi zitatu?

4. Tutondeezya biyeni kuti tukomba Jehova alikke? (Chiyubunuzyo 4:11)

⁴ Tantamuka zibumbwa alubo ukombe Jehova alikke. Jehova wakalayilila ma-Israyeli kuti bakombe nguwe alikke. (Dt. 5:6-10) Alubo chiindi Jesu naakasunkwa aaDyabbulosi, wakatondeezya aantanganana kuti tweelede kukomba Jehova alikke. (Mt. 4:8-10) Nkinkaako, tatukombi zibumbwa pe nikuba kukomba bantu. Muchikozyano, tatubaboni mbuli baleza pe bapati bazikombelo, bazyapolitikisi, basimisobano abayimbi bali aampuwo. Iswe tuli kubbazu lyaJehova alubo tukomba nguwe aalikke nkaambo nguwe “wakalenga zintu zyoonse.”—Bala Chiyubunuzyo 4:11.

5. Nkamboonzi nituswiilila mulawu waJehova uuli atala akulemeka buumi aganzi?

⁵ Tuswiilila mulawu waJehova uuli atala akulemeka buumi aganzi. Nkamboonzi? Nkaambo Jehova wakaamba kuti ganzi lyiiminina buumi, chipo chiyandikana chizwa kuli nguwe. (Lev. 17:14) Chiindi Jehova naakazumizya bantu kuti balye nyama, wakababuzya kuti batalyi ganzi. (Matl. 9:4) Wakazoowuwaamba lubo mulawu ooyu chiindi naakapa ma-Israyeli Mulawu kabelesya Mozesi. (Lev. 17:10) Alubo wakalayilila kuti kabunga keendelezya kamumwaanda wakusaanguna kalayilile maKkristu boonse kuti ‘bayinkilile kunembo kutantamuka . . . ganzi.’ (Mil. 15:28, 29) Tulawuswiilila mulawu ooyu chiindi nitusala busilisi. b

6. Niinzi nzitweelede kuchita kuti tuswiilile milawu yaJehova yakulijata?

⁶ Tuswiilila milawu yaJehova yakulijata. (Heb. 13:4) Mwaapostoli Pawulu wakabelesya chikozyano chibotu loko naakali kwaambuula atala ankani eeyi. Wakaamba kuti ‘tujaye zipanzi zyamibili yesu.’ Eezi zyaamba kuti tweelede kubeleka amanguzu eesu woonse kuti tugwisye mizeezo iitali kabotu. Tatweelede kulanga naakuti kuchita zintu zipa kuti tuchite bwaamu. (Kol. 3:5; Job. 31:1) Chiindi nitwasunkwa kuti tuchite chintu chitali kabotu, tweelede kufwambaana kugwisya mizeezo eeyo nkaambo ipambanisya bweenzuma mbutulaabo aLeza.

7. Tweelede kukanza kuchitaanzi alubo nkamboonzi?

⁷ Jehova uyanda kuti toonse ‘tuswiilile kazizwa aansi aamoyo.’ (Rom. 6:17) Zintu nzyatubuzya Jehova zigwasya ndiswe alubo tatukonzyi pe kuchincha milawu yakwe. (Is. 48:17, 18; 1 Kor. 6:9, 10) Tuleezya kusikila mputugolela kuti tuchite zintu zibotezya Jehova akuba aamaboneno aali mbuli ngaakalaawo sintembawuzyo aakuti: “Mumoyo wangu ndikanzide kutobela malailile aako ciindi coonse, kusikila kumamanino.” (Int. 119:112) Nikuba oobo, Saatani uleezya kuti atukachizye kuti tukkale katwiimvwi nji. Atubone nzila nzyabelesya.

8. Saatani uyibelesya biyeni nzila yakutupenzya kuti tuleke kusyomeka kuli Jehova?

⁸ Kutupenzya. Saatani ulikubelesya nzila yakutupenzya kuchitila kuti tuleke kusyomeka kuli Jehova. Makanze aakwe ‘ngakutuluma’ kuti amaninsye bweenzuma mbutulaabo aJehova. (1 Pet. 5:8) Bantu bakali kuyoosezya maKkristu bakusaanguna, bakali kubawuma akubajeya akaambo kakuti bakali kuyanda kukkala kabasyomeka kuli Jehova. (Mil. 5:27, 28, 40; 7:54-60) Saatani uchibelesya nzila eeyi  mazubaano yakupenzya bakombi baLeza. Eezi tulazibona munzila bakombima njibali kujatwaayo kuRussia akuli zimwi nyika. Alubo munyika yoonse, basikutukazya balikutupenzya kababelesya zimwi nzila zisiyene-siyene.

9. Ngaali meeneno aaSaatani ngitweelede kuchenjelela?

⁹ Meeneno aaSaatani atali aantanganana. Imwi nzila njabelesya Saatani kuti atulwane njakubelesya “meeneno” aakwe. (Ef. 6:11) Eezi nzizyo nzyaakachita kuMukwesu uutegwa Bob wakali kuyanda ku-opaletwa. Mukwesu Bob wakabuzya madokotela kuti taakali kuyanda pe kuti abikkwe ganzi. Umwi dokotela wakalemeka zintu nzyaakaamba mukwesu ooyu. Bumwi busiku katana-opaletwa, umwi dokotela wakayinka kuti akabone Bob chiindi bamumpuli nibakabweeda kung’anda. Dokotela ooyo wakamubuzya kuti madokotela teebakali kuyoomubikka ganzi pe pesi bakali kuzoolibikka aafwiifwi kuchitila kuti bazoolibelesye kuti lyayandikana. Kulakonzeka kuti dokotela ooyo wakali kulibuzya kuti Bob ulachincha maboneno aakwe akaambo kakuti wakali wasyaala aalikke. Nibuba oobo, Bob wakakakatila kuzintu nzyaakasala alubo wakabuzya dokotela ooyu kuti tayandi kubikkwa ganzi nikuba kuti chiimo chakwe chayanda kuti abikkwe ganzi.

10. Nkamboonzi maboneno aabantu nakonzya kutweetela mapenzi? (1 Bakkorinte 3:19, 20)

¹⁰ Maboneno aabantu. Kuti twabona zintu mbuli mbubazibona bantu batakombi, tulakonzya kusiya Jehova akutatobelezya milawu yakwe. (1 Bakkorinte 3:19, 20.) “Busongo bwanyika eeyi” bupa kuti bantu bataswiilili Leza. Bamwi maKkristu bakuPegamu abakuTiyatira bakali basaanguna kutobelezya zintu zyakali kuchitwa aabantu bakali kuchita bwaamu alubo bakali kukomba zibumbwa. Jesu wakabapa lulayo bamumbungano eezi akaambo kakuti bakali basaanguna kuchita bwaamu. (Chi. 2:14, 20) Mazubaano, bantu mbituponaabo balakonzya kupa kuti tusaangune kuba aamizeezo iitali kabotu. Bamumpuli abamwi balakonzya kupa kuti tuleke kuswiilila milawu yaJehova. Muchikozyano, balakonzya kwaamba kuti kulijata teenkani mpati pe akuti malayilile aali muBbayibbili aali atala akulijata taachibeleki pe.

11. Niinzi nzituteelede kuchita?

¹¹ Chimwi chiindi tulakonzya kubonaanga malayilile ngatupa Jehova taamvwisisiki pe. Alubo tulakonzya kusunkwa kuti ‘tuyindilizye aazintu zilembedwe.’ (1 Kor. 4:6) Beendelezi bamuchiindi chaJesu bakali aamulandu munkani eeyi. Bakali kuyungizya milawu yabo kuMulawu waLeza, eezi zyakali kupa kuti kubayumine loko bantu kuti bayiswiilile. (Mt. 23:4) Jehova utupa malayilile aamvwisisika kabelesya Jwi lyakwe ambunga yakwe. Taakwe nzitweelede kuyungizya pe kumalayilile ngatupa. (Tus. 3:5-7) Nkinkaako, tatwiindilizyi pe kuzintu zilembedwe muBbayibbili naakuti kubikkila bakombima milawu kuzintu nzibeelede kulisalila.

12. Saatani ulubelesya biyeni ‘lweeno lwabuyo’?

¹² Lweeno. Saatani ubelesya ‘lweeno lwabuyo’ “azintu zyakusaanguna zyanyika” kuti asweesye bantu akubaanzania. (Kol. 2:8) Mumwaanda wamunyaka wakusaanguna, zintu eezi zyakali kuswaanizya maboneno aabantu, njiisyo yamaJuda yakatali kuzwa muMagwalo anjiisyo yakuti maKkristu bakeelede kutobela Mulawu waMozesi. Zyoonse eezi zyakali zyalweeno nkaambo zyakapa kuti bantu batabikkili maanu kubusongo bwachoonzyo buzwa kuli Jehova. Saatani ulikubelesya intaneti kuti amwaye makani aakubeja alubo makani aayo azwa kunyuzi zyaambwa aabazyapolitikisi. Twakazibona eezi muchiindi chakkorona. c Bakamboni baJehova bakali kuswiilila malayilile  aakali kuzwa kumbunga teebakali kukataazikana pe atala amanwa ngibakali kumvwa kubantu.—Mt. 24:45.

13. Nkamboonzi nitweelede kuchenjelela kuti tutapambanisigwi aazintu nzituchita anzitumvwa?

¹³ Kupambanisigwa. Tweelede kukkala katuzibikkila maanu ‘zintu ziyandikana loko.’ (Flp. 1:9, 10) Zintu zipambanisya zilakonzya kupa kuti tumanisye chiindi amanguzu eesu kuzintu zitagwasyi pe. Zintu nzitukkala katuchita buzuba abuzuba zili mbuli kulya, kunywa, kulikondelezya amilimu njituchita zilakonzya kutupambanisya kuti twazibikka mubusena bwakusaanguna mubuumi bwesu. (Lk. 21:34, 35) Mukuyungizya, buzuba abuzuba ngatwamvwa zintu nzibachita basikupapila akukazyania nkubachita bazyapolitikisi. Tweelede kuba aachoonzyo chakuti tutapambanisigwi aazintu eezi. Kuti teetwachita oobo, tulakonzya kutola lubazu mumizeezo yesu amumyoyo. Saatani ubelesya nzila zyoonse eezi nzitwaamba aajulu kali aamakanze aakuti tuleke kuchita zintu zilikabotu mumeso aaJehova. Lino atubone kuti ngatulazitantamuka biyeni nzila nzyabelesya kuchitila kuti tukkale katusyomeka.

14. Niinzi chikonzya kutugwasya kuti tukkale katuli kubbazu lyaJehova?

¹⁴ Yeeyesesya atala akuti nkamboonzi nwakalipeda akubbabbatizigwa. Wakabweza ntaamu eezi akaambo kakuti wakali kuyanda kuba kubbazu lyaJehova. Yeeya atala azintu zyakakugwasya kuti ube aachoonzyo chakuti wajana kasimpe. Wakajana luzibo lwakasimpe atala aJehova alubo wakasaanguna kumuyanda akumulemeka akaambo kakuti nguTaateesu wakujulu. Wakaba aalusyomo alubo nzwaakayiya zyakapa kuti usanduke. Moyo wako wakapa kuti utantamuke michito mibi akuti upone kweendelana akuyanda kwaLeza. Wakaangunuka chiindi nwaakaziba kuti Leza wakakulekelela. (Int. 32:1, 2) Wakasaanguna kunjila miswaangano akubuzya bamwi atala azintu nzwaakayiya. Akaambo kakuti wakalipeda akubbabbatizigwa, lino ulikweendela munzila iitola kubuumi alubo ukanzide kuzumanana kweendela mulinjiyo.—Mt. 7:13, 14.

15. Nkamboonzi kubala akuyeeyesesya nikugwasya?

¹⁵ Bala Jwi lyaLeza akuyeeyesesya atala  anzubala. Kuti munsamu ukkale kuusimide, weelede kuba aamiyanda iinikide. Andiswe tulasima kuti lusyomo lwesu kalunikide muJwi lyaLeza. Chiindi munsamu nukomena, miyanda yawo nga iyoobubbila. Chiindi nitubala akuyeeyesesya, ngatuli kusimya lusyomo lwesu alubo ngatwaba aachoonzyo chakuti nzila zyaLeza zilagwasya chiindi choonse. (Kol. 2:6, 7) Yeeyesesya atala amalayilile aJehova mbaakagwasya bakombi bakwe bachiindi ambaakabakwabilila akubazulwida. Muchikozyano, Ezekkiyele wakaswiilisisya chiindi ngilozi niyakali kumubuzya atala akupimwa kwatempele ndyaakabona muchilengaano. Chilengaano eechi chakamusimya loko Ezekkiyele alubo mazubaano chituyiisya kuti tukakatile kuzyeelelo zyaJehova zili atala abukombi bwakasimpe. d (Ezk. 40:1-4; 43:10-12) Andiswe tulakonzya kugwasigwa kuti twayeeyesesya atala azintu zinikide zili muJwi lyaLeza.

16. Kuba aamoyo uukkalikene kwakamugwasya biyeni Bob? (Intembauzyo 112:7)

¹⁶ Belekela kuba aamoyo uukkalikene. Mwaami Davida wakatondeezya kuti wakali kumuyanda loko Jehova chiindi naakayimba kuti: “Moyo wangu ulikkalikene, O Leza.” (Int. 57:7) Tulakonzya kuba aamoyo uukkalikene kwiinda mukusyoma Jehova amoyo woonse. (Bala Intembauzyo 112:7.) Atubone mbuzyakamugwasya eezi Bob waambwa kumasaangunino. Naakabuzigwa kuti wakali kukonzya kubikkwa ganzi kuti kwayandikana kuti kuchitwe oobo, mpawaawo-mpawaawo wakasandula kuti, kuti zyachitika kuti madokotela basala kumubikka ganzi, wakali kuzoozwa muchibbadela oomo. Mukuya kwachiindi, Bob wakazoowamba kuti: “Ndakalizizi nzindakeelede kuchita alubo teendakali kukataazikana pe atala azintu zyakali kuzookonzya kundichitikila.”

17. Twiiyaanzi kuzwa kuli zyakachitikila Bob? (Langa chifanikisyo.)

¹⁷ Bob wakalikkalikene nkaambo wakali wasala nzyaakali kuyanda katanayeeyela biya pe kuti uzooyinka kuchibbadela kuchitila kuti akkale kayimvwi nji. Chakusaanguna, wakali kuyanda kubotezya Jehova. Chachibili, wakabala Bbayibbili akuyanduulisisya mumabbuku eesu kuchitila kuti azibe zyiingi atala ankani yakulemeka buumi aganzi. Chachitatu, wakali  aachoonzyo chakuti kutobela malayilile aaJehova kugwasya nguwe akuti wakali kuzoojana zilongezyo kuzwa kuli Jehova. Andiswe tulakonzya kuba aamoyo uukkalikene nikuba kuti twaswaana mapenzi aalibiyeni mubuumi.

18. Twiiyaanzi kuzwa kuchikozyano chaBbarakki? (Langa chifanikisyo chili aachivumbyo.)

¹⁸ Syoma Jehova. Bbarakki wakazunda akaambo kakuti wakasyoma malayilile aaJehova. Aachiindi eecho, ma-Israyeli teebakalibambilide pe kuya kunkondo. Alubo teebakalikwe zilwanisyo pe. Pesi Jehova wakabuzya Bbarakki kuti ayinke akalwane silutwe wamasooja wakuKkenani uutegwa Sisera amasooja aakwe nikuba kuti bakali aazilwanisyo zyiingi. (Bab. 5:8) Mupolofita wachanakazi Debbora wakabuzya Bbarakki kuti aseluke aachilundu mpaakabede ayinke aanyika iitendebede akalwane Sisera amasooja akali kweenzya ngolo zyankondo zili 900. Nikuba kuti Bbarakki wakalizi kuti kwakali kuyumu loko kuti ma-Israyeli balwane ngolo zyankondo zyaSisera zyakali kuchijaanisya loko aanyika iitendebede, wakaswiilila nzyaakabuzigwa. Chiindi masooja nibakali kuseluka aachilundu chaTabbori, Jehova wakawisya mvula. Nkalaki zyaSisera zyakabbaja mumadaka alubo Jehova wakapa kuti Bbarakki azunde. (Bab. 4:1-7, 10, 13-16) Munzila iikozyene, Jehova ulakonzya kutupa manguzu aakuti tuzunde kuti twamusyoma akutobela malayilile ngatupa kabelesya mbunga yakwe.—Dt. 31:6.

19. Nkamboonzi nuyanda kukkala kwiimvwi nji?

¹⁹ Akaambo kakuti tuliikupona munyika yeendelezegwa aaSaatani tweelede kubeleka changuzu kuti tukkale katuli aamoyo uukkalikene. (1 Tim. 6:11, 12; 2 Pet. 3:17) Atukanze kuti tutazunganisigwi aakupenzegwa, kweenwa kutali aantanganana, maboneno aabantu, lweeno lwaSaatani azintu zitupambanisya. (Ef. 4:14) Pesi atwiimikile nji tukakatile kukomba Jehova alubo tutasunzuki chiindi nituswiilila malayilile aakwe. Alubo kulayandikana kuti tube bantu bamvwisisisya. Muchiiyo chitobela, tuzoolanga-langa chikozyano chaJehova aJesu mbubatondeezya kuti balamvwisisisya.