“MWAPONA biyeni?”

Majwi aaya tulaabelesya nitujuzya bamwi. Chimwi chiindi tulakonzya kujuzya muntu katujisini maboko. Nikuba kuti nzila zyakujuzyania zilasiyana kweendela abusena pesi kujuzyania kulayandikana kubantu boonse. Chiindi chiingi, kutajuzya bamwi naakuti kutavwiila zitondeezya kuti tukwe luyando akuti tubabikkili maanu.

Bantu biingi tabakuzibide pe kujuzya bamwi. Bamwi balaleka kujuzya bamwi nkaambo bali abweeme naakuti balilangilaansi. Alubo bamwi kulabayumina kujuzya bantu mbibasiyene lukanda, maponeno azimwi. Pesi kujuzya kulagwasya nikuba kuti wabelesya majwi mache.

Libuzye kuti: ‘Kujuzya kubagwasya biyeni bamwi? Jwi lyaLeza lindiyiisyaanzi atala akujuzya?

Naakatambula muntu wabamasi uutegwa Kkorneliyo mumbungano yachiKristu, mwaapostolo Petro wakati: “Leza talangi ciimo camuntu.” (Inc. 10:34) Mukuya kwachiindi, Petro wakazoolemba kuti Leza ‘uyanda kuti boonse bajane chiindi chakweempwa.’ (2 Pet. 3:9) Tulakonzya kuyeeya kuti majwi aaya abeleka kumuntu ulikwiiya Bbayibbele. Pesi Petro wakachenjezya maKristu kuti: “Amubalemeke bantu boonse. Amuyande babunyina.” (1 Pet. 2:17) Nkinkaako, kulayandikana kujuzya bantu katutalangi musyobo wabo, maponeno aabo naakuti mbubakakomezegwa. Kuchita oobo kutondeezya kuti tulabalemeka akuti tulabayanda.

Mwaapostolo Pawulu wakaambila bakombinyina kuti: “Amusamausyanye, mbubonya mbuli Kristo mbwatusamausya kubulemu bwa-Leza.” (Rom. 15:7) Pawulu wakaamba mazina aabakombinyina bakali ‘kumuumbulizya mumoyo.’ Nkinkaako, kulayandikana kuti bakwesu abachizi kabasungwaazyania nkaambo Saatani ulikubeleka changuzu kulwana bakombi baLeza.—Kol. 4: 11; Ciy. 12:12, 17.

Zikozyano zyamuBbayibbele zitondeezya kuti kujuzya kupa kuti bamwi balimvwe kabotu akuti balayandikana.

Nichakasika chiindi chakuti Mwana aLeza azoozyalwe aMariya, Jehova wakatuma mungelo kuti akaswaye Mariya. Mungelo wakaambila Mariya kuti: “Wabonwa oopedwe luzyalo,” mpawo mungelo wakayungizya kuti, “Jehova uli ayebo.” Mariya ‘wakanyongana kapati’ kuti nkamboonzi mungelo naakali kwaambuula anguwe. Mungelo naakabona kuti wayoowa, wakamwaambila kuti: “Utayoowi, Mariya, wajana luzyalo kuli-Leza.” Wakamupandulwida kuti akali makanze aaLeza kuti azootumbuke mwana wakali kuzootegwa Mesiya. Mariya taakachili kukataazikana pe, mpawo wakati: “Ndi muzike wa-Jehova mebo, akube kulindime mbubonya mbuli kwaamba kwako.”—Lk. 1:26-38.

Chakali chilongezyo chipati kumungelo kuti abe mwiiminini waJehova pesi taakalibona kuti walangililwaansi kwiinda mukutumwa kuti akaambuule amuntu. Wakasaanguna akujuzya. Twiiyaanzi? Tweelede kujuzya bamwi akubasungwaazya. Nikuba kuti twaamba majwi mache, kulakonzya kubasungwaazya alubo kupa kuti balimvwe kabali bakombi baJehova bayandikana.

Pawulu wakaziba bakombinyina biingi bakali kumbungano zyakuAsiya Mayina akuEurope. Mumagwalo ngaakalemba wakali kujuzya bantu amazina. Eezi tulazibona muBbuku lyabaRoma chaandaano 16. Pawulu wakajuzya bakombinyina. Naakali kujuzya Febbi wakamwaamba kuti ‘muchizi  wesu.’ Mpawo wakasungwaazya maKristunyina kuti: “Amumusamausye mu-Mwami mbuli mbubeelede kusamausyanya basalali, alimwi amumugwasye mumakani oonse ali buti ngaabula kulindinywe.” Pawulu wakajuzya Priska a-Akula akwaamba kuti “teensi ndime endike ndabalumba, pele imbungano zyoonse zyabamasi.” Alubo wakajuzya bamwi bantu batakwe mpuwo kati ‘Epeneto muyandwi wangu’ kuswaanizya ‘aTrufena a-Trufosa basimilimo basungu ba-Mwami.’ Pawulu wakali kukuyanda kujuzya bakombinyina.—Rom. 16:1-16.

Kweelede aabo bakali kujuzigwa bakabotelwa nkaambo Pawulu wakali kubayeeya. Eezi zyakapa kuti bamuyande Pawulu, kuswaanizya abakombinyina! MaKristunyina bakasungwaazigwa nibakamvwa bamwi kabajuzigwa alubo zyakapa kuti babe alusyomo lusimide. Kujuzya bamwi munzila yaluyando akubalumbayizya, kupa kuti bantu babe abweenzinyina buli kabotu akuti bakkale kabajisini mubukombi.

Pawulu naakasika kuPutiyolo kaya kuRoma, bakombinyina bakumusanza bakamutambula. Pawulu naakababona kabachili kule ‘wakalumba Leza mpawo moyo wakwe wakakkala.’ (Inc. 28:13-15) Chimwi chiindi tulakonzya kujuzya bamwi kwiinda mukumwemwetela naakuti kubbabbayisya luzutu. Kuchita oobo kulakonzya kusungwaazya muntu uukataazikene.

Sikwiiya Jakkobo wakali kuyanda kubapa lulayo bakombinyina. Bamwi maKristu teebakali kuchita kabotu mubukombi nkaambo bakali kumvwanana abantu bakatali kukomba Jehova. (Jak. 4:4) Pesi atubone majwi Jakkobo ngaakasaanguna kulemba mulugwalo lwakwe:

Wakati: “Ndime Jakobo, muzike wa-Leza awa-Mwami Jesu Kristo. Ndajuzya mikowa iili ikumi aibili iimwaikide koonse koonse.” (Jak. 1:1) Kweelede kuti kwakabawubila kutambula lulayo nibakabona nzila njaakabajuzyaayo yakali kutondeezya kuti bakalijisini mukukomba Leza. Kujuzya munzila iilikabotu kupa kuti tukonzye kwaambuula nikuba makani mapati.

Nikuba kujuzya katubelesya majwi mache kweelede kutondeezya kuti tuli aluyando. Tulakonzya kuchita oobo nikuba kuti taakwe uutubona. (Mt. 22:39) Umwi muchizi kuIreland, wakasika kuNg’anda yaBwaami miswaangano kayili yaba afwiifwi kutalika. Naakali kunjila, umwi mukwesu wakamucheba akumwemwetela, mpawo wakati: “Mwapona. Ndabotelwa kumubona.” Muchizi wakakkala aansi.

Nikwakiinda mazuba, muchizi ooyu wakazoobuzya mukwesu ooyu kuti kuli penzi lyakali kumukataazya. Muchizi ooyu wakati: “Ndakalinyemede mubuzuba oobiya zyakuti ndakasileke kusika kuNg’anda yaBwaami. Nziche nzindakamvwa kumuswaangano mubuzuba oobiya pesi nsikulubi pe kujuzya kwanu. Nzimwakachita zyakapa kuti ndilimvwe kabotu. Ndalumba loko.”

Mukwesu ooyo taakwe naakazibikkila maanu pe kuti kujuzya nkwaakachita kwakagwasya. Mukwesu ooyu wakati: “Ndakabotelwa loko muchizi ooyo naakandibuzya mbukwakamugwasya kujuzya nkundakachita. Zyakapa kuti andime ndisungwaazigwe.”

Solomoni wakalemba kuti: “Aba zilyo zyako atala lyamaanzi, nkaambo uyoozijana kwamana mazuba manji.” (Muk. 11:1) Kubona mbukuyandikana kujuzya bamwi kapati bakombima, kulabasungwaazya kuswaanizya andiswe. Nkinkaako, tweelede kubona kuti kujuzya nchintu chiyandikana.