1. Nkamboonzi nikuyandikana kulibambila mapenzi aalichitikila?

 KULIBAMBILA kupa kuti tufutuke. Muchikozyano, chiindi nikuchitika mapenzi aalichitikila, bantu banga balilibambilide ngabafutuka alubo nga bakonzya kugwasya bamwi. Umwi mutabi waku-Europe uugwasya bantu wakaamba kuti: “Kulibambila kulakonzya kufutula buumi bwabantu.”

2. Nkamboonzi nitweelede kulibambila mapenzi mapati? (Mateyo 24:44)

² “Mapenzi mapati” azoosika katutayeeyeli. (Mt. 24:21) Mapenzi mapati alisiyene amapenzi aalichitikila akaambo kakuti tulizi kuti azoosika. Minyaka iisika ku2 000 yayinda, Jesu wakachenjezya basikwiiya bakwe kuti balibambile buzuba bwamapenzi mapati. (Bala Mateyo 24:44.) Kuti katulibambilide, kuyootuubila kuti tulisimye alubo tuyoogwasya bamwi kuti ambabo balisimye muchiindi eecho chiyumu.—Lk. 21:36.

3. Kulisimya, luzyalo, aluyando zitugwasya biyeni kuti tulibambile mapenzi mapati?

³ Tweelede kuba aabuntu butatu bukonzya kutugwasya kuti tulibambile mapenzi mapati. Niinzi nzituyoochita kuti twabuzigwa kuti tukaambilizye mulumbe walubeta uuli mbuli chivulamabwe alubo batasyomi nibaakutukazya? (Chi. 16:21) Tweelede kuyoolisimya kwiinda mukuswiilila Jehova katuli aachoonzyo chakuti uyootukwabilila. Tuyoochitaanzi kuti bakwesu basweekelwa zimwi zintu naakuti basweekelwa zintu zyoonse zyakumubili? (Hab. 3:17, 18) Kuba aaluzyalo kuyoopa kuti tukakonzye kuyoobagwasya azintu nzibayandikana. Tuyoochitaanzi kuti zisi zyatubuzya kuti tukkale aabusena bumwi katuli aamwi abakwesu abachizi kwachiindi chilamfu? (Ezk. 38:10-12) Kuba aaluyando kuyootugwasya loko muchiindi eecho chiyumu.

4. Bbayibbili litondeezya biyeni kuti tweelede kukkala katulisimya, kuba aaluzyalo aluyando?

⁴ Jwi lyaLeza litusungwaazya kuti tulisimye, tube aaluzyalo  aluyando. Lugwalo lwa Lukka 21:19 lwaamba kuti: “Kwiinda mukulisimya kwanu, muzoofutula buumi bwanu.” Lugwalo lwa Bakkolose 3:12 lwaamba kuti: “Amulizwaatike luzyalo.” Alubo 1 Batesalonikka 4:9, 10 yaamba kuti: “Muyiisigwa aaLeza kuti muyandane. . . . Pesi bakombima, tumusungwaazya kuti mwiinkilile kunembo kuchita oobo munzila iizwide.” Magwalo woonse aaya akalembelwa basikwiiya bakali kulisimya kale, bakali aaluzyalo aluyando. Nikuba oobo, bakeelede kwiinkilila kunembo kwiiya atala abuntu oobu. Andiswe tweelede kubutondeezya buntu oobu. Kuti tukonzye kubutondeezya, tulalanga-langa maKkristu bakusaanguna mbubakatondeezya buntu oobu bumwi abumwi. Mpawo tulabona mbutukonzya kutobelezya chikozyano chabasikwiiya aabo akutondeezya kuti tulilibambilide kuti mapenzi mapati asika.

5. Niinzi chakagwasya maKkristu bakusaanguna kuti balisimye chiindi nibakali kuswaana mapenzi?

⁵ MaKkristu bakusaanguna bakeelede kulisimya. (Heb. 10:36) Kuyungizya aamapenzi ngibakali kuswaana, kulaamwi ngibakazooswaana akaambo kakuti bakali maKkristu. Biingi bakali kupenzegwa abapati bazikombelo zyamaJuda abeendelezi baRoma kuswaanizya abamumpuli zyabo. (Mt. 10:21) Nikuba mumbungano, chimwi chiindi bakeelede kutantamuka basiluleyo anjiisyo zyakubeja kuti zitabaanzaanisyi. (Mil. 20:29, 30) Nikuba oobo, maKkristu aabo bakalisimya. (Chi. 2:3) Bakalisimya biyeni? Bakayeeyesesya atala azikozyano zyabakombi baJehova bakalisimya, mbuli chikozyano chaJobu. (Jak. 5:10, 11) Bakakomba kuti bajane manguzu. (Mil. 4:29-31) Alubo bakabikkila maanu kububotu mbubakali kujana akaambo kakulisimya.—Mil. 5:41.

6. Twiiyaanzi kuzintu nzyaakachita Merita zyakamugwasya kuti alisimye chiindi naakali kukazigwa?

⁶ Andiswe tulakonzya kulisimya kuti twakkala katubala akuyeeyesesya atala azikozyano zyabantu bakalisimya zili muBbayibbili azili mumabbuku eesu. Umwi muchizi waku-Albania uutegwa Merita wakalisimya chiindi naakali kupenzegwa abamumpuli yakwe. Wakaamba kuti: “Chikozyano chaJobu chakandigwasya kuti ndilisimye nikuba kuti ndakali mubuyumu-yumu oobu. Jobu wakaswaana mapenzi miingi loko nikuba kuti taakazi pe kuti ngwani wakali kupa kuti aswaane mapenzi aayo. Wakaamba kuti: ‘Kusikila ndikafwe, tandikaleki kusyomeka pe!’ (Job. 27:5) Ndakayeeya kuti mapenzi ngaakali kuswaana Jobu akali mayumu kwiinda ngindakali kuswaana. Kusiyana aJobu, ime ndakalizi kuti ngwani ulikundeetela mapenzi aaya.”

7. Nikuba kuti tatukwe penzi pati pe lino, niinzi nzitukonzya kuchita?

⁷ Chimwi chikonzya kutugwasya kuti tulisimye nkukomba kuli Jehova katulikumubuzya atala azintu zyoonse zilikutukataazya. (Flp. 4:6; 1 Tes. 5:17) Lino kulakonzeka kuti tukwe penzi pati pe likukataazya. Kuti kakuli oobo, nga wayanduula kuzulwidwa aaJehova na chiindi nukataazikene? Kuti wakkala kukumbila Leza kuti akugwasye kumapenzi nguswaana buzuba abuzuba lino, tukaleki pe kuyanduula lugwasyo chiindi nwaazooswaana penzi pati muchiindi chilikunembo. Uyooba aachoonzyo chakuti Jehova ulichizi chiindi ambayookugwasya nwaakuswaana mapenzi mapati.—Int. 27:1, 3.

8. Chikozyano chaMira chitondeezya biyeni kuti kulisimya kumapenzi ngituswaana lino kuyootugwasya kuti tukalisimye kumapenzi ngituyooswaana kunembo? (Jakkobo 1:2-4) (Langa chifanikisyo.)

⁸ Tulakonzya kuzoolisimya kumapenzi mapati ngituyooswaana kuti katukonzya kulisimya lino. (Rom. 5:3) Nkamboonzi nitukonzya kwaamba oobo? Bakombima biingi bakabona kuti kulisimya kumapenzi ngibaswaana lino kubagwasya kuti bazoolisimye kuchiindi chili kunembo chiyumu. Chiindi nibabona Jehova mbalikubagwasya kuti balisimye lino, nga baba aachoonzyo chakuti ulayanda kubagwasya. Akaambo kakuti balamusyoma Jehova,  balakonzya kuzoolisimya kumapenzi aali kunembo. (Bala Jakkobo 1:2-4.) Umwi payona uutegwa Mira waku-Albania wakabona kuti kulisimya nkwaakachita musule kwakamugwasya kuti ayinkilile kunembo kalisimya kumapenzi ngalikuswaana. Wakaamba kuti chimwi chiindi nga walimvwa kuti nguwe kupela uuswaana mapenzi miingi. Pesi nga wayeeya Jehova mbaakamugwasya kwaminyaka iili 20 yakiinda alubo ngawalibuzya kuti: ‘Kkala kusyomeka Mira. Yinkilila kunembo kubelekela Jehova nkaambo wakakugwasya kuti ulisimye muzyiindi ziyumu.’ Anduwe ulakonzya kuyeeyesesya mbaakakugwasya Jehova kuti ulisimye. Baachoonzyo chakuti chiindi achiindi nulisimya kulilimwi penzi, Jehova ulazibona akuti ulakulongezya. (Mt. 5:10-12) Chiindi mapenzi mapati naazoosaanguna, unoozizi zintu nzukonzya kuchita kuti ulisimye alubo uyookanza kuti ukkale kulisimya.

9. MaKkristu bamumbungano yaku-Antiyokkiya bakatondeezya biyeni kuti bakali aaluzyalo?

⁹ Atulange zyakachitikila maKkristu bakuJudiya chiindi nikwakaba nzala mpati loko. Chiindi bakumbungano yaku-Antiyokkiya kuSiriya nibakamvwa atala anzala eeyi, bakabafwida luzyalo bakombinyina bakuJudiya. Pesi bakachita chimwi chintu chitondeezya kuti bakali kuyanda kugwasya bakombinyina. “Bakakanza kweendelana ambaakali kukonzya umwi awumwi wabo, kutumizya zintu zyakugwasya bakombinyina bakali kukkala kuJudiya.” (Milimu 11:27-30) Nikuba kuti bakombinyina aaba bakali aanzala bakali kukkala kule, pesi maKkristu baku-Antiyokkiya bakalipeda kubagwasya.—1 Joh. 3:17, 18.

10. Niinzi nzitweelede kuchita zitondeezya kuti tubafwida luzyalo bakombima chiindi nibaswaana mapenzi? (Langa chifanikisyo.)

¹⁰ Andiswe tulakonzya kubatondeezya luzyalo bakombima kuti kwachitika mapenzi aalichitikila. Tulafwambaana kubagwasya, amwi tulazichita eezi kwiinda mukubuzya kubaalu kuti kakuli mputukonzya kugwasilizya, kusanga mali iigwasilizya mumulimu uuchitwa munyika yoonse naakuti kubakombela aabo bachitikilwa penzi. b (Tus. 17:17) Muchikozyano, mu2020 kwakasalwa maKkomiti aagwasilizya kuti kwachitika mapenzi aalichitikila aayinda ku950 munyika yoonse kuti agwasye bakombima aabo bakaswaana mapenzi muchiindi chakkorona. Tulabalumba bakwesu abachizi batola lubazu mumulimu ooyu wakugwasilizya. Akaambo kakubafwida luzyalo bakombinyina, bakalipeda kuti babape zintu zyakumubili, zyamubukombi zikonzya kubagwasya kuti bayinkilile kunembo kubelekela Jehova. Alubo kulizimwi zyiimo bakali kubambulula naakuti kuyakulula maanda aabo amaanda aakukombela.—Kozyanisya a 2 Bakkorinte 8:1-4.

11. Kubafwida luzyalo bakombima kumulemeka biyeni Taateesu wakujulu?

¹¹ Chiindi nitubafwida luzyalo bakombima nikwachitika mapenzi aalichitikila, bamwi balakubona kulipeda ooku nkutuchita. Muchikozyano, mu2019 kwakachitika guwo litegwa Hurricane Dorian lyakadilisya Ng’anda yaBwaami kuBahamas. Chiindi bakwesu nibakali kuyakulula Ng’anda yaBwaami eeyo, bakakumbila umwi mwaalumi uubeleka mumulimu wakuyaka kuti ababuzye kuti wakali kuyanda maliinzi kuti abayakulwide Ng’anda yaBwaami eeyo. Wakababuzya kuti: “Ndilamupa zintu zyoonse . . . ziyandikana kuti mukonzye kuyakulula kamutabbadali pe. Ndilazichita kumbunga yanu kupela. Ndajatwa-jatwa aanzila njimubayandaayo bakombinyokwe.” Bantu biingi munyika tabamuzi pe Jehova. Pesi biingi babo balazibona zichitwa aaBakamboni baJehova nibagwasya bakombinyina. Tulabotelwa nituziba kuti kulipeda nkutuchita chiindi nitutondeezya bakombima luzyalo  kupa kuti bamwi bayande kwiiya zyiingi atala aJehova, ooyo uuli “aaluzyalo lupati.”—Ef. 2:4.

12. Kutondeezya luzyalo lino kutugwasya biyeni kuti tulibambile mapenzi mapati? (Chiyubunuzyo 13:16, 17)

¹² Nkamboonzi nikuyooyandikana kuti tukatondeezyanie luzyalo muchiindi chamapenzi mapati? Bbayibbili litondeezya kuti aabo batatoli lubazu mulizyapolitikisi banooswaana mapenzi lino amuchiindi chamapenzi mapati. (Bala Chiyubunuzyo 13:16, 17.) Bakombima bayooyanda kugwasigwa kuti bakajane zintu zyakumubili muchiindi eecho. Chiindi Mwaami wesu Kkristu Jesu nazoosika kuti azoobeteke bantu, tuyanda kuti azootujane katutondeezya luzyalo alubo azootutambe kuti ‘tukone Bwaami.’—Mt. 25:34-40.

13. Mbuli mbukwaambidwe muli Baroma 15:7, maKkristu bakusaanguna bakatondeezya biyeni kuti bakali aaluyando lusimide aakati kabo?

¹³ Bantu boonse bakalizi kuti maKkristu bakusaanguna bakali kuyandana. Pesi kwakali kuuba na kuti batondeezyanie luyando? Mbungano yakuRoma yakali aabantu bakali aamaponeno aasiyene-siyene. Kwakali maJuda bakakomezegwa kabazi kuti beelede kuswiilila mulawu waMozesi, kwakali bamwi bakali kuzwa kuzisi zisiyene-siyene bakakomezegwa munzila iisiyene ayamaJuda. Bamwi maKkristu bakali bazike pesi bamwi bakalaangunukide alubo kulakonzeka kuti bamwi bakali basimalelo babazike. Niinzi nzibakeelede kuchita maKkristu aabo kuti batondeezyanie luyando nikuba kuti bakakomezegwa munzila zisiyene-siyene? Mwaapostoli Pawulu wakababuzya kuti: “Amutambulane.” (Bala Baroma 15:7.) Wakali kwaambaanzi? Bbala lyakasandululwa lyakuti “amutambulane” lyaamba kutambula uumwi muntu aamuunzi naakuti kupa kuti amvwanane abamwi. Muchikozyano, Pawulu wakabuzya Filimoni mbaakeelede kutambula muzike Onesimo wakali wachija. Wakati: “Umutambule kabotu.” (Flm. 17) Alubo Pulisila a-Akkwila bakatambula Apolo wakazi zintu ziche atala achiKkristu, kwiinda ‘mukumubweza.’ (Mil. 18:26) MaKkristu aabo teebakazumizya kusiyana nkubakali aako kuti kubapambanisye alubo bakatambulana kabotu.

14. Anna amulumaakwe bakatondeezya biyeni kuti bali aaluyando?

¹⁴ Andiswe tweelede kutondeezya kuti tulabayanda bakombima kwiinda mukubatambula kuti babe beenzuma. Kuchita oobo kupa kuti ambabo batuyande. (2 Kor. 6:11-13) Atulange zyakachitikila muchizi Anna amulumaakwe. Bakayinka kuWest Africa kuti bakabeleke mulimu mupya kabali mamishinali, mpawo kkorona yakasaanguna. Akaambo kakkorona teebakali kukonzya kunjila miswaangano kabali aamwi abakombinyina kuNg’anda yaBwaami alubo teekwakali kuuba pe kuti bazibane abakwesu abachizi. Anna amulumaakwe bakabatondezya biyeni bakombinyina luyando? Bakafoonena bakwesu abachizi akwaambuulaabo kababelesya mavidiyo alubo bakali kubabuzya kuti bayanda kubaziba kabotu. Bakabotelwa loko bakwesu abachizi aaba akaambo kaluyando ndubakatondeezegwa aamamishinali aaba alubo bakasaanguna kubafoonena akubalembela mameseji. Niinzi chakapa kuti mamishinali aaba babatondeezye luyando luli boobu bakombinyina bamumbungano yabo mpya? Anna wakaamba kuti, “Luyando ndubakanditondeezya bakombima ime abamumpuli yesu muzyiindi zilikabotu azitali kabotu lwakandisika aamoyo zyakuti andime ndakakanza kubatondeezya luyando bamwi.”

15. Twiiyaanzi kuchikozyano chaVanessa atala akuyanda bakwesu abachizi boonse? (Langa chifanikisyo.)

¹⁵ Biingi besu tunjila aambungano muli bakwesu abachizi bali bakakomezegwa munzila zisiyene-siyene alubo bali aabuntu busiyene-siyene. Tulakonzya kubayanda bakwesu abachizi aaba kuti twalanga buntu bubotu mbubali aabo. Umwi muchizi uutegwa Vanessa uuli mumulimu  wachiindi choonse kuNew Zealand, kwakali kumuyumina kumvwanana aabamwi mumbungano. Wakasala kuti ajane chiindi chiingi chakubaamwi abaabo bakali aabuntu bumunyemya. Kuchita oobu kwakamugwasya kuti abone Jehova mbabayanda bakombinyina aabo. Wakaamba kuti: “Mbukunga mulumaangu mulangizi wabbazu, ndakajana chiindi chakubaamwi abakwesu abachizi bali aabuntu busiyene-siyene alubo kwakanduubila kujana chiindi chakubaamwi ambabo. Lino ndakabayanda loko akaambo kakusiyana nkubalaako. Anguwe Jehova ulabayanda nkaambo nguwe wakabakwela kuti bazoomukombe nikuba kuti balisiyene.” Chiindi nitubona bakwesu abachizi mbuli mbababona Jehova zipa kuti tubayande.—2 Kor. 8:24.

16. Nkamboonzi nitweelede kuyoobayanda loko bakwesu abachizi muchiindi chamapenzi mapati? (Langa chifanikisyo.)

¹⁶ Muchiindi chamapenzi mapati, tweelede kuyoobayanda loko bakwesu abachizi. Kupenzegwa nikuzootalika, Jehova uyootukwabilila biyeni? Atubone Jehova nzyaakalayilila bakombi bakwe chiindi muunzi waBbabbiloni nwaakanyonyoonwa, wakati: “Kamuya nobantu bangu, amunjile mumaanda aanu aamukati, mulijalile. Amuyube kwakaindi kaniini buyo kusikila bukali bwiinde.” (Is. 26:20) Kubonekaanga majwi aaya ayoobeleka kulindiswe chiindi chamapenzi mapati. “Maanda aamukati” alakonzya kwaamba mbungano. Muchiindi chamapenzi mapati, Jehova utusyomezya kuti uyootukwabilila kuti twayinkilila kunembo katumubelekela katujisini abakwesu abachizi. Nkinkaako, tweelede kubeleka changuzu lino kuti tubayande kapati bakwesu abachizi. Lufutuko lwesu luyeeme aaluyando ndutulaalo kubakwesu abachizi.

17. Kuti twalibambila lino, niinzi nzituyoochita muchiindi chamapenzi mapati?

¹⁷ “Buzuba bupati bwaJehova” buyoopa kuti bantu boonse bakayuminwe aabuumi. (Zef. 1:14, 15) Nikuba bakombi baJehova buzoobayumina buumi. Pesi kuti twalibambila lino, tulakonzya kukkala katubateme alubo tulakonzya kugwasya bamwi. Tuyoolisimya kubuyumu-yumu mbutuyooswaana. Bakombima nibayoonjila mumapenzi, tuyoolipeda kubagwasya kwiinda mukubafwida luzyalo akubapa zintu nzibanooyanda. Kumvwanana aabakwesu abachizi lino kuyoopa kuti tukabayande kuchiindi chili kunembo. Kuti twachita oobo, Jehova uzootupa buumi butamani munyika iitakwe mapenzi alubo zintu zyachiindi tazikayeeyegwi lubo pe.—Is. 65:17.