1. Nkaakali kasimpe nkwaakayiya nwakasaanguna kwiiya Bbayibbili?

 UCHIZIYEEYEDE na zintu nzwaakayiya nwakasaanguna kwiiya Bbayibbili? Kulakonzya kuti wakagamba loko nwaakaziba kuti Leza ulaazina. Amwi wakaangunuka nwaakaziba kuti Leza tapenzyi bantu mubbibi lyamulilo. Alubo kulakonzya kuti wakabotelwa loko chiindi nwaakaziba kuti babbululu bako bakafwa uzoobabona lubo kabali babusigwa kuti bazoopone muparadayizi aanyika.

2. Kwiinkilila kunembo kulikwiiya kasimpe kamuBbayibbili kwakapa kuti uchiteenzi? (Ba-efeso 5:1, 2)

² Kuti wayinkilila kunembo kuli kwiiya Jwi lyaLeza, ulamuyanda loko Jehova. Luyando oolu lwakapa kuti ubelesye zintu nzwaakayiya. Wakasala kabotu akaambo kakutobelezya malayilile aamuBbayibbili. Wakayiya mbukonzya kuyeeya akuchita zintu zilikabotu nkaambo uyanda kubotezya Leza. Mbuli mwana mbatobelezya chikozyano chamuzyali uuli aaluyando, anduwe wakatobelezya chikozyano chaTaateesu wakujulu.—Bala Ba-efeso 5:1, 2.

3. Njiili mibuzyo njitukonzya kulibuzya?

³ Tulakonzya kulibuzya kuti: ‘Jehova ndichimuyanda mbuli nindakasaanguna kuba muKkristu na? Kuzwa nindakabbabbatizigwa, zintu nzindiyeeya anzindichita zileendelana na azintu nzyayanda Jehova kapati kumakani aakutondeezya bakwesu abachizi luyando?’ Kuti “luyando ndwaakalaalo kumasaangunino” lwatontola, toyelede kumana manguzu pe. Zyakachitika eezi kumaKkristu bakusaanguna. Jesu taakabakaka pe maKkristu aabo alubo andiswe takatukaki pe. (Chi. 2:4, 7) Ulizi kuti tulakonzya kulubusilizya lubo luyando ndutwakalaalo kumasaangunino nitwakasaanguna kwiiya kasimpe.

4. Tulalanga-langaanzi muchiiyo eechi?

 ⁴ Muchiiyo eechi, tulalanga-langa mbutukonzya kuyungizya kuyanda Jehova abamwi. Mpawo tuzoobona bubotu mbutukonzya kujana kuti twayungizya kutondeezyania luyando.

5-6. Mbuubuli buyumu-yumu mbwakaswaana mwaapostoli Pawulu mumulimu wakwe wakukambawuka alubo niinzi chakamugwasya kuti ayinkilile kunembo kabelekela Jehova?

⁵ Mwaapostoli Pawulu wakali kubotelwa kubelekela Jehova, pesi chimwi chiindi wakali kuswaana buyumu-yumu. Kwaziindi zyiingi, Pawulu wakali kweenda misinzo milamfu. Muchiindi eecho, kweenda misinzo milamfu teekwakali kuuba pe. Munyendo zyakwe, chimwi chiindi Pawulu wakali kuswaana ‘ngozi zyamumilonga’ alubo wakali “mungozi kuzigwebenga.” Chimwi chiindi basinkondonyina bakali kumuuma. (2 Kor. 11:23-27) Alubo chimwi chiindi bakombinyina teebakali kumulumba pe azintu nzyaakali kuchita kuti abagwasye.—2 Kor. 10:10; Flp. 4:15.

⁶ Niinzi chakagwasya Pawulu kuti ayinkilile kunembo kabelekela Jehova? Pawulu wakayiya zyiingi atala abuntu mbwalaabo Jehova kuzwa muMagwalo alubo akuzintu zyakamuchitikila mubuumi bwakwe. Eezi zyakapa kuti Pawulu abe aachoonzyo chakuti Jehova Leza wakali kumuyanda. (Rom. 8:38, 39; Ef. 2:4, 5) Alubo Pawulu wakamuyanda loko Jehova. Wakatondeezya kuti ulamuyanda Jehova “kwiinda mukubelekela basalali akwiinkilila kunembo kubabelekela.”—Heb. 6:10.

7. Njiili imwi nzila iikonzya kutugwasya kuti tuyungizye mbutumuyanda Jehova?

⁷ Kubala Jwi lyaLeza kulakonzya kutugwasya kuti tuyungizye nzila njitumuyandaayo Jehova. Chiindi nubala Bbayibbili, yezya kubona kuti nzulikubala zitondeezyaanzi atala aJehova. Libuzye kuti: ‘Nkani eeyi itondeezya biyeni kuti Jehova ulandiyanda? Ntuutuli twaambo tupa kuti ndiyande Jehova?’

8. Kukomba kutugwasya biyeni kuti tuyungizye nzila njitumuyandaayo Leza?

⁸ Imwi nzila iikonzya kutugwasya kuyungizya nzila njitumuyandaayo Jehova nkukkala katumubuzya zintu zili mumyoyo yesu kwiinda munkombyo. (Int. 25:4, 5) Jehova ulaziswiilila nkombyo zyesu. (1 Joh. 3:21, 22) Umwi muchizi waku-Asia utegwa Khanh wakaamba kuti: “Kumasaangunino, ndakali kuyanda Jehova akaambo kakuti kuli zintu nzindakali ndaziba atala anguwe, pesi ndakayungizya nzila njindakali kumuyandaayo chiindi nindakabona mbaakali kusandula nkombyo zyangu. Eezi zyakapa kuti ndiyande kuchita zintu zimubotezya.” b

9. Niinzi zitondeezya kuti Timoti wakali kuyungizya kunzila njaakali kubayandaayo bakombinyina?

⁹ Nikwakayinda minyaka Pawulu kali waba muKkristu, wakaswaanana awumwi uuchikula uutegwa Timoti. Timoti wakali kumuyanda Jehova alubo wakali kubayanda bantu. Pawulu wakabuzya maKkristu bakuFilipi kuti: “Nkaambo tandikwe umwi muntu uuli mbuli [Timoti] uutazootondeezye kuti ulaandaba loko azintu zimukataazya.” (Flp. 2:20) Pawulu taakwe naakaambuula atala akubambikana nkwakalaako Timoti naakuti nzila njaakali kuyiisyaayo mumbungano, pesi wakabona nzila njaakali kubayandaayo bakombinyina. Alubo chiindi bamumbungano nibakali kumvwa kuti Timoti ulasika kuzooswaya mbungano zyabo, bakali kumulangilila aameso aasalala.—1 Kor. 4:17.

10. Anna amulumaakwe bakatondeezya biyeni kuti balabayanda bakombinyina?

¹⁰ Andiswe tulakonzya kuyanduula nzila zyakugwasya bakombima. (Heb. 13:16) Atulange-lange zyakachitwa aa-Anna wakaambwa muchiiyo chayinda. Niyakamana mvula yakali aaguwo  pati, Anna amulumaakwe bakaswaya iimwi mpuli yabakombinyina alubo bakajana kuti kaluli kang’anda kampuli eeyo kakali kavumbuka. Eezi zyakapa kuti mpuli eeyo isyale aazigogo zili aadoti. Anna wakaamba kuti: “Twakabweza zigogo eezyo, twaakakuziwacha akuzi-ayina mpawo twakazibweedezya kazipetedwe kabotu. Kulindiswe, chakali chintu chiniini loko nchitwakachita pesi zyakapa kuti tumvwanane loko ampuli eeyo kusikila sunu.” Akaambo kakuti Anna amulumaakwe bakali kubayanda bakombinyina, kwakabawubila kubagwasya kuzintu ziniini nzibakali kuyanda kugwasigwa.—1 Joh. 3:17, 18.

11. (a) Kutondeezya bamwi luyando kubagwasya biyeni? (b) Kweendelana alugwalo lwa Tusimpi 19:17, niinzi Jehova nzyachita kuti twabatondeezya luyando bamwi?

¹¹ Kuti twabatondeezya luyando aluzyalo bamwi, balazibona kuti tuliikweezya kutobelezya Jehova. Alubo balakonzya kutulumba akaambo kazintu nzitubachitila. Khanh waambwa kumasaangunino uchibayeeya aabo bakamugwasya. Wakaamba kuti: “Ndibalumba loko bachizi boonse bakali kuzwa aandime mumulimu wakukambawuka. Bakali kusika akundibweza amoota, bakali kunditamba kuti tukajane chiindi chakubaamwi sikati katuliikulya alubo bakali kuba aachoonzyo chakuti ndasika kabotu kung’anda. Kuti ndayeeyesesya zintu zyoonse eezi, nga ndabona kuti bakali aamulimu mupati loko bachizi aaba. Alubo bakali kuchita zintu eezi akaambo kaluyando.” Nikuba oobo, teebantu boonse pe bakonzya kutulumba akaambo kazintu nzitubachitila. Khanh naakali kwaambuula atala abachizi bakamugwasya wakaamba wakati: “Ndilombozya kubabbadala akaambo kazintu zibotu nzibakandichitila, pesi tandikonzyi pe kuzichita eezi nkaambo tandizi pe kuti boonse bakkala kuli. Nikuba oobo, Jehova ulikuzi nkubakkala alubo ndikombela kuti andibbadalile akaambo kazintu nzibakandichitila.” Nzyakaamba Khanh nzyachoonzyo. Jehova ulazibona zintu ziniini nzituchitila bakwesu abachizi.  Jehova uzibona kaziyandikana loko zintu eezyo alubo nga zyaba mbuli chikwelete kulinguwe nchayelede kuzoobbadala.—Bala Tusimpi 19:17.

12. Bakwesu nga balatondeezya biyeni kuti balabayanda bakombinyina bali mumbungano? (Langa chifanikisyo.)

¹² Kuti kuli mukwesu, nga ulachita biyeni kuti utondeezye kuti ulabayanda bamwi akuti uyanda kuchita zintu zibagwasya? Umwi uuchikula uutegwa Jordan wakabuzya mwaalu kuti kuli nzyakonzya kuchita na kuti agwasilizye mumbungano. Mwaalu ooyo wakamulumbayizya akaambo kakuti kuli zintu zibotu nzyaakali kuchita kale mpawo wakamubuzya mbakonzya kuyungizya kuti achite zyiingi. Muchikozyano, wakabuzya Jordan kuti ajate chiindi chamiswaangano kuNg’anda yaBwaami alubo ajane chiindi chakujuzyania aabamwi, asandule kumiswaangano, akkale kazwa kukukambawuka kali aamwi abamwi alubo ayanduule zimwi nzila zyakugwasya bamwi. Chiindi Jordan naakabelesya malayilile aaya, wakayiya zintu zipya alubo wakabayanda loko bakombinyina. Jordan wakayiya kuti chiindi mukwesu naba mubelesi wambungano, teempawo pe mpasaangunina kugwasya bamwi pesi nga ulikwiinkilila kunembo kali kubagwasya.—1 Tim. 3:8-10, 13.

13. Luyando lwakamugwasya biyeni Mukwesu Christian kuti ayelele lubo kuba mwaalu?

¹³ Niinzi nzukonzya kuchita kuti kutachili mubelesi wambungano naakuti mwaalu? Jehova tawulubi pe mulimu ngwaakachita chiindi alubo aluyando ndwaakalaalo. (1 Kor. 15:58) Ulazibona nzuchita kuti uyungizye mbumuyanda. Umwi mukwesu uutegwa Christian wakanyema chiindi naakagwisigwa kuba mwaalu. Pesi wakaamba kuti: “Ndakasala kuchita zintu zyoonse nzindakali kukonzya kuchita kuti ndibelekele Jehova nikuba kuti ndili aachilongezyo na naakuti pe.” Mukuya kwachiindi, mukwesu Christian wakazoosalwa lubo kuti abe mwaalu. Wakaamba kuti: “Ndakakataazikana kuti ndilakonzya  na kuubeleka lubo mulimu ooyu. Pesi ndakayeeya kuti, kuti Jehova kayanda kuti ndibeleke kandili mwaalu lubo, ndeelede kuzumina kuuchita mulimu ooyu akaambo kakuti ndilamuyanda Jehova abakombima.”

14. Twiiyaanzi kuzintu zyakaambwa aamuchizi wakuGeorgia?

¹⁴ Bakombi baJehova batondeezya basimayakilane babo luyando. (Mt. 22:37-39) Muchikozyano, umwi muchizi utegwa Elena wakuGeorgia wakaamba kuti: “Kumasaangunino, chintu chakali kupa kuti ndikambawuke nkuyanda Jehova. Pesi nindakayungizya kuyanda Taateesu wakujulu, ndakabayanda loko bantu. Ndakeezya kubona mapenzi ngibakali kuswaana akuti niinzi nzindakeelede kuchita kuti ndibasike aamoyo. Chiindi nindakali kuyeeyesesya atala azintu zibakataazya, chiyandisyo chakubagwasya chakali kukomena.”—Rom. 10:13-15.

15-16. Mbuli mbukutondeezedwe muzifanikisyo, tugwasigwa biyeni kuti twatondeezya bamwi luyando?

¹⁵ Chiindi nitutondeezya bakombima luyando, teembabo kupela bagwasigwa. Kayili yasaanguna kkorona, umwi mukwesu utegwa Paolo amwanakazi wakwe bakagwasya bachizi bachembeede biingi kuti bakonzye kukambawuka kababelesya mafooni. Umwi muchizi kumasaangunino kwakali kumuyumina kubelesya fooni yakwe pesi wakazookonzya kwiibelesya. Wakakonzya kutamba babbululu bakwe kuti banjile Chiyubulusyo kabelesya fooni. Babbululu bakwe bali 60 bakanjila Chiyubulusyo kababonana mumavidiyo. Muchizi ooyo ababbululu bakwe boonse bakagwasigwa akubeleka changuzu nkwaakachita mukwesu Paolo amwanakazi wakwe. Mukuya kwachiindi, muchizi ooyo  wakazoolembela mukwesu Paolo lugwalo, wakati: “Ndilamulumba akaambo kakutuyiisya nituchembeede. Chiindi choonse ndinookkala kandiyeeya Jehova mbatuyanda alubo ndinoyeeya kubeleka changuzu nkumwakachita kuti mutugwasye.”

¹⁶ Zikozyano zili boobu zyakayiisya Mukwesu Paolo chiiyo chiyandikana loko. Mukwesu Paolo wakabona kuti kuyanda bamwi kulayandikana kwiinda kuba aaluzibo naakuti kukonzya kuchita chimwi chintu. Wakaamba kuti: “Ndakali mulangizi wabbazu. Ndakabona kuti basikupupulula balakonzya kuti bakaziluba nkani nzindakali kupa, pesi tabazilubi zintu nzindakali kuchita kuti ndibagwasye.”

17. Mbaani bamwi bagwasigwa chiindi nitutondeezya bamwi luyando?

¹⁷ Kuti twatondeezya bamwi luyando, andiswe tulagwasigwa munzila nzitutayeeyeli pe. Jonathan uukkkala kuNew Zealand, wakazibonza kuti nzyachoonzyo eezi. Bumwi buzuba sikati muMugibelo zuba kalili kupya, Jonathan wakabona umwi mukwesu payona wakali kukambawuka kumbali aamugwagwa. Jonathan wakasala kuti kakambawukaamwi apayona ooyu chiindi choonse muMugibelo sikati. Alubo takali kubona pe kuti kusala kubeleka aapayona ooyu kwakali kukonzya kumugwasya biyeni. Jonathan wakaamba kuti: “Aachiindi eecho, teekwakali kundinoneezya pe kukambawuka. Pesi nindakali kuswiilila nzila njaakali kuyiisyaayo payona ooyu akubona mbaakali kuzwidilila mumulimu wakukambawuka, kukambawuka kwakasaanguna kundinoneezya. Mukwesu ooyu wakaba mweenzuma alubo wakandigwasya kuti ndisaangune kubotelwa mumulimu wakukambawuka akuti ndiswene aafwiifwi aJehova.”

18. Jehova uyanda kuti tuchiteenzi?

¹⁸ Jehova uyanda kuti tuyungizye nzila njitumuyandaayo ambutubayanda bamwi. Mbuli mbutwayiya, tulakonzya kuyungizya kuyanda Jehova kwiinda mukubala Jwi lyakwe, kuyeeyesesya atala andilyo akukkala katwaambuula aanguwe kwiinda munkombyo. Tulakonzya kuyungizya kuyanda bakombima kwiinda mukubagwasya chiindi nibayanda lugwasyo. Kuti luyando lwesu lwakomena, tuyooswena aafwiifwi aJehova abakombima. Alubo tuyooyinkilila kunembo katumvwanana kusikila kukabe kutamani!