Mwalizi Na?
Zitina zyakajanwa kuBbabbiloni lyachiindi ambuzyakali kuumwa zitondeezya biyeni kuti Bbayibbili lili aamakani aachoonzyo?
BASIKULANGA-LANGA makani aachiindi bakasya kumuunzi waBbabbiloni lyachiindi mpawo bakajana zitina zyakawumpidwe zyakabelesedwe kuyaka muunzi ooyu. Kweendelana azyakaambwa aasikulanga-langa makani aachiindi uutegwa Robert Koldewey, zitina eezyo zyakali kuumpilwa “kunze aamuunzi, ooko kwakali bulongo bubotu amasamu miingi aakali kubelesegwa kuzyuumpa.”
Basikulanga-langa makani aachiindi bakajana kuti balupati-pati bamfulumende bakuBbabbiloni bakali kubelesya mabibi aamulilo kuchita zimwi zintu zitali kabotu. Umwi pulofesa uubeleka ku-University of Toronto uuli aaluzibo atala amakani aachiindi amulaka wakali kwaambuula ku-Asiriya yachiindi uutegwa Paul-Alain Beaulieu wakaamba kuti: “Malembe aakuBbabbiloni atondeezya kuti mwaami wakalayilila kuti aabo bakatali kumuswiilila naakuti bakatali kulemeka zintu zisalala bakeelede kuwaalilwa mubbibi lyamulilo kuti bapye.” Muchikozyano, amwi malembe aakalembwa muchiindi chaMwaami Nebbukkadinezari aamba kuti: “Mubanyonyoone, mubawumpe, mubakange, . . . mubbibi lyamulilo . . . busi buuntumuke, mubajaye kwiinda mukubawaalila mumulilo.”
Eezi zituyeezya makani aachiindi aajanika muli Daniele chaandaano 3. Muchaandaano eechi, tubala kuti Mwaami Nebbukkadinezari wakapanga chibumbwa chipati aanyika iitendebete kuDura aanze aamuunzi waBbabbiloni. Baalumi bachiHebbrayo batatu baswaanizya Shadrekki, Abbedinigo, aMishekki nibakakaka kukotamina chibumbwa eechi, Nebbukkadinezari wakanyema loko mpawo wakalayilila kuti “bbibi lyamulilo lisoselwe kutegwa liindile kupya ziindi zili [7] kwiinda mbolyakali kupya lyoonse” akuti baalumi aaba batatu bawaalilwe “mubbibi lyamulilo uuvwilima.” Pesi ngilozi yaJehova yakabavuna baalumi aaba kuti batafwi pe.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Chitina chuumpidwe chilembedwe zina lyaNebbukkadinezari
Zitina zyakajanwa kuBbabbiloni anzizyo zitondeezya kuti Bbayibbili lili aamakani aachoonzyo. Zitina zyiingi zyakalembedwe makani aakali kulumbayizya mwaami. Amwi makani ngakuti: “Nebbukkadinezari, Mwaami waBbabbiloni . . . Muunzi wabwaami, ngundakayaka ime ndiMwaami Mupati . . . Zyalani lyangu litobela alyeendelezye mumuunzi ooyu kusika kukabe kutamani.” Muli Daniele 4:30 muli makani aakozyenie amakani akaambwa aaNebbukkadinezari naakali kulisumpula kati: “Sena munzi ooyu tauli Babuloni Mupati, mebo lwangu ngondakayaka kuti ube ŋanda yamwami anguzu zyangu zinji alimwi akuti ube bulemu bwabweendelezi bwangu?”
