1. Kasimpe kamuBbayibbili katugwasya biyeni?

 BAKOMBI baJehova balakayanda kasimpe kajanika muJwi lyaLeza. Kasimpe aaka, nkako kakasimya lusyomo lwesu. (Rom. 10:17) Tuli aachoonzyo chakuti Jehova wakapa kuti mbungano yachiKkristu ibe “musemu antalisyo yakasimpe.” (1 Tim. 3:15) Alubo tulabaswiilila “aabo balikuzulwida” aakati kesu chiindi nibapandulula kasimpe kamuBbayibbili anibatupa malayilile aayendelana aakuyanda kwaLeza.—Heb. 13:17.

2. Kweendelana alugwalo lwa Jakkobo 5:​19, niinzi zikonzya kuchitika nikuba katuzi kasimpe?

² Nikuba kuti tuli mukasimpe akuti tulizi kuti tweelede kuswiilila malayilile aazwa kumbunga yaLeza, tulakonzya kuleya mukasimpe. (Bala Jakkobo 5:19.) Makanze aaSaatani ngakuti tuleke kusyoma Bbayibbili amalayilile aazwa kumbunga yaLeza.—Ef. 4:14.

3. Nkamboonzi nikuyandikana kuti tukakatile kukasimpe? (Ba-efeso 6:​13, 14)

³ Bala Ba-efeso 6:​13, 14. Lino-lino, Saatani uzoobelesya manwa kuti azoope kuti zisi zyoonse zizookazye Jehova. (Chi. 16:​13, 14) Alubo tulangilila kuti Saatani uzooyezya anzila zyoonse kuti azoope kuti bakombi baLeza bazoosiye kasimpe. (Chi. 12:9) Akaambo kazeezi, kulayandikana kuti tukonzye kusiyanisya kasimpe anjiisyo zyakubeja alubo tuswiilile kasimpe. (Rom. 6:17; 1 Pet. 1:22) Kuti katuswiilila, tuzoofutuka lyamapenzi mapati.

4. Tulalanga-langaanzi muchiiyo eechi?

 ⁴ Muchiiyo eechi, tulalanga-langa buntu bubili bukonzya kutugwasya kuti tuzibe kasimpe kamuBbayibbili akuti tuswiilile malayilile aazwa kumbunga yaLeza. Mpawo tulalanga-langa zintu zitatu zikonzya kutugwasya kuti tukakatile kukasimpe.

BUNTU MBUTWEELEDE KUBAABO KUTI TUZIBE KASIMPE

5. Kuyoowa Jehova kutugwasya biyeni kuti tuzibe kasimpe?

⁵ Kuyoowa Jehova. Kuyoowa Jehova chaamba kuti tumuyanda loko zyakuti tatuchiti kufumbwa chintu chimunyemya. Tuli aachiyandisyo chakuyanda kuziba musiyano uuliwo aakati kachibotu achibi, kasimpe amanwa kuchitila kuti tukonzye kutambulika kuli Jehova. (Tus. 2:​3-6; Heb. 5:14) Kuyoowa bantu takweelede kuba kunembo loko pe kwiinda kuyoowa Jehova, nkaambo zintu zibotezya bantu chiindi chiingi, zinyemya Jehova.

6. Kuyoowa bantu kwakapa kuti basikulanga-langa nyika bali 10 bachi-Israyeli bachiteenzi?

⁶ Kuti katuyoowa bantu kwiinda Leza, tulakonzya kuleya mukasimpe. Atubone chikozyano chabasilutwe bali 12 bakatumwa kuti bakalange-lange nyika Jehova njaakasyomezezye kuzoopa ma-Israyeli. Basilutwe bali 10, bakabikka kuyoowa bantu bakuKkenani mubusena bwakusaanguna kwiinda mbubakali kuyoowa Jehova. Bakabuzya bakombinyina ma-Israyeli kuti: “Tatukonzyi kuyoobalwana bantu aaba pe, nkaambo balaanguzu kwiinda ndiswe.” (My. 13:​27-31) Mumaboneno aabantu, bantu bakuKkenani bakali aamanguzu chachoonzyo kwiinda ma-Israyeli. Ma-Israyeli bakayeeya kuti bakali kuyoozundwa abasinkondonyina akaambo kakuti teebakazibikkila maanu pe kuti Jehova nguwe wakali kubagwasizya chiindi choonse. Basikulanga-langa nyika aaba bali 10, bakeelede kubikkila maanu kuzintu Jehova nzyaakali kuyanda kuti ma-Israyeli bachite. Alubo  bakeelede kuyeeyesesya atala azintu Jehova nzyaakali wabachitila kale. Kaansinga bakazichita eezi, zyakali kunoopa kuti babone kuti bantu bakuKkenani taakwe ambubakabede pe kuti beezyanisigwa aaJehova. Kusiyana abasikulanga-langa nyika aaba bali 10 bakatalikwe lusyomo, Joshuwa aKkalebbu bakali kuyanda kutambulika kuli Jehova. Bakabuzya bantu kuti: “Ikuti naa Jehova watukkomanina, masimpe uyootunjizya munyika eeyi akutupa njiyo.”—My. 14:​6-9.

7. Niinzi chikonzya kutugwasya kuti tuyungizye kuyoowa Jehova? (Langa chifanikisyo.)

⁷ Kuti tuyungizye nzila njitumuyoowaayo Jehova, tweelede kubikkila maanu kuzintu zimubotezya chiindi nitusala zyakuchita. (Int. 16:8) Chiindi nubala Bbayibbili, libuzye kuti, ‘Nikunga ndali muchiimo eechi, ndalikunoosala kuchitaanzi?’ Muchikozyano, libone kulikuswiilila basilutwe bali 10 kabali kwaamba makani aamana manguzu. Walikunooyoowa bantu na kwiinda mukusyoma makani aakubeja naakuti walikunooyanda Leza akusala kuchita zintu zimubotezya? Ma-Israyeli biingi, bakakachilwa kuswiilila majwi aakasimpe Joshuwa aKkalebbu ngibakaamba. Akaambo kazeezi, bakasweekelwa chilongezyo chakunjila Munyika Yachisyomezyo.—My. 14:​10, 22, 23.

8. Mbuubuli buntu mbutweelede kubelekela kubaabo alubo nkamboonzi?

⁸ Kulibombya. Jehova uyubununa kasimpe kubantu balibombya. (Mt. 11:25) Twakalibombya kuti tuzibe kasimpe. (Mil. 8:​30, 31) Nikuba oobo, tweelede kuchenjela kuti tutazoolisumpuli. Kuti twalisumpula tulakonzya kubonaanga zintu nzituyeeya zileendelana amalayilile aazwa muBbayibbili amalayilile aazwa kumbunga yaJehova.

9. Niinzi chikonzya kutugwasya kuti tukkale katulibombya?

⁹ Kuti tukkale katulibombya, tweelede kuyeeya kuti taakwe mbutubede pe kuti tweezyanisigwa aabupati bwaJehova. (Int. 8:​3, 4) Alubo tulakonzya kukumbila Jehova kuti atugwasye kuti tube bantu balibombya abayiisika. Jehova ulatugwasya kuti tuyibone kayiyandikana mizeezo yakwe njituyiisigwa muBbayibbili ambunga yakwe kwiinda mizeezo yesu. Chiindi nubala Bbayibbili, yanduula twaambo tutondeezya kuti Jehova ulabayanda bantu balibombya, ulabazonda bantu balisumpula abalisyoma. Ziyanda kubeleka changuzu kuti ukkale kulibombya chiindi nwaapegwa mulimu mumbunga wakuzulwida bamwi naakuti uupa kuti uzibikane.

MBUTUKONZYA KUKAKATILA KUKASIMPE

10. Mbaani Jehova mbaakasala kuti bape bakombi bakwe malayilile?

¹⁰ Yinkilila kunembo kuswiilila malayilile aazwa kumbunga yaJehova. Muchiindi chama-Israyeli, Jehova wakali kubelesya Mozesi aJoshuwa kuti ape bakombi bakwe malayilile. (Jos. 1:​16, 17) Ma-Israyeli bakali kulongezegwa chiindi nibakali kuswiilila baalumi aaba akaambo kakuti bakali kwiiminina Jehova Leza. Minyaka yakatobela, chiindi mbungano yachiKkristu niyakajulwa, baapostoli bali 12 mbabo bakali kupa bakombi baJehova malayilile. (Mil. 8:​14, 15) Mpawo kabunga aaka, kakazooyungizigwa aabamwi baalu bamuJerusalema. Chiindi maKkristu nibakali kuswiilila malayilile aakali kuzwa kubaalumi aaba basyomeka, “mbungano zyakali kuyabusima mulusyomo alubo zyakali kuyungizya buzuba abuzuba.” (Mil. 16:​4, 5) Mazubaano, andiswe tulalongezegwa chiindi nitutobela malayilile aazwa kumbunga yaJehova. Pesi Jehova umvwa biyeni kuti twakaka kuswiilila mbaakasala kuti batuzulwide? Tulakonzya kusandula mubuzyo ooyu  kwiinda mukulanga-langa zyakachitka chiindi ma-Israyeli nibakali kuya kuNyika Yachisyomezyo.

11. Niinzi zyakachitikila ma-Israyeli bakapapila Mozesi? (Langa chifanikisyo.)

¹¹ Chiindi ma-Israyeli nibakali kuya kuNyika Yachisyomezyo, baalumi bali aampuwo bakapapila Mozesi akwaamba kuti taakasalidwe aaJehova pe kuti abazulwide. Bakaamba kuti: “Bantu boonse mumbungano balasalala alimwi Jehova mpali akati kabo.” (My. 16:​1-3) Nichoonzyo kuti mumeso aaLeza “bantu boonse mumbungano” bakali kusalala, pesi Jehova wakali wasala Mozesi kuti azulwide bakombi bakwe. (My. 16:28) Chiindi nibakali kukazya Mozesi basikupapila aaba, bakali kukazyania aaJehova. Teebakabikkila maanu pe kuzintu Jehova nzyaakali kuyanda, pesi bakabikkila maanu kuzintu nzibakali kuyanda. Bakali kuyanda kweendelezya akuba aampuwo. Leza wakabanyonyoona basikupapila aaba kuswaanizya abamwi ma-Israyeli biingi bakali kubatobela. (My. 16:​30-35, 41, 49) Mazubaano, Jehova ulabazonda aabo bataswiilili bantu mbaakasala kuti bazulwide bakombi bakwe.

12. Nkamboonzi nitweelede kukkala katusyoma mbunga yaJehova?

¹² Tulakonzya kukkala katusyoma malayilile aazwa kumbunga yaJehova. Chiindi nikweelela kuti kamwi kasimpe kamuBbayibbili kabambululwe naakuti nzila njuuchitwaayo mulimu waBwaami ichinchwe, aabo bazulwida tabawayi-wayi pe. (Tus. 4:18) Bachita oobo akaambo kakuti bayanda kubotezya Jehova. Alubo bachita zyoonse nzibakonzya kuchitila kuti nzibasala zyeendelane aaJwi lyaLeza nkaambo bakombi baLeza boonse nzizyo nzibeelede kutobela.

13. ‘Chikozyanisyo chamajwi mabotu’ niinzi alubo niinzi nzitweelede kuchita angawo?

¹³ “Yinkilila kunembo kukakatide kuchikozyanisyo chamajwi mabotu.” (2 Tim. 1:13) ‘Chikozyanisyo chamajwi mabotu’ chaamba  njiisyo nzibasyoma maKkristu zizwa muBbayibbili. (Joh. 17:17) Munjiisyo eezi, mpawo aayeeme zintu zyoonse nzitusyoma. Mbunga yaJehova ilikutuyiisya kuti tukakatile “kuchikozyanisyo chamajwi mabotu.” Chiindi nituchita oobo, tulalongezegwa.

14. Niinzi chakapa kuti bamwi maKkristu baleke kukakatila “kuchikozyanisyo chamajwi mabotu”?

¹⁴ Niinzi chikonzya kuchitika kuti twaleka kukakatila “kuchikozyanisyo chamajwi mabotu”? Atubone chikozyano. Mumwaanda wakusaanguna, kwakali ntwiintwi aakati kabamwi maKkristu yakuti buzuba bwaJehova bwakali bwasika. Kulakonzeka kuti kuli lugwalo ndubakajana lwakali kubonekaanga lwakazwa kumwaapostoli Pawulu lwakali kwaamba kuti buzuba bwaJehova bwakali bwasika. Bamwi maKkristu bakuTesalonikka teebakalipa chiindi chakuti bayanduulisisye kuti makani aaya akali aachoonzyo na. Bakasyoma ntwiintwi eeyi mpawo bakasaanguna kubuzya bantu. Kaansinga bakaziyeeya zintu Pawulu nzyaakabayiisya nibakachilaamwi, nikunga teebakeenwa pe. (2 Tes. 2:​1-5) Pawulu wakabapa lulayo bakombinyina kuti batanoosyomi kufumbwa zintu nzibamvwa. Naakali kubagwasya kuti batazoozyiindululi lubo kunembo, mulugwalo lwachibili ndwaakalembela maKkristu aaba bakuTesalonikka, Pawulu wakajinsya aamajwi aakuti: “Nkoku kujuzya kwangu nkundalemba akuboko kwangu, ime ndiPawulu. Eechi nchiichitondeezyo mumagwalo aangu woonse. Mbundilemba mbuboobu.”—2 Tes. 3:17.

15. Niinzi nzitweelede kuchita kuti tulikwabilile kumakani aakubeja aabonekaanga ngachoonzyo? Amba chikozyano. (Langa zifanikisyo.)

¹⁵ Niinzi nzitukonzya kwiiya kuzwa kumajwi aaPawulu ngaakalembela maKkristu bakuTesalonikka? Kuti twamvwa aamwi makani atayendelani pe azintu nzitwakayiya muBbayibbili naakuti twamvwa ntwiintwi iitamvwisisiki pe, tweelede kubelesya maanu eesu aayiisidwe aaBbayibbili. Muchiindi chaSoviet Union, basinkondoma bakapa bakombima lugwalo kabaamba kuti lwakazwa kumawofesi mapati. Lugwalo oolu lwakali kusungwaazya bamwi bakwesu kuti baanzaane mpawo bapange  mbunga yabo. Lugwalo oolu lwakali kubonekaanga ndwachoonzyo. Pesi bakwesu bakali kusyomeka teebakazumina pe kweenwa. Bakabona kuti zyakali mulugwalo oolu teezyakali kweendelana pe anzibakayiisigwa. Mazubaano, bantu batayandi kasimpe babelesya intaneti kuti bape kuti twaanzaane. Kwiinda kuti ‘tufwambaane kuzungaanisigwa mumizeezo,’ tulakonzya kulikwabilila kwiinda mukulanga-langa kuti zintu nzitwamvwa naakuti nzitwabala zileendelana na akasimpe nkitwakayiya.—2 Tes. 2:2; 1 Joh. 4:1.

16. Kweendelana alugwalo lwa Baroma 16:​17, 18, niinzi nzitweelede kuchita kuti bamwi basala kusiya kasimpe?

¹⁶ Kkala kujisini abaabo basyomeka kuli Jehova. Leza uyanda kuti tumukombe katujisini abakombima. Tunoojisini kuti twakakatila kukasimpe. Kufumbwa muntu uusiya kasimpe upa kuti mbungano yaanzaane, nkinkaako, Leza utuchenjezya kuti ‘tubatantamuke’ bantu bali oobo. Kuti teetwachita oobo, andiswe tulakonzya kusiya kasimpe.—Bala Baroma 16:​17, 18.

17. Tugwasigwa biyeni kuti twaziba kasimpe akuti twakakatila kuli nkako?

¹⁷ Kuti twaziba kasimpe akukakatila kuli nkako, tulaswena aafwiifwi aJehova alubo lusyomo lwesu lunoosimide. (Ef. 4:​15, 16) Tulakwabililwa kunjiisyo zyaSaatani zyakubeja, kumanwa aakwe alubo Jehova uyootukwabilila muchiindi chamapenzi mapati. Kkala kukakatilide kuzintu zyakasimpe, ‘mpawo Leza waluumuno uzooba aanduwe.’—Flp. 4:​8, 9.